རྫོང་སར་རྩོམ་རིག སྒྲུང་ཐུང་། ༡

ཙི་གུ་དང་འོད་ལྡན།
              མྱི་གསར་བ། 
 ལོ་ཟླའི་ཙག་རླུང་དང་ཁངས་ཆར་གྱིས་གཙེས་པའི་རྙིང་ཞད་ཆེ་བའི་ལྷ་ཁང་གི་གྲུ་ཟུར་བཞི་རུ་དཔྱངས་པའི་གཡེར་དྲིལ་གྱི་ཏིང་སྒྲ་འཚམ་འཇོག་མེད་པར་སིང་སིང་དུ་གྲགས་ཀྱིན་འདུག་ལ།  ལྷ་ཁང་གི་མདའ་ཡབ་འོག་ཏུ་ཕུག་རོན་ཁྱུ་ཚོགས་ཤིག་བག་ཕེབས་ངང་གནས་ཚང་བཅས་ཡོད།  དུས་ཚོད་རིམ་གྱིས་འགྱུར་རྗེས་ད་ནི་ལྗང་མདོག་གི་ལོ་འདབ་དག་ཀྱང་སེར་པོར་གྱུར་ཏེ་སྟོན་རླུང་གིས་གང་སར་སྤུར་བཞིན་ཡོད་ཅིང་།  གནས་དེའི་གྲྭ་ཤག་དག་ནི་གསར་རྒྱུ་དེ་ཙམ་མེད་ཀྱང་སྒོ་དང་སྒེའུ་ཁུང་གི་ཚོན་མདངས་ལ་བལྟས་ན་བག་ཕེབས་ཤིང་ཡིད་དུ་འོང་བ་ཞིག་རེད།  འོན་ཀྱང་བང་ཤིང་གིས་གྲུབ་པའི་གྲྭ་ཤག་དག་གི་ཧྲག་བར་ན་ཙི་གུ་ཆེ་ཆུང་དུ་མ་ཉིན་མཚན་མེད་པར་རང་དབང་གིས་རྒྱུ་བཞིན་འདུག  

       འོད་ལྡན་ལོ་བཅོ་ལྔ་ནས་ཕ་ཡུལ་དང་རྒྱང་རིང་བའི་ནང་བསྟན་སློབ་གླིང་འདིར་ཞུགས་པ་རེད་འདུག་ལ།  ལོ་ངོ་ཞེ་གསུམ་ཟིན་པའི་དགེན་བྱང་སེམས་ཀྱི་བདག་སྐྱོང་འོག་ནས་འབྲི་ཀློག་ནས་རིམ་བཞིན་མདོ་སྔགས་རིག་གཞུང་ལ་ཐོས་བསམ་བྱེད་པའི་སྐལ་བ་ལེགས་པོ་ཤར་ཡོད།  འོད་ལྡན་ནི་མིག་ཟུང་སྒོར་ཞིང་ཤ་མདོག་དཀར་བའི་གྲྭ་ཕྲུག་སྙིང་རྗེ་ཞིག་རེད་ལ།  ཁོའི་ངོ་གདོང་ན་དམིགས་བསལ་གྱི་ཆ་ཞིག་འཚོལ་དགོས་ན།  ཤིན་ཏུ་སྟུག་པའི་རྫི་མ་ཞིག་སྣུམ་ཞག་འཁྱིལ་ལེར་མིག་ལྕིབས་ཀྱི་སྟེང་དུ་གཡུ་འབྲུག་ཆུང་ཆུང་ཞིག་ལྟར་འགྱིང་ཡོད་པ་དེ་རེད།  ཁོ་སེམས་རྒྱུད་དྲང་མོ་ཞིག་ཡིན་ནའང་པྲ་ཆལ་ཚ་ཞིང་ཀུན་སྤྱོད་རྒོད་པའི་བྱིས་པ་སྤོབས་པ་ཅན་ཞིག་ཀྱང་ཡིན།  ཆོས་གྲོགས་རྒན་གཞོན་ཚང་མས་ཁོ་ལ།  “གྲྭ་ཕྲུག་འོད་ཕྲུག”ཅེེས་འབོད་ཀྱིན་འདུག  

       ཁོས་མཚན་མོ་དག་ལ“དཀོན་མཆོག་རྗེས་དྲན”བློར་འཛིན་དགོས་ཀྱིན་ཡོད་ལ།  བློར་ཟིན་རྗེས།  དགེན་བྱང་སེམས་ལ་རྒྱུག་སྤྲོད་བྱེད་དགོས།  མཚན་མོ་དེའི་དུས་ཚོད་དགུ་ཕྱེད་ཙམ་ཟིན་རྗེས། 

        འོད་ཕྲུག་གིས“དགེན།  བློར་བླངས་ཟིན།”བྱང་སེམས་ཀྱིས “ཡ་་་ སྒྲ་དག་སྒྲོས་གཙང་གིས་སྒོ་ནས་ཐོན་ཨ།”འོད་ཕྲུག  དགེན་གྱི་སྔོན་ནས་ཡར་ལངས་དེ་ཀུ་ཤུ་ཞིག་ལག་ཏུ་སྒྲིལ་ཞོར“ཐེག་པ་ཆེན་པོའི་དགེ་འདུན་ནི།  ལེགས་པར་ཞུགས་པ། འུན་་་་་  རིག་པར་ཞུགས་པ། འུན་་་་་་ དྲང་པོར་ཞུགས་པ།  མཐུན་པར་ཞུགས་པ། འུན་་་་  ཐལ་མོ་སྦྱར་བའི་འོས་སུ་་་་་་” ཞེས་ཚིག་རྔ་བཅད་དེ།  ལག་གི་ཀུ་ཤུ་དེ་དཔེ་ཁྲིའི་ཟུར་འགྲམ་ཞིག་ཏུ་ཤུགས་ཀྱིས་འཕངས་སོང་།  ཁྲོག་་་ཅེས་གྲགས་པ་དང་ལྷན་དུ།  དེའི་འདོམ་གང་ཙམ་གྱི་སྔོན་དུ་སྣུམ་ཤིག་ཤིག་གི་ཙི་གུ་ཞིག་དཔེ་ཆ་དག་གི་ཧྲག་བར་ནས་ལྡེམ་མྱུར་ངང་བང་ཁང་གི་བར་གསེང་ཞིག་ཏུ་འཛུལ་སོང་།  དེ་ནི་རྫ་བར་དུ་རང་དབང་གིས་རྒྱུ་བའི་རི་དྭགས་ཤིག་གིས་གློ་བུར་བའི་མེ་མདས་སྒྲ་ཐོས་པ་དང་གཉིས་སུ་མེད།  

       སྐབས་དེར།  དགེན་བྱང་སེམས་ཐུག་ཁྲོ་བའི་ཉམས་དང་བཅས།  འོད་ཕྲུག་ལ་ཅེར་ནས།  “ཅི་རེད།  སྨྱོ་ལེ་རེད་དམ།  ཙི་གུ་གསོད་པའི་གྲྭ་བ་ཞིག་ཡོད་དམ།  གྲྭ་བས་སྲོག་གཅོད་དང་གཞན་ལ་འཚེ་བ་སྤངས་དགོས་པ་མིན་ནམ།  བློར་འདོན་བཞིན་དུ་སེམས་པ་རྣལ་དུ་མི་གནས་ནས་་་་་”ཞེས་སོགས་སྐར་མ་བཅོ་ལྔ་ཙམ་ལ་བཀའ་བཀྱོན་གནང་སོང་།  འོད་ཕྲུག་གི་སེམས་སུ།  ཟླ་གཅིག་གི་སྔོན་ལ་ཕ་ལགས་ཀྱིས་ཉོས་དེ་བསྐུར་བའི་གཟན་ཤམ་གསར་བ་དེར་ཁུང་བུ་མང་པོ་ཕུད་མཁན་དང་།  སྔོན་མའི་དབྱར་འཚམས་སྐབས་ཀྱི་རང་གི་ཆེས་འདང་ཆེ་བའི་རྩེ་སྤྱད་དག་ལ་སོ་རྨུག་མང་པོ་བྱེད་མཁན་དེ་དོ་ནུབ་མཐོང་བའི་ཙི་གུ་དེ་ཡིན་ངེས་བསམ་ཡང་།  མགོ་བོ་སྨད་ནས་འདུག་པ་ལས་ཅི་ཡང་ལབ་མ་ཕོད།  ཅུང་ཙམ་ནས་་་“ཐལ་མོ་སྦྱར་བའི་འོས་སུ་གྱུར་པ།   ཕྱག་བྱ་བའི་འོས་སུ་གྱུར་པ། བསོད་ནམས་ཀྱི་དཔལ་གྱི་ཞིང་།”ཞེས་མུ་ནས་བློར་བཏོན།

       དགེན་གྱིས་བཀའ་བཀྱོན་ནམ་བཀའ་སློབ་ལ་གནས་ལུགས་མེད་པ་མིན་ཡང་འོད་ལྡན་གྱིས་ཀླད་པས"གནས་ལུགས་ཨང་དང་པོར་མི་བརྩི་བར་ཚོར་བ་ཨང་པོར་བརྩི་བཞིན་ཡོད་པས"ཉིན་འགའི་རྗེས་ནས་དགེན་གྱིས་གསུང་བའི་སྐད་ཆ་དག་ཡེ་ནས་བརྗེད་ཟིན།  

       ད་ནི་ཙི་གུས་དཔུང་ཚོགས་ཁྲིད་ནས་དགྲ་ཤ་ལེན་པ་འདྲ་སྟེ།  མཚན་མོ་དག་ལ་ཆུང་ཞིང་གུ་དོག་པའི་གྲྭ་ཤག་གི་གནམ་གཅལ་སྟེང་ནས་ཙི་གུ་འགའ་སྡུར་སྒྲ་དང་བཅས་ཡར་རྒྱུག་མར་རྒྱུག་བྱས་ཏེ་དགེ་སློབ་གཉིས་གཉིད་ལས་ཐེངས་མང་དཀྲོག་བཞིན་ཡོད།  སྔ་དྲོ་དག་ལ།  ཧ་ཅང་ཀྱང་ཆུང་བའི་ཇ་ཁང་ནང་གི་སྡེར་མ་དང་རྩམ་སྒམ་སོགས་ཀྱི་སྟེང་དུ་ཙིག་སྐྱག་ནག་ཐར་རེ་བཏང་འདུག་ཅིང་།  ཤིན་ཏུ་ཁ་བའི་དྲི་ཞིག་ཀྱང་ཚོར་ཐུབ་པས་ཁོ་ཚོས་གཅིན་རྩེད་བྱས་ཡོད་པ་ཐག་ཆོད་རེད།  འོད་ཕྲུག་ཞེ་གཏིང་ནས་ཙི་གུས་སྟེང་ལ་སྤོ་ལང་བ་སྨྲ་མི་དགོས་མོད། ཅུང་ཙམ་ལྷོད་ལ་ཕབས་ནས“དགེན་་་འུ་གཉིས་ཀྱིས་ཙིག་སྒམ་ཞིག་ཉོས་དེ་བཞག་ན་དགའ་འམ་་་”ཞེས་དྲིས་མོད།  དགེན་བྱང་སེམས་ཤིན་ཏུ་བག་ལྷོད་ངང་ཅི་ཡང་མི་སྨྲ་བར་ཁ་ཏོན་གསུང་བཞིན་བཞུགས་འདུག  འོན་ལྡན་གྱིས་སླར་ཡང་། “ཡང་ན་ཙིག་ཁུང་གི་སྒོ་གཏན་ཨེ་ཐུབ་བལྟས་ན་་་་”ཞེས་དྲིས།  དགེན་བྱང་སེམས་ཀྱིས་འོད་ལྡན་ལ་ཕུར་ཚུགས་སུ་བལྟས་ཏེ།  “ཙིག་ཁུང་གི་སྒོ་གཏན་ཨེ་ཐུབ་བལྟས་པ་ལས་ཁོང་ཁྲོའི་སྒོ་གཏན་ཨེ་ཐུབ་བལྟས་ན་བཟང་རེད”ཞེས་ལན་བཏབས།  ད་ནི་འོན་ལྡན་ཅི་བྱ་གཏོལ་བྲལ་གྱུར་ཏེ་ཙི་གུ་དང་ལྷན་དུ་འཚོ་བ་མི་རོལ་ཀ་མེད་བྱུང་བ་འདྲ།

       ལོ་ཟླ་ཡུན་རིང་འགོར་སོང་།  ཙི་གུས་སྔར་བཞིན་ཐུབ་ཚོད་ཀྱིས་ཚུར་ལ་གནོད་འཚེ་གཏོང་བཞིན་འདུག་ལ།  འོད་ཕྲུག་གིས་ཀྱང་སྔར་བཞིན་འཁོན་སེམས་དང་བཅས་དགེན་བྱང་སེམས་ཀྱིས་མི་མཐོང་ས་ནས་ཙི་གུ་དག་ལ་སྒོལ་ལན་སྤྲད་བཞིན་ཡོད།  འདི་ནི་འཛམ་གླིང་དམག་འཁྲུག་ཅིག་ལ་དཔེ་འཇོག་མི་འོས་ཀྱང་།  མཐུན་པ་མེད་པའི་གཟའ་ཟླ་གཉིས་ཀྱི་ལོ་ཟླའི་ཁ་འཛིང་དང་ཁུར་འཛིང་ལ་དཔེ་འཇོག་བྱས་ཀྱང་ཆོག་ངེས་ཡིན།  ཡ་མཚན་པ་ཞིག་ལ་ཙིག་གུས་བསམ་གཟས་དེ་འོད་ལྡན་གྱི་གོས་སོགས་ཅ་ལག་དག་ལ་གནོད་འཚེ་གཏོང་བ་ལས།  དགེན་བྱང་སེམས་ཀྱི་གོས་སོགས་ལ་དེ་ཙམ་གནོད་འཚེ་གཏོང་བཞིན་མེད་པ་འདྲ།  

       དགོང་མོ་ཞིག་ལ།  འོད་ལྡན་གྱིས“དགེན་་་ཙིག་གུས་ངའི་དཔེ་ཆ་དག་གཏོར་ཞིང་གཏེད་ཀྱིན་འདུག  ད་དུང་།  རྔུལ་གཟན་གྱི་སྣེ་མོ་ལ་སོ་རྨུགས་མང་པོ་བྱས་འདུག”ཅེས་ལབ།  དགེན་བྱང་སེམས་ཀྱིས“ཁྱོས་ངའི་མི་མཐོང་ས་ནས་ཙིག་གུ་དག་གི་སྲོག་ལ་ཡང་གནོད་འཚེ་གཏོང་བཞིན་ཡོད་ན།  ཁོ་ཚོས་ཁྱོའི་དཔེ་འགའ་གཏེད་ན་ཅི་རེད་་་་”ཅེས་ཅུང་ཙམ་ཁྲོ་ཉམས་དང་བཅས་གསུང་།  འོད་ལྡན་གྱིས“ངས་ཙིག་གུ་བསད་མེད”ཅེས་ལབ་མོད།  སྐད་གདང་ལ་འདར་སྐད་ཅིག་ངང་གིས་འདྲེས་འདུག  དགེན་བྱང་སེམས་ཀྱིས“ངས་ཤེས་་་ ཁར་ཉིན་དཔལ་འབྱོར་ཁྱེད་གཉིས་ཀྱིས་ཅི་སྒྲུབ་ཚང་མ་ངས་གསལ་པོ་ཤེས་ཡོད།  མ་ཟད།  དེའི་སྔོན་ལའང་ངས་ཅོག་ཙེའི་ཞབ་ནས་ཙིག་གུ་ཞིག་གི་རྔ་ཤུན་ཁྲག་དང་བཅས་པ་ཞིག་དངོས་སུ་མཐོང་སོང་།  ངས་ཁྱོད་དཔེ་ཆ་བ་ཆོས་པ་ཞིག་གིས་རང་ཤུགས་ངང་དེ་འདྲའི་གནས་ཚུལ་སྡུག་པོ་དག་འགྱུར་བ་གཏོང་ཨེ་མི་འོང་སྙམ་ནས་མ་གོ་ཁུལ་བྱས་པ་ཡིན་་་་་་་”ཞེས་ཞལ་ཕར་ལ་འཁོར་སོང་།  འོད་ལྡན་གྱིས་སེམས་ལ། ཨ་ཡ་་་་་་་དཔེ་ཆ་གཏེད་པའི་གནས་ཚུལ་ཆུང་ཆུང་འདི་ངས་ཅིས་ཕྱིར་དགེན་ལ་ཞུ་རྒྱུ་དྲན་སོང་སྙམ་ནས་འགྱོད་པ་དྲག་ཏུ་སྐྱེས། 

       དེ་ནས་བཟུང་འོད་ལྡན་གྱིས་ཙི་གུས་གནོད་འཚེ་ལ་བཟོད་སྒོམ་བྱ་ཅི་ཐུབ་བྱེད་ཀྱིན་འདུག་ལ།  ཙི་གུ་དག་གིས་འོད་ལྡན་གྱིས་མཐོང་ས་ནས་ཤོག་ཧྲིལ་དག་ཕར་ཁུར་ཚུར་སྐྱེལ་བྱས་ཀྱང་མ་གོ་ཁུལ་གྱིས་གུ་ཡངས་ངང་བཏང་སྙོམ་དུ་འཇོག་བཞིན་འདུག  མ་ཟད།  སྐབས་རེར་འོད་ལྡན་གྱིས་ཆེད་དུ་ཙིག་ཁུང་དག་གི་སྒོ་འགྲམ་དུ་ཟས་རིགས་སོགས་ཀྱང་གཏོར་བཞིན་འདུག  དེས་རྐྱེན་གྱིས་ཡིན་ནམ་ཅི་ཆ་སྟེ།  རིམ་གྱིས་ཙིག་གུས་ཀྱང་འོད་ལྡན་གྱི་ཟས་གོས་དག་ལ་གནོད་འཚེ་གཏོང་བཞིན་མི་འདུག་ལ།  ཤིན་ཏུ་ཆུང་བའི་གྲྭ་ཤག་གི་ནང་དུ་ཡང་ནག་ཐར་རེ་གཏོར་བའི་ཙིག་སྐྱག་དང་ཤིན་ཏུ་ཁ་བའི་དྲི་ངད་དེ་དག་ཀྱང་ཇེ་ཉུང་རེད་་་་་་་་                   ༢༠༢༣ ༦ ༡༨ཉིན་གྲུབ།                    
                                         རྩོམ་སྒྲིག་པ། མྱི་གསར་བ།

	མཐོང་གྲོལ།
邮箱：tongdrol@163.com

Signature is customized by Netease