རྫོང་སར་རྩོམ་རིག རང་མོས་སྙན་ངག ༥
རྫོང་སར་རྩོམ་པ་པོ་མཐུན་ཚོགས།
རྫོང་སར་རྩོམ་རིག རང་མོས་སྙན་ངག ༥
རི་སྤྱང་། རབ་རྡོར། གྱམ་སྙིང་ལྕགས། བྱང་དུར་འདྲེ། བཞད་དཀར།
ཕུང་གསུམ་པ། སྲོད། གཟི་ནག་པོ། ཁམས་པ་རག་སྨྱོན། རྒོད།
སྨིན་ཚངས་སྲས། རྣལ། གངས་འོད། ཁྲག་གདོང་། མྱི་གསར་བ།
གངས་རི་མཇལ་བ།
སྲོད། ཕར་ཕྱིན་བར་པ།
མི་སེམས་ལ་གངས་རི་འཁྲུངས་པར་ཤོག
དད་པའི་སྤུ་ལོང་གཡོ་བར་ཤོག
ཚེ་རབས་མེ་ལོང་ལས་གཙང་བར་ཤོག
རྗེ་ཡི་དབྱངས་ཅན་བསྟོད་གླུ
རྗེ་ཡི་རྟེན་འབྲེལ་བསྟོད་པ
སྐོམ་པ་ཆུ་འདོད་ལྟར་འབར་བར་ཤོག
དབུས་ཀྱི་ཆོས་གྲྭ་དྲན་བྱུང
མ་ཡུམ་གྱི་གདུང་ཤུགས་དྲན་བྱུང
འབྲོག་དགོན་པ་མཇལ་འདོད་བྱུང་ཡོད
རྗེ་ཡི་དཀའ་ཐུབ་དྲག་པོས་ས་གསུམ་བསྒུལ་བྱུང
དུས་མཐའི་མེ་འོབས་འདི་ནས
ང་ནི་ཁྱེད་ལ་འཁོར་བའི་ལས་མཐའི་ཨ་སྐྱོ་ལས་མིན་མོད
དམིགས་བརྩེ་མས་ཅི་ཡང་སྲུང་ཡོད
མི་ལོ་དྲུག་བརྒྱ་ནི་ཚད་ཐིག་ཆུང་ངུས་གཞལ་བར་ག་ལ་ནུས
ལྟ་སྒོམ་སྤྱོད་པའི་བདེ་གཤེགས་ཀྱི་རྣམ་ཐར
བསྐལ་པའི་ཉི་ཆེན་ལ་དྲངས་སོ
༢༠༢༣.༡.༡.རང་ཁྱིམ།
༢༠༢༣.༡.༡.རང་ཁྱིམ།
ང་ཡི་མེ་ལོང་།
རི་སྤྱང་། ཕར་ཕྱིན་བར་བ།
ངའི་སེམས་པ་ཕྱི་གསལ་ནང་གསལ་གྱི་མེ་ལོང་ཞིག་སྟེ།
ཕྱི་ཐག་རིང་བའི་གྲོགས་པོ་འཛུམ་མདངས་དང་བཅས་ཕེབས་བྱུང་།
ལག་ཏུ་བཟུང་བའི་ཁུག་མའི་ནང་དུ།
ལོ་ངོ་བརྒྱ་ཡི་བདག་གི་སྐྱོ་གདུང་ཁུར་ནས་འགྲོ་བཞིན་འདུག
དོན་དངོས་ཡིན་ལ།
འཁྲུལ་སྣང་ཡིན་པའི་མེ་ལོང་ནང་ནས།
གྲོགས་པོ་འཆར་བྱུང་ མ་ཟད་ཐག་རིང་ཐག་རིང་ཞིག་ཏུ་ང་རང་ཁྲིད་སོང་།
སོང་སོང་བའི་མཐའ་མར རྨི་ལམ་གྱི་སྣེ་མོ་མདུད་ལོག་ཐེབས།
དམ་ཚིག་དམར་པོ་ཞིག་གིས་རྒྱ་བཏབས།
ད་སྐབས།
དོན་སྙིང་ཡོད་ལ་དོན་སྙིང་མེད་པའི་ཁ་པར་ལ།
ཡང་ཡང་བལྟ་དགོས་པ་ནང་བཞིན།
གྲོགས་པོ་ལ་ཡང་དེ་ལྟར་རོ། །
ཁེར་རྐྱང་གིས་བཙིར་བའི་བདག་གི་སེམས་ངོར་ལྷུང་བའི་འཇིག་རྟེན་གྱི་འགྲེལ
བྱང་དུར་འདྲེ། མངོན་པ་གོང་མ།
མི་རྣམས་ཤིན་ཏུ་སྤྲོ་བའི་ལྟས་ནི
རྐྱེན་གྱིས་བསྒྱུར་བའི་སྨིག་རྒྱུ་ཞིག་ཏུ་སྣང
ཁོག་མེད་པའི་འཇའ་ཚོན་ལ་དཔེ་འཇོག
དུས་ཚོད་ཀྱི་རྗེས་སུ་ཤུལ་མེད་པར་བཞུད་འགྲོ
ནང་སེམས་ཀྱི་བདེན་པ་ནི
རྟག་བརྟེན་ཐེག་ཟུག་གི་ཁེར་རྐྱང་ཡིན
ཉེ་འགྲམ་གྱི་མི་ཚོགས་དག་ཀྱང
བསྒོ་སྐལ་གྱི་ཆེད་ལྟར
རང་དོན་འགྲུབ་རྗེས་ཕྱི་ལྟས་མེད་པར་བཞུད་འགྲོ
ནང་སེམས་ཀྱི་བདེན་པ་ནི
རྟག་བརྟེན་ཐེག་ཟུག་གི་ཁེར་རྐྱང་ཡིན
མཐའ་ཡས་པའི་འཇིག་རྟེན་འདི་ཡང
མི་དགེ་བས་བདག་གིར་བཟུང་བའི་འདུ་འགོད་ཞིག་ཏུ་སྣང
སྐྱོ་སྣང་གི་ན་བུན་འཁྱིལ་བའི་སྒེའུ་ཁུང་ལ་དཔེ་འཇོག
སྒེའུ་ཁུང་ནང་གི་ཉི་འོད་དེ
བུམ་ནང་གི་ནམ་མཁའ་ཙམ་ལས་མེད
ནང་སེམས་ཀྱི་བདེན་པ་ནི
རྟག་བརྟེན་ཐེག་ཟུག་གི་ཁེར་རྐྱང་ཡིན
2022 _8_30
ལོ་ཟླ་འདིའི་རྗེས་སུ།
ཁྲག་གདོང་། ཕར་ཕྱིར་བར་མ།
དྲན་ཆོག་པའི་དུས་ཚོད་དེའི་རྗེས་སུ
གླེང་འདོད་པའི་ཁ་ཕྱོགས་དེའི་རྗེས་སུ
བསམ་ཕོད་པའི་རེ་བ་དེའི་རྗེས་སུ
ད་དུང་ཤུལ་དུ་ལུས་པའི་ལོ་ཟླ་འདིའི་རྗེས་སུ
རྨི་ལམ་ཡོད་ཚད་མངོན་དུ་འགྱུར་བར་སྨོན་ལམ་འདེབས
ཤོར་སོང་བའི་ལོ་ཟླ་གང་མང་གི་རྗེས་སུ
འཁོར་མ་ཐུབ་པའི་སྣང་བ་མག་མོག་དེའི་རྗེས་སུ
འབོད་མ་ཕོད་པའི་སྐྱོ་ངག་ག་ཚད་དེའི་རྗེས་སུ
ད་དུང་ཤུལ་དུ་ལུས་པའི་ལོ་ཟླ་འདིའི་རྗེས་སུ
བག་ཕེབས་ཀྱི་འཚོ་བ་རོལ་ཐུབ་པའི་ཡིད་སྨོན་ངག་ཏུ་བླངས
མཐོང་ལ་མ་མཐོང་བའི་མཛེས་པ་དེའི་རྗེས་སུ
ཐོས་ལ་མ་ཐོས་པའི་སྙན་དབྱངས་དེའི་རྗེས་སུ
དྲན་ལ་མ་དྲན་པའི་དགའ་ཕྱོགས་དེའི་རྗེས་སུ
ད་དུང་ཤུལ་དུ་ལུས་པའི་ལོ་ཟླ་འདིའི་རྗེས་སུ
སེམས་ཀྱི་རེ་འདུན་བདེ་བླག་ཏུ་འགྲུབ་པའི་རེ་སྨོན་འཆང
༢༠༢༢ ༡༢ ༣༡
འཕྲུལ་མི།
སྟོན་ཁ་རྫོགས་སོང་།
འཕྲུལ་མི།
ཁམས་པ་རག་སྨྱོན། ཚད་མ་འོག་མ།
མི་སྐད་སྨྲས་ཀྱང་མི་ཡི་འདུ་ཤེས་མེད་པ
མི་ལ་ལད་མོ་བྱས་རུང་བྱམས་བརྩེ་མེད་པ
མི་ལ་ཞབས་ཞུ་ནུས་ཀྱང་ལྷག་བསམ་མེད་པ
མི་ཚོགས་སུ་ཞུགས་ཀྱང་མི་ཡི་འགན་འཁྲི་མེད་པ
འཕྲུལ་མི འཕྲུལ་མི འཕྲུལ་ཆས་ཀྱི་མི
ཇི་ཙམ་ཇི་ཙམ་འདྲིས་རུང་འདྲིས་རྒྱུ་མེད་པ
འདྲིས་རྒྱུ་མེད་པས་བརྩེ་དུང་གི་འདུ་ཤེས་ཀྱང་མེད་པ
ཐུག་འཕྲད་བྱུང་ཡང་འཛུམ་མདངས་མེད་པ
བདེན་པར་སྨྲ་ཡང་ཤེས་རབ་མེད་པ
ལག་ཟུང་ཡོད་ཀྱང་རྩ་རྒྱུས་མེད་པ
འཇུག་ལྡོག་ཤེས་ཀྱང་སྲོག་དབང་མེད་པ
འཕྲུལ་མི འཕྲུལ་མི འཕྲུལ་ཆས་ཀྱི་མི
ཇི་ཙམ་ཇི་ཙམ་འདྲིས་རུང་འདྲིས་རྒྱུ་མེད་པ
འདྲིས་རྒྱུ་མེད་པས་བརྩེ་དུང་གི་འདུ་ཤེས་ཀྱང་མེད་པ
རེད མེད་འགྲོ་ས་དེ་འཕྲུལ་མི་རེད
ཕྱི་ཐག་དང་བསམ་ཤེས་ཀྱང་མེད
ཨོ་ད་དུང་འཕྲུལ་མི་ལྟ་བའི་འགའ་རེ་ཡང་ཡོད
འོན་ཀྱང་དེ་དག་ང་ཡི་གམ་དང་ཟུར་ན་མེད
སད་ན་རན།
སྙིང་ཉེ།
གཟི་ནག་པོ། ཕར་ཕྱིན་བར་པ།
གཡོ་ཟོལ་གྱི་ངར་ཤུགས་དེ
ལྷག་ཏུ་སེམས་སུ་འཚེར
མཐོང་མ་ཐག་པའི་ལུས་ཀྱི་འགྱུ་བ
དྲན་གདུང་གི་རྨ་ཁ་ལས་ནམ་ཡང་འཛར་གྱིན་པའི་རྣག
བཀོད་པ་སྣ་ཚོགས་ཀྱིས་གཡོལ་ཐབས་བྱས
གང་ལྟར་སེམས་སུ་ལྷག་ཏུ་འཚེར
མཐའ་དག་ལས་བཀོད་ཡིན་ཙང
འཚམས་འཚམས་སུ
ངའི་སྣང་ཚུལ་ལ་ཁྱོད་ཇག་པ་ཞིག་ཏུ་འཁྲུལ་གྱི་འདུག
འཐབ་འཛིང་སྣ་ཚོགས་ཀྱི་དུས་སུ
རྟག་ཏུ་བདག་ནི་ཁྱོད་ཀྱི་འུ་ལག་ཏུ་གྱུར་འགྲོ
སྙིང་ཉེ
ལོ་ཟླའི་འགྲུལ་བཞུད་ལ
ཕྱིར་འཐེན་གྱི་བཟོ་བཀོད་ཡོད་ཚེ
ང་ཡང་སྐྱར་ཁྱོད་ཀྱི་ཉེ་ལོག་ཏུ་འགྲེང་འདོད
སྙིང་ཉེ
ཡང་སྐྱར་ཁྱོད་ཀྱི་ཉེ་ལོག་ཏུ་སླེབས་ཚེ
ནང་སྙིང་གི་རྩ་ཡི་སྦུབས་ནས་ཐོན་པའི
ཚིག་འགའ་ཞིག་གིས་ཁྱོད་ལ་བྱ་ར་བྱེད་འདོད།
སད་ན་རན།
རྒོད། ཤེར་ཕྱིན་འོག་མ།
སྐྱོ་ཡུས་ཀྱི་གྱང་ཐེད་གཏོར།
སྨྲེང་བའི་ཀུ་ཅོ་མི་སྒྲོག
ལན་གཅིག་གི་མྱུ་གུ་ཕྲ་མོ།
བ་མོ་དང་ལྷགས་རླུང་ལ་གཏང་དོན་མེད།
མི་ཁའི་མུན་ལམ་ནས་སངས་ལ་རན།
ཐན་དུ་ལྟ་བའི་མིག་ལམ་ནས་སད་ན་རན།
མི་གཤིས་ཀྱི་གཉུག་མ་བོར་ཞིང་།
ཁྲེལ་གཞུང་མེད་པའི་སྤྱི་ཚོགས་ནས།
གང་ལ་ལྕེ་བསྣར་གྱིན་མགོ་བོ་བསྒུར།
སུ་ཞིག་གཉའ་ནས་གནོན་གྱིན་དཔུང་བ་འཁུར།
ཁེངས་དྲེགས་ཀྱི་ངར་ཁ་ཞི་ལ་རན།
རང་རློམ་གྱི་རས་ནག་དོར་ལ་རན།
རེ་འབྲས་ལ་སྒུག་པ་བསྐྱུར།
རང་མདུན་གྱི་འཕྲང་ལམ་བརྒལ།
སྒེའུ་ཁུང་ཀློང་གི་ཉི་འོད་བཞིན།
རང་གིས་རང་ཉིད་གསལ་དགོས།
ཕྱི་ཆད་ཀྱི་འཐེན་ཐག་ཆོད་ལ་རན།
མདུན་བསྙེག་གི་སྙིང་ཁོང་ཆེ་ལ་རན།
ཐོག་མའི་སྨོན་ལམ།
རྣལ།
སྐྱེ་འཆིའི་འཕོ་འགྱུར་ལ་འགོག་ཐབས་མེད་མོད།
དགའ་སྡུག་རེ་རེ་ཁྱོད་ཀྱི་བགོ་སྐལ་ལ་དབང་བས།
བསོད་ནམས་ཀྱི་འཛུམ་དཀར་བག་ལ་མི་ཞ་བར་སྨོན།
ཕུགས་བསམ་དང་དྲན་གདུང་ན་ཟུག་གིས་མནར་ན་ཡང་།
མི་ཚེའི་སྐར་ཕྲན་རེ་རེ་ཁྱོད་ལ་བློ་དཀར་བས།
ནག་འཐོམ་འཐོམ་གྱི་སྤྲིན་ནག་མི་འཁྲིག་པར་སྨོན།
བརྩེ་བའི་འཇའ་སྤྲིན་ལ་རྟག་བརྟན་མེད་པ་ཤེས་མོད།
རང་གི་འཇིག་རྟེན་ཧྲིལ་བོ་ཁྱོད་ལ་དྲིན་དུ་ཆད་པས།
འགྱུར་ཆེ་བའི་མི་རྟག་པ་ལོ་འདིར་མེད་པར་སྨོན།
སྟོང་ལྷང་ལྷང་གི་ནམ་མཁའ་ཡངས་ཤིང་ཆེ་ནའང་།
རླབས་ཆེ་བའི་དགའ་ཕྱོགས་ཤོང་དཀའ་འདུག་པས།
དེ་བས་དབྱངས་གསལ་གྱི་གཤོག་པ་ཆེ་རུ་བརྐྱང་བར་སྨོན།
ངེས་འབྱུང་སྤུ་སུད་མས་སྐྱོ་ཡུས་དྲངས་མོད།
རྒྱུ་སྐར་འདྲ་བའི་འཇིག་རྟེན་ལ་ཞེན་ཆེ་འདུག་པས།
མགོན་པོའི་གསུངས་དབྱངས་ལ་ཉི་ནུབ་མེད་པར་སྨོན།
༢༠༢༣ ༡ ༡
འོད་ཀྱི་བརླན་པའི་སེམས
གྱམ་སྙིང་ལྕགས། ཚད་མ་འོག་མ།
འོད་ཀྱི་བརླན་པའི་སེམས
གྱམ་སྙིང་ལྕགས། ཚད་མ་འོག་མ།
སྔོན་མདོག་གི་དབྱར་གཞུང
བསིལ་རླུང་དལ་བུ་ལྡང་བའི་དགུ་ཚིགས་རེར
ངས་བསམ་ཕྱོགས་ལྟར
རོལ་དབྱངས་དང་སྦྲང་ཆར་གཞི་གཅིག་ཏུ་འདྲིས
ང་ལ་འདི་ལྟ་བུའི་དུས་ཚིགས་རེ་རེས
འཁྲུལ་སྣང་གི་བཀག་རྒྱ་དབེན་པའི་སེམས་ཁམས་ཤིག་འཚོལ་དུ་བཅུག
ད་དུང
སྒེའུ་ཁུང་ཕྱིར་རོལ་གྱི་ཟླ་འོད་དང་མེ་ལྕེབས་ཚོགས་ཀྱིའི
ཡང་བསྐྱར་ངའི་འཚོ་བ་ལ་སྤྲོ་གར་གཞན་ཞིག་ཁྱེར་ཡོང
ཞོགས་པ་འདི
མིག་འབེན་གྱི་ཀྱ་ཀྱོག་ཆེ་བའི་ལྕགས་ལམ་ལ་ལྟ་དུས
ཉི་འོད་ནི་ངེད་གཉིས་ཀྱི་གདོང་ལ་ཕོག་ཟིན
ཕུགས་བསམ་དང་རེ་འདུན་གྱི་ཁེངས་པའི་ནང་སེམས་འདི་ལ
ཞི་འཇགས་དང་སོས་དལ་གྱི་རླུང་བུ་ཡང་དལ་བུ་ལྡང་ཙམ་གནང
ཞི་འཇགས་ཀྱི་རླུང་བུ་འདི
མི་ཚེ་རིང་མོ་འདི་ཡི་བདེ་སྐྱིད་ཀྱི་ཟུར་ཅིག་ཡིན་པ་བཤད་ན་ཆོག
2022/11/9
ཡར་འབྲོག་གཡུ་མཚོ།
ང་རང་ཁྱེད་ཀྱི་མདུན་ནས་རྒྱང་དུ་བཞུད་ཟིན་
ངས་ཡང་དུ་ཁྱོད་ཀྱི་བཞུར་རྒྱུན་མིག་གིས་འཚོ་ན་འདོད
འགྲུལ་བཞུད་ཀྱི་བར་གསེང བར་གསེང་ཀྱི་ཡར་འབྲོག
འབབ་ཚུགས་གྲངས་མེད་ཅིག་གི་ཁྲོད་དུ
ངས་ག་ལེར་ཁྱོད་ཀྱི་མཛེས་པ་རོ་མྱོང་བྱས
མཚམས་མཚམས་སུ་ས་སྲོད་མཚོན་བྱེད་ཀྱི་ཁྱོད་རང་སྙིང་དུ་སྡུག་ཨང
ས་སྲོད་ལྟར་ཁྱེད་རང་ག་ལེར་སེམས་སུ་ཐིམ་པས
ངའི་ཡིད་ཀྱི་མཚན་མོ་དང་རྨི་ལམ་འོད་དུ་འཚེར
༢༠༢༢•༦-༤ཉིན་ཀོང་པོ་འགྲོ་བའི་ལམ་བར་ནས།
སྟོན་མཇུག་གི་མཚན་མོ་ཞིག་ལ།
སྟོན་མཇུག་གི་མཚན་མོ་ཞིག་ལ།
བཞད་དཀར། ཕར་ཕྱིན་གོང་མ།
ང་ཡི་འབུ་མེ་ལྕེབས
རླུང་ནང་གི་མར་མེའི་བར་ན་ཞ་བའི་གཤོག་པ་ཞིག
གྲིབ་གཟུགས་ཀྱི་དཀྱིལ་ལ་བྲིས་པའི་རི་མོ་ཞིག
འགུལ་གྱིན་འགུལ་གྱིན
མུན་ནག་གི་བར་སྣང་ན་སྟོང་འཕུར་བྱེད་པའི་རྣམ་ཤེས་ཤིག་ཆགས
ཁོ་བོའི་མིག་ནང་འདི
ཆར་ཐིག་ཅིག་ཡིན་ན་དལ་གྱིས
ཁྱོད་ཀྱི་གདོང་ལ་འོད་ལྟར་འཚེར་ནས
ཡང་ན་ཁྱོད་ཀྱི་སེམས་ལ་བག་མ་ལྟར་བླངས་ནས
མྱུ་གུའི་རྩེ་ལ་རི་མོའི་ཐིག་སྒྲ་སྔོན་དུ་ལྷུང་ན
ང་རང་ཤོག་ལེབ་ཅིག་ཏུ་འགྱུར་རམ
ཡིན་ན་ཡང བར་སྣང་འདི་ནས
སེམས་ལ་རྣ་བ་མེད་ཀྱང
གཤོག་པ་ཐོགས་པའི་འཕུར་ཆགས་ཤིག་ཡོད་འདུག
དྲན་འཁྲུལ་གྱི་ཕ་རོལ
དྲན་འཁྲུལ་གྱི་ཕ་རོལ
གངས་འོད།
འོད་སྣང་མི་མཐོང་བའི་ལོ་ཟླའི་འདབ་ཁ་རུ
འཇིག་རྟེན་འཇིག་རྟེན་དུ་གྲུབ་པ་ནས
ངས་སེམས་ཀྱི་གསང་གཏམ་དག་རང་གཅིག་པུ་ལ་གྱེར་དགོས་བྱུང
ཆོས་ཉིད་ཀྱི་བར་ཐག་ཇི་ཙམ་རིང་ཡང
ནང་སེམས་སུ་བར་མེད་དུ་རྡོལ་བ་ནི
ངས་བོས་མྱངས་བའི་གཅེས་མིང་དེ་ཁོ་ན་རེད
མུ་མེད་པའི་ས་སྟོང་དེ་གར
མེ་ཏོག་དེའི་འདབ་མ་ཆེས་ཆེར་སྐྱེས་ཀྱང
ཁེར་རྐྱང་དུ་ལུས་པའི་གནར་གཅོད་ལ
ནམ་ཡང་སྣང་བ་ཡལ་ཐབས་མི་འདུག
ལན་རེར་སྦག་བཙོག་གི་ཟིན་པའི་མཛའ་འཕྲིན་མཐོང་ཐེངས་རེར
ཤུགས་ཆེན་པོས་སེམས་སོང་གི་མིང་དེ་ལན་མང་བོས་ཀྱང
སྨྲ་བརྗོད་ལས་འདས་པའི་མིག་ཆུའི་སྐྱོ་སྣང་ལ
སུས་ཀྱང་ཨ་ལན་སྟེར་ཐབས་མ་བྱུང
དུས་ཚོད་བཅུ་གཉིས་ཀྱི་སྟེང་དུ
ཐང་ཆད་པའི་རོལ་དབྱངས་ལན་མང་གཏོང་སྟེ
ད་ནི་སུ་ཡང་དྲན་མི་སྲིད་པའི་ཟོལ་གྱིས
རེ་ཞིག་བདེ་མོ་འཇོག་དགོས་བྱུང
2023/1/3 ཕ་ཡུལ།
སྟོན་ཁ་རྫོགས་སོང་།
སྨིན་ཚངས་སྲས། དབུ་མ་གོང་མ།
ཕར་གྱི་ཆུ་བོ་བཞུར་སྒྲ་དེ་སྔར་ལས་ད་རེ་ཇེ་མདའ་རུ་གྱུར་ཞིང
བསིལ་རླུང་བཙན་པོ་ཞིག་གིས་སྟོན་གྱི་ལོ་མ་རེ་རེ་ནུབ་ཕྱོགས་སུ་ཁྱེར་སོང
གནམ་གཤིས་ཉི་བཞིན་བསིལ་བར་འགྱུར་བ
ཁ་བའི་འདབ་མ་རིམ་པར་མཁའ་དབུས་སུ་བབས་པ
འདི་དག་ནི་དགུན་ཁ་སླེབས་བའི་རྟགས་ཤིག་རེད
མྱི་རྣམས་ཀྱི་འགྲིམ་བཞུད་བྱ་རྒྱུ་ཉུང་ངུ་ཉུང་ངུར་འགྱུར་འདུག
དབྱར་ཁ་དང་མི་འདྲ་བར་ལུས་པོ་འཁྲུད་ལུགས་ཀྱང་མེད་པར་ཆགས
མི་དག་གིས་གོན་པ་མཐུག་པོ་གྱོན་དགོས་ཤིང
ཁ་ཤུབས་དང་ལག་ཤུབས་རྒྱག་དགོས་ཐུག
འདི་འདྲ་བའི་སྟབས་མི་བདེ་བ་མང་པོ་ནི་དགུན་ཁས་བཟོས་བར་འདོད
མཇུག་འབྲས་ལྟར་སྣང་།
ཕུང་གསུམ་པ། ཤེར་ཕྱིན་བར་མ།
༡
དོན་དམ་པའི་རང་ཉིད་འབྲི་བ་བརྩམས་ཚེ
མནོ་བསམ་ཐ་སྙད་ཀྱིས་མིད་པ་བརྣངས
དངོས་གཤིས་བདེན་པའི་གསང་བ་སྔོག་ཚེ
སྨྲ་ལྕེའི་རང་དབང་ལ་མདུད་པ་རྒྱབ
༢
ང་ཚོས་ཇི་ལྟར་རང་ཉིད་འཚོལ་ཀྱང
རང་དབང་གི་རང་ཉིད་བརྙེད་ཐབས་མི་འདུག
བརྩེ་བའི་བསླུ་བྲིད་ཐེབས་པའི་བག་མ་བཞིན
མཇུག་འབྲས་ལྟར་སྣང་གི་ཡིད་ཆེས་བརྙེད
༣
ཟོལ་རྫུན་ལ་བརྟེན་པའི་སྙན་ངག་པས
མིང་ཚིག་གི་ཐ་སྙད་ལ་བཙན་གཡེམ་བྱས
ལོ་འཁོར་བརྒྱད་བཅུ་རྗེས་སུ
ཞེ་མདངས་ཀྱི་སྨུག་པ་དང་བཅས་ཏེ་ཤི
༤
རྟོག་བཏགས་ཀྱི་འཇིག་རྟེན
བསླུ་བྲིད་ཀྱི་ལྐོག་གྱུས་གཤམ
རང་ཉིད་ཀྱི་ཆེད་དུ་རང་ཉིད་བོར་བའི་མི
རྒྱབ་ལྗོངས་མཇུག་འབྲས་ལྟར་སྣང་ཞིག་ལས་ཅི་ཡང་མེད།
འདང་བརྒྱབས་ན།
རབ་རྡོར། ཤེར་ཕྱིན་གོང་མ།
རང་གིས་རང་ལ་བསམ་ན།
རང་གི་མི་ཚེའི་སྙིང་པོ་རྟོགས་མེད་ལ།
མི་ཚེ་འདིའི་ནང་ཅི་ཞིག་སྒྲུབ་དགོས་པའང་མ་རྟོགས།
གང་ལྟར། ཅི་ཞིག་ཡིན་རུང་།
མྱི་རྗེས་རྒྱུགས་བཞིན། སྟངས་སྟབས་བཟོ་བཞིན།
རང་ཉིད་ལ་འགན་འཁྲི་ཅིའང་མེད་པར་གྱུར་ཚེ།
རང་ཉིད་ནི་དུད་འགྲོ་ཞིག་གམ།
རང་ཚུགས་ཡལ་བཞིན་པའི་བོད་མི་དེ་དག་ལྟར།
ཡང་ན། ཆགས་སྡང་གི་ཚོར་བས་སྟོང་པའི་ས་རྡོ་ལྟར།
ངོ་ཚ་དང་ཁྲེལ་སོགས་བོར་བའི་ཁྱི་འཁྱམས་ལྟར།
དྲིན་ཆེན་འབོད་པའི་ཨ་ཕའི་རུས་དང་།
ཨ་མའི་ཁྲག་ལ་རིན་ཐང་ཅིའང་མེད།
ངག་ནས་ཅི་ཤོར་དང་།
ལག་གིས་ཅི་འབྲི་ལ་དོཊ་ཟོན་ཅིའང་མེད།
དེ་ལྟར་ཡིན་ཚེ། རང་ཉིད་ཀྱིས།
རང་ཉིད་མྱུར་དུ་འཆི་བའི་སྨོན་ལམ་འདེབས་ངེས།
བོད་རྒྱལ་ལོ༢༡༤༩ལོའི་ས་ག་ཟླ་བའི་ཚེས༢༥ལ།
གནས་ལུགས་སྟོང་བ།
མྱི་གསར་བ། མངོན་པ་འོག་མ།
གནས་ལུགས་སྟོང་བ།
མྱི་གསར་བ། མངོན་པ་འོག་མ།
ངས་མི་ཚེ་གཅིག་གི་རང་དབང་ཡོད་ཚད་ཕྱོགས་བསྒྲིགས་བྱས་ཏེ
སྐར་ཆ་གཅིག་གི་རིང་ལ་དཀར་ཞིང་གཙང་བའི་ཤོག་ངོས་སུ་བྲིས
ཁྱེད་ཀྱིས་མི་ཚེ་གཅིག་གི་རིང་ལ
སྐར་ཆ་གཅིག་གི་རང་དབང་ཙམ་ཡང་ཤོག་དཀར་འདིའི་སྟེང་ལ་འབྲི་མ་ནུས
འོན་ཀྱང་ཁྱེད་ཀྱིས་ང་རང་སྨྱོན་པ་རུ་འཁྲུལ་ཞིང
ངས་ནི་ཁྱེད་ཉིད་བླུན་པོ་རུ་བསམ
ཧ་ཧ སྐྱེ་འཆིའི་གྲུ་གཟིང་འདི་ནི་ཅི་འདྲའི་མཚར་ཨང
ངས་མི་ཚེ་གཅིག་གི་དུས་ཚོད་སྤྱད་དེ
འུ་ཅག་གིས་བོར་སྟོར་བྱུང་བའི་ཚེ་སྲོག་དང་འཚོ་བའི་བདེན་པ་རྙེད་པར་འབད
ཁྱེད་ཀྱིས་སྐར་མ་གཅིག་གི་ཡུན་ཙམ་ལའང
བདེན་དགེ་མཛེས་གསུམ་གྱི་དོན་སྙིང་ལ་བསམ་གཞིག་མ་བྱས
འོན་ཀྱང་ཁྱེད་ཀྱིས་ང་རང་གླེན་པ་རུ་འཁྲུལ་ཞིང
ངས་ནི་ཁྱེད་ཉིད་སྨྱོན་པ་རུ་བསམ
ཧ་ཧ འཁྲུལ་བའི་མེ་ལོང་འདི་ནི་ཅི་འདྲའི་མཚར་ཨང
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
