ལྷུག་རྩོམ།
སེམས་ཀྱི་གནས་མལ།
མྱི་གསར་བ། མི་ཉག
ཧེ། ཡིད་འོང་གི་གྲོགས་པོ་ཚོ། ཁྱེད་ཅག་ནི་རང་དབང་གི་གོམ་ཁ་རྒྱང་རིང་ལ་ཕྱོགས་པའི་ནགས་ཚལ་གྱི་རི་དྭགས་དེ་ཡིན་ནམ། ཁྱེད་ཅག་ནི་དྭངས་གཙང་གི་དྲོད་ཁོལ་བར་མེད་དུ་རྩོལ་བའི་མཁའ་དབྱིངས་ཀྱི་ཉི་གཞོན་དེ་ཡིན་ནམ། ཁྱེད་ཅག་ནི་ལྷད་མེད་ཀྱི་ཨ་སྔོན་ནམ་མཁའ་ཡིན་འོས་ཤིང་། ཁྱེད་ཅག་ནི་དྭངས་གཙང་གི་ཞི་བདེ་རྒྱ་མཚོ་ཡིན་འོས།
མཚར་སྡུག་འོད་སྟོང་འབར་བའི་འཇིག་རྟེན་གྱི་སྐར་ཁྱིམ་རེ་རེ་ན་ཆེས་བླ་ན་མེད་པའི་མཛེས་པ་རེ་ཡོད་ངེས་ཤིང་། དེ་ལྟ་བུའི་མཛེས་པ་དེ་ནི་འཇིག་རྟེན་འཕེལ་འགྱུར་དང་འབྲེལ་བ་མེད་ཅིང་། འཇིག་རྟེན་དར་རྒུད་ལའང་འབྲེལ་བ་མེད་ངེས་པ་རེད། འོ་ན་ཤིན་ཏུ་བླ་ན་མཐོ་བའི་མཛེས་པ་དེ་ནི་ནམ་མཁའ་དང་ཉི་འོད་བཞིན་དུ། རྩྭ་ཐང་དང་མེ་ཏོག་ལྟར་དུ། ཚེ་སྲོག་དང་དབུགས་རྒྱུན་ཚུལ་དུ་མི་རེ་རེའི་ནང་སེམས་ཀྱི་རྣམ་ཤེས་དང་འབྲེལ་བ་ཡོད་ཅིང་། སྲོག་ཆག་རེ་རེའི་ནང་སེམས་ཀྱི་ངོ་བོ་དང་འབྲེལ་བ་ཡོད་པར་ང་ལ་ཡིད་ཆེས་གཏིང་ནས་སྐྱེས་བྱུང་། ཡིད་འོང་གི་གྲོགས་པོ་ཚོ། ཁྱེད་ཅག་གིས་རང་སེམས་ཀྱི་གནས་ཁང་བརྒྱུད་དེ་འཇིག་རྟེན་གྱི་རྒྱ་མཚོ་བརྒལ་བར་འདོད་དམ། ཁྱེད་ཅག་གིས་རང་སེམས་ཀྱི་ང་རྒྱལ་བཅོམ་དེ་ཚེ་སྲོག་གི་མཛེས་སྡུག་མཐོང་བར་འདོད་དམ། གལ་ཏེ་བློ་སེམས་རྣམ་དག་གིས་སྒོ་ནས་དེ་ལྟར་འདོད་ན། དེ་ནི་ཁྱེད་ཅག་དང་བར་ཐག་ཡེ་ནས་མི་རིང་སྟེ། ནང་སེམས་ཀྱི་ངོ་བོར་གནས་པའི་ལྷད་མེད་མཛའ་བརྩེ་ཡི་རིན་ཐང་ཤེས་ཤིང་། འཇིག་རྟེན་གྱི་སྐྱེ་དངོས་དག་ལ་དྭངས་གཙང་གི་བརྩེ་བ་ཨེན་ཙམ་རྩོལ་དང་ཁྱེད་ཀྱིས་ཤེས་ངེས་པ་རེད་ལགས།
ཚེ་སྲོག་གི་མེ་ལོང་དུ་མངོན་པའི་བརྩེ་བའི་རྒྱུད་སྐུད་ཅི་ལྟར་མཉེན་ན་འཚོ་གཞིས་ཀྱི་ནམ་མཁའ་དེ་ལྟར་དྭངས་ཤིང་གཙང་ངེས་ལ། རང་སེམས་ཞི་འཇགས་ཀྱི་གནས་མལ་ཡང་རྙེད་ངེས། མཛའ་དུང་གི་སྙིང་པོ་ནི་སེམས་ཀྱི་ཕ་རོལ་ཏུ་ཕྱིན་རེད་ལ་སེམས་ཀྱི་ཕ་རོལ་ཏུ་ཕྱིན་པ་ཡང་མཛའ་དུང་གི་སྙིང་པོ་རེད། དེ་བས་འུ་ཅག་གིས་ཕན་ཚུན་འཁོན་འཛིན་དང་གནོད་སེམས་སྐྱེ་མི་འོས་ཤིང་། འདྲན་སེམས་ཀྱི་དུག་རླངས་འཕྱུར་ཏེ་གཞན་གྱི་སྤྲོ་སྣང་གི་ཚོར་ཤེས་བརླག་མི་རུང་། བདག་གིས་ཀྱང་ཤེས་ཏེ། ལྷད་མེད་བརྩེ་འདུན་གྱི་འཇའ་ཚོན་རྣམ་པར་བཀྲ་རྗེས། ཕྱོགས་སུ་རྒྱུ་བའི་སྨུག་སྤྲིན་གྱིས་ཡིད་འོང་གི་ཚོན་མདང་སྒྲུབ་པར་བྱེད་སྲིད་མོད། དེ་ནི་ང་ཚོས་མཛེས་ཤིང་སྡུག་པའི་ནང་སེམས་ཀྱི་བར་ཆད་ཙམ་ཡིན་པ་ངོས་ཟིན་དགོས། རླུང་ཁའི་མར་མེ་བཞིན་བསྐྱོད་པའི་སྙིང་རྗེ་བའི་ཚེ་སྲོག་འདི་ནི། དུས་ཚོད་ཀྱི་མདའ་རྩེའི་ཐོག་ནས་ཡིད་ཙམ་གནས་དགོས་ཚེ། ཁྱེད་ཀྱིས་རང་ཉིད་ལ་དབང་བའི་འཇིག་རྟེན་གྱི་སྐྱེ་འགྲོ་ཀུན་ལ་བརྩེ་བའི་འཛུམ་ཆུང་དང་དགོད་སྒྲ་ཨེན་ཙམ་རྩོལ་དང་། ཚེ་སྲོག་གི་ཉིན་མཚན་ཀུན་ཏུ་རང་དབང་དང་སྤྲོ་སེམས་ཚད་མེད་སྟེར་ངེས་ཤིང་། མཐིང་མདོག་གི་ས་ཆེན་འདི་ནས་ཡང་སྙིང་བརྩེ་སེམས་ཀྱི་དྲོད་ཁོལ་ཕྱོགས་སུ་འཕྲོ་ངེས་པ་རེད།
གལ་ཏེ་འཇིག་རྟེན་དང་འཇིག་རྟེན་གྱི་ལོངས་སྤྱོད་མཐའ་དག་བདག་ལ་དབང་བར་གྱུར་ཡང་། རང་སེམས་ཀྱི་ཞི་བའི་གནས་མལ་ཏེ་ནི་བདག་གིས་ངོས་ཟིན་པའི་ངེས་པ་མི་འདུག་ལ། གལ་ཏེ་ཚེ་སྲོག་དང་ཚེ་སྲོག་གི་རིན་ཐང་མཐའ་དག་བདག་གིས་རྟོགས་པར་གྱུར་ཡང་། རང་སེམས་ཀྱི་ཚེ་སྲོག་གི་མཛེས་པ་དེ་བདག་གིས་རྒྱུན་སྐྱོང་བྱ་ཐུབ་པའི་ངེས་པ་མི་འདུག དེ་བས་ངས་ནམ་རྒྱུན་དུ་རང་ཉིད་ལགས། ཆོག་ཤེས་བྱོས་དང་། རྒྱ་ཆེ་བའི་ནམ་མཁའ་འདི་ནི་རང་སེམས་འཆར་ཡན་གྱི་ཁྲོད་ན་ཚད་ཡོད་ཅིང་། མཐའ་ཡས་པའི་རྒྱ་མཚོ་འདི་ཡང་རང་སེམས་ཞི་གནས་ཀྱི་ངོས་སུ་ཚད་ཡོད་པ་ཞིག་རེད་དོ་ཞེས་ཁེར་ལབ་བྱ་བཞིན་ཡོད། དཔྱོད་ཤེས་ཀྱི་མིག་ཟུང་ཡངས་པོར་ཕྱེས་དང་། རང་སེམས་འཆར་ཡན་གྱི་མེ་ལོང་ནང་དུ་བདེན་ལུགས་ཀྱི་ཉི་འོད་ཨེན་ཙམ་འཕྲོས་བྱུང་།
ང་རང་མཚོ་འགྲམ་གྱི་མེ་ཏོག་སྡུམ་ར་ཞིག་ཏུ་བསྡད་ནས་ནམ་མཁར་བལྟ་བཞིན། ང་རང་གང་ནས་འོང་བ་ཡིན། དེ་བཞིན་དུ་གང་ལའང་འགྲོ་དགོས། ད་ལྟ་གང་དུ་གནས་ཡོད་ཨང་བསམ་མྱོང་། ཡིན་ནའང་ལོ་རབས་བརྒྱ་ཕྲག་མང་པོའི་རྗེས་སུ་གནས་འདི་ན་མཚོ་མོ་དང་ལྡུམ་ར་མེད་ངེས་ཤིང་། འཚོ་གཞས་དང་ཚེ་སྲོག་ཀྱང་མེད་ངེས། དེ་བས་ད་ལྟ་ཉི་འོད་རབ་དུ་གསལ་བའི་མཚོ་འགྲམ་འདི་ནས་ངས་རང་ཉིད་ལ་མཚན་ཉིད་རིག་ལམ་གྱིས་འདྲི་རྟགས་མི་འདོན་པར་རང་དབང་གི་སྒོ་ནས་དབུགས་འབྱིན་རྔུབ་ཐེངས་གཅིག་བྱ་ཆོག་ལ། རང་དབང་གི་སྒོ་ནས་རང་སེམས་ཀྱི་མཛེས་པར་ཨེན་ཙམ་ཁེན་འོས། ངས་མཐའ་འཁོར་གྱི་འབུ་སྡོམ་རེ་ལ་བརྩེ་སེམས་ཀྱི་རང་གཟུགས་སྟོན་འོས་ཤིང་། རྩྭ་ལྗང་གི་ལོ་འདབ་རེ་ལ་བརྩེ་འཛུམ་གྱི་དགོད་སྒྲ་རྩོལ་འོས། ངས་རང་བྱུང་ཁམས་ལ་དྭངས་གཙང་གི་སེམས་ཉིད་བརྩལ་ཏེ་ཆོས་ཉིད་ཀྱི་གནས་ལུགས་སྟོན་ན་འདོད། ངས་མཐའ་འཁོར་གྱི་སྲོག་ཆག་ཀུན་ལ་འདྲ་མཉམ་གྱི་འདུ་ཤེས་བརྩལ་ཏེ་བྱམས་སྐྱོང་གི་མཛེས་པ་སྟོན་ན་འདོད། ཉི་འོད་སྨུག་ལོང་གིས་བསྒྲིབས་ཀྱང་ནང་སེམས་ཀྱི་མཛེས་པ་སུས་ཀྱང་བསྒྲིབ་པར་མི་ནུས། གངས་རི་བར་ཐག་གིས་བཅད་ཀྱང་ནང་སེམས་ཀྱི་མཛའ་དུང་སུས་ཀྱང་གཅོད་པར་མི་ནུས། ཨེ་མ། ང་ཡི"སེམས་ཀྱི་གནས་མལ"ཨ།
སྐྱེ་བ་འདིར་རང་སེམས་རང་དབང་གི་རྟ་ཕོར་ཞོན་ཅིང་། དཀར་གསལ་ཉི་འོད་ཀྱི་ཕྱོགས་སུ་བསྐྱོད་དེ་རང་དབང་གི་ཀི་སྒྲ་འདེབ་དགོས། སྐྱེ་བ་འདིར་རང་སེམས་ཞི་གནས་ཀྱི་རྩེ་ལ་གནས་ཤིང་། མཛེས་སྡུག་རང་བྱུང་གི་པང་ལ་ལོག་སྟེ་ནང་སེམས་ཀྱི་ངལ་བ་གསོ་དགོས།
2018 6