ཕྱིར་དྲན་དེ་དག་ཁ་མོ་ཁ་མོ་ཞིག སྐྱོ་མོ་སྐྱོ་མོ་ཞིག
མགར· བཀྲ་ཤིས་བསམ་འཕེལ་གྱིས་བརྩམས།
ཕྱིར་དྲན་དེ་དག་ཁ་མོ་ཁ་མོ་ཞིག སྐྱོ་མོ་སྐྱོ་མོ་ཞིག
མགར· བཀྲ་ཤིས་བསམ་འཕེལ་གྱིས་བརྩམས།
རླུང་བུ་ཞིག་ལྡང་བས་སྡོང་བོའི་ལོ་མ་ཞིག་བར་སྣང་ལ་ཁུར། བར་སྣང་ནས་ཁུར་ཏེ་ངའི་པང་ལ་ལྷུང་། ངས་པང་ལ་ལྷུང་བའི་ལོ་མ་དེ་ཡར་ལེན་གྲབས་བྱེད་སྐབས། ཡང་བསྐྱར་རླུང་བུ་ཞིག་ལྡང་བས་ལོ་མ་དེ་དང་དེའི་མཛེས་སྡུག་མཐའ་དག་གཏན་ཏུ་ང་ལ་མི་དབང་བར་ང་དང་བྲལ་ནས་ཡུལ་ཕྱོགས་གཞན་ཞིག་ལ་བཀྲམས། དེ་ངས་རྟག་ཏུ“ལས་དབང”གི་ཐུགས་ཕྲད་དང་གྱེས་བྲལ་གྱི་དཔེ་ཡག་ཤོས་ལ་བརྩི་བཞིན་ཡོད། མོ་ཡང་རླུང་གི་བསྐྱོད་པའི་སྡོང་མགོའི་ལོ་མ་ཞིག་དང་འདྲ་བར། ཐག་རིང་ནས་ཐག་ཉེ་དང་། ཐག་ཉེ་ནས་ཡང་བསྐྱར་ཐག་རིང་ཐག་རིང་ཞིག་ལ་ཁུར།
དང་ཐོག་ངས་མོ་རང་ངོ་ཤེས་དུས།མོའི་སྙིང་ཉེ་བའི་ཨ་ཕ་བཀྲོངས་ནས་ཡུན་རིང་འགོར་མེད།སྐབས་ཐོག་དེར་མོའི་མགོ་ཐོག་གི་གནམ་རྡིབ་པ་དང་རྐང་འོག་གི་ས་གས་པ་ཅི་ལ་མིན། སྐྱོ་གདུང་དང་རེ་ཆད། ངུ་ངག ཕངས་སེམས་བཅས་ཀྱིས་མནར་ཞིང་། སྒོར་ཁྲི་ཁྲག་གི་དོམ་ཆད་ཡོད་པ་ལྟར་གདོང་ན་སྐད་ཅིག་གི་སྤྲོ་འཛུམ་ཙམ་ཡང་མེད་པར་སྐྱ་ཐལ་ལེར་ཡིད་སེམས་སྨྲེང་ནས་ལུས་འདུགངས་མོ་ལ་སེམས་གསོའི་སྐད་ཆ་ཁ་ཤས་བཤད་ཡང་།ང་ནི་བཤད་འཇོན་པོ་ཞིག་མེད་པས་མོའི་སྐྱོ་གདུང་དང་ཁེར་རྐྱང་གི་སེམས་པ་ལ་སྐྱོ་རོགས་སྡུག་རོགས་ཤིག་བྱེད་མ་ཐུབ། བསམ་ཤེས་ཀྱི་སྐད་ཆ་མང་པོ་ཞིག་མིད་པ་བརྣངས་ཞོར་བསྙད་ཀྱང་། མོའི་སེམས་སུ་ཉར་བའི་སྲ་མཁྲེག་གི་དངོས་པོ་རྡོག་རྡོག་དེ་ཅིས་ཀྱང་འཇམ་མཉེན་ལ་གཏོང་མ་ཐུབ། སྡུག་ལ་བརྗེད་རྒྱུ་དང་། གོས་ལ་རྙིང་རྒྱུ་ཞེས་པའི་དཔེ་ལྟར། ངེད་གཉིས་ངོ་ཤེས་ནས་ཟླ་ངོ་ཁ་ཤས་འགོར་རྗེས། མོ་ཡང་དུས་ཚོད་ཀྱི་འགྲོས་དང་བསྟུན་ནས། སྔོན་དང་བསྡུར་ན་སྐད་ཆ་མང་བ་དང་། ཀུ་རེ་ཡོང་སླ་མོ་ཞིག་ལ་ཆགས་བྱུང་། མོ་རང་དཀའ་སྡུག་གི་དུས་ཚོད་དེ་དག་དང་གཡོལ་ནས་བགྲོད་ཐུབ་ཀྱིན་ཡོད་པ་འདྲ། གདོང་གི་འཛུམ་ཡང་མངོན་གསལ་གྱིས་ཇེ་མང་ལ་སོང་འདུག་པ་ཚོར།
ཐེངས་དང་པོར་ངེད་གཉིས་ཀྱིས་ཁྲིན་ཏུའུ་ནས་དུས་བཏབ་པ་ཡིན། མོས་ཁྲིན་ཏུའུ་རུ་ལས་ཀ་གཉེར་བཞིན་ཡོད་པ་དང་། ངས་ཀྱང་ཁྲིན་ཏུའུ་ཀྱི་མཐའ་ཁ་ཐག་ཉེ་ཞིག་ན་སློབ་གྲྭ་འགྲིམས་བཞིན་ཡོད་པས། ངེད་གཉིས་ཀྱིས་གཟའ་མཇུག་ཞིག་ལ་ངོ་ཐུག་པའི་དུས་བཅད་བྱས།། ཉིན་མོ་དེར། ང་རང་ས་འོག་ལྕགས་ལམ་བརྒྱུད་དེ་ངེད་གཉིས་ཀྱིས་དུས་བཅད་བྱས་པའི་ས་གནས་ལ་ཕྱིན། ས་འོག་ལྕགས་ལམ་ནས་སྒོར་འབུད་དུས། ང་རང་ཅུང་བྲེལ་འཚུབ་ལངས་བྱུང་། ངེད་གཉིས་ཀྱིས་ཁ་པར་ལས་བརྡ་འཕྲིན་དང་བརྙན་ཐུང་གྲངས་ལས་འདས་པ་བསྐུར་མྱོང་བ་དང་། ཡུན་རིང་ལ་ཁ་བརྡ་གློད་ནས་ཆ་ཡོད་རྒྱུས་ཡོད་ཞིག་ལ་བཏང་ཡོད་མོད། དངོས་སུ་ངེད་གཉིས་ངོ་ཐུག་པ་ཐེངས་དང་པོ་ཡིན་པས། གང་ཞིག་ནས་དོགས་མི་བདེ་བ་ཞིག་བྱུང་། གློག་སྐས་ལས་ཡར་འགོས་སྐབས། ང་རང་དངངས་འཚབ་ཀྱིས་རང་ཉིད་ཀྱི་སྙིང་ཏིག་ཏིག་ལྡང་བྱུང་བ་ཚོར་ལ། གདོང་ཡང་ཚ་ལམ་ལམ་བྱེད་། མཁའ་དབུགས་འདི་ཡང་གྲགས་འགུལ་སྤུ་ཙམ་མེད་པར་གཟབ་ནན་དང་སྒམ་བརླིང་གིས་ངའི་རྗེས་སྙེག་ནས་ཡོང་བ་དང་འདྲ། སྐར་མ་འགའ་འགོར་རྗེས་ང་རང་ས་ངོས་ལ་ཐོན་པ་དང་། གང་སར་བལྟས་ཡང་མོའི་གྲིབ་གཟུགས་ཙམ་ཡང་མཐོང་རྒྱུ་མ་ཡོད་པས། ངས་མོ་ལ་ཁ་པར་བཏང་། གློ་བུར་དུ་ངའི་རྒྱབ་ཕྱོགས་ནས་མོས“ཧ་ལོ”ཞེས་ཁ་གྲགས་བྱུང་། ལག་ལ་སིལ་ཏོག་གི་ཁུ་བའི་བཏུང་ཆུ་གཉིས་བཟུང་འདུག་པ་དང་། བྲེལ་འཚུབ་དང་བཅས་གཅིག་ཤོས་དེ་ངའི་ལག་ལ་གཏད། “ཡོང་རྒྱུ་དཀའ་བྱུང་ངམ”ཞེས་འཚམ་འདྲི་བྱས་བྱུང་། ངས་ཀྱང“མ་དཀའ”ཞེས་ལན་བྱིན་པ་དང་། “ངས་གང་སར་བལྟས་ཀྱང་། ཁྱོད་རང་མཐོང་རྒྱུ་མ་ཡོད། དེ་བས་ཁ་པར་བཏང་བ་ཡིན”ཞེས་བཤད་པ་ཡིན། མོ་རང་ངོ་ཚ་གྱིན་ཡོད་པ་འདྲ། མིག་ཟུང་ང་དང་གཡོལ་ནས་འདུག་ལ། མགོ་བོ་སྒུར་སྒུར་དང་ལུས་པོ་སྒོང་སྒོང་བྱས་ནས “ངས་ཁྱོད་སྔ་མོ་ནས་རིག་བྱུང”ཞེས་བཤད།
ཉིན་མོ་དེར་ངེད་གཉིས་ཐེངས་དང་པོར་ཐུགས་ཕྲད་བྱས་པ་ཡིན་ལ།དུས་དེ་ནས་བཟུང་།ངེད་གཉིས་ཀྱི་བར་ཐག་ཡང་ཇེ་ཉེ་ནས་ཇེ་ཉེ་འགྲོ་མགོ་བརྩམས།དུས་ཚོད་རིང་དུ་ཕྱིན་པས་གོམས་འདྲིས་དང་ཐུགས་ཁུར་གྱིས་སོ་ཕག་བརྩིགས་པའི་གྱང་གི་ར་བ་དེ་ཡང་བརྟོལ་ནས། ཕོ་མོ་གཉིས་ཀྱི་བརྩེ་དུང་གི་གཏམ་རྒྱུད་ཞིག་ལ་དབུ་འཁྱུད་བྲིས། ཉིན་དེར་མོས་ཞྭ་སྨུག་པོ་ཞིག་གྱོན་འདུག། ཤ་མདངས་དཀར་ཞིང་ཤ་ཅུང་རིད་པ། གདོང་ལ་ལྷོད་ཉམས་ཤིག་དོད་ཅིང་། སྐག་རྫས་དང་མཆུ་རྩི་ཚད་དང་རན་པ་ཞིག་བྱུགས་འདུག ཐེངས་དང་པོའི་ཐུགས་འཕྲད་འདི་ལས་ཀྱང་མོ་ནི་ངའི་མིག་ལ་ཧ་ཅང་འཕྲོད་པོ་བྱུང་། དབྱར་ཟླ་ལྔ་བའི་ནང་ཁྲིན་ཏུའུ་ལ་ཚད་པ་ཧ་ཅང་ཆེ་བས། མོས་ཁོག་སྟོད་ལ་མདོག་དཀར་པོ་སྐེ་ན་སྒྲོག་བུ་ཅན་གྱི་ཕུ་ཐུང་ཡུ་མེད་ཅིག་གྱོན་འདུག་པ་དང་། ལུས་སྨད་ལ་རྐང་ཐུང་ཞིག་གྱོན་འདུག་པས་དཀར་ཞིང་ཕྲ་བའི་སྒྱིད་པ་གཉིས་ཕྱིར་མངོན་འདུག རྐང་འབོབ་ཡུ་རིང་ཞིག་གི་ཐོག་ལ་ལྷམ་དཀར་པོ་ཞིག་གྱོན་འདུག ད་དུང་སྐྲ་མདོག་ཅུང་སེར་ཞད་འདྲེས་ལ། སྣུམ་ཤིག་གེར་རྒྱབ་ནས་ཐུར་དཔྱང་འདུག མོ་ནི་དབྱར་མགོ་མར་བཞད་མ་ཐག་པའི་མེ་ཏོག་ཅིག་ལྟར་མངོན་ཆུང་གིས་འཛུམ་ཙམ་འཛུམ་ཙམ་བྱེད་པ་ལས། ང་ལ་སྐད་ཆ་མང་པོ་མི་བཤད། ཉིན་མོ་དེར་ངེད་གཉིས་ཀྱིས་དམིགས་ཡུལ་གང་ཡང་མེད་པར་སྤྱི་གླིང་ཞིག་ནས་ཐང་ཆད་རག་བར་འཁྱམ་ཉུལ་བྱས་ཏེ་བསྡད་། མཚམས་ཤིག་ངས་སྤོབས་པ་ཆེན་པོས་མོའི་ལག་པ་ནས་འཇུས། དེར་མོས་ཕྱི་ནུར་དང་ངོ་རྒོལ་གང་ཡང་མ་བྱས་པས། ང་རང་དགའ་སྣང་ཆེན་པོས་མོའི་ལག་པ་ནས་དམ་པོར་འཇུས་ཏེ་འཆམ་འཆམ་བྱས། མོའི་ལག་པ་འཇམ་ཞིང་མཉེན་ལ། བསིལ་རླུང་འཇམ་པོ་ཞིག་གིས་ངའི་འགྲམ་པའི་མཁུར་ཚོས་ལ་འོ་བྱེད་པ་ནང་བཞིན། ཚོར་བ་དེ་དངོས་གནས་སྙིང་ལ་སིམ་པ་ཞིག་རེད། མོ་དང་ལག་གདང་འབྲེལ་ཏེ་ངལ་དུབ་ཀྱི་གོམ་པ་དག་མདུན་ལ་སྤོ་སྐབས། ངས་བཙལ་བཙལ་ནས་ཅི་ཞིག་རྙེད་བྱུང་བ་དང་འདྲ་ལ། སོང་སོང་ནས་གང་ཞིག་ལ་ཐོན་པ་དང་ཡང་འདྲ། ཚོར་བ་དེ་སྨྲ་བསམ་བརྗོད་འདས་ཤིག་རེད། ཉིན་མོ་དེར་ངེད་གཉིས་སྤྱི་གླིང་དེའི་ནང་ནས་ཉི་མས་ནུབ་ཕྱོགས་ཀྱི་ཁང་བརྩེགས་མཐོན་པོ་དག་ལ་གྱེས་བརྡ་བཏང་སྟེ་ཟླ་བ་མཁའ་ལ་འཕགས་རག་བར་ཡང་བསྐོར་བསྐྱར་བསྐོར་བྱས་ནས་ཉུལ་བ་ཡིན། འོན་ཀྱང་ངེད་གཉིས་ལ་སྐད་ཆ་ཤིན་ཏུ་ཉུང་། ལམ་ཐག་མང་ཆེ་ཤོས་སུ་སྨྲ་བ་མེད་པར་ངག་བསྡམས་ཏེ་གང་སར་ཉུལ་བ་ཡིན། ང་ནི་ལུས་པོ་ཅུང་རྒྱགས་པོ་ཡོད་པས་ལན་རེར་དབུགས་ཧལ་ཧལ་བྱེད་དགོས་བྱུང་ཡང་། མོའི་དཀར་ཞིང་ནེམ་ཤ་དོད་པོའི་ལག་པ་ནས་འཇུས་ཡོད་པས། སེམས་སུ་དཀའ་སྣང་གང་ཡང་མ་ཤར་བར། དེ་ལས་ལྡོག་སྟེ་དགའ་སྤྲོས་རབ་ཏུ་བརྟས། མོའི་འཛུམ་ཤེས་པའི་མིག་ཟུང་གིས་ང་ལ་བསླུ་བྲིད་ཡང་ཡང་གཏོང་ལ། ངའི་གདོང་ལ་བལྟས་ནས་འཛུམ་ཙམ་བྱས་རྗེས། ཡང་བསྐྱར་མིག་ཟུང་ང་དང་གཡོལ་ནས་འདུག་ལ། ལན་རེར་ས་ངོ་ལ་བལྟས་འདུག་པ་དང་། ལན་རེར་ལམ་འགྲམ་གྱི་བྱ་དངོས་དག་ལ་མིག་གཡེང་བྱས་འདུག ཉི་མ་ཁད་ཀྱིས་ནུབ་པ་དང་བསྟུན། མུན་ནག་གིས་གང་ཡིན་སར་འཇབ་རྒོལ་བྱས། བསིལ་སྤྱིན་བུ་མོ་ཡང་ག་ལེར་མཁའ་ལ་འཕགས ངའི་སེམས་སུ་བུ་མོ་འདི་དང་མཉམ་པོར་ཤ་མཆིན་གླན་ནས་དགོང་ཞག་གཅིག་ལ་ནམ་མཁའི་སྐར་མ་བརྩི་ཐུབ་ཚེ། འཇིག་རྟེན་འདིར་ང་ལ་དེ་ལས་ལྷག་པའི་བདེ་བ་ཞིག་མི་དགོས་ལ། འདི་ལས་ལྷག་པའི་བུ་མོ་ཞིག་གིས་ཀྱང་མི་ཆོག་པ་མེད་སྙམ།
མོའི་ཕ་ཡུལ་ནི་ཁྱུང་མཆུ་རྫོང་ཟངས་དཀར་ཡུལ་ཚོ་ནས་ཡིན། མོས་བཤད་པ་ལྟར་ན། ཁོ་ཚོའི་ཡུལ་ཚོ་འདི་ལ་ཟངས་དཀར་ཞེས་པའི་མིང་ཐོགས་དོན་ནི། དང་ཐོག་སྟོད་མངའ་རིས་ས་ཁུལ་གྱི་ཟངས་དཀར་ནས་དམག་དཔོན་ཞིག་འཁོར་དང་བཅས་པ་འདི་བྲོས་བྱོལ་བྱས་ནས་གཞིས་ཆགས་ཤིང་།དེ་བས་ཡུལ་ཚོ་འདི་ལ་ཡང་ཟངས་དཀར་ཞེས་མིང་ཐོགས་པ་ཡིན་ཟེར།སྤྱིར་ཟངས་དཀར་ཞེས་པའི་ཡུལ་ལུང་འདིའི་མིང་ཐོགས་ཚུལ་ནི་ཡོངས་གྲགས་སུ་གནའ་སྔ་མོའི་དུས་སུ་ཡུལ་ལུང་དེའི་ཆུ་ཟངས་དཀར་པོ་རྙེད་ཀྱི་ཡོད་པར་བརྟེན་ཡུལ་ལུང་འདིའི་མིང་ལ་ཟངས་དཀར་ཞེས་ཐོགས་པ་ཡིན་ཞེས་བཤད། ཟངས་དཀར་ཞེས་པའི་ཡུལ་འདི་ལ་དྭགས་དང་གུ་གེའི་རྒྱལ་ཁམས་གཉིས་ཀྱི་བར་ན་ཆགས་ཡོད་པ་དང་།ཡུལ་ལུང་གི་ལུགས་སྲོལ་ཡང་སྟོད་མངའ་རིས་ཀྱི་ཡུལ་ཁམས་གཞན་དང་འདྲ་བར་ཐུན་མོང་མ་ཡིན་པའི་ཁྱད་ཆོས་མང་དུ་ལྡན་ཡང་། བོད་ཡིག་སྤྱོད་པ་དང་ནང་པའི་ཆོས་ལ་དད་པ་སོགས་བོད་སྤྱི་དང་མཐུན། ལ་དྭགས་རྒྱལ་རབས་ལས། ཆུང་བ་ལྡེ་གཙུག་མགོན་ལ་ཟངས་དཀར་སྒོ་གསུམ། སྤི་ཏི། སྤི་ཅོག་དང་བཅས་པ་ལ་མངའ་མཛད་ཞེས། སྐྱིད་བདེ་ཉི་མ་མགོན་གྱི་སྲས་ཐ་ཆུང་ལྡེ་གཙུག་མགོན་ཟངས་དཀར་ཡུལ་ལ་སླེབས་པ་ནས་ཟངས་ལྷའི་རྒྱལ་རྒྱུད་དང་རྒྱལ་ཁང་ཕོ་བྲང་སོགས་མ་ཉམས་པར་བསྡད་ཡོད།
ཁས་ཉིན་བར་ང་རང་ཕ་ཡུལ་ནས་རྐང་ཐང་ལ་ཁྲོ་སྐྱབས་ཐུགས་རྗེ་ཆེན་པོར་མཇལ་བསྐོར་དུ་སོང་བ་ཡིན། ལམ་བར་ནས་ཟངས་དཀར་ཡུལ་ཚོ་བརྒྱུད་དེ་འགྲོ་དགོས་བྱུང་། ད་དུང་ཉིན་གཅིག་ལ་དེ་ནས་ཞག་སྡོད་ཀྱང་བྱས་པ་ཡིན། ཡར་སྔོན་ང་རང་ཡུལ་ཚོ་འདི་ལ་ཐོན་མྱོང་མེད། འོན་ཀྱང་ངས་སྣང་ངོར་གྲོང་བརྡལ་འདི་ནི་ཆ་ཡོད་རྒྱུས་ཡོད་ཞིག་ལ་སྣང་། ཡུལ་འདི་ལ་འབྱོར་དུས་ཡིད་སེམས་རྒྱ་མཚོའི་འཇིངས་ལ་ལྷུང་བ་ནང་བཞིན་སྨྲེང་སྨྲེང་པོར་བཏང་ལ། གྱེས་དུས་ཀྱང་རང་གི་ཕ་ཡུལ་དང་གྱེས་པ་ནང་བཞིན་སེམས་ཀྱིས་མི་བཟོད་པ་ཞིག་བྱུང་། སྐད་ཅིག་ལ་མོ་དང་འབྲེལ་བའི་འདས་མ་ད་གསུམ་གྱི་ཐ་སྙད་མང་པོ་ཞིག་གིས་མིག་དབང་གབ་ནས་མདུན་སྐྱོད་མི་ཐུབ་པར་ཐོ་ཡོར་ཞིག་ལྟར་ཧད་དེ་ལུས། མི་ནི་མ་གཞི་ནས་ཕྱིར་དྲན་བྱེད་དགའ་བོ་ཡོད་པ་ཞིག་ཡིན་ཡང་སྲིད། གང་ལྟར་ངས་ནི་མོ་དང་འབྲེལ་བའི་གཏམ་རྒྱུད་དག་ལ་རེ་རེ་བཞིན་ཕྱིར་དྲན་གྱི་སྐུད་སྣེ་བསྲིངས་ཏེ དྲན་གདུང་གི་རྨ་ཁ་ཐེབས་པའི་ལྷེབ་ལྷེབ་ངང་འགུལ་བཞིན་པའི་སེམས་པར་ལག་སྙོབ་ཐེངས་གཅིག་བྱེད་དགོས་ཐུག ལག་སྙོབ་བྱས་ཏེ་ཕྱིར་དྲན་འདིའི་ཁྲོད་ཀྱི་དགའ་བ་མཐའ་དག་ཕྱོགས་གཅིག་ལ་བསྡུས་ནས་སྙི་དྲགས་པའི་སེམས་པ་ལ་ལྷོད་ཤིག་ཤིག་གི་འོ་ལན་གཅིག་བྱས་པ་ཡིན། ཉིན་དེ་དག་ལ་མོ་རང་ཤིན་ཏུ་དྲན་ཞིང་། དགོང་མོ་རྨི་ལམ་ལ་ཡང་འཁོར་ཡོང་།
མོ་ནི་ངུ་སླ་བ་ཞིག་ཡིན། ཕྱི་ཚུལ་ནས་མོ་ནི་སྤོབས་པ་ཆེན་པོ་དང་སེམས་ཤུགས་ཆེན་པོ་ཡིན་པའི་རྫུ་བག་གི་རྣམ་འགྱུར་མངོན་ཡང་། དོན་དངོས་སུ་མོ་ནི་སེམས་ཆུང་ལུ་གུ་འདྲ་བ་ཞིག་ཡིན། དགོང་མོ་ཞིག་ལ། ངེད་གཉིས་མལ་ཁྲི་གཉིས་ཅན་གྱི་མགྲོན་ཁང་ཞིག་ནས་ཞག་སྡོད་བྱས། ནམ་གུང་ངས་མོ་ལ་ང་རང་མོ་དང་མཉམ་པོར་མལ་ཁྲི་གཅིག་ལས་ཉལ་འདོད་ཚུལ་གླེང་བ་ཡིན། དོན་དེ་ལ་མོ་རང་གཏན་ནས་འཐད་པ་མ་བྱུང་བས། གློག་ཟིམ་རྗེས། ངེད་གཉིས་ཀས་ཕན་ཚུན་ལ་ཁ་གཏམ་བཅད་དེ་རང་རང་ས་ནས་ཉལ་བ་ཡིན། ངེད་གཉིས་ཀ་ཟེར་ཡང་གཙོ་བོ་ངས་མོ་ལ་ཁ་མ་བསྲེས་པར་ཉལ་བ་ཡིན། ངས་འདོད་ཐོག་ལ་མ་ཡོང་བས་ང་རང་སེམས་དེ་འདྲ་སྐྱིད་པོ་མ་བྱུང་། དེ་བས་གཉིད་ཀྱང་མ་ཁུག་པས་མལ་ལས་ལངས་ཏེ་སྒེའུ་ཁུང་གི་ཕྱི་རོལ་ལ་བལྟས་ནས་སེམས་གཡེང་བྱས་པ་ཡིན། ངེད་གཉིས་ཀྱིས་ཞག་སྡོད་བྱས་པའི་མགྲོན་ཁང་ནི་བརྩེགས་གསུམ་པའི་ཐོག་ཡིན། སྒེའུ་ཁུང་ཆེན་པོ་ཞིག་ཡོད་ལ། སྒེའུ་ཁུང་གི་ཁ་གཏད་ནི་གཞུང་ལམ་ཆེན་པོ་ཞིག་ཡིན། ང་རང་སྒེའུ་ཁུང་གི་མདུན་ནས་དྲང་བོར་འགྱིང་སྟེ། ཕྱི་རོལ་གྱི་གཞུང་ལམ་སྟེང་གི་བཞུར་གྱིན་པའི་རླངས་འཁོར་དག་ལ་བལྟས་ནས་བསྡད་པ་ཡིན། གཞུང་ལམ་སྟེང་གི་རླངས་འཁོར་དེ་དག་རྒྱ་མཚོའི་རླབས་རྒྱུན་དང་འདྲ་བར་གཏན་སྡོད་མེད་པར་བྲེལ་འཚུབ་དང་བཅས་ངའི་མིག་མདུན་ནས་སྐད་ཅིག་སྐད་ཅིག་ལ་ཡལ་འགྲོ མི་ཚེ་ཞེས་པ་འདི་ཡང་རྒྱུགས་ཀྱིན་པའི་རླངས་འཁོར་རེ་རེ་དང་འདྲ་བར་སྐྱེས་པ་ནས་འཆི་བའི་བར་སྐད་ཅིག་ལ་ཡང་གཏན་སྡོད་མེད་པར་ལོ་ཟླས་དེད་ནས་བགྲོད་དགོས་པ་ཞིག་རེད། གློ་བུར་དུ་མོ་རང་ངའི་དཔུང་བ་ལ་འཐམ་བྱུང་། “ཁྱོད་ལ་ཅི་བྱས་སོང”ཟེར། ངས་སྔར་བཞིན་ཁ་མ་གྲགས་པར་མིག་མདུན་ལ་གཡེང་ནས་བསྡད་པ་ཡིན། མོས་ངའི་དཔུང་བ་ནས་འཐེན་ཙམ་བྱེད་བཞིན། མགོ་བོ་སྒུར་ཏེ་ཤུམ་ཤུམ་གྱིས་ངུས་བྱུང་།
ཐེངས་ཤིག་ངེད་གཉིས་ཀས་མཉམ་པོར་ཆང་འཐུང་བ་ཡིན། དམ་བུ་ཁ་ཤས་ཀྱིས་མོ་རང་ར་རོ་བཏང་བྱུང་། དེ་འཕྲོལ་འདས་ཟིན་པའི་ཨ་ཕ་གླེང་བ་དང་། མིག་ཆུ་མཚམས་མི་ཆད་པ་བཞུར། ང་ནི་ཅི་བྱེད་འདི་བྱེད་མེད་པར་ལུས། གཙང་ཤོག་བླངས་ནས་མོ་ལ་མིག་ཆུ་ཕྱིས་པ་ཡིན། མཚམས་ཤིག་སྙིགས་ཟོམ་ནང་གཙང་ཤོག་གིས་ཁ་བཀང་འདུག་པ་དང་། མོའི་མིག་མཐའ་གཉིས་ཡང་སྐྲང་སྟེ་དམར་པོར་གྱུར་འདུག བར་ཤིག་ངའི་པང་ལ་མགོ་བོ་བཞག་སྟེ་གཉིད་དུ་ཡུར། དགོང་མོ་དེར་ང་ཡང་ཆང་གིས་བཟི་ཡོད་ན་བསམ། གལ་སྲིད་ང་ཡང་ཆང་གིས་བཟི་ཡོད་ན། མོ་དང་མཉམ་པོར་སྨྲེ་ངག་གི་རྒྱུན་བསྲིངས་ནས་སྐྱོ་ཡུས་ཀྱི་མིག་ཆུ་བཞུར་ཆོག་སྙམ།
མོ་རང་རྒྱ་ཡིག་ལ་འཇོན་པོ་ཡོད། རྒྱ་ཡིག་གི་སྤྱི་སྐད་བཤད་པ་ཡང་སྒྲ་གདངས་དག་མོ་ཡོང་འདུག མོས་རྒྱ་སྐད་བཤད་ཚེ་རང་ཤུགས་ཀྱིས་རྒྱ་མི་ཞིག་ལ་འཁྲུལ་འགྲོ་བའི་ཚད་ཡིན། དེ་ཡང་མོ་རང་ལས་ཞུགས་བྱེད་སའི་གནས་སུ་རྒྱ་མི་ཏག་ཏག་ཡིན་པ་དང་། ནམ་རྒྱུན་རྒྱ་མི་དག་དང་འབྲེལ་འདྲིས་བྱེད་དགོས་པས་ཡིན་ཡང་སྲིད། མོ་རང་དཔེ་ཀློག་ལ་ཡང་དགའ་བོ་ཡོད། ངེད་གཉིས་མཉམ་པོར་ཡོད་སྐབས་མོས་ང་ལ་དཔེ་དེབ་མང་པོ་ཞིག་འོས་སྦྱོར་བྱས་མྱོང་། ཁས་ཉིན་བར“ངོ་ཁེབས”ཞེས་པའི་སྒྲུང་དེབ་དེ་ཀློག་སྐབས། ངས་ཡང་དང་བསྐྱར་དུ་མོ་རང་དྲན་ཞིང་། མོ་དང་འབྲེལ་བའི་གཏམ་རྒྱུད་དག་དྲན་ངོགས་ཀྱི་འཆར་ཡོལ་ལ་གསལ་ནས་ངའི་ལུས་ངག་ཡིད་གསུམ་ལ་ཕྱིར་དྲན་གྱི་དྲན་གདུང་གིས་ཟུག་གཟེར་རྒྱག སྒྲུང་དེབ་དེ་ནི་མོས་ང་ལ་བྱིན་པ་ཡིན། ཉིན་དེར་ངས་མོ་ལ་གྱེས་བརྡ་བཏང་རྗེས། ཕྱིར་སློབ་གྲྭར་སོང་བ་ཡིན། སྡོད་ཁང་དུ་ཐོན་རྗེས་རྒྱབ་ཁུག་ནང་གི་དངོས་པོ་དག་སྔོག་སློག་བྱེད་སྐབས། དཔེ་ཆ་ཞིག་འདུག སེམས་སུ་དཔེ་དེབ་མོས་ཅ་ལག་བསྡུ་གསོག་བྱེད་སྐབས་གོ་འཛོལ་ཐེབས་ནས་ངའི་རྒྱབ་ཁུག་ནང་ལ་བཞག་པ་ཡིན་ངེས་སྙམ། མྱུར་མོར་མོ་ལ་ཁ་པར་བཏང་ནས“ཁྱོད་ཀྱི་དཔེ་དེབ་དེ་ངའི་རྒྱབ་ཁུག་ནང་ན་ལུས་འདུག”ཞེས་བཤད་པ་ཡིན། མོས་ང་ལ“དཔེ་དེབ་དེ་ངས་བསམ་གཟས་ཏེ་ཁྱོད་ཀྱི་རྒྱབ་ཁུག་ནང་ནས་བསྐྱུར་བ་ཡིན། ཁྱོད་ལ་བྱིན་པ་ཡིན”ཞེས་བཤད། སྒྲུང་དེབ་དེ་ནི་བསྒྱུར་རྩོམ་ཞིག་ཡིན་ཞིང་། རྩོམ་པ་པོ་ནི་དབྱིན་ཇིའི་མི་ཞིག་ཡིན། མིང་ལ་མོ་མོས་ཟེར། གཟའ་འཁོར་ཁ་ཤས་གྱི་ཡར་སྔོན་གྲོགས་པོ་དང་ངེད་གཉིས་ཁྲོ་སྐྱབས་ཐུགས་རྗེ་ཆེན་པོ་མཇལ་བསྐོར་ལ་སོང་། ཁོས་ཀྱང་ལམ་བར་ནས་ང་ལ་རྩོམ་མཁན་དེ་དང་དེའི་བརྩམས་ཆོས་དག་འོས་སྦྱོར་གནང་བྱུང་། སྐབས་དེར་ངེད་གཉིས་ཁ་ཁར་སོང་ནས་ཡུན་རིང་འགོར་ཡོད་མོད། སྒྲུང་དེབ་དེ་ད་དུང་ངའི་ལག་ན་འཚམ་པོར་གནས་ཡོད་པས ཅིས་ཀྱང་ཐེངས་གཅིག་ཀློག་དགོས་སྙམ། དེ་མིན། ཡར་སྔོན་ངེད་གཉིས་ཁྲིན་ཏུའི་ནཱལེནྡྲའི་དཔེ་ཁང་ལ་ཉུལ། མོས་ཡང་བསྐྱར་གཏོང་ཕོད་ལྡན་པའི་སྒོ་ནས་ང་ལ་དཔེ་དེབ་མཆན་གང་གི་མགྲོན་བྱས། མོ་རང་བོད་ཡིག་ལ་དེ་འདྲ་འཇོན་པོ་མི་འདུག བོད་ཡིག་གི་དཔེ་དེབ་ཀློག་རྒྱུ་ཡང་དེ་འདྲ་མི་དགའ། འོན་ཀྱང་མོས་ངས་བོད་ཡིག་གི་དཔེ་དེབ་ཀློག་པར་རྒྱབ་སྐྱོར་བྱེད་ཀྱིན་འདུག ངེད་གཉིས་མཉམ་པོར་ཡོད་སྐབས། དུས་ཚོད་མང་ཆེ་ཤོས་སུ་བརྩམས་སྒྲུང་རེ་ཀློག་ནས་ལྷོད་ལྷོད་ངང་ཁ་བརྡ་བྱས་ཏེ་བསྡད་པ་ཡིན། མོས་ལྷོད་ལ་བབས་པའི་འཚོ་བ་ཞིག་རོལ་ཐུབ་ན་སྙམ་གྱིན་ཡོད། སྐབས་ཐོག་དེར་ངས་ཀྱང་དེ་ལྟར་འདང་རྒྱབ་མྱོང་། མི་ཚོགས་ཀྱི་འདུ་འཛི་དང་རྒྱང་བཀྱེད་ནས་མོ་དང་མཉམ་པོར་ལྷིང་འཇགས་ཀྱི་གནས་ཤིག་ནས་ཆེས་སྤྱིར་བཏང་གི་འཚོ་བ་ཆུང་ཆུང་ཞིག་རོལ་ཐུབ་ན་བསམ། དཔེ་ཆ་ཀློག་པ་དང་། ཁོ་ཧྥེ་འཐུང་བ། མེ་ཏོག་གསོ་བ། མཚམས་མཚམས་སུ་མོ་ལ་འོ་བྱེད་པ་དང་། ལྷོད་ལྷོད་ངང་ཁ་བརྡ་བྱེད་པ་བཅས་ལ་སྟོང་འདང་བྱས་མྱོང་། ངེད་གཉིས་སུས་ཀྱང་ལས་དབང་གིས་ངེད་གཉིས་ལ་ཀུ་རེ་ཐེངས་གཅིག་བྱས་ཡོང་བ་ཡིད་ཀྱི་དགུ་ལ་ཡང་མ་ཤར་།
ངེད་གཉིས་ཤ་འདྲེས་ལྤགས་འདྲེས་བྱུང་བའི་ལོ་གཅིག་གི་རིང་། དུས་ཚོད་དང་ནོམ་པའི་ཐུབ་ཚོད་ཀྱིས་ས་ཆ་གང་སར་ཡུལ་བསྐོར་དང་མཇལ་བསྐོར་ལ་ཕྱིན་པ་ཡིན། སྤྱི་ལེ་དྲུག་བརྒྱ་ལྷག་གི་ལམ་ཐག་ཉིན་གང་བོར་རེས་འཁོར་ལ་བསྡད་ནས་གཞོག་པ་ཡོད་ལ། ལྕགས་ལམ་མེ་འཁོར་ལ་བསྡད་ནས་ཤོག་བུ་ལྡེབ་ལྡེབ་བྱས་པ་ཡང་ཡོད། ལམ་བར་ནས་འཁོར་དུག་གི་མནར་ཏེ་མགོ་བོ་མགོ་བོར་གླན་ནས་གཉིད་པ་ཡང་ཡོད་ལ། ཡང་ལག་པས་ལག་པ་འཇུས་ནས། ཕན་ཚུན་ལ་འཐམ་འཁྱུད་བྱས་ཏེ་མཆུ་སྦྱོར་བྱས་པ་ཡང་མང་། ལས་དབང་གིས་ང་ཚོ་བསྐྱུར་ཏེ་སྡོང་མགོའི་ལོ་མ་བཞིན་གང་ཡིན་སར་འཐོར་དགོས་བྱུང་ཚེ། ངས་བསམ་ན། འཁྱག་གི་བསྡམས་པའི་དགུ་གསུམ་པ་ལའང། དྲོད་ཀྱི་མེ་སྟག་འཕྲོས་པ་ལྟར་། ང་ལ་ཕྱིར་དྲན་འདི་དག་ལས་མི་ཆོག་པ་མེད་སྙམ།
ངེད་གཉིས་མཉམ་པོར་ཡོད་སྐབས། རྒྱ་ཁོག་ཟོས་པ་ཅུང་མང་། དེ་ནི་ཁ་ཚ་ནས་དབུགས་ཧལ་ཧལ་དང་མིག་ཆུ་ཡང་བཞུར་ལ་ཁད་བྱས་ཡོང་བའི་ཟས་རིགས་ཤིག་རེད། ངས་དེ་ལ་གཏན་ནས་ཁ་ཐེབས་ཀྱིན་མི་འདུག དགའ་བོ་ཡང་དེ་འདྲ་མི་འདུག འོན་ཀྱང་མོ་རང་རྒྱ་ཁོག་ཟ་རྒྱུ་ཧ་ཅང་དགའ། དེ་བས་ངེད་གཉིས་དུས་བཅད་བྱེད་ཐེངས་རེར་ངས་མོ་རང་ཁྲིད་ནས་རྒྱ་ཁོག་ཟོས་པ་ཡིན། མོས་ང་རང་རྒྱ་ཁོག་ཟ་རྒྱུ་དེ་འདྲ་དགའ་བོ་མེད་པ་ཤེས་རྗེས། མོ་ཡང་འགྲོ་འདོད་མེད་ཞེས་བརྗོད་མོད། ངས་ཨུ་ཚུགས་བྱས་ནས་མོ་རང་ཁྲིད་པ་ཡིན། ང་རང་མོ་ལ་དགའ་བས་ངས་ནུས་ཚོད་ཀྱིས་མོ་ལ་གཅེས་འདོད་པ་དང་། མོ་ལ་བསམ་ཤེས་བྱེད་ཐུབ་ན་སྙམ། ཁས་ཉིན་ལོ་སར་ནང་སྲིང་མོས་རང་འདེམས་རྒྱ་ཁོག་གི་ཚོད་མ་དང་རྒྱུ་ཆ་སྒྲིག་སྐབས། ངས་མོ་རང་དྲན་ཞིང་། མོ་དང་མཉམ་པོར་རྒྱ་ཁོག་ཟོས་པའི་ལོ་ཟླ་དག་དྲན་ཡོང་།
སློབ་མཐར་ཕྱིན་ནས་ང་རང་ཕ་ཡུལ་ལ་ལོག་རྗེས། ངས་ཧུར་ཐག་གིས་དཔེ་ཆ་ཀློག་སྟེ་གཞུང་ཞབས་ཀྱི་ལས་ཀ་བརྩོན་ལེན་བྱས། སློབ་མཐར་ཕྱིན་རྗེས་ང་རང་བྱེའུ་ཞིག་སྡོང་མགོ་ནས་མར་ལྷུང་བ་བཞིན་གར་འགྲོ་འདིར་འདུག་མེད་པར་ལུས། སྡེ་མི་ཚོའི་ཁ་ནང་གི་སློབ་ཆེན་པའི་ཐོབ་ཐང་དང་། ཁྱིམ་མི་ཚོའི་སེམས་ནང་གི་ལས་བྱེད་པའི་གོ་སའི་ང་ལ་གནོན་ཤུགས་ཚ་ཡེར་བ་ཞིག་བྱིན། ཨ་མ་གཅིག་པོས་ང་ལ་ཡང་དང་བསྐྱར་དུ“འབྲོག་པ་བྱས་ཀྱང་སྐྱོན་མི་འདུག གཞན་གྱི་ཅི་བཤད་ཡང་ཅི་བཤད། རྒྱུགས་མི་འཕྲོད་མཁན་ཁྱོད་གཅིག་པོ་མ་རེད”ཞེས་གུ་ཡངས་གནང་། འོན་ཀྱང་ང་རང་གཏན་ནས་འབྲོག་པ་བྱེད་མི་འདོད། མོ་རང་ལས་བྱེད་པ་ཞིག་ཡིན་པས། ངས་ཀྱང་མོའི་གོམ་རྗེས་སྙེག་སྟེ་མོ་དང་མཉམ་པོར་འཚོ་བ་རོལ་ན་འདོད། ཡང་ན་ངས་མོ་རང་འབོལ་གདན་ཅན་གྱི་རྐུབ་སྟེགས་ལས་བྱུས་ཏེ་སུག་བཞིའི་སྤུ་ནག་གི་རྗེས་ལ་གཏོང་བ་སེམས་ཀྱིས་མི་ཡོང་། བར་ཤིག ངེད་གཉིས་མཉམ་པོར་མེད་པ་དང་། འཚོ་བ་ལ་བར་ཆད་ཆེ་བ། མོ་རང་ང་ལ་ཡིད་ཆེས་མེད་པ་བཅས་དོན་ཁ་ཤས་ཀྱིས་ངེད་གཉིས་བར་ལ་ཡང་དང་བསྐྱར་དུ་འགལ་བ་ཐོན། མི་སེམས་ནི་སྙི་དྲགས་པས སྐད་ཆ་ཚིག་གཅིག་གིས་ཀྱང་གནོད་འགྲོ་བ་ཞིག་རེད།
དུས་ཚོད་ནི་རྟ་སྲབ་མེད་ཅིག་དང་མཚུངས་པར་ཁད་ཁད་ཀྱིས་འདས་འགྲོ ང་རང་མཐར་ཕྱིན་ནས་ལོ་ངོ་གཉིས་ཙམ་འགོར་ཡང་། གཞུང་ཞབས་ཀྱི་ལས་ཀ་སོགས་གང་ཡང་མ་རག་པར་ཕ་ཡུལ་ནས་ལུག་འཚོས་ཏེ་འདུག་དགོས་ཐུག། མོས་སྔར་བཞིན་རྒྱ་ནག་གྲོང་ཁྱེར་ཁྲིན་ཏུའུ་ནས་གཞུང་ཞབས་ཀྱི་ལས་ཀ་གཉེར་ཏེ་བསྡད། ངས་ཡང་ཡང་རྒྱུགས་སྤྲད་ཀྱང་ཡང་ཡང་ཡིད་ཆད་དང་སྐྱོ་གདུང་གིས་ཁྱེར། ཕ་མ་གཉིས་ཀས་དུས་རྟག་ཏུ་ང་ལ་སྐུལ་ལྕག་གཏོང་བ་དང་སེམས་ཤུགས་བསྩལ། ང་ཀྱང་མོ་ལ་འགྲོགས་འདོད་ཆེ་བ་དང་། ཕ་མ་གཉིས་ཀའི་རེ་བ་སྐོང་འདོད་པ། སློབ་མཐར་ཕྱིན་པའི་འབྲས་རྟགས་ཤིག་ལེན་འདོད་པ་བཅས་ཀྱིས་སྒུལ་ཏེ་རང་གི་རང་ལ་སྙིང་ཕུར་བརྡབས་པ་དང་སེམས་ཤུགས་བསྐྱེད། འོན་ཀྱང་གཞུང་ཞབས་ལས་ཀ་ནི་ནམ་མཁའི་སྐར་མ་བཞིན་ཐོགས་དཀའ་བ་ཞིག་ལ་སྣང་བས། ང་ནི་ཡང་ཡང་ཡིག་ཚད་མ་ལོན་པར་ལུས། བར་ཤིག་ཉེ་འཁོར་གྱི་མི་དག་ང་ལ་ཁོ་ཆད་པ་དང་། མོ་ཡང་ང་ལ་ཁོ་ཆད་ནས། “འུ་གཉིས་ལ་ལས་དབང་མི་འདུག ང་རང་ཁྱོད་དང་འགྲོགས་ནས་ཕྱུགས་འཚོས་ཏེ་འཚོ་བ་རོལ་མི་དཔེ། ”ཞེས་བཤད། མཚམས་འདིར་ངས་གྲོགས་པོ་ཤིག་གི་སྐྱོ་ཡུས་དང་རེ་ཆད་ཀྱི་ཁེངས་བའི་སྐད་ཆ་ཁ་ཤས་བསྙད་པ་དྲན་བྱུང་། འབྲོག་ཁུལ་གྱི་བུ་མོ་ཚོ་འབྲོག་ལས་དཀའ་ཚེགས་ཆེ་བར་སྐྲག་ནས། གྲོང་ཁྱེར་ནང་ཧུར་ཐག་གིས་གནས་བཅའ་བཞིན་ཡོད། ཞོར་ལས་ཀྱིས་ཁ་གསོ་རྒྱབ་ཁེབས་བྱེད་དགོས་ཐུག་ཡང་། ཕྱིར་ཡོང་ནས་ཕྱུགས་འཚོ་བ་ནི་འུ་ཐུག་པའི་བྱ་སྤྱོད་ཞིག་ལ་བརྩི་བཞིན་ཡོད། དེ་བས་འབྲོག་ཁུལ་གྱི་སྐྱེས་པ་མང་པོ་ཞིག་གིས་ཆུང་མ་མི་རྙེད་པར་ལུས་ཡོད་ཟེར། དངོས་གནས་དེ་འདྲ་རང་རེད། བུ་མོ་ཚོས་ཀྱང་རང་ཉིད་སྐྱིད་ས་བདེ་ས་ཞིག་འཚོལ་ཆེད་ལོས་ཡིན། བསམ་ཤེས་ཀྱིས་མོའི་བྱེད་སྟངས་འདི་དང་སྐད་ཆ་དེ་དག་ལ་ངས་ལས་བདའ་བྱེད་མ་མྱོང་ལ། བྱེད་ཀྱང་མི་སྲིད། གལ་སྲིད་མོ་རང་གསེར་རྡོག་རྡོག་ཞིག་ཡིན་ཚེ། རང་ཉིད་ལ་ནུས་པ་ཆུང་བས་གསེར་རྡོག་རྡོག་དེ་བཙོ་སྦྱང་བྱེད་མ་ཐུབ་པས་ཡིན་སྙམ། མོས་ང་ལ་གོ་སྐབས་མང་པོ་བྱིན་པ་རེད། དེ་ངས་ཤེས་ཡོད། བུ་མོ་སུ་ཞིག་གི་ལང་ཚོ་ནི་རིན་མེད་ལ་བཞུར་གྱིན་པའི་ཆུ་དང་གཙང་བོ་རེད། ངས་མོའི་ལང་ཚོ་ལ་ཁག་ཐེག་ཅིག་བྱེད་མ་ཐུབ་ཚེ། བརྩེ་དུང་ཞེས་རྫིག་པོ་བཤད་ས་མེད། རྒྱུ་དངོས་ཀྱིས་ཁག་ཐེག་མེད་པའི་བརྩེ་དུང་ནི་བྱེ་མ་སྤར་མོ་གང་དང་འདྲ་བར་གང་ཡིན་སར་བཞུར་འགྲོ་བ་ཞིག་ཡིན་ངེས། དེ་ཡང་ངས་ཤེས་ཡོད། རང་ཉིད་ལ་ནུས་པ་ཆུང་བ་དང་ལོ་ཟླ་ལ་བརྩེ་བ་མེད་པས། ང་ལ་ཕྱིར་དྲན་ལས་ཅི་ཡང་མ་བསྐྱུར། འོན་ཀྱང་ང་ལ་ཕྱིར་དྲན་འདི་ལས་མི་ཆོག་པ་ཡང་མེད་སྙམ། ཀུན་སྤྱོད་གཙང་ཞིང་། གཞུང་ཞབས་ཀྱི་ལས་ཀ་ཡང་གཉེར་བཞིན་ཡོད་པའི་སྐྱེས་པ་ཞིག་གིས་མོ་ལ་གཅེས་གཅེས་གནང་སྟེ་མོ་རང་སྐྱིད་པོ་བྱུང་ཐུབ་ཚེ། ང་ནི་ལམ་འགྲམ་གྱི་སྡོང་བོ་ཞིག་གི་གྲིབ་བསིལ་བཞིན་བགྲོད་ཀྱིན་པའི་མོ་ལ་དུས་བརྟན་དུ་ངའི་གྲིབ་གཟུགས་ཕོག་མི་ཐུབ་ཀྱང་། སྐད་ཅིག་གི་འདུ་འཛོམས་འདི་དང་བསིལ་སྦྱིན་འདི་ཡང་མི་ཚེ་ཞེས་པའི་ལམ་ཀ་འདིའི་ཁྲོད་ནས་གླེང་རི་བ་ཞིག་ག་ལ་མིན།
ད་ལྟ་ཁྱོད་ནི་ངའི་དྲན་པའི་ཁྲོད་རབ་རིབ་རབ་རིབ་དུ་གྱུར་ཏེ་བཏང་སྙོམས་སུ་ཆགས་ཡོད་ན་ཡང་། ཕྱིར་དྲན་གྱི་ནམ་མཁའ་ལ་འཕུར་བསྐྱོད་ཀྱི་གཤོག་པ་རྡེབ་ཚེ། སྙིང་ནི་གཅུ་གཟེར་གཅུས་པ་ལྟར་ན་ཞིང་ཆུ་ཁོལ་གདུས་པ་ལྟར་ལྷོག་ལྷོག་འཕྱོ།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customizedby Netease
