ཕ་ལོ་ལགས།
མིང་མེད།
ཕ་ལོ་ལགས། གལ་ཏེ་ང་རང་བུ་ཞིག་ཡིན་ན།ངས་ཁྱོད་ཀྱི་ཚབ་ཏུ། གཞིས་ཁྱིམ་གྲུ་བཞིའི་གཡས་ཀྱི་གོང་ནས་བསྡད་ཅིང་། ཤ་ཚ་ཉེ་དུའི་ཁྲོད་ཀྱི་གྲལ་འགོར་བསྒྲིགས་ཏེ། ཕྱོགས་རེས་ཀྱི་བསམ་པ་འཕྲལ་དུ་སྤངས་ཤིང་། ལེ་བརྡ་ཡི་ཚིག་ཟུར་ཁོག་ཏུ་སྦས་ཏེ། ནང་གོ་ཁའི་བཟའ་མིའི་ཁ་འཆམ་གྲོས་ཀྱིས་མཐུན་ཤིང་བརྩེ་བུ་དང་བུ་མོའི་སེམས་འགྱུ་བློ་ཡིས་རྟོགས་སྲིད།
ཕ་ལོ་ལགས། གལ་ཏེ་ང་རང་བུ་ཞིག་ཡིན་ན། ངས་ཁྱོད་ཀྱི་ཚབ་ཏུ།རྟ་རྒོད་པོར་ཁ་ལོ་རྩལ་གྱིས་བསྒྱུར་ཏེ། ཆུ་རི་བོ་མྱུར་མོ་གོམ་གྱིས་གཅོད་སྲིད་ལ། དགུང་ཨ་སྔོན་མཐོན་པོར་སྟོབས་ཀྱིས་འགྲན་ཏེ། སྡེ་ཕྲ་མོར་སྐོར་བ་ལན་གསུམ་རྒྱག་སྲིད།
ཡང་གལ་ཏེ་ང་རང་བུ་ཞིག་ཡིན་ན། རི་གསུམ་མདོ་ནས་ཚོགས་ལ་ཞུགས་ཤིང་། རི་ལམ་ཀྱོག་པོ་འཕྲེད་ཀྱིས་བཅད་དེ། རི་དར་རིང་མོ་རླུང་ལ་བསྐྱོད་ན། ངས་སྐྱེས་ལྷའི་རི་ཆེན་དེ་ལ་བསང་སྔོན་མོ་དགུང་ལ་འཕྱོ་བ། འབོད་སྙན་མོ་བྲག་ལ་ཟུག་པ་ཞིག་གི་བསྟོད་པ་བྱ་སྲིད།
ཕ་ལོ། གལ་ཏེ་ང་རང་བུ་ཞིག་ཡིན་ན། ངས་ཁྱོད་ཀྱི་ཚབ་ཏུ། སྡེ་ཆེན་གྲོང་གི་དོན་དེ་ཕྲག་ཏུ་བླངས་ཤིང་། ཚོ་གསུམ་མདོ་ཡི་གྱོད་དེ་ཞི་བས་འདུམ་སྟེ། སྨྲ་ལྕེ་རྣོན་པོ་ངག་ལ་ཐོགས་པ་དེ་མཚོན་གྱི་གོ་ཆར་བསྒྲིགས་ཤིང་། བློ་སྟོབས་ཆེན་མོ་རྒྱུད་ལ་མངའ་བ་དེ་རུས་པའི་གཏིང་ཏུ་ཟུག་སྟེ། བདེན་པ་ལ་ཁ་མདོག་འབྲི་ཞིང་དྲང་མོ་ལ་རྣོ་རྩེ་ཕུད་སྲིད།
ཕ་ལོ། གལ་ཏེ་ང་རང་བུ་ཞིག་ཡིན་ན། ངས་ཁྱོད་ཀྱི་ཚབ་ཏུ།རྒྱ་ཡན་གྱི་སེམས་པ་ནང་དུ་ཕྱོགས་ཤིང་། བརྗོད་འདོད་ཀྱི་སྨྲ་ལྕེ་ཐུང་དུ་བཏང་སྟེ། མགོན་སྐྱབས་གནས་དཀོན་མཆོག་གཙུག་ཏུ་བཀུར་ཞིང་། ལོ་བརྒྱད་བཅུའི་ལོ་ལོན་སེམས་ཀྱིས་གཅེས་ཏེ། གཞིས་ཁྱིམ་དྲོད་མོ་འདི་བདེ་བས་ཁེངས་ཤིང་སྐྱིད་ཀྱིས་ཕྱུག་ཏུ་འཇུག་སྲིད།
ཕ་ལོ་ལགས། དོན་དུ། སྟག་ཤར་གཞོན་ནུར་སྐྱེས་པའི་ལས་བསོད་མེད་རུང་། རྟ་ཕོའི་བང་རྩལ་འགྲན་པའི་སྤོབས་པ་མེད་རུང་། ཡུལ་ལྷ་གཞི་བདག་འགུག་པའི་བསང་འབོད་མེད་རུང་། དགའ་བའི་གཏམ་གྱིས་མཛེས་པ་གླེང་ན། སྨན་བུ་མོ་གོ་ཁའི་མན་ཡིན་རུང་། ཁྱིམ་ལས་ཀར་སྟག་མོ་དྲེད་ཡིན། བློ་ཐུང་བ་དག་མོའི་ས་ཡིན་རུང་། ནང་ལ་རྒྱ་གནམ་ཁའི་མཐའ་ཡིན།གཏམ་མང་བ་དམད་པའི་གཞི་ཡིན་རུང་། སེམས་འཁྲེལ་གཞུང་རྨ་ཆུའི་རྒྱུན་ཡིན། ཕྱི་མགྲོན་ལ་འགྲོ་བའི་གོམས་མེད་རུང་། གཡང་འབྲི་མོར་འཐབ་པའི་གྲོགས་ཡིན། མདོར་ན། དྲང་ཞིང་བབས་ཆགས།མཛངས་ཤིང་བློ་འགྱུ། བརྟན་ཞིང་རྒྱུན་རིང་།
དེ་བས། ཕ་ལོ་ལགས། སྨན་བུ་མོ་ངས་ཀྱང་། མ་བཟང་བུ་མོའི་རྒྱན་འདི་བཀོལ་ཏེ། གོང་གཙིག་གི་ནོར་བུར་ཕྱག་ཀྱིས་མཇལ་ཞིང་། དྲིན་ཡབ་ཡུམ་ཟུང་གཉིས་སྤྱན་ལྟར་གཅེས་ལ། ནངས་སྔ་མོའི་སྐྱ་རེངས་འགྲན་གྱིས་བསུས་ཏེ། དྲོད་སྐྱིད་ཀྱི་གཞིས་གཅིག་བསྐྲུན་ཞིང་། མར་ཆུར་གྱི་ཟས་སྣ་བསྒྲིགས་ཏེ། གཡང་ལ་ཚོའི་འོ་མས་གུས་ཤིང་རིན་ཆེན་ཟས་རྩམ་པས་མཆོད་སྲིད། སྨན་བུ་མོ་ངས་ཀྱང་རང་ཕན་པའི་ཁ་འདོན་ངག་ནས་གྱེར་ཞིང་། བདེ་སྡུག་གི་ལོ་ཟླར་ཕྱིས་བདར་བྱས་ཏེ། ཕ་ཨ་ཁུའི་དགའ་སྐྱོ་འཚོ་རོགས་བྱས་ཆོག་ལ། གྲོས་འགྲིག་པའི་བློ་ནི་གཟུ་བོར་གནས་ཆོག
སྨན་བུ་མོ་ངས་ཀྱང་ཡབ་མེས་ཚོའི་ལ་རྒྱ་སྲུང་ཞིང་། ཁ་ཏ་ཡི་ཚིག་གསུམ་བརྩིས་ཏེ། དོན་ཆེན་མོ་རི་གཟར་ཆུ་དང་འཕྲད་ན་བློ་མི་འཁུམས་ལ། གཏམ་སྙན་མོ་དབྱར་ཁའི་འབྲུག་ལྟར་གྲགས་ན་གཤིས་མི་གཡོ། བུ་མོ་ངས་ཀྱང་། གཅིག་པུར་སྡོད་ཚེ་སེམས་ལ་བརྟག་ཅིང་། མང་བོའི་ནང་དུ་ངག་ལ་བརྟག་སྟེ་ཡོད་པ་ལ་གཅེས་ཤིང་། མེད་པ་ལ་སྨོན་མི་སྲིད། དེ་བས། ཕ་ལོ་ལགས། བུ་གཅིག་མེད་རུང་། བུ་མོ་ངས་བུ་ངན་བརྒྱ་ཡི་གོ་ཆོད་དེ། གཞིས་ཁྱིམ་དྲོད་མོ་གོར་གོར་བྱས་ཆོག
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
Signature is customized by Netease