དགེ་རྒན་སྐུ་དྲིན་ཅན།
རྩོམ་པ་པོ། མགར་ལྷུན།
དགེ་རྒན་སྐུ་དྲིན་ཅན།
མགར་ལྷུན། མཚོ་ལྷོ།
དུས་ཚོད་ནི་སུན་སྣང་ཆེ་སྐབས་དལ་དྲགས་པར་སྣང་ནའང་། ལོ་དང་ཟླ་བའི་ཧྲག་བར་ནས་མི་ལོ་བཅུའི་དུས་ཡུན་ནི་འཇའ་ཚོན་བཞིན་ཡལ་ཚར། མི་ལོ་བཅུའི་ཡར་སྔོན་དུ་ང་རང་དམའ་འབྲིང་འགྲིམ་བཞིན་པའི་སློབ་མ་ཞིག་ཡིན། དེ་དུས་སློབ་གྲྭའི་འཚོ་བ་ནི་སུན་སྣང་ལྡན་པ་དང་རང་དབང་ལས་མ་འགོང་པ་ཞིག་ཡིན་ཡང་། ད་ཆར་བསམ་ན་སྐབས་དེ་ནི་ཆེས་སྐྱིད་སྣང་ཆེ་བ་དང་སྡུག་སྣང་ཉུང་བའི་དུས་ཚོད་ཅིག་ཡིན་པར་སེམས།
དམའ་འབྲིང་གི་ལོ་ངོ་གསུམ་གྱི་དུས་ཚོད་ནི་ང་ལ་མཚོན་ན་སློབ་ལ་སྦྱངས་བརྩོན་ཆེས་ཆེར་བྱས་པའི་དུས་སྐབས་ཡིན། དེ་དུས་ང་ནི་དགེ་རྒན་ཁོང་གི་སྐུལ་འདེད་དང་སློབ་གསོའི་ངོགས་ནས་ནར་སོན་སྐད། བསམ་བློ་དང་སློབ་སྦྱོང་། ཀུན་སྤྱོད་དང་མི་གཤིས་སོགས་ལ་འགྱུར་བ་ཆེན་པོ་ཞིག་བྱུང་།
དགེ་རྒན་ཁོང་ནི་ང་ཚོའི་འཛིན་གྲྭའི་སྐད་ཡིག་དགེ་རྒན་ཡིན། ངའི་བག་ཆགས་ཀྱི་ཆེས་ཟབ་ས་ན་འབོར་ཐབས་མེད་པ་ནི་ཁོ་རང་ཐོག་དང་པོར་མཐོང་དུས་རེད། སྐབས་དེར་ང་དམའ་འབྲིང་དུ་ཞུགས་མ་ཐག་ཡིན། ཐེངས་སྔོན་མའི་འབྲིང་རྒྱུགས་ཁྲོད་ཁུལ་ཡོངས་ཀྱི་རྒྱུགས་འབྲས་འབུར་དུ་ཐོན་པའི་དགེ་རྒན་དག་ལ་བྱ་དགའ་གནངས་བའི་ཚོགས་འདུ་ཞིག་གི་སྟེང་དུ་སློབ་གཙོས་དགེ་རྒན་ཁོང་གི་མཚན་ནས་བོས་ཏེ། “ཁུལ་ཡོངས་ཀྱི་སྐད་ཡིག་གི་ཨང་དང་པོ་རེད” ཅེས་པར་མི་ཚོགས་ཀྱི་ཐལ་མོའི་རྡེབ་སྒྲའི་ཁྲོད་ནས་ཤེལ་མིག་ནག་པོ་བརྒྱབ་པའི་ཕོ་སྐྱེས་ཤིག་གར་སྟེགས་སྟེང་དུ་སོང་ནས་བྱ་དགའ་ལེན་པའི་རྣམ་པ་རེད། མ་ཟད་འཛིན་གྲྭར་སློབ་ཁྲིད་རེའུ་མིག་ཅིག་ཐོན་པ་དང་དེའི་སྟེང་དུ་ཁོང་ནི་ང་ཚོའི་སྐད་ཡིག་དགེ་རྒན་ཡིན་པ་མཐོང་མ་ཐག སློབ་གྲོགས་དག་གིས་སྐད་ཡིག་དགེ་རྒན་དེ་བཙན་པོ་ཞེ་དྲག་འདུག་ཅེས་འུད་སྒྲོགས་མང་དུ་བྱེད། ཆེས་ཐོག་མའི་སྐད་ཡིག་སློབ་ཐུན་དེར་ཁོག་གིས་ང་ཚོ་ལ་སློབ་ཁྲིད་མ་བྱས་པར་ཁོ་རང་ཉིད་ངོ་སྤྲོད་དང་ལོ་དུ་མའི་སློབ་ཁྲིད་ཀྱི་ཉམས་མྱོང་། སློབ་ཁྲིད་སྐབས་ཀྱི་སྒྲིག་ལམ་སོགས་དང་། དེ་མིན་ཁོང་ནི”ཁྲོས་ན་རྟ་མགྲིན་དམར་པོ་དང་། མ་ཁྲོས་ཐུགས་རྗེ་ཆེན་པོ་ཡིན” ཞེས་གཏམ་དཔེ་ཞིག་བཞག་པ་དེ་ཡང་ཡིད་ངོགས་སུ་ད་རུང་མ་སུམ་མ་ནོག་པར་གནས།
ཁོང་གིས་བཤད་ན་ཁོ་རང་བྱ་བའི་ལས་རྐང་དུ་ཞུགས་ནས་ལོ་བརྒྱད་ལྷག་འདས་ཟིན། ལོ་བདུན་གྱི་ཡུན་དུ་དམའ་གསུམ་རྐྱང་རྐྱང་བསྐྱངས་བ་ཡིན། ཡིན་ཡང་ད་རེ་སློབ་གྲྭས་དམའ་གཅིག་ལ་བགོས་པས། ཁྱོད་ཚོ་ད་ནས་བཟུང་སློབ་སྦྱོང་གི་དུས་ཚོད་དམ་དུ་འཛིན་འཆར་ཡིན་ཟེར། ཁོང་གིས་སློབ་ཁྲིད་ལ་འཆར་གཞི་འཐུས་ཚང་ཞིག་བཟོ་བར་མ་ཟད། སློབ་ཁྲིད་སྐབས་སུ་ཁོ་རང་གི་འཚོ་བའི་ཉམས་མྱོང་རྟག་ཏུ་གླེང་བར་བྱེད། དུས་རྒྱུན་དུ་ཁྱོད་ཅག་སློབ་ཁྲིད་སྐབས་སྤྲོ་བ་འཕེལ་དུ་འཇུག་རྒྱུ་ནི་གལ་འགངས་རབ་ཏུ་ཆེ། ཁྲིད་སྟེགས་གར་སྟེགས་དང་། དགེ་རྒན་འཁྲབ་སྟོན་པ། སློབ་མ་དག་ལྟ་མཁན་ལྟ་བུ་ཡོང་དགོས་ཟེར། ངོ་མ་དེ་ལྟ་ཡིན་ཏེ། ཁོང་ལ་གསལ་དག་སྙན་གསུམ་གྱི་སྨྲ་ལྕེ་ཡོད་ཁར་ལག་པས་ཕྱག་རྒྱ་དེས་ངེད་ཅག་སློབ་མ་ཚོའི་སེམས་ལ་སྤྲོ་བ་ཆེན་པོ་ཞིག་ངང་གིས་འཚངས་པར་བྱེད། དེ་བས་སྐད་ཡིག་སློབ་ཁྲིད་ལ་རེ་ཞིང་སྒུག་དགོས་པ་ཞིག་དང་། སྐད་ཡིག་སློབ་ཁྲིད་ཀྱི་དུས་ཚོད་རྟ་རྒོད་ལ་གཤོག་པ་ཐོགས་པ་ལྟར་ཤིན་ཏུ་མགྱོགས་སྣང་སྐྱེ་བར་མ་ཟད་ཁོང་གི་སློབ་ཁྲིད་ནི་རྒྱ་གར་གྱི་གློག་བརྙན་ལས་ཀྱང་ཡིད་དབང་རབ་ཏུ་ཕྲོག་སྣང་སྐྱེ།
དག་ཡིག་དང་སུམ་ཅུ་པ། སྙན་ངག་དང་བསྡུས་གྲྭ་སོགས་དམའ་འབྲིང་གི་ཤེས་བྱ་རྣམས་བུམ་པ་གང་བྱོའི་ཚུལ་གྱིས་ང་ཚོའི་ཁ་གསེང་རུས་གསེང་ལ་བཞག་པར་མ་ཟད། མཐོ་འབྲིང་གི་ཤེས་བྱ་སྟེ་རྟགས་འཇུག་གི་དུས་གསུམ་སོགས་ཀྱང་ང་ཚོ་ཁ་གསལ་སྨྲ་དག་གིས་ཁྲིད་པར་བྱེད། དེ་མིན་ང་ཚོའི་ཟིན་བྲིས་འདེབས་སྐབས་ཁོང་གིས་བཏོན་ཏེ་ང་ཚོས་འབྲི་བ་ལས་ཁོང་གིས་སྒོ་སམ་སྟེང་དུ་མི་འབྲི། དེའི་རྗེས་སུ་མི་རེ་རེའི་ཟིན་བྲིས་བཏབ་པར་ཞིབ་ཏུ་བལྟས་ནས་ཡིག་ནོར་བཅའ། དེ་ལྟར་བྱས་ན་སློབ་མ་ཚོའི་ཡི་གེ་དག་ཆ་ལ་ཕན་པ་ཆེན་པོ་ཡོང་ཟེར།
དེ་མིན་སློབ་ཁྲིད་དང་འབྲེལ་ཏེ་ཁོང་གིས་ང་ཚོ་ལ་བོད་ཀྱིད་ལོ་རྒྱུས་དང་། མེས་པོའི་བཀའ་དྲིན། བོད་ཀྱི་དམངས་སྲོལ། འཇིག་རྟེན་མི་ཆོས། དེང་གི་སྲིད་ཇུས། སྐབས་སྐབས་ཀྱི་གསར་འགྱུར་སོགས་ནམ་ནམ་ཞར་ཞར་དུ་འཆད། དེ་ལས་ང་ལ་བག་ཆགས་ཆེས་ཟབ་པ་ནི་སྐབས་ཤིག་ཏུ་ཁོང་གིས་ང་ཚོ་ལ་རྒྱལ་ཕྱིའི་གསར་འགྱུར་ཅིག་བཤད་པ་དེ་རེད། “མ་ལེ་ཞི་ཡ་རྒྱབ་ཁབ་ཀྱི་གནམ་གྲུ་ཞིག་སར་ལྷུང་ནས་མི་མང་པོ་བསད་འདུག་པས། ད་སྐབས་ཚང་མས་གནམ་གྲུ་དེ་བཙལ་བཞིན་པའི་སྒང་རེད”ཟེར། ང་ཚོས་དུས་གཅིག་ཏུ”དགེ་རྒན། དེ་ནས་གནམ་གྲུ་དེ་རྙེད་ཡོད་དམ” ཞེས་པར། “ད་དུང་རྙེད་མ་བྱུང་། གལ་སྲིད་རྙེད་པའི་གསར་འགྱུར་ཐོས་ཚེ་ཁྱོད་ཚོར་བཤད་ངེས་ཡིན” ཟེར།
ཕྱི་ཉིན་སྐད་ཡིག་སློབ་ཁྲིད་སྐབས་དགེ་རྒན་ཁོང་སློབ་ཁང་དུ་འཛུལ་མ་ཐག་ང་ཚོས་འགྲིན་གཅིག་ཏུ”དགེ་རྒན། མ་ལེ་ཞི་ཡའི་གནམ་གྲུ་རྙེད་བྱུང་ངམ” ཞེས་པར། ཁོང་གིས” རྙེད་མ་བྱུང་། རྙེད་མ་བྱུང” ཞེས་ཐེངས་གཉིས་ལ་འཕྲོ་རུང་འཕྲོར་བཤད། ཉིན་དེ་དག་ཏུ་ངེད་འཛིན་གྲྭའི་སློབ་གྲོགས་དག་གི་གླེང་གཞིའི་ཁྲོད་དུའང་མ་ལེ་ཞི་ཡའི་གནམ་གྲུ་གང་དུ་ལྷུང་སོང་བ་ཡིན་ནམ། ཕྱིའི་རྒྱ་མཚོའི་ནང་དུ་ལྷུང་སོང་ངམ། ཞེས་སློབ་ཁང་གི་གྱང་ལྡེབས་སུ་བཀལ་བའི་འཛམ་གླིང་ས་བཀྲའི་སྟེང་དུ་མཛུབ་མོས་འདེད། ངས་ནི་སྐབས་དེར”མ་ལེ་ཞི་ཡ” ཞེས་པའི་རྒྱབ་ཁབ་ཐོག་མར་ཐོས་པ་ཡིན་ལ། སློབ་གྲོགས་གཞན་དག་ཀྱང་ཕལ་ཆེར་དེ་ལས་མ་འདས་པ་འདྲ། རྗེས་ཀྱི་འཚོ་བའི་ནང་ནས”མ་ལེ་ཞི་ཡ” ཞེས་པ་ཐོས་མ་ཐག་སྐབས་དེའི་རྣམ་པ་དྲན་པ་དང་། ས་བཀྲའི་ངོས་ཀྱི་མ་ལེ་ཞི་ཡ་རྒྱལ་ཁབ་ཀྱི་ཆགས་དབྱིབས་དེ་ཡང་མིག་ལམ་དུ་ཡང་ཡང་འཆར།
དེ་ལྟར་དམའ་གཅིག་དང་དམའ་གཉིས་ཀྱི་ལོ་ཟླ་དག་ཅི་བྱུང་འདི་བྱུང་མ་ཤེས་པར་འདས་སོང་དུ་གྱུར་བ་དང་། དམའ་གསུམ་དུ་སླེབས་མ་ཐག་ཁོང་གིས་ལོ་གཅིག་གི་ཡུན་དུ་ནམ་གུང་གི་ཆུ་ཚོད་ལྔའི་སྔོན་ལ་སླེབས་ནས་བློ་སྐྱོར་དང་རང་སྦྱོང་བྱེད་དགོས་པ་མ་ཟད། ཁོ་རང་ཡང་ལོ་གཅིག་འདིའི་ཡུན་ལ་དུས་ལྟར་མ་ཆད་མ་ལྷག་པར་སླེབས་ཐུབ་པར་དམ་བཅའ་བྲག་འདྲ་བ་བཞག རྗེས་སུ་སློབ་གྲོགས་འགའ་རེ་དུས་ལྟར་མ་སླེབས་པའི་གནས་ཚུལ་ཡོད་ནའང་། ཁོ་རང་ཉིན་གྲངས་སུམ་བརྒྱ་དྲུག་ཅུའི་ཉིན་གཅིག་ལའང་མ་འགྱངས་མ་འཕྱི་པར་ང་ཚོའི་སློབ་སྦྱོང་ལ་མཐུན་རྐྱེན་མང་དུ་བསྒྲུབ་མྱོང་།
མི་ལོ་གསུམ་རྒྱབ་ཏུ་བསྐྱུར་ནས་སྐད་ཡིག་གི་ཆེས་མཇུག་མཐའི་སློབ་ཐུན་དེར་ཁོང་གི་ང་ཚོ་མི་རེ་རེའི་སྟེང་གི་དགེ་སྐྱོན་སོགས་བཤད་ཅིང་། བཟང་བ་རྒྱུན་སྐྱོང་རྒྱུ་དང་ངན་པ་བཅའ་དགོས་ཚུལ་ནན་གྱིས་བཤད། སྐབས་རེར་ཁོ་གིས་ང་ཚོ་བློས་མི་ཐོངས་བའི་རྣམ་འགྱུར་གྱིས་སློབ་གྲོགས་རེ་རེའི་གདོང་ལ་ཞིབ་ཏུ་ལྟ་ཞིང་།ལན་རེར་སྒོ་སམ་ངོས་སུ་ཅེར་ནས་སྨྲ་མེད་ངང་འདུག སློབ་གྲོགས་དག་གིས་ཀྱང་མགོ་བོ་དུད་ནས་མིག་ཆུ་འབྱིད་ཅིང་། ཁུ་སིམ་སིམ་གྱི་སློབ་ཁང་དེར་ཆུ་ཚོད་འཁོར་ལོའི་སྐར་ཆའི་ཐག་སྒྲ་དང་དབུགས་ཀྱི་འབྱིན་རྔུབ་ཕྲན་བུ་ཞིག་ལས་གྲགས་འགུལ་ཅི་ཡང་མི་གདའ། དེ་ཙ་ན་དགེ་རྒན་ཁོང་གིས་ཅི་ཞིག་བཤད་འདོད་ཀྱི་འདུན་པ་སྐྱེས་ཀྱང་མགྲིན་པ་བརྣངས་བྱུང་བས། དུས་གཅིག་ཏུ་མིག་ཆུའི་ཐིག་པ་ཞིག་འཁུར་བ་ནས་ག་ལེར་ས་རུ་ལྷུང་བར་བསྟུན། སློབ་གྲོགས་དག་གི་སེམས་ཀྱི་སྐྱོ་བ་མ་ནོན་པར་ངུ་སྔགས་འབྱིན་བྱུང་། སྐབས་དེར་ཕྱི་རོལ་ནས་རླུང་བུ་ཐོལ་གྱིས་ལྡང་ཡོང་ནས་དགེ་རྒན་མདུན་གྱི་དཔེ་དེབ་ཀྱི་ཤོག་ལྷེ་རེ་རེ་ཕར་ཚུར་ལ་བསྐྱོད་པ་དང་། སློབ་ཁྲིད་ཀྱི་གྲོལ་བརྡ་རྣ་བར་གཟན་པ་དེས་ང་ཚོའི་ཆེས་མཇུག་མཐའི་སློབ་ཁྲིད་དེ་ལ་བཞི་ཤད་བྲིས་པར་བསྡེབས་ནས། དགེ་རྒན་ལགས་བསམ་དབང་དྲན་དབང་མེད་པར་ཕྱི་རུ་བུད་སོང་། ང་ཚོས་མགྲིན་གཅིག་ཏུ”དགེ་རྒན”ཞེས་བོས་པར་དགེ་རྒན་གྱིས་གོམ་མཚམས་རེ་ཞིག་བཞག་ནའང་། དེ་མ་ཐག་ཕྱིར་བལྟས་ཙམ་ཡང་མེད་པར་ང་ཚོ་དང་རིང་དུ་བཞུད།
ལོ་གསུམ་རིང་གི་སྐྱིད་སྡུག་མཉམ་མྱོང་ཁྲོད་དུ་ངེད་ཅག་གི་སེམས་སུ་དགེ་རྒན་ཁོང་ནི་དྲོད་དང་འོད་ཀྱི་ཕུང་པོ་ཉག་ཅིག་སྟེ། ཁོང་ལ་བཅངས་བའི་བརྩེ་སེམས་ནི་ལྷད་དང་བྲལ་བ་ཞིག་ཡིན་ལ། མ་ཟད་ཁོང་གི་རྣམ་དག་དང་ལྷག་བསམ་གྱི་སེམས་པས་ང་ཚོ་ལ་ཡལ་མེད་ཀྱི་རེ་བ་ཆེན་པོ་ཞིག་བཞག་ཡོད་པ་གདོན་མི་ཟ།
ད་ནི་མི་ལོ་བཅུའི་ལོ་ཟླ་མཐའ་དག་འདས་སོང་དུ་གྱུར་ནའང་། དགེ་རྒན་ཁོང་གི་ཐུགས་རྗེ་དང་སྐུ་དྲིན་ངའི་ཤ་རུས་རྐང་གསུམ་དུ་ཐིམ་སོང་བ་ལྟར་བརྗེད་པའི་དུས་ནི་ཕྲན་ཙམ་མི་གདའ། ཁོང་གི་སྐུ་དྲིན་མི་ལོ་བཅུའི་ཆར་རླུང་ཙག་གསུམ་གྱིས་གཞོམ་མ་ནུས་པར་ད་དུང་ལ་ལུང་ཀུན་ཏུ་ཁྱབ་པའི་ང་དང་ངའི་སློབ་གྲོགས་ཚོ་སེམས་ན་ཉི་མའི་འོད་ལྟར་གསལ། དེ་བས་ཁོང་ནི་ངེད་ཅག་ལ་སྐུ་དྲིན་རབ་ཏུ་ཆེ། བཀའ་དྲིན་ཤིན་ཏུ་མཐོའོ།།
༢༠༢༢-༣-༡༧ལ་སྦྱར།
རྩོམ་སྒྲིག་པ། བསམ་འགྲུབ་རྒྱལ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
