ཆ་མི་སྙོམས་པའི་འཇིག་རྟེན་ཞིག་ནས་ཨ་མ་དྲན་པ།

    རྩོམ་པ་མོ། སྨིན་ལེགས་མ།

ཆ་མི་སྙོམས་པའི་འཇིག་རྟེན་ཞིག་ནས་ཨ་མ་དྲན་པ།  
 
          
སྨིན་ལེགས་མ། 

     ཨ་མ་ལགས།  ཁྱོད་ཀྱིས་ངའི་འཇིག་རྟེན་ལ་གྲང་ལྷགས་ཀྱིས་ཟད་བཞིན་པའི་ཉི་གཞོན་ཞིག་བརྐྱངས་དོན་ཅི་ཡིན། མཐའ་འཁོར་གྱི་མི་ཚོགས་འདི་ཡིས།  རང་ཉིད་ཀྱི་དངུལ་ཁུག་བོར་སོང་བ་བཞིན་རྒྱ་མཚོའི་གཏིང་དང་།  རི་རབ་ཀྱི་རྩེ།  གངས་མཐའ་ཡི་ཀློང་ན།  རང་ཉིད་ཁོ་ནའི་དོན་དུ་རྒྱུག་བཞིན་འདུག  འོན་ཀྱང་། ཨ་མ་ལགས།  ཁྱོད་ཉིད་དེ་ལས་ལྡོག་སྟེ།  བུ་མོ་ང་ལ་དྲོ་འཇམ་གྱི་གནས་མལ་ཞིག་བཙལ་ཆེད་ལྷ་ཆེན་ལ་མཆོད་ཕྱག་འབུལ་ཞིང་དཔོན་ཆེན་ལ་གུས་འདུད་ཞུས་ཤིང་།  བུ་མོ་ང་ལ་གྲང་ངར་ལས་ལྡོག་པའི་བདེ་གྲོང་གི་མཁར་རྫོང་ཞིག་འཛུགས་དོན་ཅི་ཡིན།  ཨ་མ་ལགས།  དྲིན་ལྡན་གྱི་མ་ཡུམ། སྒེག་ཉམས་ཀྱིས་ཕྱུག་པའི་ལང་ཚོ་འདི་ཉིད་ང་ཡི་དོན་དུ་རྒས་ཤིང་ཉམས་པར་གྱུར་ཀྱང་། ནག་ནོག་གི་སྐྲ་ལོ་དེ་ང་ཡི་དོན་དུ་དཀར་པོར་གྱུར་ཀྱང་།  ད་དུང་ཡང་ཕངས་སེམས་རྡུལ་ཙམ་ཡང་མེད་པར་ང་ལ་སྙིང་ཉེ་ཉེ་དང་ཤ་ཚ་ཚ་བྱེད་མཁན་ཨ་མ་ཁྱོད་ཡིན།
 
     སྙིང་རྗེ་ཡི་གཤིས་སུ་གྲུབ་པའི་ངའི་འཇིག་རྟེན་ལ་འོད་སྣང་སྦྱིན་མཁན་གྱི་ཨ་མ་ལགས།  ཁྱོད་ལ་མཚོན་ན་རྨི་ལམ་ལས་ལོགས་སུ་གྱེས་པའི་འཚོ་བ་དག་ནི།  བུ་མོ་ངའི་དོན་དུ་དཀའ་སྡུག་གི་འཚོ་བ་ཁོ་ན་ཡིན་ངེས།  བུ་མོ་ངའི་དོན་དུ་ཡོད་ཚད་ཇི་ལྟར་ཟད་པའང་མ་ཤེས་པར་ཁྱོད་ཀྱི་སྐྲ་ལོའི་ཁ་དོག་དེ་དཀར་པོར་གྱུར་ནས་ན་ཚོད་མཐོ་རུ་སླེབས་སོང་། ད་རུང་ཡང་དངུལ་མདོག་གི་ཟླ་བ་མཁའ་དབྱིངས་ནས་ཚེས་པ་བཞིན་འཛུམ་དམུལ་དམུལ་གྱི་ངོ་གདོང་དེ་ད་རུང་མ་ཉམས་པར་ང་སར་གཏད་འདུག  ཨ་མ་ལགས།  ཁྱོད་ཀྱི་གཞོན་པའི་ལོ་ཟླ་ནི་འཇའ་ཚོན་བཞིན་ཡལ་ན་ཡང་།བྱམས་བརྩེའི་ཨུཏྤལ་དམར་པོ་ད་དུང་མ་ཉམས་པར་ཇེ་ཡག་དང་ཇེ་མཛེས་རེད། འཁོར་བ་མྱ་ངན་གྱི་ཐང་ཆེན་འདི་ཉིད་སྐད་ཅིག་ཉིད་ལ་ཁ་དོག་སྣ་ལྔ་རུ་གྱུར་ན་ཡང་། ཨ་མ་ཁྱོད་ཀྱི་ཐུགས་བརྩེ་ནི་འགྱུར་བའི་རང་བཞིན་མེད་པར་ང་ལ་རྣམ་ཀུན་ཏུ་སེམས་ཁུར་དང་ཐུགས་རྗེས་གཟིགས་ཡོད། དྲིན་ལྡན་གྱི་ཨ་མ་ཁྱོད་ནི་བུ་མོ་ང་ཡི་འདི་ཕྱི་ཡི་སངས་རྒྱས་གསོན་པོ་དེ་ཡིན། ངས་རྣམ་པ་ཀུན་ཏུ་ཁྱོད་ལ་གསོལ་བ་འདེབས་ཀི་ཡོད།
 
      ཨ་མ་ལགས། ཟླ་དགུར་དྲིན་གྱིས་བསྐྱངས་པའི་མ་ཡུམ། ངས་ཁྱོད་ཉིད་དྲན་བཞིན་ཡོད། སྨྲ་བསམ་བརྗོད་འདས་ཀྱི་སྐད་ཆ་ཞིག་བཤད་ན། མཐའ་མེད་པའི་འཇིག་རྟེན་འདིར་གཞོན་དུས་ཀྱི་བརྩེ་དུང་ལ་མགོ་བོ་འཁོར་བཞིན་པའི་མི་ཚོགས་འདི་ལན་ཅིག་མཐོང་དུས། ངས་ཨ་མ་ཁྱོད་ཀྱི་བརྩེ་བ་དེ་བརྩེ་བ་ཡིན་པ་གཞི་ནས་ཤེས་སོང་། མི་ཚོགས་འདི་ཡི་བརྩེ་དུང་ལ་ཞེན་ཁ་ལོག་སོང་། གྲུ་ཁུག་ལ་གྲུ་ཁུག་བཞག་ནས་འགྲོ་བཞིན་པའི་གཞོན་པ་འདི་ཚོའི་བརྩེ་དུང་ནི། སྐྱེ་གཟུགས་དང་ཁ་མཁས་མིན་ན་ཐོབ་སྐལ་མི་འདུག རྒྱུ་འབྱོར་དང་དབང་ཆ་མེད་ན་ལོན་རབ་མི་འདུག ཤེས་ཡོན་དང་བསམ་བློ་མེད་ན་མྱོང་རབ་མི་འདུག ཨ་མ་ལགས། ཁྱོད་ཀྱིས་བཅིངས་བའི་བརྩེ་དུང་ནི་དེ་ལས་ལྡོག་སྟེ། རྒྱུ་འབྱོར་དང་དབང་ཆ་ཡག་སྡུག་དང་ཤེས་ཡོན་གང་ཡང་མི་དགོས་པར་མཁའ་དབྱིངས་སུ་ཟླ་འོད་བཞིན་འཆར་ཡོད། ཨ་མ་ལགས། གལ་སྲིད་ཁྱོད་ཉིད་མེད་ན་འཇིག་རྟེན་གྱི་ཚ་ཟེར་དེས་བསྐལ་བ་ཡ་ཐོག་ཞིག་ནས་ང་རང་མེད་པར་བྱས་ཟིན། ང་ལ་ཟླ་འོད་བཞིན་འཆར་བའི་བདེ་དྲོ་འདི་གང་ཞིག་ནས་ཡོང་།  
 
     ཨ་མ་ལགས། ཁྱོད་རང་བདེ་མོ་ཡིན་ནམ། ད་ནི་དགུན་མགོ་ཚེས་སོང་། ཨ་མ་ཁྱོད་ཀྱིས་ལུས་ལ་དྲོ་འཇམ་འཚམས་པའི་ལྭ་བ་གྱོན་རྒྱུ་མ་བརྗེད། ཁ་བ་ནི་དལ་གྱིས་སྲིད་པ་འདིར་གཅིག་འཐོར་གཉིས་འཐོར་བྱས་ནས་འབབ་བཞིན་པའི་དུས་མཚུངས་སུ། སེམས་བསམ་པའི་གཏིང་རུམ་ན་ཡོད་པའི་དྲིན་ལྡན་གྱི་ཨ་མ་ལྷག་པར་དྲན་སོང་། བུ་མོ་ང་རང་གི་བདེ་སྡུག་སྐོར་ལ་སེམས་ཁུར་བྱེད་མཁན་གྱི་ཨ་མ་ལགས། ང་ནི་ཕ་ཡུལ་དང་ཁ་བྲལ་ནས་དུས་ཡུན་རིང་བོ་ཞིག་འགོར་སོང་། ཕ་ཡུལ་དང་ཁ་ཐག་རིང་བའི་ཡུལ་གྲུ་འདི་ནས།  ངས་དྲིན་ལྡན་གྱི་ཨ་མའི་བཀའ་དྲིན་དང་བྱམས་སེམས་བརྗེད་ཐབས་མེད་པས། ཨ་མ་ཁྱོད་ལ་འཕྲིན་ཡིག་འདི་སྐུར་དགོས་ཐུག་སོང་། ཁྱེད་རང་ཐུགས་བདེ་མོ་བྱོས་དང་བུ་མོ་ང་རང་བདེ་མོ་སྐྱིད་པོ་ཡིན། 

                              རྩོམ་སྒྲིག་པ། མྱི་གསར་བ།
           མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།

Signature is customized by Netease