སྙན་ངག་པ།
རྩོམ་པ་པོ། བཟི་བོ།
སྙན་ངག་པ།
བཟི་བོས།
སྙན་ངག་པ། ལྷས་བཏང་བའི་མངོན་མཁྱེན་པ་དེ་ཁྱེད་ཡིན་ལ། བླུན་རྨོངས་ཀྱི་མིག་ནང་གི་ལྷའི་སྒྲོན་མ་དེ་ཡང་ཁྱེད་ཡིན། ཁྱོད་ཀྱིས་བླུན་རྨོངས་དེ་དག་གི་ང་རྒྱལ་དང་ཁྲེལ་གཞུང་ངོ་ཚ་རྣམས་ལ་ཞེ་མི་ཁྲེལ་འམ། ཁྱོད་ཀྱི་མགོ་ཐོག་ན་ཡོད་པ་ནི་གནམ་སྔོན་པོ་ཁོ་ན་ཡིན་ལ། ཁྱོད་དང་འགྲན་བཟོད་པ་ནི་ཤེས་བྱའི་ཁམས་ན་བཙལ་ཡང་མེད། དེ་བས་ཁྱོད་ཀྱི་མགོ་འཕང་དེ་ཡར་འགྱོག་ནས་བླུན་རྨོངས་དེ་དག་གི་བྱ་སྤྱོད་ལ་ལད་མོ་མ་བྱེད།
སྙན་ངག་པ། ཁྱོད་ཀྱིས་ཚོར་བའི་དར་སྐུད་རོལ་དབྱངས་འཐུམས་དེ་གླུ་དབྱངས་ལེན་གྱིན་འདུག འོན་ཏེ་བརྩེ་བ་མེད་པའི་ང་རྒྱལ་ཅན་གྱི་མི་ཚོགས་འགའ་ཞིག་གིས། ཅི་ཡང་མི་སྙམ་པར་ཁྱོད་ཀྱི་གླུ་དབྱངས་ལ་རྣ་བ་བླགས་ཀྱིན་འདུག ཁོ་ཚོས་སྨྲས་པ་"གླུ་དབྱངས་དེའི་ཚིག་དང་བརྗོད་བྱ་གང་ཐད་ནས་ང་ཚོ་དང་འབྲེལ་བ་མེད་པས། གླུ་དབྱངས་དེ་ཕལ་བ་རེད"ཟེར། དེ་བས་ཁྱོད་ཀྱི་དྲི་ཟའི་གླུ་དབྱངས་དེ་རྒྱལ་ཁམས་ལ་བསྒྲག་དགོས་ཀྱི། ཁོ་ཚོས་དང་འབྲེལ་འདྲིས་མང་དྲགས་ན་རོམ་མོའི་དེའི་རོལ་སྐུད་ཆད་ངེས།
སྙན་ངག་པ། ཁྱོད་ནི་སྡུག་པའི་བྲན་གཡོག་དང་ལྟོ་གོས་ཁོ་ནའི་ཕྱིར་ཏུ་གསོན་ན། གནམ་ཀྱི་སྲས་པོ་དེ་ག་ལ་ཡིན། ཁྱེད་ཅག་གིས་ཁེ་ཕན་གྱི་ཆེད་དུ་མདོ་མེད་ཀྱི་སྡུག་མོ་གཞན་ལ་བསྐུར་ནས་དབྱངས་ཅན་མའི་མགུལ་རྒྱན་རྐུས་ན། སྙན་པ་ངག་པ་ག་ལ་ཡིན། དེ་བས་གསུང་མགུར་རེ་རེའི་གསེབ་ནས་མི་སེམས་ལ་དག་ཞིང་ཞིག་བསྐྲུན་ནས། དད་མེས་ལ་མཐོ་བར་བྱས་ན་འོས་ལེགས། ཀུ་རེ་རྩེད་ཤེས་ན་བླུན་རྨོངས་པ་དེ་སྙན་ངག་པ་རྣམས་རེད། ༡༩ ༣ ༡༩
རྩོམ་སྒྲིག་པ། མྱི་གསར་བ།
