སྟོན་མཇུག་གི་རླུང་།
རྩོམ་པ་པོ། འབྲོག་སྨྱུག
སྟོན་མཇུག་གི་རླུང་།
འབྲོག་སྨྱུག རྨ་ལྷོ།
འགྲུལ་བཞུད་ཅིག་གི་སྣེ་རུ་སྟོན་མཇུག་གི་རླུང་བུ་དཀྲིས་ཏེ་གངས་རི་དང་རྩྭ་ཐང་དུ་ལོག་དུས། ཁྱེད་རང་སྦྲང་དཀར་རྩམ་པའི་དྲི་ངད་བསྣམས་མཁན་གྱི་གནས་མལ་དྲོད་མོ་ཞིག་སྟེ། ཡང་ན་གཉིད་ལྕོག་རྒྱག་བྱེད་ཀྱི་རོལ་དབྱངས་སྙན་མོ་ཞིག ཁྱེད་ཀྱི་པང་ལ་ལོག་དུས་མེ་ཕུང་སྐོར་བྲོ་འཁྲབ་ཀྱིན་ལྷིང་འཇགས་ལ་བསྙལ། སྟོན་མཇུག་གི་རླུང་ལ་བཅིབས་ཏེ་མཚོ་མཐའི་རླུ་བུ་བསིལ་བསིལ་གྱི་ཁ་རུ་སླེབས་ན། མཚོ་མོ་ལྟེམས་ལྟེམས་ངང་དགའ་སྐྱོ་ཡིས་གཏིང་མཐའ་མི་མངོན་པར་བྱས། གསེར་གྱི་གླིང་ཕྲན་སྟེང་གི་ལྷིང་འཇགས་དང་མཛེས་སྡུག ཉི་མའི་གྲོང་གི་འོད་སྣང་དང་མཁའ་དབྱིངས་མཐའ་དག་མཚན་མོའི་མུན་ལ་འཐིམ། སྟོན་མཇུག་གི་རླུང་བུས་ཤ་གསེང་རུས་གསེང་ལ་གཡབ་གཡུག་བྱེད་ཀྱིན་ཚོར་བའི་སྒོ་ཟྭ་རེ་རེ་ཐྲིག་ཐྲིག་ཕྱེས་དུས། སྙན་ངག་ནི་ཉི་མའི་གྲོང་གི་བྱ་ཁྱུ་བཞིན་ཕྱོགས་ཕྱོགས་སུ་མཆེད་ནས་ཆེས་རིང་བའི་འགྲུལ་བཞུད་ཅིག་བརྩམས་ཕྱུང་། བརྟན་བརླིང་གི་རི་ཚོགས། རྒྱང་བཞུར་གྱི་ཆུ་བོ། འདས་མ་ད་གསུམ་གྱི་གཏམ་རྒྱུད་རེ་རེ་སྙན་ངག་གི་འགྲུལ་བཞུད་ཁྲོད་དུ་མཐོང་ཐུབ། ཚོར་བའི་རྩིག་ལྡེབས་སུ་འབྱར་ཞིང་དྲན་པའི་མེ་ལོང་ལས་འཆར་ཐུབ།
ཁེར་རྐྱང་གི་གནས་མལ་འཚོལ་བའི་ཕྱེ་ལེབ་ཁྱུ་ཞིག་གི་མཁའ་དབྱིངས་སུ་སྟོན་མཇུག་གི་རླུང་བུ་བསིལ་བསིལ་ལྡང་བྱུང་། ཕྱེ་མ་ལེབ་ཀྱི་གཞས་གཏོང་ཚུལ་ནི་ཤིན་ཏུ་མི་འདྲ་སྟེ། ཕྱོགས་གཅིག་གིས་མཚན་མོ་གཏོང་ལ་གཅིག་ཤས་ཀྱིས་ཉིན་མོ་གཏོང་བར་བྱེད། ཁོ་ཚོའི་གཏམ་རྒྱུད་ནི་ཚེ་སྲོག་གི་གླུ་སྒྲ་རེ་རེ་དང་ཁོ་ཚོའི་མིག་ཟུང་ནི་མཚར་སྡུག་གི་ལང་ཚོ་རེ་རེ་ཡིན། ཕྱེ་མ་ལེབ་གྱི་གཤོག་སྟེང་གི་དངུལ་ཆུ་རེ་རེ་རྡོག་པོ་དང་རྡོག་པོ་བྱས་ཏེ་རྒྱ་མཚོའི་ངོས་སུ་གཏོར་ལ། རྩྭ་ལྗང་དང་ལོ་མའི་གསེབ་ཏུ་གཏོར། སྟོན་མཇུག་གི་བསིལ་རླུང་ལྡང་དུས་ཀྱི་ཕྱེ་ལེབ་ཁྱུ། ནམ་མཁའ་སྔོན་པོ་དང་གསེར་གྱི་ས་གཞི་རུ་འཕུར་བསྐྱོད་ཀྱི་གཤོག་རླབས་མཐོ་རུ་བཏེགས་ཏེ་རྒྱང་ནས་རྒྱང་ལ་མཆེད་ནའང་། ཆར་ཟིལ་བབས་པའི་ཞོགས་པ་རེ་རེ་གངས་ཀྱི་དབུས། ཆུ་བོའི་མགོ ས་ཡི་ཐིག་ལེ། སྦྲ་གར་དང་མེ་ཏོག་གི་ཞིང་ཁམས་སུ་རྒྱུ། ཕྱེ་མ་ལེབ་ཀྱིས་ཚེ་སྲོག་ལས་རྩ་ཆེ་བ་མེ་ཕུང་སྐོར་བྲོ་འཁྲབ་རྒྱུ་དེ་ཡིན། མེ་ཕུང་རེ་རེ་ཡི་སྔ་རྗེས་སུ་གཞས་གཏོང་ཚུལ་རེ་རེ་ཡོད་ལ། རྩྭ་ཐང་ཡངས་ཤིང་ཆེ་བ། རི་ཚོགས་བརྟན་ཞིང་བརླིང་བ། ཆུ་བོ་སྐྱོམ་ཤུགས་ཆེ་བ། འདི་དག་གིས་སེམས་ཀྱི་གཞས་མཚོན་ལ། འདི་དག་གིས་སེམས་ཀྱི་འདུན་མའང་མཚོན། དེ་དག་ནི་ཕྱེ་ལེབ་སྣ་ཚོགས་ཀྱི་ཡུལ་དང་གནས་མལ་ཡིན།
སྟོན་མཇུག་གི་རླུང་། ཁྱེད་ལ་རྣམ་ཤེས་ཡོད་པས་མཚན་མོ་གཙང་ངོགས་སུ་ཡོད་ལ་ཉིན་མོ་སེམས་གཏིང་དུ་ཡོད། སྤྲིན་པའི་འགྱུར་བག་ལས་རླུང་གིས་མི་སེམས་བདས་མྱོང་ལ། མཚན་མོའི་ལྷིང་འཇགས་ལས་རླུང་གིས་རྨི་ལམ་གྱི་གསང་བ་སྒོམ་མྱོང་། རླུང་ནི་འཇིག་རྟེན་སྟེང་གི་སྟོབས་ཤུགས་ཞིག་ཡིན་པས་རྒྱ་མཚོ་སྐྱོམ་ལ་སྤྲིན་པ་དེད། རླུང་ལ་གར་དུ་རྩེན་མཁན་ནི་ཕྱེ་མ་ལེབ་དང་ང་ཡི་སྙན་ངག་ཡིན་ལ། རླུང་ཁ་ཟས་སུ་སྒོམ་མཁན་ནི་སྨག་རུམ་ཁྲོད་ཀྱི་སྤྱང་ཁུ་ཡིན་ལ་ང་ཡི་སྙན་ངག་ཀྱང་ཡིན། རླུང་ལ་མཐོ་དམའ་མེད་ལ། རླུང་ལ་ཕྱོགས་དང་རུས་སུ་མཆེད་པ་མེད། བདེན་དང་རྫུན་གྱི་དབྱེ་བའང་མེད། རླུང་གི་རྩིག་ལྡེབས་སུ་དཔྱངས་པའི་སྙན་ངག་རེ་རེ་ཉི་མཚན་མེད་པར། ཁ་དོག་མེད་པར་དུས་དང་གནས་ངེས་མེད་དུ་གཡོ་བཞིན་ཡོད།
རླུང་དང་ཕྱེ་ལེབ་ད་དུང་སྙན་ངག་གསུམ་ནི་མཚན་མོ་ཞིག་གི་སྐར་འོད་ཡིན། ད་དུང་རྨི་ལམ་ཁྲོད་ཀྱི་རི་མོ་ཡིན། ང་སྟོན་མཇུག་གི་རླུང་ལ་དགའ་བ་ནི་ཕྱེ་མ་ལེབ་འཚོལ་འདོད་པས་ཡིན་ལ། ཕྱེ་ལེབ་འཚོལ་བ་ནི་སྙན་ངག་འབྲི་འདོད་པས་ཡིན། འོད་ལ་འོད་བསྣན་པ་དང་ཆུ་ལ་ཆུ་ཞུགས་པ་ལྟར། རླུང་། ཕྱེ་ལེབ། སྙན་ངག་གསུམ་ག་ང་ཡི་སྙིང་ཉེ་བའི་སྨྲ་སྒོ་ཡིན། ཐོབ་ཤོར་དང་མིག་ཆུ་མང་བའི་དུས་སུ་རླུང་གིས་གཡབ་གཡུག་བྱེད་ངེས། རླུང་ནི་ང་རྒྱལ་དང་ཕྲག་དོག་མེད་པར་སྐྱེས་ཆེན་སུ་ཞིག་གི་སྙིང་གཏམ་དང་འདྲ། ཁེར་རྐྱང་དང་སུན་སྣང་མོད་པའི་དུས་སུ་ཕྱེ་མ་ལེབ་ཀྱིས་སེམས་གཡེངས་པར་བྱེད་དུ་བཅུག་ལ། ལྷ་ཡུལ་དང་མི་ཡུལ། འཇིག་རྟེན་དང་དམྱལ་བར་མི་རྟོགས་པར་རང་ཉིད་རང་ཉིད་ལ་གནས་ཐུབ། ཁེར་རྐྱང་གི་བསམ་གཞིགས་རེ་རེ་སྙན་ངག་གིས་སེལ་ནུས་པས་སྟོན་རླུང་རེ་རེ་གྲོགས་སུ་སྡོངས་ནས་མཐའ་དང་དབུས་མེད་པར། ཕྱེ་མ་ལེབ་ཅིག་དང་འདྲ་བར་བསྐྱོད་བཞིན་མཆིས། ང་ཡི་སྙན་ངག བདག་གིས་བྲིས་པའི་སྙན་ངག་ནི་ཧ་ཅང་རྒྱང་རིང་དུ་གནས་པ་མ་ཡིན་ལ། རང་ཉིད་ལ་རྟོགས་པ་ཞིག་ཀྱང་མ་ཡིན། སུའི་ཁེར་རྐྱང་གི་སྙིང་ག་རུ་གནས་ཐུབ་ལ། སུའི་བརྩེ་དུངས་ཀྱི་གཏམ་བརྗོད་ལ་གནས་ཐུབ་བོ།།
2018 6 7 གྱི་ཞོགས་པར་སྦྱར།
རྩོམ་སྒྲིག་པ། མྱི་གསར་བ།
