རྟོག་གེ་བའི་རང་ལམ་མདོར་བསྟན།
རྩོམ་པ་པོ། དྲང་ཤེད།
རྟོག་གེ་བའི་རང་ལམ་མདོར་བསྟན།
དྲང་ཤེད།
བདག་གི་འདྲེན་པ་མཆོག་གི་ཞལ་ནས“གང་ཟག་ལ་མི་རྟོན། ཆོས་ལ་རྟོན”ཞེས་སྤོབས་པའི་གདེང་གི་ང་རོ་ཡང་ཡང་བསྩལ་ཡོད། བསམས་ཤིང་བསམས་ན། གསུང་འདི་རིགས་ཀྱིས་ཅི་འདྲའི་རིགས་པའི་སྒོ་ཆེན་མོ་ཞིག་ཕྱེ་འདུག་ལ། རྣམ་དཔྱོད་ཀྱི་ལྟེ་བ་གྲུ་བཞི་ཞིག་བསྐྲུན་འདུག ཤེས་རབ་ཀྱི་གདན་ཆ་མཐོན་པོ་ཞིག་བཏིང་འདུག་ལ། སྒལ་ཚིགས་ཀྱི་གཞུང་རྟ་དྲང་མོ་ཞིག་བསླངས་འདུག བདེན་དོན་རྣལ་མར་འཇུ་བའི་བསམ་བློའི་ཉེར་བསྡོགས་འཐུས་སྒོ་ཚང་བ་ཞིག་ཀྱང་བསྟན་འདུག
བདག་གིས་འདིར་ཉེ་བའི་མི་དག་ལ་གོ་བདེའི་ངག་ལམ་ནས། སྐབས་སུ་བབ་ལ། གནད་ཐོག་ལ་འཛེར་བའི་གསུང་དེར་འགྲེལ་ཞིག་བསྐྱོན་ན། “ལུང་ལ་མི་རྟོན། རིགས་པ་ལ་རྟོན། ཡིག་ཆ་ལ་མི་རྟོན། གནས་ལུགས་ལ་རྟོན། ངག་རྒྱུན་ལ་མི་རྟོན། དངོས་ཡོད་ལ་རྟོན། དག་སྣང་ལ་མི་རྟོན། རྟོག་དཔྱོད་ལ་རྟོན། དད་པ་ལ་མི་རྟོན། ཤེས་རབ་ལ་རྟོན”འགྲེལ་འདིས་རྨད་དུ་བྱུང་བའི་གསུང་དེའི་བཞེད་སྙིང་བརྡ་དོན་གསལ་བོར་འཕྲོད་དེ། ལག་ཐོག་ལ་ཐོབ་ཅིག་གུ
བསམ་བློའི་སྙིང་སྟོབས་དེ་གདན་ལ་བཞག་སྟེ། རིགས་པ་འཚོལ་བའི་རྩ་དོན་ལས་མདོར་བསྡུས་གློད་ན། དོགས་སློང་ནི་སྒལ་ཚིགས་ཀྱི་གཞུང་རྟ་ཡིན་ལ། བསམ་གཞིག་ནི་ཚེ་སྲོག་གི་སྐྱ་ཡ་ཡིན། བདེན་པ་ནི་ཕུགས་ཀྱི་བསྙེག་བྱ་ཡིན་ལ། ཤེས་རབ་ནི་སྐྱབས་ཀྱི་མཐར་ཐུག་ཡིན། གཟུར་གནས་ནི་དཔྱོད་པའི་ལྟེ་བ་ཡིན་ལ། རང་རྟོག་ནི་རྣམ་ཤེས་ཀྱི་ངར་ཤེད་དང་། རང་རྟོན་ནི་ཚེ་སྲོག་གི་ཆོས་ཉིད་ཀྱིས་བསྩལ་བའི་བདག་ཉིད་ཀྱི་སྤོབས་པ་ཡིན། མ་ཟད། འདི་ཐམས་ཅད་རང་ཉིད་ལྟེ་བར་བཟུང་། རང་བློ་གཞི་རྩར་བཏིང་ནས་གྲུབ་དགོས་ལ། རང་རྐྱ་ཕེར་དགོས། སྟོབས་ཤུགས་སྨིན་དགོས་ལ། རྒྱལ་ཁ་ཡང་འཐོབ་དགོས། གཞན་འདི་ཐམས་ཅད་གཡར་མས་མི་རུང་ལ། བྲིས་མ་དང་དཔར་མས་མི་ཆོག བསྐྱར་ཟློས་དང་བཅོས་མ་ནི། དེ་བས་ཀྱང་མཆིལ་མའི་ཐལ་བ་བཞིན་འདོར་བྱ་ཁོ་ནར་དམིགས།
དེའི་ཕྱིར་རང་རྟོག་ལ་གོམས་ཤིང་། རང་གཤིས་ལ་བཀུར། རང་བློའི་སྣེ་ཐག་ལ་འཇུས་ཏེ། རང་ལམ་ཤེད་ཀྱིས་འཚོལ། གཉུག་གཤིས་ལ་ཐོགས་པའི་སྨྲ་ལྕེ་བདག་གིར་འཛིན། ཅི་མཛད་དག་སྣང་ལ་རྟོག་དཔྱོད་ཀྱིས་འཐབ་ཅིང་། གནའ་སྲོལ་ཧྲིལ་འཛིན་ལ་རིགས་པས་རྒོལ། བདག་ཉིད་བདག་གི་མགོན་དུ་གྲུབ་པའི་ཚེ་སྲོག་གི་ཆོས་ཉིད་གཅེས་པར་སྐྱོང་། གནས་ལུགས་ཏིལ་ཙམ་མ་མཐོང་། རྒྱུ་མཚན་སྣེ་གཅིག་མི་ཤོད་ཀྱང་། དུང་ཞེན་འཐུག་པོ་ཞིག་གི་བཟི་སྨན་ཕོག་སྟེ། ཡོད་ཚད་བསམ་བློའི་ཚད་ཤིང་གཅིག་གི་འོག་ལ་འཛུད་པའི་སྒེར་གཅོད་དང་། ཧམ་སེམས་དེ་ལྟ་བུ་ལ་ནི། མཆིལ་མའི་ཐལ་བ་གཏོར་ཏེ། རྒྱང་དུ་བསྐྲད་ལ། རྒྱང་གིས་བཀྱེད། ཆོལ་ཁ་དང་ལུང་ཚན། ཆོས་ལུགས་དང་གྲུབ་མཐའ། ཡིག་ཆ་དང་ལུང་ཚིག་སོགས་རིས་ཆད་དུང་ཞེན་གྱི་སྒྲོག་ཐག་རྩད་ནས་བཅད་དེ། རྟོག་གེ་བ་གཅེར་བུ་ཞིག་གི་རིགས་པའི་ལམ་འདེད།
སྤྱིར་བཏང་ནས། ཇི་ཙམ་ལྐོག་གྱུར་གྱི་གནས་སུ་འཕྲད་པ་ན། དེ་ཙམ་ཐེ་ཚོམ་དང་བསམ་གཞིག་གི་ཀློང་དུ་འགྲོ་བ་ནི། རང་སྟེང་ནས་སྒེར་ཐུབ་ཀྱི་རྣམ་དཔྱོད་སད་པའི་ཉེར་བསྡོགས་དང་པོ་ཡིན། ཇི་ཙམ་ལྐོག་གྱུར་བཤད་ན། དེ་ཙམ་ཡིད་ཆེས་ཤིང་། དད་པའི་འཁུན་བུ་འབྱིན་ཡོང་བ་ནི། རང་བློ་སྒྲོག་ཏུ་བཅུག་ཅིང་། རྣམ་དཔྱོད་ཀྱི་རྩ་བ་བཅད་དེ། བླུན་ནག་གི་གཡང་དུ་འཕྱན་པའི་ལྟས་ཡིན། ཤེས་བྱའི་ཐང་ཆེན་འདི་ནས། རིག་པའི་དོ་ར་འདི་ནས། ལྷེམ་མེར་གྱི་རྣམ་ཤེས་ཕྲ་མོ་འདི། ཚེ་སྲོག་ཆུང་ཆུང་འདི། ཐེ་ཚོམ་ཁྲི་ཕྲག་དང་། བསམ་གཞིག་འབུམ་འགྱུར་གྱི་ཀློང་དུ་ལྷུང་བ་ནི། ཅི་འདྲའི་འོས་ཤིང་རྒྱུན་ལྡན་ཞིག་སྟེ། མུ་མེད་པའི་སྣ་ཚོགས་ཤེས་བྱའི་ཐང་ཆེན་འདིར། ཕལ་བའི་ཚེ་སྲོག་ཆུང་ཆུང་འདིས་ཇི་ཙམ་ལྷུས་ཐིངས། མཐའ་རྒྱ་ག་ཙམ་ཆོད། དངོས་ནས་ཉམ་ཆུང་ཞིང་། ཤེད་ཕྲ་བ་ལ་ཨང་།
དེའི་ཕྱིར་མཐའ་ཡས་པའི་ཤེས་བྱའི་ཟུར་ཀ་འདི་ནས། མཐོང་རྒྱ་ཐུང་ལ། བློ་ཚད་ཞན་པའི་ཚེ་སྲོག་འདིས། གང་ལ་ཡང་དོགས་སློང་རེས་སྣེ་དྲངས་ཏེ། བསམ་གཞིག་གི་གྲུ་ལ་བསྡད་དེ། ཤེས་བྱའི་རྫིང་ཆེན་པོར་རིམ་བགྲོད་བྱ་དགོས་པ་ལས། དང་ཐོག་ནས་གཞན་གྱི་ངག་རྗེས་ཁོ་ནར་རྒྱུག་ཅིང་། ཚིག་སྙན་གཅིག་པུར་འཇུས་ཏེ། ཅི་མཛད་དག་སྣང་གིས་འཁྱེར་མདོག་དང་། གང་བྱུང་བདེན་པར་ཐེག་ཁུལ་ལ་ཧུར་ཐག་བགྱིད་པ་ནི། ཚེ་སྲོག་གི་ཆོས་ཉིད་དང་འགལ་བའི་རྨོངས་སྒྱེ་ནག་པོ་མགོ་བོར་གྱོན་ཏེ། རང་བློ་མཐའ་འཁོབ་ཀྱི་དོང་དུ་བཅུག་པ་རང་ངོ་།
དོགས་སློང་གི་སྣེ་ཐག་འདི་ཁོ་ནས། ད་གཟོད་རྣམ་དཔྱོད་ཀྱི་གཤོག་པ་ཐོགས། ཤེས་རབ་མིག་གིས་ཤེས་བྱའི་མཐོངས་ཆེན་པོར་ལྟ་བའི་གླགས་དང་སྐབས་རྙེད། འདི་ཁོ་ནས་གཟུར་གནས་ཀྱི་མི་གཤིས་འཇགས་ཐུབ་ལ། སྒེར་ཚུགས་ཀྱི་བློ་རིག་རྙེད་ཐུབ། རྣམ་དཔྱོད་ཀྱིས་རང་རྐྱ་ཡང་ཕེར་ཐུབ། ཚད་འདི་ནས་བལྟས་ན། རང་ཉིད་ལ་རང་གི་རྣམ་དཔྱོད་ཅིག་གསོ་བསྐྲུན་དང་། ཤེས་རབ་ཅིག་གི་རྟོགས་པ་རང་སྟེང་ནས་སད་ཐབས་སུ་གཞོལ་བས་ནི། དངོས་གནས་རང་གི་ཚེ་སྲོག་གི་ཆོས་ཉིད་ལ་འགན་བླངས་བ་ཡིན དེ་བས། ཤེས་བྱའི་གནས་ཕྲ་རགས་གང་ལའང་། དོགས་སློང་གིས་སྣེ་དྲངས་ཏེ་འཇུག་པ་ནི། རང་སྟེང་ནས་སྒེར་ཚུགས་ཐུཔ་པའི་རྣམ་དཔྱོད་དང་། ཤེས་རབ་རྣལ་མའི་རྟོགས་པ་གཏིང་ནས་སད་པའི་མཐུན་རྐྱེན་དང་པོ་ཡིན། གཞན་གང་ལའང་རྟོག་པ་མེད་ཅིང་། དཔྱོད་པ་དོར་ཏེ། དག་སྣང་ཆེན་པོ་དང་། དད་པ་འཐུག་པོས་ཤེས་བྱར་འཇུག་པ། ཡང་ན་གཞན་གྱི་སྒྲོས་དང་འགལ་གྱིས་དོགས་པའི་སེམས་ཁྲལ་ལྕི་མོའི་འོག་རབ་འབྱམས་ཤེས་བྱའི་དཀྱིལ་འཁོར་བསླབ་པའི་ངལ་བ་བགྱིས་ཀྱང་། རང་སྟེང་ནས་རྣམ་དཔྱོད་ཤེས་རབ་སད་པའི་སྐབས་མེད་ཅིང་། གནས་མེད་དོ།། འདི་ལྟར་ན་མཁས་དབང་དགེ་ཆོས་ཀྱིས“གཞན་གྱིས་སྒྲོས་དང་འགལ་གྱིས་དོགས་པའི་ཞུམ་པ་ཆེར་བྱས་ཚེ། ཤེས་རབ་འཕེལ་བའི་གོ་བ་ཡང་མི་སྐྱེད”ཅེས་གདམས་པའི་ལེགས་བཤད་ཀྱི་དགོངས་དོན་ལྷག་ཏུ་གསལ།
མདོར་ན། རིགས་ཤེས་གཅེར་བུ་ལ་འཁྲེང་བའི་རྟོག་གེ་བ་ཞིག་གིས། ལོ་ངོ་སྟོང་ལ་འཇགས་ཤིང་མཁྲེགས་པའི་གོམས་སྲོལ་འཐུག་རུང་གཅིག་ཏུ་མི་སྟུན། བརྒྱ་ཁ་གཅིག་གྲག་གིས་བདེན་པར་བསྟོད་པའི་མཐུན་སྣང་གི་སྐད་མཐོ་ཡང་བརྩི་ངེས་མེད། བླ་མ་ཡི་དམ། དཔའ་བོ་མཁའ་འགྲོ། ཆོས་སྐྱོང་སྲུང་མ་སོགས་ལྐོག་གྱུར་དགུ་རྩེག་གི་མུན་ནག་ཏུ་ལག་སྙོབ་ནམ་ཡང་མི་གཏུབ། གང་ན་མངོན་སུམ་གྱི་དཔང་མཆིས། གནས་ལུགས་ཀྱི་སྲོག་ཡོད། སུ་ལ་གཏན་ཚིགས་ཀྱི་རྩལ་བདོག རིགས་པ་རྗེན་པར་བཤམ་རྒྱུ་ཡོད་ཕྱིན། དེར་རྒྱུག དེ་བཀུར། དེ་ལ་ཡིད་རྟོན། དེ་ཡིས་ཅི་ཡང་འཐུས། འདི་ནི་རིགས་པའི་རྗེས་འདེད་ཀྱི་སྐྱེ་བོའི་གཤིས་ཡིན། རྟིང་མའི་གྲུབ་དོན་ལ། བདག་ནི་རྣམ་ཀུན་ཏུ། བློ་ཐག་རྦད་ཆོད་དང་། ཁ་ཞེ་གཉིས་མེད་ཀྱིས། རང་ཉིད་ཀྱི་རྣམ་དཔྱོད་དང་། འདུ་ཤེས་ཀྱི་གཞུག་དེད་ནས་འགྲོ། འདི་ནི་བདག་གི་རང་གཤིས་མངོན་སྟངས་དང་། མི་ཚེ་སྤྱོད་སྟངས། ཕྱིར་མི་ལྡོག་པའི་རང་ལམ་ཤིག་ཀྱང་ཡིན་ཞེས་སྨྲས་ཆོག དེ་བས། བདག་གི་བར་སྣང་འདི་ཇི་ཙམ་དོག་ཀྱང་། འཕུར་དགོས། བདག་གི་རྐང་ལམ་འདི་ཅི་འདྲའི་རྩུབ་ཀྱང་། འགྲོ་དགོས། རང་ཉིད་ལ་བདོག་པའི་དོགས་སློང་གི་བློ་རིག་འདི་ཅིས་ཀྱང་རྒྱུན་སྐྱོང་ལ། རང་སེམས་ལ་འཇགས་པའི་བསམ་གཞིག་གི་སྤོབས་པ་འདི་དང་། རང་དཔྱོད་ཀྱི་སྙིང་སྟོབས་འདི་གཞར་ཡང་དབུགས་ཀྱི་རྒྱུན་ཐག་ལ་བཏགས་ཏེ། ཚེ་ཡི་ཁ་ལོ་བར་རྟོན་ཞིང་བཀུར་བར་བགྱིའོ།།
2018 4 17 རེབ་གོང་དུ།
རྩོམ་སྒྲིག་པ། འཕགས་མི།
