ཕྱིར་དྲན།
རྩོམ་པ་པོ། འབྲོང་ཚ།
ཕྱིར་དྲན།
འདི་ནི་རང་རྩོམ«ཕྱིར་དྲན»བཀླགས་རྗེས་སླར་ཡང“དེ་སྒྲ”བརྗོད་གཞིར་བཟུང་ནས་བྲིས་པ་ཡིན།
འབྲོང་ཚ།
སེང་འབྲུག་སྟག་རྩེ་ནས
འདས་པའི་མེ་ཏོག་གི་ཁོ་ལག་མ་རྫོགས
མ་འོངས་པའི་མེ་ཏོག་ལ་འདབ་མ་མ་རྒྱས
སྒུག་ཡུན་གྱི་དུས་ཚོད་དེ་དག་གིས
ང་ལ་འཕྱ་སྨོད་ཀྱི་རྒས་གཉེར་གནང་བྱུང
ང་ལ་མཐོང་ཆུང་གི་སྐྲ་དཀར་བསྩལ་བྱུང
རྨ་ཆུའི་ཁུགས་སོ་རེ་རེ་ན་ལུས་པའི་འདས་དོན་གྱི་སྣང་བ
རྫ་ཆུའི་དཀྱོག་མཚམས་རེ་རེ་ན་ལུས་པའི་ཕྱིར་དྲན་གྱི་ལང་ཚོ
ད་དུང་བརྗེད་བྱང་དུ་འཁོད་པའི་ལས་ཀྱི་ཁ་ཡིག
ཚེ་ཡི་གླེགས་བམ་ལ་བྲིས་པའི་སྙིང་གི་ནོར་བུ
དུས་ཀྱི་ཟས་སུ་གྲུབ་པའི་སྙན་ངག་རྒས་པོ
ཡོད་ཚད་ནས་ཡོད་ཚད
ཐམས་ཅད་ནས་ཐམས་ཅད
རེ་སྒུག་གི་དུས་ཚོད་དང་འདྲེས་པའི་ཆུ་ཡིས་ཕྱགས་སོང
རེ་འདུན་གྱི་རྨི་ལམ་དང་སྡེབ་པའི་མེ་ཡིས་ཚིག་སོང
ད་ལྟ་གནས་འདིར་དགུན་ཁ་བསླེབས་འདུག
གྲང་རླུང་གི་སྤུ་གྲི་ཤིན་ཏུ་རྣོ
བུ་ཡུགས་ཀྱི་འཚུབ་ཁ་ཤིན་ཏུ་ཆེ
ཡིན་ན་ཡང
ངས་སླར་ཡང་དབྱར་གཞུང་གི་སེང་འབྲུག་སྟག་རྩེ་དྲན་བྱུང
དེ་དུས་ཀྱི་མེ་ཏོག་སྣུམ་ཞིང་མངར
སྦྲང་མ་ཡི་་ཚོགས་ཀྱང་དགའ་ཞིང་འགུ
མཆུ་སྒྲོས་ཀྱི་འདབ་མ་ཤིན་ཏུ་མཉེན
རྣམ་ཤེས་ཀྱི་ཕོངས་པོ་ཡོམ་ཡོམ་འདུ
དེ་དུས་ཀྱི་ཁྱོད
དེང་སང་ངའི་དྲན་པའི་གཏིང་རིམ་ན
རྨ་ཁ་ལྟར་ལུས་པའི་ཡོད་ཅིང
ངའི་ཚེ་ཕྱེད་ཀྱི་སྙན་ངག་ལ་བརྗོད་གཞི་ཡང་བཟུང་ཡོད
ད་ལྟ་གང་ཞིག་ཏུ་ཡོད་ཅིང
བདེ་མོར་གྱིས་ཤིག
ཤུགས་ཡོད་ཚད་ཀྱིས་འཚོ་བ་རོལ་ཅིག
2022.1.18
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
