མཚན་མོའི་བཞུར་སྒྲ།
རྩོམ་པ་པོ། མིག་ཡོར།
མཚན་མོའི་བཞུར་སྒྲ།
མིག་ཡོར།
ས་སྲོད་དེར།
ངས་མཚན་མོའི་བཞུར་སྒྲ་ལ་མཉན་ནས།
བློས་མི་ཐོང་བའི་མི་ཞིག་ལ་བསམ་བློ་བཏང་ནས་བསྡད།
གཡེལ་དྲིལ་གྱི་སྒྲ་དབྱངས་ལྟ་བུའི།
ཁུ་སིམ་མེར་གྲག་འགུལ་ཅི་ཡང་མེད་པའི།
མཚན་མོ་དེར།
རྨིས་མ་ཚར་བའི་རྨི་ལམ་མང་པོ་ཞིག་དང་སླར་ཡང་འཕྲད།
ངས་ནང་སེམས་མཚོན་བྱེད་དུ་ཕ་ཡུལ་གྱི་རི་ཆུ་ཐང་གསུམ་རྨིས།
རྟ་ནོར་ལུག་གསུམ་རྨིས།
སྐབས་དེར།
རང་ཉིད་དང་བསྡེབས་ནས་བཞུར་སོང་བའི་མཚན་མོ་གྲངས་མེད་པ་ཞིག
ལོ་ཟླ་ཞིག་གི་ཕྱིར་དྲན་དུ་གྱུར་འདུག་པ་རྟོགས།
2021/8/17
ཐོལ་བྲིས།
བར་ཐག་གིས་སྦྲེལ་བའི་དུས་ཚོད་འདིར།
ངས་སུ་ཞིག་གི་ཆེད་དུ།
ནང་སེམས་ཀྱི་སྒེའུ་ཁུང་ཕྱེས་ཏེ།
ཟླ་བ་ཁོ་ནར་ཅེར་ནས། ཡུན་རིང་ཞིག་ལ་བསྡད།
རེ་བ་དང་ཡིད་ཆེས་བོར་བའི་དུས་ཚིགས་འདིར།
སྐབས་རེར།
བདག་གིས་དྲན་སྣང་ཡོད་ཚད་མེ་རུ་སྦར་ནས།
ཅི་བྱ་གཏོལ་མེད་དུ་གྱུར།
2021/8/16
ཆར་བའི་ནང་གི་རང་ཉིད།
དོ་ནུབ།
ཆར་བ་བབས་དྲགས་པས།
ངས་ཆར་བའི་ནང་ནས།
ཆར་གདུགས་འཛིན་དགོས་པའང་བརྗེད་འགྲོ།
ཆར་བས་རང་ཉིད་བརླན་འགྲོ་བ་ཡང་བརྗེད་འགྲོ།
དོ་ནུབ།
ཆར་བ་ཤིན་ཏུ་བབས་ན་ཡང་།
ངོ་མི་ཤེས་པའི་མི་དག་གིས།
སྔར་བཞིན།
ཆར་བའི་ནང་ནས། རང་ཉིད་འཚོལ་བཞིན་འདུག
དོ་ནུབ།
ཆར་བ་བབས་དྲགས་པས།
ངས་ཆར་བའི་ཡང་སྙིང་རྟོགས་དགོས་པ་ཡང་བརྗེད་འགྲོ།
ཆར་བའི་ནང་གི་རང་ཉིད་ཁེར་རྐྱང་ཡིན་པའང་བརྗེད་འགྲོ།
2021，8，24
མིང་མེད།
འཇམ་ཅག་གེར་གནས་པའི་མཚན་མོ་འདི།
མི་རྣམས་ཀྱི་རྨི་ལམ་གྱི་ཞིང་ཁམས་ལྟ་བུར་གྱུར།
འུ་ཐུག་པའི་སེམས་པ་འདི་ཡང་།
གཉིད་དུ་ཡུར་བའི་མཚན་མོར་ཕྱོགས།
གློ་བུར་དུ།
བརླན་ཆགས་པའི་སེམས་པ་འདི།
དབུགས་ཆད་ནས་སྨྲ་བ་ཡོད་ཚད་འགག་སོང་ན་ཡང་།
མི་རྣམས་ཀྱིས།
འཆི་བར་བསམ་བློ་མི་གཏོང་བར།
མཚན་མོ་ཁོ་ནར་ཕྱོགས།
2021/8/9
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
