དབྱངས་ཅན་མའི་བསྟོད་པ་སྙན་ངག་དབྱངས་ཀྱི་ཌཱ་ཀི་མ་ཞེས་བྱ་བ།
ཐོར་བུ། དཀར་མཛེས།
ཐོར་བུ། དཀར་མཛེས།
ཨེ་མ་ལྟོས་དང་མཚོ་ལ་ལྟོས།།
མཚོ་ནི་མེ་ལོང་སྔོན་པོ་འམ།།
ནམ་མཐའི་གཟུགས་ནི་མེ་ལོང་དུ།།
ཤར་བ་འམ་སྟེ་ནམ་མཁའ་ཉིད།།
ཞུ་སྟེ་གནས་འདིར་འཁྱིལ་བ་གང་།།
ཨ་ཧོ་ལྟོས་དང་མཚོ་དེའི་སྟེང་།།
འདབ་མ་སྟོང་ལྡན་པདྨའི་སྟེང་།།
དབྱངས་ཅན་མ་ནི་གར་སྟབས་ཀྱིས།།
ཟླ་གདན་དཀར་ཞིང་སྔོ་བའི་སྟེང་།།
ཡི་གར་འོང་བར་བཞུགས་པ་ལ།།
བསོད་ནམས་མེད་པའི་མིག་གིས་ནི།།
ལྟ་མི་བཟོད་པར་མི་འདུག་གམ།།
ཡིད་འོང་ཚིག་གི་སྙན་ངག་ནི།།
ཆར་ནི་སྟོན་སྤྲིན་ཕུང་པོ་སྟེ།།
དབྱངས་ཅན་ཞལ་ནས་ཆལ་ཆིལ་འཇོ།།
དེ་ལ་ཐིམས་ལའི་བདག་གི་སེམས།།
འཇམ་མཉེན་དབྱངས་ཅན་ལག་པར་རེག།
དེ་ཡིས་བདེ་དགའི་ཏིངའཛིན་གྱིས།།
མྱོས་ན་ཡོངས་སུ་མྱོས་འགྱུར་ཏེ།།
བདག་གིས་བདག་ནི་ཡོངས་སུ་འབོར།།
ཨེ་མ་ཁྱོད་སྐུའི་ཡོན་ཏན་གྱི།།
ཆ་ཤས་ཀྱང་ནི་བརྗོད་པར་དཀའ།།
ཁྱོད་ཞལ་པདྨ་གསར་བར།།
མིག་གཉིས་བུང་བ་ལྡང་བས།།
རྒྱལ་རྣམ་དགྱེས་ཏེ་བཟི་ན།།
བདག་ནི་ཅི་ལ་མི་བཟི།།
མཇའ་མཉེན་ཕྱག་སོར་ཡང་མོས།།
རྒྱུད་སྐུད་ལ་ནི་རེད་དུས།།
དེས་ཀྱང་ཆགས་པའི་སྐད་ཀྱིས།།
སྙན་ངག་ལན་སྟོང་གྱེར་ན།།
ཁྱོད་ཀྱིས་ང་ལ་རེག་པས།།
ངས་ཀྱང་སྙན་ངག་ལོས་འབྲི།།
དམའ་དམའ་ལྟེ་བའི་བུ་གར།།
དྲི་བཟང་འདོད་པ་དགུ་འཕེལ།།
འདོད་ལྡན་རླུང་གིས་ཁུར་བར།།
བདག་གི་མྱོས་ཙམ་བྱས་པས།།
ལོ་དང་ཟླ་ཙམ་མིན་པར།།
ང་ཡང་བདེ་བས་བཟི་སོང།།
དཀར་ལ་ཟླུམ་པའི་འོ་འཛིན་ནི།།
ག་ལེར་འགུལ་བ་ཙམ་གྱིས་ཀྱང་།།
མཁའ་ཡི་ཉི་མ་འདོད་པས་གདུང་།།
ཁ་ཆུ་ཉིད་ནི་དབྱངས་ཅན་གྱི།།
ལུས་སྟེང་བཞུར་བ་སུས་མི་གོ།།
མཆི་སྒྲོ་པདྨ་འགུལ་ཙམ་གྱིས།།
ས་འདི་ཡོངས་སུ་མ་ཚིམ་པར།།
ཉིད་ཀྱི་མཐའ་ནི་ལྷུན་པོ་དང་།།
རི་བོ་དག་གིས་ཡོངས་བསྐོར།།
ནག་ལ་སྣུམ་པའི་སྐྲ་དེ་འང་།།
ཕྲག་སྟེང་འཁྱིལ་བར་ལ་ལྟོས་དང་།།
དེ་ནི་མེ་ཏོག་ལུང་བའི་ནང་།།
རླུང་བུ་ཅུང་ཙམ་སྐྱོམ་མཚུངས།།
འགྲོ་བའི་ཡིད་སེམས་མདངས་འཕྲོག་མ།།
ཁྱོད་ཀྱི་ཡོན་ཏན་ཤ་ཆས་ཀྱང་།།
བདག་གི་བརྗོད་པ་ཤིན་ཏུ་དཀའ།།
2021/6/11
རྩོམ་སྒྲིག་པ། བསམ་འགྲུབ་རྒྱལ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
Signature is customized by Netease