ཉི་ནུབ་ཀྱི་གླུ།
རྩོམ་པ་པོ། དབལ་ཡན་མ།
ཉི་ནུབ་ཀྱི་གླུ།
དབལ་ཡན་མ།
རབ་རིབ་རབ་རིབ་ཏུ་གྱུར་བའི
དུས་ཚོད་ཀྱི་རྟ་ཕོ་ལོང་བ་དེ་མདུན་ཕྱོགས་སུ་རྒྱུག
སྒེའུ་ཁུང་ནི་སྙིང་ཉེ་བའི་ཉི་འོད་དུམ་གཅིག་འགྲུལ་བར་ཡོང་ས་སྟེ།
འཛུམ་མདངས་དང་བཅོས་མིན་གྱི་དྲོད་ཁོལ་ཞིག་ཀྱང་མིག་ཁར་ལྷུང་འོང
ཁ་བ་བབས་རྗེས་ཀྱི་ལྕང་མ་གཉོམ་པོ་དེ་དག་ནི
ཁེར་རྐྱང་དང་རེ་སྒུག་མཚོན་བྱེད་ཁོ་ནར་ངེས
ཆུ་ལྷམ་གྱོན་མཁན་གྱི་སྨིན་མའི་ནང་དུ་བདེ་སྐྱིད་ཀྱི་ཉི་འོད་ཆགས
རོལ་དབྱངས་དཀྲོལ་བའི་ཆང་མ་ཞིག་སུན་སྣང་གི་འཛུམ་གྱིས་རྒས
དུར་ཁྲོད་དུ་ལུས་པའི་བེན་པོ་དག་སྦར་ཤུལ་གྱི་མེ་ལྕེས
ལྷིང་འཇགས་ཀྱི་རྨི་ལམ་ནང་དུ་མཚན་ཉུལ་གང་མང་བྱས
ཨར་འདམ་གྱི་རྩིག་པའི་ངོས་སུ་མཚོན་བྱེད་གྱི་རི་མོ་མང་དུ་བབས
ཞེ་ལ་ཐོགས་པའི་མཛའ་གཞས་ཤིག་གི་འགྱུར་ཁུག་རེ་རེས
མི་སྡུག་པའི་སྡོང་ལོ་དུ་མ་ཧྲིལ་གྱིས་བསྲེགས
ཉིན་མཚན་གཉིས་སུ
ཡིད་འོང་གི་གཏམ་རྒྱུད་ཀྱང་མང་དུ་བྲིས
2020.3.3
སྙན་ངག་བཙའ་རོ་མ།
བཙའ་ཆགས་པའི་ཐ་སྙད་དེས་ཁྱོད་ལ་ཅི་བྱ
མུན་པ་དང་ཐལ་མདོག་གྱོན་པའི་སྲང་ལམ་དེས་ཁྱོད་ལ་ཅི་བྱ
བརྩེ་བ་འཇིག་རྗེས་ཀྱི་འཛུམ་མདངས་སྐྱུར་བོ་དེས་ཁྱོད་ལ་ཅི་བྱ
མ་དག་སྣང་བས་བསྡམས་པའི་ཞེན་ཆགས་དེས་ཁྱོད་ལ་ཅི་བྱ
ཁྱོད་ཀྱི་ཁ་དོག་ནི་ཡིད་དུ་འོང་བའི་ན་ཟུག་ཅིག་སྟེ
མི་སེམས་ཀྱི་གཙང་བོ་ཡོམ་པར་བྱེད་པའི
ལོ་ཟླའི་སེར་ཁར་འཚང་བའི་ས་རྡུལ་སྤར་བ་གང་དང་འདྲ་ཨང
ཉི་འོད་གྱོན་པའི་དགུན་གཞུང་གི་དུས་ཚིགས་སུ
ཁྱོད་ཀྱི་བརྩེ་དུང་གི་ཡོབ་ལུང་ཆད་པའི་སྐྱོ་ཡུས་དེ
དུས་ཚོད་ཀྱི་རྟ་ཕོས་ཀྱང་ཁོག་ཏུ་བཞུག་ཐབས་བྲལ
ཞི་བར་གཤེགས་པའི་སྣང་བ་འཁྱག་པ་དེ
འདས་ལོག་བརྒྱབ་པའི་ཉིན་མཚན་གཉིས་སུ་འཁྱམས
སྐད་ཆ་རེ་རེས་སེམས་པ་སྦྲིད་དུ་བཅུག་རྗེས
ཁ་རོག་གེར་དུས་ཚོད་ཀྱི་ཕར་རྒྱབ་ཏུ་ལོག་པར་མོས་ཨང
2020.3.2
རབ་ཏུ་འཁྱགས།
ཁྱོད་ཀྱི་མགྲིན་པར་མིག་གིས་མི་བཟོད་པའི་ཁ་དོག་འཚེར
སུན་སྣང་བརྩེགས་མའི་གྲིབ་མ་དགུ་བརྩེགས་བཞད
རྣམ་པར་མ་ངེས་པའི་དུས་ཚོད་ཀྱི་སྐྱོ་དུབ་སྤུངས
ཚེ་ཡི་ལན་ཆགས་ཁུར་བའི་འབུ་སྲིན་གྱི་འཛེར་སྒྲ་འཛིང
དུས་ཚོད་ཀྱི་རྟ་ཕོ་ལོང་བ་དེ
ཁྱོད་ཀྱི་ཁེར་རྐྱང་གི་རྩྭ་ཐང་དུ་ཡན
མུ་མཐའ་མེད་པའི་ནང་སེམས་ཀྱི་འཇིག་རྟེན་རབ་རིབ་དེས
ཁྱོད་ཀྱི་མཛེས་སྡུག་གི་སྙིང་བོའང་ཁྱེར་སོང་བ་འདྲ
ཉི་ནུབ།
ཁྱོད་ཀྱིས་ཁྱུར་མིད་དུ་བཏང་མྱོང་བའི་སེམས་པ་འདི
ཁྱོད་ཀྱི་ཕྱིར་དུ་འབུ་སྦྲང་མ་ཞིག་གི་རྣམ་ཤེས་སུ་སྐྱེས
གློ་བུར་བའི་ན་ཚ་དང་ཟུག་གཟེར་གྱིས་སྦྲིད་པའི
ངོ་གདོང་སྙི་མོ་སྙི་མོ་དེ ཡུན་རིང་དུ
དུས་ཚོད་ཀྱི་སོ་ཁར་འདར་ཡོམ་ཡོམ་བྱེད
མུན་པ་ཡུག་གཅིག་གི་སྣེ་མོར་ཐོགས་པའི
མིག་ལོང་བའི་ཕྱེ་མ་ལེབ་ཀྱི་ཚོགས
ས་རྡུལ་ལྟ་བུའི་རྨི་ལམ་གྱི་ནང་དུ་ཉུལ
ཁེར་རྐྱང་གི་དུས་ཚོད་བརྩིགས་པའི་ལོ་ཟླ་དེར
ཁྱོད་ཀྱི་སྐུད་པ་ལྟ་བུའི་ཤེས་རབ་ཀྱི་སྐྱ་ཞིག་ཅིང
འདུན་མའི་རྩེ་རུ་ཡོམ་ཡོམ་འགུལ་བའི་ལོ་ཆུང་གི་སྣང་བ
སྐད་ཅིག་གཅིག་གི་ཡུན་དུ་འཕྲོ་རྫོགས་པར་བྱས
2020.2.28
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
