རྟ་རྫིང་ཇ་སག་ཨུ་རྐེ་ནས་གསུང་བའི་མགུར།
ཞིང་བཙུན་བསྟན་པ་རྒྱ་མཚོས་གསུང་།
རྟ་རྫིང་ཇ་སག་ཨུ་རྐེ་ནས་གསུང་བའི་མགུར།
ཞང་བཙུན་བསྟན་པ་རྒྱ་མཚོས་གསུང་།
ཕོ་མི་མཁོ་དགུ་མཁོའི་འདོད་པ་ཅན། །
དུས་དབྱར་དགུན་མེད་པར་ཁོམ་དུས་མེད། །
རྒྱ་ཁེ་བའི་བོང་རྒན་རྒྱབ་མེད་པོ། །
ཁོ་ཀུམ་མེ་ཀུམ་མེ་འདུག་དབང་མེད། །
ཕོ་འདོད་ཆགས་ཅན་གྱི་བློས་ཡེངས་པོ། །
སེམས་རླུང་རྒོད་ལག་པས་ཁོག་དུས་མེད། །
དབྱར་སོས་ཀའི་དུས་ཀྱི་བོང་གསེབ་དེ། །
ཕོ་རང་ངེ་རང་ངེ་འདུག་དུས་མེད། །
ཕོ་ཞེ་སྡང་ཅན་དང་ཕྲག་དོག་ཅན། །
ཁོ་ཉལ་རུང་ལངས་རུང་བདེ་དུས་མེད། །
ནོར་ཐོབ་རྒྱུ་མེད་རུང་ཁྱི་རྒན་དེ། །
ཁ་ཅབ་བེ་ཅབ་བེ་དལ་དུས་མེད། །
ཕོ་བློ་ཁོག་ཅན་གྱི་བུ་རྒོད་པོ། །
ནོར་སྡུག་གསོག་མུག་གསོག་གང་དུས་མེད། །
ས་འོག་གི་བྱི་ལོང་མཆུ་དམར་དེ། །
ས་འབུར་རེ་འབུར་རེ་འདུག་དུས་མེད། །
ཕོ་རྒོད་པོ་ཚོང་ཁེ་བུན་ལོག་ཅན། །
འདང་སྟོང་པ་བརྒྱབ་ནས་གཉིད་དུས་མེད། །
འཇའ་འཛིན་འདོད་བྱིས་པ་བསམ་མེད་པོ། །
དབུགས་ཐེར་རེ་ཐེར་རེ་འདུག་དུས་མེད། །
མིང་བླ་མ་ཆེན་པོའི་གྲགས་པ་ཅན། །
ཐུགས་ཤི་སྔས་གཏད་པས་བཞུགས་དུས་མེད། །
མཐོ་དགུང་སྔོན་བསྟོད་པའི་བྱ་རྒོད་དེ། །
ཁོ་ལྷབ་བེ་ལྷབ་བེ་རོ་ལ་འཁོར། །
ཟས་དཀོར་ཟས་འཚོལ་བའི་གྲོང་ཆོག་པ། །
ཁ་ལག་པ་གཉིས་ཀ་དལ་དུས་མེད། །
ས་རི་བྲག་དཀྱིལ་གྱི་བྲ་ཙིག་དེ། །
མཆུ་མོ་རེ་མོ་རེ་དལ་དུས་མེད། །
གནས་རི་ཁྲོད་འགྲིམ་པའི་སྒོམ་ཆེན་པ། །
གྲོང་ཁྱིམ་སྒོ་ཉུལ་ནས་ནས་སྦར་འཐུ། །
ཉིན་ལུང་སྟོང་འགྲིམ་པའི་སྤྱང་ལྟོག་དེ། །
མཚན་ཀུག་གེ་ཀུག་གེ་རུ་མཐའ་ཉུལ། །
མིང་གོ་ས་མཐོ་འདོད་མི་ཆེན་ཚོ། །
སྡུག་ཡོང་གི་ཡོང་གི་སུན་དུས་མེད། །
མཐོ་རྫ་རི་ཉུལ་བའི་ཤ་བོ་དེ། །
ཁོ་གྲབ་བེ་གྲབ་བེ་འདུག་དུས་མེད། །
དོན་བསམ་བློ་མི་གཏོང་མདོ་མེད་པོ། །
ས་གང་དུ་སོང་ཡང་སྡུག་བསྔལ་མེད། །
མི་སྤྲང་པོས་ཁྲིད་པའི་སྤྲེའུ་དེ། །
ཁྲོམ་གར་སོང་བཞད་གད་ཆ་ལ་ལ། །
ཆོས་ཚུལ་བཞིན་བྱེད་པའི་སྐྱེས་བུ་དེ། །
ཕྱིའི་ཆ་ལུགས་ངན་ཡང་ཀུན་གྱིས་བཀུར། །
གདུགས་སེར་པོ་རྒྱུ་དག་ངན་ན་ཡང་། །
མི་ཀུན་གྱི་གཙུག་ན་གྱི་ལི་ལི། །
ཞེས་པ་འདི་ཡང་ཞང་བཙུན་པས་རྟ་རྫིང་ཇ་སག་ཨུ་རྐེ་ནས་བྲིས་པ་དགེ།། །།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
