འཕོ་བ་གསལ་འདེབས་ཀྱི་མགུར།
ཡུམ་བདག་མེད་མ། སྲས་དར་མ་མདོ་སྡེ་གཉིས་ཀྱིས་གསུངས།
འཕོ་བ་གསལ་འདེབས་ཀྱི་མགུར།
ཡུམ་གྱིས་སྲས་ཀྱི་སྙན་ཁུང་ལ་ཞལ་གཏད་ནས་བཤུམས་ཤིང་འཕོ་བ་གསལ་འདེབས་ཀྱི་མགུར་འདི་གསུངས་སོ།།
ཡུམ་བདག་མེད་མས་གསུངས།
རྗེ་དུས་གསུམ་སངས་རྒྱས་ཐམས་ཅད་ཀྱི།།
མཆོག་གི་སྤྲུལ་པ་རིན་པོ་ཆེ།།
མཚན་ལྡན་མར་པ་ལོ་ཙཱ་ཡི།།
ཞབས་ལ་གུས་པས་ཕྱག་འཚལ་ལོ།།
བུ་གསོན་དང་ཇོ་སྲས་མདོ་སྡེ་འབུམ།།
བུ་འདི་ནས་ཕ་རོལ་གཤེགས་པའི་ཕྱིར།།
འདུས་བྱས་ཕུང་པོ་འཇིག་པ་ལ།།
ཐུགས་ཁྲལ་ཅུང་ཟད་ཡོད་དེ་མཆི།།
ཕ་ཇོ་མར་པ་ལོ་ཙཱ་ཡིས།།
རྒྱ་གར་ཡུལ་ལ་ལན་གསུམ་བྱོན།།
སྐུ་སྲོག་ལ་མ་ལྟོས་དམ་ཆོས་བཙལ།།
མཚན་ལྡན་བླ་མ་དུ་མ་བསྟེན།།
ཁྱད་པར་ནཱ་རོ་པཎ་ཆེན་ལ།།
སྙན་རྒྱུད་ཀྱི་གདམས་པ་མ་ལུས་གསན།།
ཕ་ཇོས་མ་གསང་བུ་ལ་གསུངས།།
དུས་ད་ལྟ་ཐུགས་ལ་གསལ་མི་གསལ།།
ནཱ་རོ་པཎ་ཆེན་གྱི་གདམས་ངག་རྣམས།།
ད་ལྟ་གདེང་དང་ལྡན་མི་ལྡན།།
ཁྱད་ཆོས་བསྲེ་འཕོའི་གདམས་ངག་ལ།།
ད་ལྟ་ངེས་ཤེས་སྐྱེས་མ་སྐྱེས།།
སྐྱེ་མེད་ཕྱག་རྒྱ་ཆེན་པོ་ལ།།
ད་ལྟ་མཉམ་བཞག་བརྟན་མི་བརྟན།།
འཕོ་བ་གྲོང་འཇུག་གདམས་ངག་ལ།།
ད་ལྟ་གདེང་དང་ལྡན་མི་ལྡན།།
འདུས་བྱས་ཤ་ཁྲག་ཕུང་པོ་འདི།།
མི་རྟག་ནམ་མཁའི་འཇའ་ཚོན་འདྲ།།
སྒྱུ་མ་ལུས་ཀྱིས་རྟག་མ་ཐུབ།།
ཡུམ་ང་རང་ལྷ་མོ་བདག་མེད་མ།།
དུས་གསུམ་སངས་རྒྱས་བསྐྱེད་པའི་ཡུམ།།
སྙིང་པདྨ་འདབ་བརྒྱད་སེང་གེའི་ཁྲི།།
ཉི་ཟླ་པདྨའི་གདན་སྟེང་ན།།
སྐྱེས་མཆོག་མར་པ་ལོ་ཙཱ་བཞུགས།།
དགེས་རྡོར་སྤྲུལ་པའི་ལྷ་དགུ་ཡིན།།
བུ་རྣམ་ཤེས་ཚངས་པའི་ལམ་ནས་ཐོན།།
ད་ལན་ཨ་མའི་ཐུགས་ཀར་འཕོས།།
ཞེས་གསུངས།
ཞེས་གསུངས།
ཡབ་ཡུམ་ཐུགས་ཁྲལ་དུ་མི་འགྲོ་བའི་ཞུ་བ་ཞིག་འབུལ་བས། ཨ་ཕོས་ངའི་རམ་ཐེག་ཅིག་གསུང་ཞུ་དོན་གྱི་མགུར་འདི་ཕུལ།
སྲས་དར་མ་མདོ་སྡེས་གསུངས།
སྲས་དར་མ་མདོ་སྡེས་གསུངས།
རྗེ་སུམ་ལྡན་གྱི་བླ་མ་རིན་པོ་ཆེ།།
དཔལ་རྡོ་རྗེ་འཆང་དང་དབྱེར་མེད་པའི།།
ཡབ་དགེས་རྡོར་སྤྲུལ་པའི་ལྷ་དགུ་དང་།།
ཡུམ་སངས་རྒྱས་སྐྱེད་བྱེད་བདག་མེད་མ།།
ཡབ་ཡུམ་གཉིས་ལ་གུས་ཕྱག་འཚལ།།
ཡབ་ཡུམ་གྱིས་དབང་བསྐུར་བྱིན་གྱིས་རློབས།།
ང་འདི་ནས་ཕ་རོལ་འགྲོ་བ་ལ།།
ཡ་ང་དང་བག་ཚ་མི་བདོག་སྟེ།།
ཡབ་ཡུམ་དྲིན་ལན་མ་ཁྱེར་འཆི་བ་འདི།།
ཅུང་ཙམ་སེམས་ལ་འཕྲེང་བར་གདའ།།
འོན་ཀྱང་མ་ཕན་འཆི་བ་ལ།།
ཡབ་ཡུམ་ཐུགས་ཁྲལ་མི་བགྱིད་འཚལ།།
ཡབ་ཕ་ཇོས་གསུངས་པའི་རྒྱུད་འགྲེལ་རྣམས།།
དུས་ད་ལྟ་སེམས་ལ་གསལ་བར་གདའ།།
ཐབས་ལམ་ནཱ་རོ་ཆོས་དྲུག་ལ།།
ད་ལྟ་གདེང་དང་ལྡན་པར་གདའ།།
ཁྱད་ཆོས་བསྲེ་འཕོའི་གདམས་ངག་ལ།།
ད་ལྟ་ངེས་ཤེས་འདྲོངས་པར་གདའ།།
སྐྱེ་མེད་ཕྱག་རྒྱ་ཆེན་པོ་ལ།།
ད་ལྟ་མཉམ་བཞག་བརྟན་པར་གདའ།།
ཁྱད་ཆོས་འཕོ་བ་གྲོང་འཇུག་ལ།།
ད་ལྟ་གདེང་དང་ལྡན་པར་གདའ།།
ཡབ་ཡུམ་གཉིས་སྤྱན་ཆབ་མི་གཏོང་འཚལ།།
སྐྱེ་མེད་སྤྲོས་བྲལ་ཕྱག་རྒྱ་ཆེ།།
ཕུང་པོ་ཁམས་དང་སྐྱེ་མཆེད་རྣམས།།
ལྷ་དང་ལྷ་མོའི་རང་བཞིན་གསལ།།
སྤྱིར་འཕོ་བྱ་འཕོ་བྱེད་རྟེན་དང་བྲལ།།
སྐྱེ་མེད་ཆོས་ཀྱི་དབྱིངས་སུ་འཕོ།།
ཡབ་ཡུམ་གྱི་ཐུགས་ཀར་གཏད་མི་འཚལ།།
རྣམ་ཤེས་གྱེན་ལ་འཕང་མི་འཚལ།།
བླ་མ་ནཱ་རོ་དང་མཻ་ཏྲིའི་རྒྱུད་འགྲེལ་རྣམས།།
རྔོག་སྟོན་མཐུ་ཆེན་ལ་སོགས་པའི།།
ཁོང་བུ་ཆེན་རྣམས་ལ་གནང་མཛོད་ལ།།
སངས་རྒྱས་ཀྱི་བསྟན་པ་སྤེལ་བར་ཞུ།།
བདག་གསོན་ཡང་བྱེད་རྒྱུ་དེ་ལས་མེད།།
ཤི་ཡང་ཞུ་རྒྱུ་དེ་ལས་མེད།།
འོ་སྐོལ་ཡབ་ཡུམ་སྲས་བཅས་རྣམས།།
སྐྱེ་བ་འདི་ལ་མཇལ་སྙམ་མི་གདའ་སྟེ།།
ཨུ་རྒྱན་ཡུལ་ལམ་མཁའ་སྤྱོད་དུ།།
ཕྱི་མ་ཅིས་ཀྱང་མཇལ་བར་ཞུ།།
ཞེས་ལན་དུ་ཕུལ་ལོ།།
རྩོམ་སྒྲིག་པ། མྱི་གསར་བ།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
