མཆོད་པའི་ལྷ་མོ་བཅུ་དྲུག
རིག་འཛིན་ཆེན་པོ་འཇིགས་མེད་གླིང་པས་གསུང་།
མཆོད་པའི་ལྷ་མོ་བཅུ་དྲུག
རིག་འཛིན་ཆེན་པོ་འཇིགས་མེད་གླིང་པས་གསུང་།
སྒེག་མོ་མ།
པདྨ་རྒྱས་པ་ལྟ་བུའི་ལང་ཚོ་ཅན།།
རེག་ན་བདེ་བའི་མཆོག་སྟེར་ཨུཏྤལ་མིག །
གཟུགས་ཀྱི་རྣམ་འགྱུར་ངོམ་པའི་ཡིད་འཕྲོག་མ།།
རྡོ་རྗེ་སྒེག་མོ་མ་ཡིས་མཉེས་གྱུར་ཅིག །
ཕྲེང་བ་མ།
སྲིད་ན་རྣམ་པར་མཛེས་པའི་ཟླ་བས་ཀྱང་།།
བལྟ་ན་སྡུག་པའི་གཟུགས་ཀྱི་ཆར་མི་ཉེ།།
ནོར་བུའི་དོ་ཤལ་འཛིན་པའི་ཡིད་འོང་མ།།
རྡོ་རྗེ་ཕྲེང་བ་མ་ཡིས་མཉེས་གྱུར་ཅིག །
གླུ་མ།
འཇམ་མཉེན་པུཎྜ་རི་ཀའི་ལང་ཚོ་ལ།
རེག་འཇམ་དབང་པོའ་ིགཞུ་ཡི་འཁྲི་ཤིང་ཅན།།
སྐད་སྙན་འགྱུར་ཁུགས་སྟོང་གི་གླུ་ལེན་མ།།
རྡོ་རྗེ་གླུ་མའི་ཚོགས་ཀྱིས་མཉེས་གྱུར་ཅིག །
གར་མ།
བུང་བ་པདྨའི་ཚལ་ན་གཡོ་བ་བཞིན།།
ཕྱག་ཞབས་གསེར་གཡུའི་གདུ་བུས་མཛེས་པའི་གར།།
མིག་འཕྲུལ་ལྟ་བུར་བསྒྱུར་བའི་གཡོ་ལྡན་མ།།
རྡོ་རྗེ་གར་མའི་ཚོགས་ཀྱིས་མཉེས་གྱུར་ཅིག །
བདུག་སྤོས་མ།
བཅུ་དྲུག་ལང་ཚོས་མྱོས་པའི་རྣམ་འགྱུར་དེས།།
སྙིང་ལ་དགའ་བའི་ཡ་མཚན་ཅིར་ཡང་སྟེར།།
དྲི་ཞིམ་སྤོས་ཕོར་ཐོགས་པའི་སྨིན་ལེགས་མ།།
རྡོ་རྗེ་བདུག་སྤོས་མ་ཡིས་མཉེས་གྱུར་ཅིག །
མེ་ཏོག་མ།
ཚངས་དབང་འཆི་མེད་བུ་མོའ་ིའཇོ་སྒེག་ཀྱང།།
ཤིན་ཏུ་མཛེས་པའི་ལང་ཚོས་བརྟན་པ་འཕྲོག །
ཨུ་དུམ་ཝ་རའི་ཆུན་འཕྱང་ཡིད་འཕྲོག་མ།།
རྡོ་རྗེ་མེ་ཏོག་མ་ཡིས་མཉེས་གྱུར་ཅིག །
སྣང་གསལ་མ།
ཡིད་འོང་བལྟ་ན་སྡུག་པའི་མཁུར་ཚོས་ལ།།
ལི་ཁྲིས་ཐིག་ལེ་བསྐུས་པའི་རི་དྭགས་མིག །
ཉི་ཟླའི་སྒྲོན་མེ་ཐོགས་པའི་བཞིན་བཟང་མ།།
རྡོ་རྗེ་སྣང་གསལ་མ་ཡིས་མཉེས་གྱུར་ཅིག །
དྲི་ཆབ་མ།
འཆི་མེད་བུ་མོའ་ིདཔལ་འཛིན་སྨིན་ལེཌ་གཟུགས།།
ཞལ་ནས་ཨུཏྤལ་ལ་ཡི་དྲི་འཐུལ་ཞིང།།
བཟང་དྲུག་སྨན་གྱིས་བྱུག་པས་དགྱེས་པ་སྐོང།།
རྡོ་རྗེ་དྲི་ཆབ་མ་ཡིས་མཉེས་གྱུར་ཅིག །
མེ་ལོང་མ།
ལང་ཚོའི་ཆ་ཤས་རྫོགས་པའི་པདྨ་དང།།
རྣམ་འགྱུར་ཅིར་ཡང་འཆར་བའི་ཨ་དར་ཤ །
ཕན་ཚུན་འགྲན་པ་ལྟ་བུའི་གཟུགས་མཛེས་པ།།
རྡོ་རྗེ་མེ་ལོང་མ་ཡིས་མཉེས་གྱུར་ཅིག །
རྔ་ཟླུམ་མ།
ཏིང་འཛིན་རི་མོ་མཁན་གྱིས་བྲིས་པའི་གཟུགས།།
བཞིན་བཟང་མནྡ་ར་བའི་ཐོད་བཅིངས་ཅན།།
ཟླུམ་པོའ་ིརྔ་ལས་བདེ་སྟོང་སྒྲ་འབྱིན་མ།།
རྡོ་རྗེ་རྔ་ཟླུམ་མ་ཡིས་མཉེས་གྱུར་ཅིག །
པི་ལྦཾ་མ།
རཏྣའི་སོར་གདུབ་འཁྲོལ་བའི་ཁུ་ཚུར་གྱིས།།
དྲི་ཟའི་བུ་མོར་འགྲན་པའི་ཏཾ་བུ་ར།།
རྣ་བའི་དཔྱིད་དུ་སྦྲེངས་པའི་ཡིད་འཕྲོག་མ།།
རྡོ་རྗེ་པི་ཝཾ་མ་ཡིས་མཉེས་གྱུར་ཅིག །
གླིང་བུ་མ།
དགའ་བ་བཅུ་དྲུག་རླུང་གི་རྟར་བསྐྱོན་ནས།།
ཐིག་ལེ་བཅུ་དྲུག་གནས་སུ་དག་པ་ལས།།
སྟོང་ཉིད་བཅུ་དྲུག་གླིང་བུའི་སྒྲར་སྟོན་པའི།།
རྡོ་རྗེ་གླིང་བུ་མ་ཡིས་མཉེས་གྱུར་ཅིག །
རྫ་རྔ་མ།
ཟླ་གཞོན་པད་དཀར་ལྟ་བུའི་ལང་ཚོའི་དཔལ།།
མིག་གི་བདུད་རྩིར་སྦྱིན་དང་ཆབས་གཅིག་པར།།
སྙན་འགྱུར་རྫ་རྔའི་སྒྲ་སྒྲོགས་ན་ཆུང་མ།།
རྡོ་རྗེ་རྫ་རྔ་མ་ཡིས་མཉེས་གྱུར་ཅིག །
རེག་བྱ་མ།
སྟོང་ཉིད་ནམ་མཁའི་རྒྱན་གྱུར་ལྷ་ཡི་གོས།།
རིན་ཐང་བརྗོད་དུ་མེད་པའི་པཉྩ་ལི།།
འཕྲུལ་ལྡན་སོར་རྩེས་སྤྲོད་པའི་མཛའ་ན་མོ།།
རྡོ་རྗེ་རེག་བྱ་མ་ཡིས་མཉེས་གྱུར་ཅིག །
རོ་མ།
ཆགས་མེད་ཆགས་པ་ཆེན་པོའ་ིཟུར་མིག་གིས།།
དཔའ་བོའ་ིཡིད་ལ་མྱོས་པའི་ཆོམ་རྐུན་འཇུག །
ལག་ན་རོ་བརྒྱའི་དཔལ་འཛིན་ཞལ་ཟས་ཐོགས།།
རྡོ་རྗེ་རོ་མའི་ཚོགས་ཀྱིས་མཉེས་གྱུར་ཅིག །
ཆོས་ཀྱི་རྡོ་རྗེ་མ།
བདེ་བས་བདེ་བའི་མཐར་སོན་སྟོང་པ་ཉིད།།
བདེ་ཆེན་ཆོས་གྱི་འབྱུང་གནས་མངལ་ཁུར་ཅན།།
བདེ་སྟོང་ངང་ལས་རྒྱལ་ཀུན་བསྐྱེད་པའི་ཡུམ།།
ཆོས་ཀྱི་རྡོ་རྗེ་མ་ཡིས་མཉེས་གྱུར་ཅིག །
རྩོམ་སྒྲིག་པ། མྱི་གསར་བ།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
