ཤར་གངས་རི་མ།
པཎ་ཆེན་དགེ་འདུན་གྲུབ་ཀྱིས་གསུངས།
ཤར་གངས་རི་མ།
པཎ་ཆེན་དགེ་འདུན་གྲུབ་ཀྱིས་གསུངས།
ཤར་གངས་རི་དཀར་པོའི་རྩེ་མོ་ན། །
སྤྲིན་དཀར་པོ་གནམ་ལ་སྙེགས་འདྲ་བ། །
དེ་མཐོང་བའི་མོད་ལ་བླ་མ་དྲན། །
དྲིན་བསམས་ཤིང་བསམས་ཤིང་དད་པ་སྐྱེ། །
སྤྲིན་དཀར་པོ་ལྡིང་པའི་ཤར་ཕྱོགས་ན། །
འབྲོག་དགེ་ལྡན་རྣམ་པར་རྒྱལ་བའི་གླིང༌། །
མཚན་བརྗོད་པར་དཀའ་བའི་དྲིན་པོ་ཆེ། །
ཕ་བློ་བཟང་གྲགས་པ་ཡབ་སྲས་བཞུགས། །
ལམ་རིམ་པ་གཉིས་ཀྱི་རྣལ་འབྱོར་སོགས། །
ཆོས་ཟབ་ལ་ཤིན་ཏུ་རྒྱས་པར་གསུངས། །
བོད་ཁ་བ་ཅན་གྱི་སྐལ་ལྡན་ལ། །
མགོན་ཁྱོད་ཀྱི་བཀའ་དྲིན་བསམ་མི་ཁྱབ། །
སྒོས་སྙོམ་ལས་འཛིན་པའི་དགེ་འདུན་གྲུབ། །
བློ་ཅུང་ཟད་ཆོས་ལ་ཕྱོགས་པ་འདི། །
རྗེ་ཡབ་སྲས་རྣམས་ཀྱི་བཀའ་དྲིན་ཡིན། །
དྲིན་ཆེ་བར་ངེས་སོ་ཡབ་སྲས་རྣམས། ༈ །
དུས་དེང་ནས་བྱང་ཆུབ་སྙིང་པོའི་བར། །
རྗེ་ཡབ་སྲས་ཁྱེད་རྣམས་མ་གཏོགས་པར། །
སྐྱབས་རེ་ས་གཞན་དུ་མི་འཚོལ་བས། །
ཐུགས་བརྩེ་བའི་ལྕགས་ཀྱུས་དྲང་དུ་གསོལ། །
དྲིན་ཇི་བཞིན་འཁུར་བར་མ་ནུས་ཀྱང༌། །
སེམས་ཆགས་སྡང་དབང་དུ་མ་སོང་བར། །
མགོན་ཁྱོད་ཀྱི་བསྟན་པ་འཛིན་པ་ལ། །
དུས་ནམ་ཡང་བརྩོན་པ་བགྱིད་པར་སྨོན། །
ལར་ད་ལྟ་གངས་རིའི་ཁྲོད་འདི་ན།།
རང་བསྟན་པ་འཛིན་པར་ཁས་ལེན་ཞིང༌། །
གཞན་བསྟན་འཛིན་དགྲ་བོའི་དྭངས་མར་འཛིན། །
ཚུལ་འདི་ལ་སྐྱོ་བ་གཏིང་ནས་སྐྱེས། །
གཞན་ཕུང་བར་འདོད་པའི་ཀུན་སློང་དང༌། །
རྒྱུད་མཚན་འཛིན་དམ་པོས་བཅིངས་ལགས་ཀྱང༌། །
ལམ་མཐོན་པོར་གནས་པའི་ཁས་ལེན་བྱེད། །
འདི་བརྟག་ན་ཀུན་གྱིས་ཁྲེལ་བའི་རྒྱུ། །
ལམ་གོལ་སར་རྒས་པའི་སྡུག་ཡུས་ཀྱིས། །
ཆོས་ཚུལ་བཞིན་བྱེད་པའི་གང་ཟག་ལ། །
རྒྱུད་ཁོང་ནས་འཁྲུགས་པའི་གདུག་སེམས་ཅན། །
གདོན་ཐུགས་ལ་ཞུགས་པ་མ་ལགས་སམ། །
དགྲ་ཉོན་མོངས་འདུལ་ཐབས་མི་བྱེད་པར། །
གཤགས་འགྱེད་པ་ཙམ་གྱི་འཆད་ཉན་ཡང༌། །
འདྲེ་ཤར་སྒོའི་ཕྱོགས་སུ་གནས་པ་ལ། །
གླུད་ནུབ་སྒོར་གཏོང་བ་དོན་རེ་ཆུང༌། །
དོན་དེ་ལྟར་གོ་བའི་བཤེས་གཉེན་རྣམས། །
སྤྱིར་ལུས་ཅན་ཀུན་ལ་བཀའ་དྲིན་སོམས། །
སྒོས་ཆོས་མཛད་ཡོངས་ལ་དག་སྣང་སྦྱོངས། །
དགྲ་ནང་ན་འདུག་པའི་བདག་འཛིན་ཐུལ། །
མི་ཁོ་བོའི་རྗེས་འཇུག་གྲོགས་པོ་ཀུན། །
ཡིད་ཕྱོགས་སུ་ལྷུང་བར་མི་བྱེད་པར། །
བློ་གཟུ་བོར་གནས་པའི་རྟོག་དཔྱོད་ཀྱིས། །
ལམ་དྲང་པོར་ཞུགས་པ་ཅིས་ཀྱང་ལེགས། ༈ །
གཏམ་འདི་ལ་བརྟེན་ནས་འགྲོ་བ་རྣམས། །
བྱམས་སྙིང་རྗེས་དྲངས་པའི་སེམས་བསྐྱེད་དང་།།
དབྱིངས་སྤྲོས་བྲལ་རྟོགས་པའི་ལྟ་བ་ཡིས། །
དཔལ་བླ་མེད་བྱང་ཆུབ་མྱུར་ཐོབ་ཤོག །
སྐུ་ལ་མཚན་དཔེའི་དཔལ་འབར་ཞིང༌། །
གསུང་དབྱངས་ཡན་ལག་དྲུག་ཅུས་བརྒྱན། །
ཐུགས་ནི་ཟབ་ཡངས་མཁྱེན་བརྩེའི་གཏེར། །
དཔལ་ལྡན་བླ་མའི་བཀྲ་ཤིས་ཤོག །
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
