ཨོཾ་མ་ཎི་པདྨེ་ཧཱུཾ།།

    ཞབས་དཀར་ཚོགས་དྲུག་རང་གྲོལ་གྱིས་གསུངས།


དེང་སང་གི་བླ་མ་ཕལ་ཆེར་ལ་བལྟས་ནས་རང་ཉིད་དགེ་ལ་བསྐུལ་བའི་ཆ་རྐྱེན་དུ་སྨྲས་པའོ།།

 
                ཞབས་དཀར་ཚོགས་དྲུག་རང་གྲོལ།

ཨོཾ་མ་ཎི་པདྨེ་ཧཱུཾ།། 
དང་པོ་བླ་མ་ངེས་འབྱུང་ཅན།།
ཆུང་ངུའི་དུས་ནས་རབ་བྱུང་བྱས།།
ཆེར་སོང་བསྙེན་རྫོགས་སྡོམ་པ་བླངས།།
མཚན་ཉིད་གྲྭ་ས་དག་ལ་བསྡད།།
ཆོས་ལ་ཐོས་བསམ་བྱེད་པའི་ཚེ།།
དགེ་འདུན་ཀུན་གྱིས་འདི་ཉིད་ལ།།
ཆོས་ར་བ་ནི་བཟང་པོ་ཞིག །
ངེས་པར་འོང་གི་ཟེར་ཞིང་སྨོན།།
དབུ་མ་ལྟ་བུར་ཐོན་པའི་ཚེ།།
དེ་དོན་བསྒོམ་པ་ཕར་ལ་ཞོག།
གང་ཞིག་ཅིག་ནས་སྐད་ཉེས་ཤིག །
གོ་ལྟར་འཕྲོ་ཡང་བཤོལ་ནས་འཇོག །
བར་དུ་བླ་མ་འགྲོ་འདྲེན་པོ།།
ཕ་ཡུལ་ལ་སོགས་གྲོང་དུ་འབབ།།
ཀུན་གྱིས་བླ་མ་ཟེར་ཞིང་མཇལ།།
ཁོས་ཀྱང་བླ་མའི་ཁུར་དེ་བཟུང་།།
དད་ཟས་གཤིན་ཟས་སྡུད་ལ་བརྩོན།།
དད་ཅན་མི་ཡིས་ཆོས་ཞུས་ཚེ།།
ནོར་རྫས་རྩྭ་མགོའི་ཟིལ་བ་འདྲ།།
མཆོད་སྦྱིན་བྱས་ན་བཟང་ལ་སོགས།།
ཆོས་གཏམ་ཆེན་པོ་ཁ་ནས་ལབ།།
ཁོག་ནས་འདོོད་སྲེད་མེ་བཞིན་འབར།།
དེ་ལ་འབུལ་བ་ཅི་སྟེར་སྙམ།།
མི་ཞིག་ཤི་བ་ཐོས་ནས་བཟུང་།།
གདན་འདྲེན་པ་ཞིག་ཨེ་འོང་སྙམ།།
མི་ཞིག་གྲགས་ན་འདན་འདྲེན་པ།།
ཨེ་ཡིན་སྙམ་ནས་ཨུ་རེད་ཟེར།།
ཉི་མ་ཁ་ཤས་གདན་འདྲེན་པ།།
མ་འོངས་པ་ན་རྒྱང་རྩར་བྱེད།།
དེ་བས་བླ་མ་སུ་གདན་དྲངས།།
ཅི་ཕུལ་རྒྱུ་ནོར་ཨེ་བཟང་འདྲི།།
གདན་འདྲེན་མི་ནི་བྱུང་མ་ཐག།
གྲྭ་བར་རེམ་ལ་རྟ་ལོངས་ཟེར།།
མྱུར་དུ་རྟ་ལ་སྒ་བསྟད་ནས།།
རེབ་གོང་སྟོད་ཀྱི་ཇག་པ་བཞིན།།
རྒྱུག་འདུར་གཉིས་ཀ་བྱས་ནས་སོང་།།
དེ་ནས་ཇ་དང་ཤ་དྲངས་ཚེ།།
ལུག་ཤ་ཆེན་པོ་ཞིག་ཡིན་ན།།
ཨོཾ་མ་ཎི་པདྨེ་ཧཱུཾ།།
ལུག་འདི་ཅི་ཞིག་ཚོ་ནི་རེད།།
ཟེར་ཞིང་གྲྭ་བ་རྣམས་ལ་བལྟ།།
གྲྭ་བས་ལགས་སོ་དེ་རེད་ཟེེེར།།
དེ་ནས་ཆོ་ག་འདོན་པའི་ཚེ།།
མིག་ཟུམ་ཁོག་སྟོད་རབ་ཏུ་འགུལ།།
ཁོག་ན་དེ་རིང་ཅི་སྟེར་སྙམ།།
དེ་ནས་འབུལ་བ་ཕུལ་བའི་ཚེ།།
དགའ་ཞིང་ཁ་ནས་འདི་སྐད་ཟེར།།
ང་ལ་འབུལ་བ་ཆེ་ཚད་རེད།།
ཁྱེད་རྣམས་ཤི་བོ་འདིའི་དོན་དུ།།
མྱ་ངན་བྱས་པས་མི་ཕན་པས།།
ཤི་བོར་ཕན་པ་ལྷ་ཆོས་ཡིན།།
ཆོས་རྣམས་རྒྱུ་མ་རྨི་ལམ་འདྲ།།
རྟག་པའི་ཆོས་ནི་གང་ཡང་མེད།།
མྱ་ངན་མ་བྱེད་ལ་སོགས་པས།།
སྡུག་བསྔལ་ཅན་ལ་སེམས་གསོ་བྱེད།།
ཁོག་ན་ནོར་རྫས་འདི་ཉིད་ཀྱིས།།
འདི་དང་འདི་འདྲ་ཞིག་བྱེད་སྙམ།།
ཆར་ཆུ་ནམ་ཡང་མི་འཛེམ་པར།།
རྟ་རྔ་ཁྱི་ཁར་གཡེང་བཞིན་དུ།།
དབྱར་གྱི་དུས་སུ་མར་བསོད་རྒྱག།།
སྟོན་གྱི་དུས་སུ་ནས་བསོད་རྒྱག།
མི་རྟ་གཉིས་ཀས་སྡུག་བསྔལ་མྱོང་།།
ཁ་དར་ཕྱག་མདུད་ལུང་བ་འགེངས།།
ཡོན་བདག་མི་ལེན་ཕྱིར་ལ་འཕེན།།
མི་ལེན་ན་ཡང་གཉའ་འཇོག་བྱེད།།
དེ་ལྟར་ཐབས་ནི་སྣ་ཚོགས་པ།།
བྱས་ནས་ཟས་ནོར་ཁྱེར་ནས་འོང་།།
ཐུགས་དམ་བྱེད་ཀྱིན་ཡོད་ཟེར་ནས།།
རྒྱུན་དུ་འདང་ལོག་མང་བོ་རྒྱབ།།
མི་ཞིག་སླེབས་ན་སུ་རེད་ཟེར།།
ཡོན་བདག་འདི་སྐད་རེད་ཞུས་ཚེ།།
ཡོན་བདག་བཟང་བོ་ཞིག་ཡིན་ན།།
ཁོང་གི་མདུན་དུ་ཤོག་ཅིག་ཟེར།།
སྟན་བཏིང་སྔོན་དུ་སྡེར་ཁ་བསྒྲིགས།།
ཁྱེད་ཚོ་ཐམས་ཅད་བདེ་མོ་ཞེས།།
སྐད་མགོ་མཐོན་པོས་འཚམས་འདྲི་བྱེད།།
དེ་མིན་གཞན་གྱི་མི་ཡིན་ན།།
མདུན་དུ་འོང་གི་མ་འཇུག་ཟེར།།
གྲྭ་བས་མི་དེར་འདི་སྐད་ཟེར།།
བླ་མའི་ཐུགས་དམ་མ་གྲོལ་བས།།
ད་དུང་མདུན་དུ་མི་ཆུད་ཟེེར།།
ཐ་མ་བླ་མ་སེར་སྣ་ཅན།།
གང་ཡོད་སྣོད་ཀྱི་ནང་དུ་བཅུག།
ཁ་ལ་རྒྱ་མདུད་ལ་སོགས་རྒྱག།།
གཉེར་བ་མིང་གི་གཉེར་བ་ཡིན།།
དོན་ལ་བླ་མ་གཉེར་བ་ཡིན།།
ཟངས་ཁ་མིན་ཚད་ཀུན་ལ་སླེབས།།
གཉེར་བ་གྲྭ་བ་ཐམས་ཅད་ལ།།
ཅུང་ཟད་ཙམ་ཞིག་ཡིན་ན་ཡང་།།
ཡོན་བདག་འདི་ཡིས་ཕུལ་བ་ཡི།།
ནོར་རྫས་འདི་ནི་ཅི་བྱས་ཞེས།།
ཡང་ཡང་རྩད་གཅོད་དྲག་པོ་བྱེད།།
ལག་པ་ལྷ་ཁང་སྒོ་བས་དམ།།
མཆོད་སྦྱིན་མང་བོ་ཕར་ལ་ཞོག།
ལྟོགས་ནས་འཆི་བའི་མི་ལ་ཡང་།།
རྩམ་འཆང་ཙམ་ཞིག་སྟེར་མི་ཤེས།།
ཟས་ནོར་མང་བོ་བསོག་བསོགས་ནས།།
འཆི་བའི་ནད་ཀྱིས་ཐེབས་པའི་ཚེ།།
གཉེར་བ་གྲྭ་བ་རྣམས་ཀྱི་ཁས།།
བླ་མའི་སྐུ་འདི་བདེ་ན་ཟེར།།
ཁོག་ན་བླ་མ་འདི་ཤི་ན།།
ཟས་ནོར་འདི་ཚོ་ཁོར་ཐོབ་སྙམ།།
ནོར་རྫས་ཆགས་བཞིན་བླ་མ་འཆི།།
བླ་མ་ཤི་བའི་ནངས་པར་དུ།།
ཡུལ་བ་རྣམས་ཀྱིས་བླ་མ་ཡི།།
བདག་པོ་ཁོང་རྣམས་ཡིན་ཟེར་འོངས།།
ནོམ་པ་གང་ཡོད་ཕལ་ཆེར་ཁྱེར།།
གཉེར་བས་སྔོན་ནས་གང་མཁོ་བླངས།།
ཤུལ་དུ་ཅུང་ཟད་ཙམ་བཞག་ནས།།
བླ་མར་འདི་མིན་གང་ཡང་མེད།།
ཟེར་ཞིང་ཀུན་ལ་རབ་བསྟན་ནས།།
ཅུང་ཟད་པོ་དེ་ཚོགས་སུ་གཏོང་།།
བླ་མའི་གདུང་མཆོད་དེ་ནས་འགྲུབ།།
བླ་མ་ནོར་རྫས་རབ་ཆགས་པའི།།
སྟབས་ཀྱིས་ཉེ་འཁོར་དེ་ཉིད་ཀྱི།།
སྲོག་ཆགས་ཤིག་ཏུ་སྐྱེ་བ་འམ།།
ཡང་ན་དཀོར་གྱི་རྣམ་སྨིན་རྣམས།།
རྒྱབ་ཏུ་ཁུར་ནས་དམྱལ་བར་འགྲོ།།
སོང་ན་ཨ་ཁུ་ཆོས་རྒྱལ་གྱི།།
དྲུང་དུ་བླ་མ་འོ་བརྒྱལ་ཡོད།།
དེ་ཕྱིར་ཚོགས་དྲུག་རང་གྲོལ་ཁྱོད།།
དེང་སང་བླ་མ་ཕལ་ཆེར་གྱི།།
གོ་ས་དེ་ཉིད་མ་འཛིན་པར།།
རི་དྭགས་རྨས་མ་ཇི་བཞིན་དུ།།
དུ་མའི་རི་ཁྲོད་དབེན་པར་ཆོས།།
ཆོས་བཞིན་གྱིས་དང་འཆི་ཚེ་སྐྱིད།།
སྐྱིད་པ་གཞན་ལ་ཁྱོད་མ་སྨོན།།   
      འཇིགས་མེད་བློ་གྲོས་དང་བསམ་དགས་ཡི་གེར་ཕབས།
                             རྩོམ་སྒྲིག་པ། གསར་བ། 

           མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།

Signature is customized by Netease