ཆོས་ལུགས།
ཤེས་རིག
གསུང་མགུར།
སྒྲུང་རྩོམ།
སྙན་ངག
འགྱུར་རྩོམ།
ལྷུག་རྩོམ།
ལྷ་ཚོགས།
ཆོས་ལུགས།
ཤེས་རིག
གསུང་མགུར།
སྒྲུང་རྩོམ།
སྙན་ངག
འགྱུར་རྩོམ།
ལྷུག་རྩོམ།
ལྷ་ཚོགས།
མྱི་གསར་བ།
དཔེ་འཕྲིན།
བརྩེ་ལྡན་གྱི་ཨ་མ།
རྩོམ་པ་པོ། མྱི་གསར་བ།
སྐྱེ་བ་འདིའི་
ཨ་མ་ཚེ་རིང་དབང་མོ
་སོགས་ཨ་མ་ཡོངས་ལ་ཕུལ།
ལྷུག་རྩོམ།
བརྩེ་ལྡན་གྱི་ཨ་མ།
མྱི་གསར་བ། མི་ཉག
ཨ་མའི་གོ་དོན་ནི་བྱམས་བརྩེའི་གོ་དོན་ཡིན་ལ། བདེ་སྐྱིད་དང་མཛེས་སྡུག་གི་གོ་དོན་ཡིན། ཨ་མའི་གོ་དོན་ནི་ཁྱིམ་གཞིས་ཀྱི་གོ་དོན་ཡིན་ལ། ཆ་མཐུན་དང་ཞི་བདེའི་གོ་དོན་ཡང་ཡིན། འུ་ཅག་གི་མཐུན་སྣང་གི་འཇིག་རྟེན་ནི་ཨ་མས་བསྐྲུན་ཞིང་། ཟག་བཅས་འཁོར་བའི་དོན་སྙིང་ཡང་ཨ་མས་བསྐྲུན་པ་རེད། ཨ་མ་ནི་བརྗོད་པར་དཀའ་བའི་གནས་ལུགས་ཀྱི་བང་མཛོད་ཡིན་ལ། ཨ་མ་ནི་བརྗོད་ཀྱང་རྫོགས་མཐའ་བྲལ་བའི་རང་བྱུང་གི་མཛེས་སྡུག་ཡིན།
འུ་ཅག་འཇིག་རྟེན་འདིར་སྐྱེས་པ་ནས་བཟུང་ཐོག་མར་མཐོང་བའི་གཟུགས། ཐོག་མར་ཐོས་པའི་སྒྲ། ཐོག་མར་ཚོར་བའི་དྲི། ཐོག་མར་མྱངས་བའི་རོ། ཐོག་མར་འཕྲད་པའི་རེག་བྱ་མ་ལུས་པ་བརྩེ་ལྡན་ཨ་མའི་ལུས་སེམས་ཀྱི་ཁྲག་རྒྱུན་དང་འབྲེལ་བ་ཡོད་སྐད། དེ་བཞིན་འུ་ཅག་གི་སྐད་བརྡ་ཨ་མ་ཞེས་པའི་ཐ་སྙད་ལས་བརྩམས་ཤིང་འུ་ཅག་གི་རྐང་བ་ཨ་མའི་པང་ནས་ས་ཆེན་གྱི་ངོས་སུ་ཐོག་མར་སྤོས་པ་རེད། འུ་ཅག་གི་གཏམ་རྒྱུད་ཨ་མ་ནས་མགོ་བརྩམས་ཤིང་འུ་ཅག་གི་འཇིག་རྟེན་ཨ་མ་དང་འབྲལ་ཐབས་བྲལ་བའི་ཆོས་ཉིད་ཀྱི་བདེན་པ་ཞིག་ཏུ་གྱུར། མ་ཟད་འུ་ཅག་གསོན་པའི་དུས་སྐབས་སུ་ཡང་ཨ་མའི་བྱམས་བརྩེ་དང་སྙིང་གཏམ། སེམས་ཁུར་དང་བསླབ་བྱའི་འོག་ནས་འཚོས་པ་རེད་ལ། གློ་བུར་དུ་འུ་ཅག་ན་བ་དང་འཆི་བའི་སྐབས་ཀྱང་ཨ་མའི་བཟོད་ཐབས་བྲལ་བའི་གདུང་སེམས་དང་། བརྗོད་ཐབས་བྲལ་བའི་སྙིང་རྗེའི་འོག་ནས་དེ་ལྟར་མཇུག་རྫོགས་དགོས་བྱུང་བ་རེད། ཨ་མས་དུས་ཚོད་དང་ཚེ་སྲོག་མཐའ་དག་སྤྱད་དེ་འུ་ཅག་གི་བདེ་སྐྱིད་དང་རེ་སྨོན་ལ་འོད་སྣང་བརྩལ་ཞིང་། ཨ་མས་དྭངས་གཙང་གཞལ་མཐའ་བྲལ་བའི་སྙིང་ཆུང་ཕྱི་རུ་བཏོན་ནས་འུ་ཅག་ལ་ལེགས་སྐྱེས་སུ་ཕུལ། ཨ་མ་ནམ་ཡང་ཁོམ་པ་མེད་པར་འཁོར་བའི་ཐབས་ཚང་དུ་འཇུག་པ་ནི་འུ་ཅག་གི་ཆེད་དུ་རེད་ལ། ཨ་མ་འཁྱག་ལྟོག་སྐོམ་པའི་ཇི་ལྟར་གདུང་དགོས་བྱུང་ཡང་འུ་ཅག་གི་ཆེད་དུ་རྒྱུག་ཅིང་འདུར་བའི་གོམ་མཚམས་ཡེ་ནས་ལྷོད་མ་མྱོང་། ཨ་མ་འཇིག་རྟེན་འདིར་འོང་བ་ལ་དམིགས་ཡུལ་གཉིས་ཡོད་དེ། གཅིག་ནི་བདེ་ཞིང་སྐྱིད་པའི་ཁྱིམ་གཞིས་ལེགས་པར་བསྐྲུན་རྒྱུ་དང་། གཅིག་ནི་མཛའ་ཞིང་བརྩེ་བའི་བུ་ཕྲུག་ནད་མེད་ཚེ་རིང་ངང་འཚར་ལོངས་བྱུང་བར་འཇུག་རྒྱུ་དེ་རེད། དེ་ནི་ཨ་མའི་ཐོབ་ཐང་དང་འབྲེལ་བ་མེད་པར་ཨ་མའི་ལས་དབང་དང་བྱམས་བརྩེ་ལ་འབྲེལ་བ་ཡོད་པ་ཞིག་རེད་ལ། རྣམ་དག་ལྷད་མེད་ཀྱི་ཨ་མའི་ནང་སེམས་དང་འབྲེལ་བ་ཡོད་པ་ཞིག་ཀྱང་རེད།
ཁྱེད་ཀྱི་ཁྲག་རྒྱུན་ཨ་མའི་ཁྲག་རྒྱུན་ཡིན་པ་དང་ཁྱེད་ཀྱི་བྱམས་བརྩེ་ཨ་མས་གནང་བ་ལས་ལྡོག་སྟེ། བརྩེ་ལྡན་གྱི་མ་ཡུམ་ནི་ཁྱེད་ཀྱི་འཇིག་རྟེན་ཤེས་རིག་གི་འབྱུང་ཁོང་དང་ལེགས་པའི་ཀུན་སྤྱོད་ཀྱི་རྩ་བ་ཡང་ཡིན། ཨ་མའི་རྣམ་ཤེས་ཀྱི་བརྩེ་བའི་དྲོད་ཁོལ་ཁྱེད་ཀྱིས་མྱངས་ཞིང་རོལ་བ་བཞིན་དུ། ཨ་མའི་རུས་པའི་གཏིང་ལ་ཟུག་པའི་རིག་གནས་དང་འདུ་ཤེས། ཨ་མའི་ཕྲ་ཕུང་ཀུན་གཞིའི་སྟེང་ལ་གོམ་པའི་ཀུན་སྤྱོད་དང་སྙིང་རྗེ་སོགས་ཀྱིས། ཧ་ཅང་ལྐོག་གྱུར་དང་ཞིབ་ཚགས་ངང་ཁྱེད་ཀྱི་འཚར་ལོངས་ལ་ཤུག་རྐྱེན་བླ་མེད་བཟོ་བཞིན་འདུག་ཅིང་ཁྱེད་ཀྱི་རང་གཤིས་ཀྱི་སྟེང་དུ་བག་ཆགས་ཚད་མེད་འཇོག་བཞིན་འདུག དེ་ལ་བསམ་གཞིག་ནན་མོ་མ་བཏང་ཚེ་ཁྱེད་ཀྱིས་གནས་ཚུལ་དེ་ལ་ལས་དབང་གིས་འགྲེལ་བཤད་རྒྱག་སྲིད་ཅིང་། ཡང་ན་འགྲེལ་བཤད་ཅི་ཡང་མ་ཕོག་པར་ཆོས་ཉིད་ཀྱི་རིགས་ཤིག་ལ་ངོས་འཛིན་བྱ་ཡང་སྲིད། འོ་ན་ཡང་ཨ་མ་དང་ལྷན་དུ་འཚར་ལོངས་བྱུང་བའི་མི་དང་ཨ་མ་དང་ལྷན་དུ་འཚར་ལོངས་བྱུང་མ་ཐུབ་པའི་མི་གཉིས་ནི་ཨ་མའི་གཤིས་རྒྱུད་དང་ཤེས་ཚད་ལ་བསྡུར་ཚེ་གཏན་ནས་མི་འདྲ་བ་མ་ཡིན་ནམ། ལེགས་པར་སོམས་དང་། ཁྱོད་ཀྱི་རྣམ་འགྱུར་ནི་ཨ་མའི་རྣམ་འགྱུར་དང་འདྲ་ལ། ཁྱོད་ཀྱི་ཀུན་སྤྱོད་དང་འཆར་རྟོག་ནི་ཨ་མའི་ཀུན་སྤྱོད་དང་འཆར་རྟོགས་གཞན་ཞིག་ཡིན། ཁྱོད་ཀྱི་གུས་ལུགས་སམ་ཡང་ན་དེ་ལས་ཟློག་པའི་སྣང་བ་རྒྱ་ཡན་དང་ཆོབ་ཚ་ཞིང་ཉམས་སྣང་རྒོད་པའི་གོམ་གཤིས་ཀྱང་ཨ་མས་གསོ་སྐྱོང་དང་འབྲེལ་བ་དམ་ཟབ་ཡོད་ངེས་རེད། ང་ཚོའི་ཚིག་མཛོད་ནང་དུ་བྱིན་རླབས་ཅེས་པའི་བརྡ་ཆད་ཅིག་ཡོད་ལ། ང་ཚོ་ཐ་སྙད་དེར་ཤིན་ཏུ་འདྲེས་ཤིང་རང་ཚོད་ཀྱིས་ཐ་སྙད་དེར་གོ་བ་ཞིག་ཀྱང་ཆགས་ཡོད། དེ་ནི་དཔེ་མཚོན་ཡག་ཤོས་ཤིག་ཡིན་དེ། ཁྱེད་རང་ཨ་མས་གཉོར་སྐྱོང་གི་འོག་ནས་ཨ་མའི་གོམས་གཤིས་དང་རིག་གནས་ཀྱི་བྱིན་རླབས་ཁྱོད་ལ་ཞུགས་པ་ཡིན་ཞིང་། ཨ་མའི་རྣམ་འགྱུར་དང་རྟོག་འཆར་གྱི་བྱིན་རླབས་ཁྱོད་ལ་འགོས་པ་རེད། ཁྱོད་ནི་ཨ་མས་བརྩམས་ཆོས་ཀྱི་རིགས་ཤིག་ཡིན་པས་ཁྱེད་ཀྱི་ལུས་སེམས་ཀྱི་ཐོག་ཏུ་ཨ་མའི་གྲིབ་གཟུགས་གཏན་དུ་ཡལ་ཐབས་མེད་པར་སྨིན་ནས་འདུག་ཅིང་། ཁྱོད་ནི་ཨ་མའི་ཀུན་སྤྱོད་ཀྱི་རིགས་ཤིགས་ཡིན་པས་ཨ་མའི་རིག་གནས་དང་སྙིང་སྟོབས་ཀྱི་ཆ་ཤས་ཡིན་ལ། ཨ་མའི་བྱམས་བརྩེ་དང་གཤིས་རྒྱུད་ཀྱི་ཆ་ཤས་ཀྱང་ཡིན་ངེས། ཁྱོད་ནི་ཨ་མའི་སྒྱུད་ལུགས་ཀྱི་ཆ་ཤས་ཡིན་ཆོག་ལ། ཨ་མའི་རྨོངས་རྟུལ་དང་ཨུ་ཚུགས་ཀྱི་ཆ་ཤས་ཀྱང་ཡིན་ཆོག དེ་བཞིན་ཁྱོད་ནི་ཨ་མའི་སེམས་ཆུང་གི་ཆ་ཤས་ཡིན་ཆོག་ལ། ཨ་མའི་གཟབ་ནན་དང་ཞིབ་ཚགས་ཀྱི་ཆ་ཤས་ཀྱང་ཡིན་ཆོག མདོར་ན་ཨ་མའི་བག་ཆགས་དང་གོམས་གཤིས་ནི་ཁྱོད་ཀྱི་འཚོ་བ་དང་མི་ཚེའི་ཆེས་རླབས་ཆེ་བའི་གདུང་གྲོགས་ཡིན་ངེས་ཨང་།
རང་གིས་བསམ་ཚུལ་ལྟར་ན་འཇིག་རྟེན་འདིར་སྙིང་ནས་ཡིད་རྟོན་རུང་བའི་རྒྱུ་ནོར་རླབས་ཆེན་མང་པོ་མེད་ནའང་། སྙིང་ནས་དགའ་འོས་པ་ཞིག་ལ་འུ་ཅག་རེ་རེ་ནས་རླབས་ཆེན་བརྗོད་པར་དཀའ་བའི་ཡུམ་ཆེན་གྱིས་བརྩེ་བའི་གཏན་དུ་བསྐྱངས་པ་ནི་དངོས་པོས་གཞལ་མཐའ་བྲལ་བའི་གྱ་ནོམ་པའི་རྒྱུ་ནོར་རླབས་ཆེན་དེ་རེད་དོ་སྙམས། དེ་བཞིན་སྐྱེ་བ་འདི་ལ་ཧ་ཅང་ཤེས་པར་འདོད་ཅིང་ཧ་ཅང་སྒྲུབ་པར་འདོད་པའི་རིག་ཚན་མང་པོ་ཡོད་ནའང་། ཅེས་ཀྱང་ཤེས་ཤིང་སྒྲུབ་དགོས་པ་ནི་ཨ་མའི་བྱམས་བརྩེ་དང་དྲིན་ལན། ཨ་མའི་རེ་འདུན་དང་ཞབས་ཕྱི་སོགས་རེད་ཨང་བསམ། དེ་ལྟ་ནའང་འུ་ཅག་ཨ་མ་འཚོ་ཞིང་བཞུགས་པའི་སྐབས་སུ་སྙིང་ཐག་པ་ནས་ཨ་མར་ཞབས་ཏོག་སྒྲུབ་པར་ཉུང་ཞིང་། གུས་བཀུར་དང་ཚིག་འཇམ་གྱིས་སྒོ་ནས"ཨ་མ་ལགས་ཁྱེད་རང་ངེད་ཅག་བུ་ཕྲུག་དག་གི་ཆེད་དུ་དཀའ་ལས་མྱང་སོང"ཞེས་ཐེངས་གཅིག་ཙམ་ཡང་བརྗོད་མྱོང་མེད་ཀྱང་སྲིད། དེ་བཞིན་གོ་མེད་ཚོར་མེད་ཀྱི་ངང་དུ་ཨ་མའི་ཐོད་པའི་གཉེར་མ་དང་ཨ་མའི་སྐྲ་ལོའི་ཁ་དོག་ཀྱང་ཉིན་རེ་བཞིན་འགྱུར་བཞིན་ཡོད་པར་ཁྱོད་ཀྱིས་གཏན་ཏུ་དོ་སྣང་བྱས་མེད་སྲིད་ལ། ཨ་མའི་རུས་ཚིག་དག་ན་ཚས་གདུང་ཞིང་རྐང་ལག་གི་རྩ་ཕྲན་མངོན་པར་གསལ་བོར་ཆགས་བཞིན་ཡོད་པ་ཁྱོད་ཀྱིས་ཡེ་ནས་ཤེས་མེད་ཀྱང་སྲིད། ཨ་མའི་ལུས་ཕུང་ཉིན་རེ་ནས་ནང་ལ་ཅེ་སྒུར་ཏུ་འགྲོ་བཞིན་ཡོད་ཅིང་ཨ་མའི་ནུས་རྩལ་ཉིན་རེ་ནས་ཅེ་ཞན་དུ་འགྲོ་བཞིན་ཡོད་པ་ཁྱོད་ཀྱིས་ཤེས་མེད་ངེས་ལ། ཨ་མའི་འགྲོ་འདུག་དང་ལངས་ཙོག་སོགས་ཀྱང་ཉིན་རེ་ནས་དཀའ་ཁག་ཅེ་ཆེ་རུ་འགྲོ་བཞིན་ཡོད་པའང་ཤེས་མེད་སྲིད། དེ་ལྟར་ཀུན་སྤྱོད་ཀྱི་རྩ་བ་དང་བྲལ་བའི་གནས་ཚུལ་འདི་ནི་འུ་ཅག་རེ་རེའི་གྲིབ་གཟུགས་ཀྱི་ནང་དུ་སྐྱེ་ཞིང་འགག་པར་བྱེད། འུ་ཅག་དུས་ཡུན་རིང་པོའི་ངང་རིག་གནས་ཀྱི་རྒྱལ་ཁབ་འགྲིམ་སྟེ་ཕྱིར་ལ་ལོག་ཀྱང་ཨ་མར་གཅེས་ཤིང་བྱམས་པའི་འཇིག་རྟེན་གྱི་བདེན་པ་རྟོགས་མེད་པ་འདྲ་ལ། འུ་ཅག་སྤྱི་ཚོགས་ཀྱི་གྲུ་ཟུར་སྣ་ཚོགས་འགྲིམ་སྟེ་ཕྱིར་ལ་ལོག་ཀྱང་ཨ་མར་བཀུར་ཞིང་སྐྱོང་བའི་འཇིག་རྟེན་གྱི་ཀུན་སྤྱོད་ཡེ་ནས་ཆགས་མེད་པ་འདྲ། སྐྱེ་བ་འདིར་ཁྱོད་རང་འཇིག་རྟེན་འདི་རུ་ཅི་ལྟར་ཡུན་རིང་འཚོ་ཞིང་བཞུགས་མོད་རྨོངས་འཐིབ་མུན་པ་སེལ་བའི་ཉི་མ་གཅིག་ལས་མཐོང་མི་སྲིད་ལ། དུས་ཀུན་འོད་སྣང་གསལ་བའི་ཉི་འོད་གཅིག་ལས་རྙེད་མི་སྲིད། དེ་བས་ཁྱོད་ཀྱིས་ད་ལྟ་ནས་ཉི་འོད་ཀྱི་རིན་ཐང་དང་མཛེས་པ་མཐའ་དག་ཤེས་འོས་སོ།།
ཁྱེད་རང་རིག་གནས་དང་དཔལ་འབྱོར། ཐོབ་ཐང་དང་སྙན་གྲགས་ཀྱི་དབུལ་པོ་ཡིན་ཡང་ཁྱེད་ལ་ཨ་མ་བྱམས་ཀྱིས་སྐྱོང་བའི་ནུས་རྩལ་ཡེ་ནས་མི་ཕྲ་སྟེ། ཨ་མས་དགོངས་པ་དང་མཐུན་པའི་དོན་བྱ་མ་ལུས་འབད་བརྩོན་གྱིས་ངང་སྒྲུབ་པ་ནི་དྲིན་ལན་ཡིན་ལ། ཨ་མས་བྱམས་བརྩེའི་ངང་བཀའ་སློབ་གནང་བ་དག་ཡིད་ལ་དམ་པོར་འཛིན་ཞིང་བརྗེད་པར་མི་བྱ་བ་ནི་དྲིན་ལན་ཡིན། དེ་བཞིན་ཨ་མའི་སེམས་ལ་ན་ཟུག་མི་སློང་ཞིང་ཨ་མའི་སེམས་ལ་སྤྲོ་སྣང་སྟེར་བར་འབད་པར་བྱ་བ་ནི་འུ་ཅག་གིས་ཆེས་མ་མཐའི་སྒྲུབ་འོས་པའི་དོན་བྱ་ཞིག་ཡིན་ངེས་རེད། གལ་ཏེ་ཁྱོད་ཀྱི་ཕུགས་བསམ་ཨ་མའི་དགོངས་པ་དང་ཡེ་ནས་མི་མཐུན་ཚེ་ཁྱོད་ཀྱིས་ཨུ་ཚིགས་དང་མཁྲེགས་འཛིན་ངང་རང་གི་འདོད་པ་ལྟར་གྱིས་ཕུགས་བསམ་མི་སྙེགས་པར་ཧ་ཅང་བརྩེ་ཞིང་ཞིབ་ཚགས་ལྡན་པའི་ངང་། རེ་འདོད་ཀྱི་གནས་ལུགས་བརྩེ་ཞིང་དུང་བའི་ངང་དུ་ལྷོད་པོར་བརྗོད་དགོས་ཤིང་། སེམས་ལ་རྨ་ཁ་བཟོ་བའི་སྐད་ཆ་དང་མིག་མདངས་ནམ་ཡང་སྟོན་མི་རུང་། དེ་ལྟར་ན་ཨ་མའི་དགོངས་པ་དང་ཁྱེད་ཀྱི་ཕུགས་བསམ་བར་གྱི་རྙོག་འཛིང་ནི་ཞི་བདེའི་ངང་ཐག་གཅོད་བྱ་ཐུབ་ལ་དུས་ཚོད་ཀྱིས་བཞུར་རྒྱུན་ཁྲོད་ནས་ཨ་མས་ཀྱང་ཁྱོད་ཀྱི་ཕུགས་བསམ་ལ་རྒྱབ་སྐྱོར་དང་དགའ་མོས་བྱ་སྲིད། མ་གཞི་དེ་ལྟར་བརྩེ་འཛུམ་དང་གུ་ཡངས་ངང་ཞིབ་ཚགས་ཀྱིས་ཁ་བརྡ་བྱས་པ་ལ་བརྟེན་ནས་རང་བདེ་གཞན་སྐྱིད་ཀྱི་དོན་དག་གང་མང་ཞིག་ཐག་གཅོད་བྱ་ཐུབ་པ་མ་ཡིན་ནམ། གཞན་ཡང་། ཁྱོད་རང་དུས་ཚོད་ཀྱི་འཁོར་བསྐྱོད་བར་ནས་ཕྱིར་ཨ་མའི་ཉེ་སར་ལོག་ཚེ་སྔ་ལངས་ཉལ་ཕྱི་དང་ཟས་གཡོག་ཐབ་ལས་དག་ཀྱང་ཁྱེད་ཀྱིས་ལས་ན་ཅི་འདྲའི་འོས་ཤིང་འཚམ་པ་ཞིག་ཡིན་ལ། ངལ་རྩོལ་གྱི་སྐབས་སུ་ཁྱེད་ཀྱིས་ཨ་མའི་ལག་གི་ལས་ཀ་བླང་སྟེ་དེ་ཨ་མར་ངལ་གསོ་བྱ་རུ་འཇུག་ཆོག་པ་མ་ཡིན་ནམ། ཁྱོད་ཀྱིས་རང་ཚོད་ཀྱི་སྒོར་མོ་ཨེན་ཙམ་སྤྱད་དེ་བརྩེ་ལྡན་གྱི་ཨ་མར་དྲོ་ཞིང་འཇམ་པའི་གྱོན་གོས་འཚེམ་ཆོག་ལ་བདེ་ཞིང་ཡང་བའི་རྐང་ལྷམ་གསར་བ་ཉོ་ཆོག ཁྱོད་ཀྱིས་རང་ཚོད་ཀྱི་སྒོར་མོ་ཕུད་དེ་བརྩེ་ལྡན་གྱི་ཨ་མར་ལུས་ཕུང་གསོ་བའི་རྩི་བཅུད་ལྡན་པའི་ག་བུར་དང་གུར་གུམ་ཉོ་ཆོག་ལ་འཚོ་བཅུད་ལྡན་པའི་རང་བྱུང་གི་ཟས་རིགས་སྒྲིག་ཆོག སྐབས་རེར་འཁོར་བའི་རེ་བཞག་གི་ལས་ཀ་བློས་བཏང་བྱས་ཏེ་བརྩེ་ལྡན་གྱི་ཨ་མ་ལགས་ཉི་མ་ལྷ་ས་དང་བླ་རུང་ཆོས་སྒར། སེ་འབྲས་དགའ་གསུམ་དང་ཀ་དཔེ་རྫོགས་གསུམ་ལྟ་བུའི་གནས་ཡུལ་དང་ཆོས་དགོན་མི་འདྲ་བར་ཆོས་མཇལ་དུ་ཁྲིད་ཆོག་ཅིང་། སྐབས་རེར་རྒྱ་གར་འཕགས་ཡུལ་དང་ལྷོ་བརྒྱུད་ཐེ་ལན། རི་བོ་རྩེ་ལྔ་དང་པེ་ཅིན་ཚེམས་གདུང་སོགས་ལའང་ཆོས་མཇལ་དུ་འགྲོ་བའི་གོ་སྐབས་བཙལ་ཞིང་གྲ་སྒྲིག་བཟོ་ཆོག མ་ཟད་རིང་གི་སློབ་སྦྱོང་དང་ལས་ཀའི་དུས་ཚོད་ལྷག་མ་ཕུད་དེ་ཨ་མ་དང་ལྷན་དུ་མང་ཙམ་འདུག་ཅིང་ཨ་མའི་མི་ཚེའི་གཏམ་རྒྱུད་དང་འཚོ་བའི་ཉམས་མྱོང་ལ་མང་ཙམ་ཉན་པ་ནི་ཅི་འདྲའི་མཛེས་ཤིང་སྡུག་ལ་བདེ་སྐྱིད་ལྡན་པ་ཞིག་རེད། ཁྱོད་ཀྱི་མི་ཚེ་ཇི་ལྟར་ཐུང་ཡང་བརྩེ་ལྡན་གྱི་ཨ་མ་དགའ་བ་དང་འཛུམ་མདངས་ཀྱིས་སྲུང་དགོས་ལ། ཁྱོད་ཀྱི་མི་ཚེ་ཇི་ལྟར་རིང་ཡང་བརྩེ་ལྡན་གྱི་ཨ་མ་བྱམས་པ་དང་བརྩེ་བའི་སྐྱོང་དགོས་ཨང་།
གནའ་གཏམ་ཡང་ཡིན་ལ་དངོས་ཡོད་ཡང་ཡིན་པའི་གཏམ་རྒྱུད་འགའ་ཡོད་དེ། ཀུན་སྤྱོད་དང་བརྩེ་བ་ལྡན་པའི་བུ་ཕྲུག་ནར་སོན་རྗེས་ཨ་མ་ལགས་ཀྱི་ལུས་ཟུང་གཉོམ་ཞིང་ཇི་ལྟར་ཐང་ཆད་པའི་ངང་ཚུལ་ཡིན་ཡང་ཨ་མ་ལགས་རྒྱབ་ལ་ཁུར་ནས་སྟོད་ཀྱི་ཉི་མ་ལྷ་སར་རྐང་ཐང་དུ་བསྐྱོད་པ་རེད་ལ། ཨ་མ་ལགས་ཇི་ལྟར་རྒས་ཤིང་ཧོན་ཐོར་བར་གྱུར་ཡང་རང་གི་རྒྱབ་ལ་ཁུར་ཏེ་ལྷ་ཁང་དང་མཆོད་རྟེན་བརྒྱ་རྩ་ལའང་མཇལ་སྐོར་དུ་ཕེབས་པར་གྲགས། དེ་ལས་ལྡོག་ཏེ་ཀུན་སྤྱོད་དང་བསམ་ཤེས་བྲལ་བའི་བུ་ཕྲུག་ནར་སོན་རྗེས་བརྩེ་ལྡན་གྱི་ཡུམ་ཆེན་དང་ཁྲག་རྒྱུན་གྱིས་འབྲེལ་བ་གཅོད་ཐབས་བྲལ་ཡང་ལུས་སེམས་འཚོ་གཞིས་ཀྱི་འབྲེལ་བ་གཏན་དུ་བཅད་ཅིང་། རྒས་ཤིང་འཁོབ་པའི་བརྩེ་ལྡན་གྱི་མ་ཡུམ་དྲོད་ཁོལ་དང་འཇམ་མཉེན་ལྡན་པའི་གཡང་ཁྱིམ་ནས་ཕྱི་རོལ་དུ་ཕུད་པར་གྲགས། གཞན་ཡང་ཀུན་སྤྱོད་དང་བརྩེ་བ་ལྡན་པའི་བུ་ཕྲུག་ནར་སོན་རྗེས་ཨ་མ་ལགས་རྒས་ཤིང་ནད་ཀྱིས་ཤིན་ཏུ་གདུང་བའི་སྐབས་སུ་ཉིན་མཚན་དང་སྔ་ཕྱི་མེད་པར་ནད་གཡོག་དང་ཞབས་ཕྱི་ལེགས་པར་བྱ་ཞིང་། ནམ་ཞིག་ཨ་མ་ལགས་ཚེ་ཡི་ཕ་རོལ་དུ་ཕྱིན་ཚེ་དཀའ་ལས་དང་འབྱོར་བའི་འགྲོ་གྲོན་ལ་ཡེ་ནས་མི་བལྟ་བར་འཆི་ཆོས་ཡིད་ཚིམས་པ་ཞིག་སྒྲུབ་ངེས་ལེགས། དེ་ལས་ལྡོག་ཏེ་ཀུན་སྤྱོད་དང་བསམ་ཤེས་བྲལ་བའི་བུ་ཕྲུག་ནར་སོན་རྗེས་བརྩེ་ལྡན་གྱི་ཨ་མ་རྒས་ཤིང་ནད་ཀྱིས་ཇི་ལྟར་གདུང་ཡང་དོ་སྣང་དང་གཅེས་སྐྱོང་ཡེ་ནས་མི་བྱ་ཞིང་། གལ་ཏེ་དོ་སྣང་དང་གཅེས་སྐྱོང་ཨེན་ཙམ་བྱ་བ་ནི་སྙིང་ཐག་པ་ནས་འགན་ཁུར་མ་ཡིན་པར་གཞན་གྱི་མཐོང་སྣང་དུ་ངོ་ཚ་སྲུང་བའི་ཆེད་ཙམ་ཡིན་ངེས། དེ་བཞིན་བརྩེ་ལྡན་གྱི་ཨ་མ་ལགས་ཚེ་འདིའི་འདུ་བྱེད་ཡེ་ནས་སྟོང་བར་གྱུར་ཚེ་གདུང་སེམས་ཀྱི་མིག་ཆུ་འབྱིན་མི་སྲིད་ལ་འགྲོ་གྲོན་ཨེན་ཙམ་བཏང་ནས་རྣམ་ཤེས་ཀྱི་ར་མདའ་ཙམ་ཡང་བྱ་མི་སྲིད། ཐ་ན་བརྩེ་ལྡན་གྱི་ཨ་མའི་ཕུང་པོ་ཙམ་ལའང་བདག་པོ་མི་རྒྱག་པར་རང་གར་དུ་དོར་ཡོད་པ་གོ་ཐོས་སུ་བྱུང་ངོ་།།
གྲོགས་པོ་ལགས། གལ་ཏེ་འུ་ཅག་ལ་མི་གཞན་གྱིས"ཁྱེད་ཀྱི་བློ་ངོར་རླབས་ཆེ་བའི་མི་སྣ་ནི་ཅི་འདྲ་ཞིག་ཡིན་ནམ"དཔེར་ན་སུ་ལྟ་བུ་ཞིག་ཡིན"ཞེས་ཚ་འདྲི་བྱེད་སྐབས། འུ་ཅག་གིས་ཚིག་ཐག་ཆོད་པོའི་སྒོ་ནས་འཇིག་རྟེན་ཆོས་སྲིད་གང་རུང་ལ་བྱས་རྗེས་བླ་མེད་མཛད་ཅིང་མི་ཚེ་གང་པོ་སྤྱི་ཕན་དང་བདེན་དོན་ལ་གཞོལ་བའི་མི་ནི་རླབས་ཆེན་ནོ་ཟེར་ཞིང་། ཡང་ན་འདོད་བློ་དང་རིགས་ལམ་། རྒྱུ་མཚན་གཞན་ལ་བརྟེན་ནས་རླབས་ཆེན་གྱི་མི་སྣ་ངོས་འཛིན་སྣ་ཚོགས་བྱ་ཡང་སྲིད། དཔེར་མཚོན་ཡང་འཇོག་ཏེ"ཆོས་ལུགས་ཀྱི་སྟོན་པའམ་ཆོས་ལུགས་སྣེ་ཁྲིད་པ། ཁྲིམས་ལུགས་གཙོ་སྐྱོང་བའམ་ཁྲིམས་ལུགས་དབང་སྒྱུར་མཁན། ཆོས་དང་ཆོས་ཉིད་ཀྱི་ངོ་བོ་དང་བྱེད་ལས་རེ་རེ་ནས་རྩད་ཅིང་འཚོལ་བར་བྱ་ཞིང་འཇིག་རྗེན་ལེགས་པའི་དངོས་པོ་སྣ་ཚོགས་གསར་གཏོད་པ། ཞི་བདེ་དང་རང་དབང་གི་དོན་སྙིང་རྩོད་ལེན་བྱ་ཞིང་ཐོབ་ཐང་དང་འགན་ཁུར་གྱི་རྩ་དོན་ཁྱབ་བསྡར་བྱ་མཁན། མི་ཚེ་གཞན་ཕན་གྱི་ལས་རིགས་ལ་ཕུལ་ཞིང་འཇིག་རྟེན་ཤེས་རིག་གི་རྒྱལ་དར་གོ་ལའི་ཁྱོན་ལ་སྒྲེང་མཁན་སོགས་ནི་རླབས་ཆེན་གྱི་མི་སྣའོ་ཟེར་ངེས། མཁས་མཛངས་རྟུལ་ཕོད་མངའ་བའི་སྐྱེས་བུ་དེ་དག་ནི་རླབས་ཆེན་གྱི་སྐྱེས་བུ་རེ་རེ་ཡིན་ངེས་ན་ཡང་། ཁྱོད་ཀྱི་རང་གི་མ་ཡུམ་ནི་རླབས་ཆེ་བའི་སྐྱེས་བུ་ཞིག་ཡིན་མིན་ལ་བསམ་བློ་ཡེ་ནས་གཏོང་མ་མྱོང་བ་ནི་ཅི་འདྲའི་ཡ་མཚན་ཞིག་རེད་ཨང་སྙམས། ཁྱོད་ཀྱི་རླབས་ཆེན་རིན་ཐང་གི་ལྟ་བ་ནི་ཆོས་སྲིད་རིག་གནས་ལས་ངེས་པར་དུ་བསྒལ་དགོས་ཤིང་ཚེ་སྲོག་འཚོ་གཞིས་ཀྱི་སྟེང་དུ་ངོས་འཛིན་བྱ་མི་ཆོག་པ་ག་རེ་ཡིན་ནམ་སྙམས། ཁྱོད་ཀྱི་སྣང་ངོར་གྱིས་རླབས་ཆེན་མཛངས་པའི་མི་ནི་འཇིག་རྟེན་མཐུན་སྣང་དུ་གྲུབ་དགོས་པ་ཞིག་ཏུ་ག་རེ་འདོད་དགོས་སོང་། བསམ་གཞིག་ལེགས་པར་བྱོས་དང་་་་་ ཁྱེད་ཀྱི་ཨ་མ་ནི་འཇིག་རྟེན་གྱི་ཆེས་རླབས་ཆེ་བའི་མི་སྣ་ཡིན་ངེས་ཏེ་ཁྱེད་ཀྱི་ཨ་མས་རེ་སྙེག་དང་དམིགས་ཡུལ་མེད་པར་བསམ་ཡང་བརྗོད་དུ་མེད་ལ། བརྗོད་ཀྱང་མཚོན་དུ་མེད་པའི་རྣམ་དག་དྭངས་གཙང་གི་ནང་སེམས་དེ་ཉིད། འཇིག་རྟེན་དུ་འཚར་ལོངས་བྱུང་བའི་བརྩེ་བའི་བུ་ཕྲུག་ཡོངས་ལ་སྙིང་ཐག་པ་ནས་ཕུལ་བ་རེད་ལ། རེ་འབྲས་ཀྱི་ཚེ་སྲོག་གསར་བའི་དབུགས་རྒྱུན་ལེགས་པར་བསྐྱངས་ཤིང་གཅེས་པའི་རྣམ་ཤེས་ཕྲ་མོ་ལུས་སེམས་ཀྱིས་ཡང་ཡང་བསྲུངས་བ་རེད། ཨ་མས་རིན་ཐང་གཞལ་ཐབས་བྲལ་བའི་ཚེ་སྲོག་གི་དུས་ཚོད་སྤྱད་དེ་བུ་ཕྲུག་གི་སློབ་སྦྱོང་དང་འཚོ་བ"མདུན་ལམ་དང་རེ་སྙེགས་སོགས་ལ་མཐུན་སྐྱེན་ལེགས་པར་སྦྱར། ཨ་མའི་ཁྲག་རྒྱུན་ནི་དམར་པོ་ཡིན་ལ་ཨ་མའི་བརྩེ་བ་ནི་དྭངས་ཤིང་རླབས་ཆེ། ཨ་མའི་མི་ཚེ་ནི་བུ་ཕྲུག་ཚེ་རིང་ནད་མེད་འོང་བའི་སྨོན་འདུན་གྱི་མི་ཚེ་ཡིན་ལ། ཨ་མའི་ཚེ་སྲོག་ནི་བུ་ཕྲུག་བདེ་ཞིང་སྐྱིད་པའི་འཚོ་གཞིས་ཀྱི་གྲུབ་ཆ་ཡིན། ཨ་མའི་ནང་སེམས་ནི་ལྷད་མེད་བརྩེ་བ་འཁྱིལ་བའི་བྱམས་སྐྱོང་གི་གཅེས་སེམས་ཡིན་ལ། ཨ་མའི་དུས་ཚོད་ནི་བུ་ཕྲུག་དགའ་ཞིང་སྤྲོ་བའི་ཕུགས་བསམ་གྱི་ཉི་མ་ཡིན།
བརྩེ་ལྡན་གྱི་ཨ་མ་ལགས། ཁྱེད་ཀྱི་དཔའ་མཛངས་ལྡན་པའི་བྱམས་བརྩེ་ནི*བླ་ན་མེད་པ། གོང་ན་མེད་པ། ལྷད་མེད་པ། ཡང་དག་པ། ཡོན་ཏན་མངའ་བ། ཚིག་གིས་མཚོན་པར་དཀའ་བ། མཐོང་ན་མི་མཐུན་པ་མེད་པ། སྤོབས་པ་བསམ་གྱིས་མི་ཁྱབ་པ། བརྩེ་བའི་བུ་ཕྲུག་རྣམས་ལ་མངོན་པར་དགའ་བའི་རང་བཞིན་ཅན་ཉིད་དུ་ལེགས་སོ།།
2019 11
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
མཐོང་གྲོལ།
邮箱:tongdrol@163.com
Signature is customized by
Netease
མི་རྟག་པའི་སྒྲུང་།
རྩོམ་པ་པོ། མྱི་གསར་བ།
སྟོན་པ་སྐྱེས་བུ་ཚད་སྒྲུབ།
མྱི་གསར་བས་བརྩམས།