རྒྱ་མཚོའི་རྨི་ལམ།
ཡིག་སྒྱུར་བ། གཅན་མེ་ཏོག
རྒྱ་མཚོའི་རྨི་ལམ།
ཁྲིན་ཧྲི་ཞུའུ་ཡིས་བརྩམས།
གཅན་མེ་ཏོག་གིས་བསྒྱུར།
མུ་མཐའ་མེད་པའི་མཚོ་འགྲམ་དུ་ཁུ་སིམ་མེར་ཙོག་སྟེ། ཁ་རོག་གེར་རྒྱང་ལྟ་དང་གཟབ་ཉན། བསམ་གཞིག་རེ་བཏང་ན་སྙམ། དེ་ནི་བསམ་པའི་འགྲུལ་བཞུད་ཐེངས་ཤིག་རེད་ལ། ཡུན་རིང་མ་མཇལ་བའི་ཡིད་ཁམས་ཤིག་ཀྱང་རེད།
སྤྲིན་གྱི་འགྱུ་བག་གྲུ་གཟིངས་སུ་བྱས་ཏེ། ལོ་ཟླའི་འཇམ་མཉེན་འདྲེན། གྲང་བསིལ་ཕོར་གང་བཏེགས་ཏེ། གཉེར་རིས་ཀྱི་སེམས་ཁམས་གཅལ་དུ་བཀྲམ། དུས་བཞིའི་མཛེས་ལྗོངས་ཅི་འདྲ་མང་པོ་ཞིག་རེ་རེ་བཞིན་མངོན་པར་བསྟར། ལྷན་སྐྱེས་ཀྱི་སྐད་སྒྲས་སེམས་པའི་རོལ་མོ་དཀྲོལ་བས། མཚར་སྡུག་གནམ་སར་ལྡོག་སྟེ་འཆར། མཚོ་ཁུགས་ཀྱི་འདམ་རྩྭ་ནི། ཉམས་སྣང་སྣ་ཚོགས་ཀྱི་དར་ཆ་ཡིན། སྙན་ངག་དང་རླུང་བུ། རྦ་རླབས་ཀྱི་མིང་གིས་དམ་དུ་འཁྱུད། ཡུན་རིང་མ་འགོར་བའི་ལས་དབང་མཚར་བོ་དེ། འཚབ་འཚུབ་ཀྱི་རྒྱབ་གཟུགས་ཁོ་ན་ལྷག རྡོག་སྒྲ་རིམ་གྱིས་རྒྱང་དུ་ཡལ་ཞིང་། ཆར་ཟིམ་དེ་ཆུ་རྒྱུན་སྐེམ་པའི་ལུང་ཤུར་དུ་བཞུར། ཡུན་རིང་བསྙལ་བའི་འཇོ་སྒེག སྔ་མོ་ནས་ཡལ། མེ་ཏོག་གི་ཡལ་ག་ཉི་འོད་འོག་ལྡེམ་ལྡེམ་གཡོ་ཞིང་། དྭངས་བསིལ་ཁ་ཤས་ཀྱིས་སྐྱོར། གབ་ཚིག་ལྟ་བུའི་རྨི་ལྗོངས་དེ། རྒྱ་ལྕང་གི་མཉེན་ལྕུག་དང་མེ་ཏོག་གི་བཀྲག་མདངས་ཁྲོད་དུ་བོར།
བྱེ་ཐང་གི་ཡིག་འབྲུ་མཚོ་ཆུའི་ལྗིད་ཚད་ལ་སིམ་ཞིང་། གནོན་དཀའ་བའི་སེམས་ཚོར་མཚོ་ངོགས་ཀྱི་དྲང་ཐིག་བརྒྱུད་དེ་དགའ་སྐྱོའི་ངོ་བོ་རེག་ཟིན་དུ་བཏབ། རླབས་རྒྱུན་གྱིས་བྱུ་རུ་བྲག་རྡོའི་མཚོ་རླབས་བསྙེགས་ལ། དཔྱིད་ཟླ་གསུམ་པའི་རྒྱ་ལྕང་གི་མུ་ཁྱུད་བྲིས། ཡང་བསྐྱར་ཁོ་མོའི་སྒེག་ཉམས་གསལ་ལེར་མཐོང་ཞིང་། རླུང་བུ་གོས་སུ་བཀླུབས། ཆུ་མོ་མགུལ་དུ་དཔྱངས། ཕྲ་ལ་ལྡེམ་པའི་གཟུགས་བྱད་དང་ཀེམ་ཀེམ་གཡོ་བའི་མིག་ཟུང་། ཞི་དུལ་གཤིས་འཇམ་གྱིས་རི་ཆུ་གང་འདོད་དུ་སྒུལ། འཇམ་ཐིང་ཐིང་གི་བསུང་ཞིམ་ཕྲན་བུ་ནགས་ཀློང་དུ་ཁྱབ་པར། མཆོར་སྒེག་གིས་མིག་དབང་ཅི་ཙམ་འཕྲོག འདི་གའི་ཨ་སྔོན་སྤྲིན་གཟུགས་ཀྱི་སྙོར་སྐྱེད་ཐོབ་པ་ཡིན་ནམ། ཡང་ན་འདི་གའི་རི་མཚོའི་མཛེས་སྡུག་གིས་རླབས་སུ་སློང་བ་ཡིན་ནམ་ཆ་མ་འཚལ།
དེ་ལྟར་ཕེབས་འོང་། ཟླ་འོད་བཀླུབས་ནས། བདེ་ལྷོད་ལྷོད་ཀྱིས་ཟོལ་སྒྲིབ་ཀྱི་ཤིང་སྒོ་ཕྱེས་ཡོང་། ལྷན་སྐྱེས་ཀྱི་མཛེས་སྡུག་ཁྱེར་ནས། ཐུན་མིན་གྱི་ཤེས་རིག་བསྣམས་ནས། མཛེས་སྡུག་གི་ཡིག་འབྲུ་ཐོགས་ནས___
ཞག་གང་བོར་གཉིད་མ་ཁུགས།ཙོག་པུར་བྱ་འདབ་ཀྱི་ཡོལ་བ་ལྟ་བུའི་ཆར་བར་ཉན་ཞིང་། མཆི་མས་གོས་ཐུ་བརླན་པའང་མ་ཚོར། བློས་ཐུབ་ཁྱོད་ལྟ་བུ་འཕྲད་ཐུབ་པ་ཡིད་རྟོན་བྱ་ཐབས་བྲལ་ལ། འཇིག་རྟེན་དུ་འདི་ལྟའི་སྟེས་དབང་ཡོད་པར་དེ་ལས་ཀྱང་ཡིད་རྟོན་བྱ་ཐབས་བྲལ། ཞོགས་སྨུག་རིམ་གྱིས་སྟུག་པོར་གྱུར་ནས་སྲང་ལམ་གྱི་ཟབ་སར་རྩེན་ཞིང་། ཁམ་བུ་མེ་ཏོག་གི་ཚོམ་བུས་གཡབ་མོ་བྱེད། ཤུབ་བུར་ཟློ་བ་ཚང་མ་གསང་གཏམ་ཡིན་ལ། མི་ཚོགས་ལང་ལོང་ཁྲོད་སྐྱེ་བ་འདིའི་བློས་ཐུབ་ཁོ་ན་འཚོལ། འཐོབ་ན་ངའི་བདེ་སྐྱིད་ཡིན་ལ། ཤོར་ན་ང་ཡི་ལས་དབང་སྟེ། དེ་ལས་ཐབས་གཞན་ཅི། བདེ་སྡུག་གང་ཡིན་རུང་། དེ་རིང་ནི་བཀྲ་ཤིས་པའི་ཉིན་མོ་ཡིན་ནམ། གཟིངས་ལ་བསྡད་དེ་འབྲི་ཆུའི་རབ་ཁ་བརྒལ། དེ་རིང་ནི་དོན་འགྲུབ་པའི་ཉིན་མོ་ཡིན་ནམ། རྒྱལ་སྲས་དང་མཉམ་དུ་གཟིངས་ལ་ཞུགས།
མཆི་མ་གྲོག་གེར་ཕྱོགས་བཞིར་ལྟ་དུས། གནམ་ས་ལྷོད་གྱི་ལེར། སུས་ཀྱང་སྐད་ཆ་བཤད་མ་སོང་། ཁྱོད་དང་ཐུག་འཕྲད་བྱུང་བའི་བར་དུ། ཕྲ་ལ་མཉེན་པའི་སྐྱེས་གཟུགས་ཀྱི་ཆ་རྒྱུས་དང་བལྟ་བས་མི་ངོམ་པའི་གོ་དོན་གྱིས་སེམས་པ་སྒུལ་དུས། ལོ་མང་པོར་བསྙལ་བའི་བརྩེ་སེམས་ཀློང་དུ་བརྡོལ། ཞེ་འཁོན་གྱིས་ངའི་སེམས་ཀྱི་འདབ་མ་མཉེད་མི་ཐུབ་པས། བསུང་ཞིམ་གྱི་ཟོལ་གྱིས་ཆང་ཕོར་བཏེགས་དུས། སུས་ཀྱང་རྟོགས་དཀའ་བའི་བརྩེ་སེམས་ལ་བཞི་ཤད་བྲིས།
གཏན་དུ་མི་སྲིད་སྙམ་པའི་མི་དེ། དངོས་སུ་མངོན་བྱུང་། གལ་ཏེ། བདེ་སྐྱིད་ཀྱི་མི་ཚེ་འདིར་སྙན་ངག་བྲི་ཆོག་ན། རྨི་ལམ་རྨི་ཆོག་ན། ང་རང་བདེ་ཞིང་སྐྱིད་པ་ཡིན། སྙན་ངག་དང་རྨི་ལམ་ཁྲོད་འཚོ་བ་རོལ་ཞིང་། ཉི་འོད་འོག་རྨི་ལམ་རྨིས་པ་དེ། ག་ལེར་འཕྱོ་བ་མི་ཤེས་པའི་རྐྱེན་ཡིན། དུད་ཞགས་སྲབ་མོར་བརྟེན་ནས། སྐྱོ་བའི་ཆིག་ལབ་བརྒྱབ།
ལྷག་བསམ་རྣམ་དག་སྤྲིན་ལམ་བསྙེགས་ཙ་ན།། དགོངས་པ་ཤིང་ཏོག་མེ་ཏོག་དང་ཅིར་འདྲ།། གློ་བུར་བརྡོལ་བའི་སུའུ་ཏུང་ཕོའི་སྙན་ཚིག་གིས། སྙན་ངག་གི་རྨི་ལམ་གྱི་ཞོགས་པ་མཆན་དུ་བཀོད་ཅིང་། མིག་ཟུང་དགའ་བས་བརླན། འོན་ཀྱང་། ཁྱོད་ཉིད་བྲུག་བཞིན་པའི་ངའི་ཚེ་སྲོག་གི་གཙང་འགྲམ་དུ་སོམ་ཉིར་ཚུད་ཡོད་དམ། ཨ། ངའི་གཏན་དུ་རྫོགས་མེད་ཀྱི་ལོ་ཟླའི་མཛའ་གྲོགས། ད་ལྟ། གཏན་དུ་འཇགས་ཐབས་མེད་པའི་རེ་སྒུག་དེ་ངའི་ལུས་སྟེང་ན་གཤོག་རླབས་རྡེབ་པའི་འུར་སྒྲ་ཐོས་ཐུབ། ཁྱོད་ལས་གཞན་ད་དུང་སུ་ཞིག་ཡོད་དམ།
རྒྱ་ལྕང་གི་ཡལ་འདབ་དང་པོ་དཔྱིད་རླུང་གིས་གཅོད་དུས། ངས་དེ་ཡིས་ཁྱོད་ཀྱི་ངོ་གདོང་ཕྱགས་ན་བསམ། དབྱར་གྱི་རླུང་བུས་ཉི་ནུབ་ཀྱི་འོད་མདངས་སྒུལ་དུས། ངས་འབུ་བླ་མ་མ་ཎིས་ཁྱོད་ལ་དྭངས་བསིལ་སྐྱེལ་ན་སྙམ། སྟོན་གྱི་ཁམ་བུ་དཀར་པོས་ནམ་མཁའ་སེར་ལམ་མེར་བཀང་དུས། སར་ཟགས་པའི་ལོ་མ་ཞིག་བཏུས་ཏེ་ཁྱོད་ཀྱི་ལག་ཏུ་འཇོག་ན་འདོད། གལ་ཏེ་དགུན་ཁ་སླེབས་ཀྱང་། ངས་ཁྱོད་རང་ཉི་འོད་འོག་གི་གྲོ་ལྕོག་ཅིག་དང་འདྲ་བར། གཙང་ཞིང་མཐུག་ན་བསམ། ཁྱོད་རང་རྣམ་རིག་གིས་དགོད་དུས། མི་ཡུལ་ལ་དབྱར་ཟླ་ཐོག་མ་བསྣམས་ཡོང་། ཁྱོད་ལས་གཞན་ད་དུང་སུ་ཞིག་ཡོད་དམ།
ང་ཚོ་ཚང་མར་སྔོན་གྱི་གནའ་མི་མ་མཐོང་ཞིང་ཕྱིས་ཀྱི་རྗེས་རབས་མི་མཐོང་བའི་ཁེར་རྐྱང་དང་སོ་སྲུང་ཡོད། ང་ཚོའི་ཁྲག་རྒྱུན་ཁྲོད་གནའ་བོའི་དུས་ཡོལ་གྱི་སྙན་ངག་བཞུར་བཞིན་ཡོད། རྩི་ཏོག་འཐུ་ཞིང་འདམ་རྩྭ་སྐྱ་ཐིང་ཐིང་། ཁམ་བུ་སྨིན་ནས་དུད་ཀྱང་། ང་ཡི་ཆེད་དུ་བཏོགས་པ་མིན། མཚམས་སྤྲིན་ནུབ་ཅིང་ངང་བ་ཁེར་རྐྱང་གིས་འཕུར་ལ། སྟོན་གྱི་གཙང་བོ་ནམ་མཁའི་མཐའ་ལ་འདྲེས། ཨ་སྔོན་སྔོ་ཞིང་བསངས་། ས་གཞི་སེར་ལོས་གཡོགས། ང་དང་མཉམ་དུ་ཆང་གིས་རླུང་བུ་བསུས་ཏེ། ཕྲན་ཙམ་མཆོད་ཅིང་སྐད་དམའ་མོས་ལེན་མཁན། ཁྱོད་ལས་གཞན་ད་དུང་སུ་ཞིག་ཡོད་དམ།
རི་བོ་མཐོ་ལ་མཚོ་མོ་ཡངས་པས། གཉུག་གཤིས་འཛེམ་མེད་དུ་ངོམ་ཆོག དུས་ཚོད་ཀྱི་མུ་མེད་ཐང་སྟོང་དུ། མདའ་མོ་རེ་ཟུང་ཁོམ་མེད་འཇིག་རྟེན་དུ་རྒྱུ། འདས་པའི་ལོ་ཟླར་ཚ་འདྲི་དང་། ཁུ་སིམ་པའི་སྐྱོ་བར་ཁ་རོག་གེར་ལྟ་དུས། ཚེ་སྲོག་རིགས་དྲུག་ཏུ་འཁོར་བའི་དུས་མདར་ཡི་མུག་ཅིང་། ཁུ་སིམ་མཛེས་སྡུག་གི་རྐང་རྗེས་དབེན་ཞིང་འཇགས། ང་དང་འོད་གྲིབ་ཀྱི་ངོགས་གཉིས་ལ་ལྟ་དུས། ལམ་ཐག་རིང་ཐུང་ཆར་རླུང་གིས་ཁེངས་ཤིང་། རྒྱ་མཚོར་དུད་སྨུག་དང་མཚམས་སྤྲིན་གྱིས་གཡོགས། སྐྱེ་བ་སྔ་ཕྱི་གསུམ་གྱིས་རྡོ་སྟེང་དུ། སྙན་ངག་གི་རྨི་ལམ་གྱི་ལུང་བསྟན་བརྐོས། ཁྱོད་ལས་གཞན་ད་དུང་སུ་ཡོད་དམ།
ཁྱོད་འདི་ལྟར་ཕེབས་འོང་། དཔྱིད་ཀྱི་ཁམ་བུའི་དམར་མདངས་ཡིད་ལ་ཡང་ཡང་ཤར་ཞིང་ཕྱི་མིག་ཡང་ཡང་བལྟས། མཆོར་སྒེག་གི་ཝ་དཀར་གྱིས་སེམས་རྩ་འཁོལ་བའི་གར་དུ་རྩེན། འབྱོར་ཕྱུག་གི་གླིང་ཕྲན་ཆུང་ཆུང་ཞིག་དང་ངལ་གསོ་འཁེན་ཡུལ་གྱི་མཚོ་ཁུག་ཅིག་ཡོད་པར། ཕན་ཚུན་གྱིས་སྙིང་གི་འཕར་ལྡིང་ལས་དྲོད་ཁོལ་ལེན་ཞིང་། མཛུབ་མོའི་ཞི་འཇམ་གྱིས་མཚོ་ངོགས་ཀྱི་ཁྲ་ཐིག་བརྒྱུད་དེ། རྨི་ལམ་གྱི་བས་མཐར་དམར་མདངས་ལྷག་མར་བསྙེགས། ལམ་ཕྲན་གྱ་གྱུའི་ཟབ་སའི་ལྗོན་གྲིབ་དང་། བག་ལྷོད་ཀྱི་སྒྲོན་མེ་ཞིག བརྩེ་བའི་ལྷ་ལ་ཕུལ། སྐྱེ་བའི་སྔོན་མའི་རླབས་ཕྲེང་བརྒལ་ཏེ། མེ་ཕུང་དང་མཉམ་དུ་དབལ་ཚ་བར་གྱུར།
ཉིན་མོའི་འོད་སྟོང་གིས་སྒེའུ་ཁུང་བརྟོལ་ཞིང་། ཕྱི་གསལ་ནང་གསལ་གྱི་མཚན་མོས་རྟག་བརྟན་གྱི་ཟིན་ཐོ་བཞག བརྩེ་བའི་གྲུ་གཟིངས་སྒུལ་བཞིན། སྙན་ངག་གསང་མཐོར་གྱེར། སྨིན་མ་གནག་ལ་མིག་དཀྱུས་རིང་བ། གཤིས་རྒྱུད་དྲང་ཞིང་ངང་རྒྱུད་རིང་བས། ཞི་འཇམ་ཁྲི་ཕྲག་སིག་སིག་ཏུ་འདར། མཚོ་རླུང་ནི་མེ་ཏོག་གི་ལྷ་མོ་ཞིག་སྟེ། ཁོ་མོ་ཕེབས་པ་ན། རླབས་ཀྱི་མེ་ཏོག་བརྒྱ་ཕྲག་མངོན་པར་བཞད། མཚོ་རླུང་ནི་རོལ་མོ་བ་ཞིག་སྟེ། ཁོ་མོ་ཕེབས་པ་ན། གདངས་དབྱངས་མང་པོ་སྙན་པར་དཀྲོལ།
བསིལ་ཟེར་ག་ལེར་ཡར་འཕགས་ཤིང་། དགུན་ཟླའི་མཚན་མོའི་ཟླ་འོད་འཇམ་ཞིང་མཉེན། སྒེའུ་ངོགས་སུ་མེ་ཏོག་དང་ལྗོན་པའི་གྲིབ་རིས་གཡོ་ལ། སྡོང་འོག་ཏུ་ཕུ་རིང་རླུང་གིས་སྐྱོད་ཅིང་ལྭ་བ་ལྷབ་ལྷུབ་ཏུ་ཡོམ། ཟླ་འོད་འཁྲེང་བའི་དཔུང་བ་གཉིས་ཀྱི་གཉེར་རིས་སྐབས་འགར་མངོན་ཞིང་རེས་འགར་ཡིབ། མཉེན་ལྕུག་གི་གར་སྟབས་མཚམས་རེར་འཁྲུག་ཆ་དོད་ཅིང་ལན་རེར་ལྷིང་ཞིང་འཇགས།
སྒེའུ་འགྲམ་དུ་རླུང་དྲིལ་བཀལ་ཞིང་། དཀར་གཙང་གི་ཉ་ཕྱིས་དང་ལྗང་ནག་གི་དུང་དཀར་ལ་ཆུ་གཉེར་གྱི་མཛེས་ཆོས་དང་རྒྱ་མཚོའི་བརྗིད་ཆགས་མངོན་པས། རྒྱ་མཚོའི་ལེགས་ཚོགས་ཀུན་ནས་འཛོམས། རླུང་བུས་ཡལ་གའི་གྲིབ་གཟུགས་བཏེགས་ཤིང་། རླུང་དྲིལ་གཉིད་ལས་དཀྲོལ་ལ། དུས་ཚོད་རྒྱང་རིང་ཞིང་ཟོལ་གྱིས་བྲལ། རབ་རིབ་ཀྱི་ཉམས་འགྱུར་དེ་འཇིག་རྟེན་ཕ་རོལ་གྱི་བྲག་ཅ་འདྲ།
རླུང་དྲིལ་གྱི་སིང་སྒྲ་རེ་རེས། རྒྱང་རིང་གི་འཛུམ་བག་ཅིག་རྨི་ལམ་གྱི་སྒོ་འགྲམ་དུ་བསྣམས་ཡོང་། ཐེངས་རེ་རེ་རྒྱ་མཚོ་དང་ཁ་ཆད་བྱས་ཤིང་། ཐེངས་རེ་རེར་ཡུལ་དུས་སྟོང་ཟད་དུ་བཏང་། ཐེངས་རེ་རེར་དུས་ཚིགས་ལ་གོ་འཛོལ་ཏེ། དུས་ཚོད་ཀྱི་གོ་རིམ་ཉོག་ཅིང་རིང་དུ་གྱེས་པར་སྨྲེང་བས་ཁེངས།
མཚོ་རླབས་ལོ་ངོ་སྟོང་ཕྲག་གི་བྲག་ངོར་བསྙེགས་ཤིང་། ཟླ་འོད་གནམ་མཐར་དཔྱངས་བས། རྒྱ་མཚོ་དང་ལོ་ཟླའི་སོ་བར་བྱས། བྲང་གཞུང་དུ་རྒྱ་མཚོའི་བྲག་ཅ་བསྐྱིལ་བ། སྟོང་སིང་སིང་གི་ཆོས་ཁང་ཞིག་དང་འདྲ་བར། མཇལ་ཞག་ཏུ་ཡོང་བར་སྒུག དོན་དུ་རྒྱ་མཚོ་སེམས་སུ་ཡོད་དེ། སེམས་པ་ཅི་ཙམ་རྒྱ་ཆེ་ཞིང་ཁོད་ཡངས་ན། རྒྱ་མཚོའི་བསམ་གཞིག་ཀྱང་དེ་ལྟར་རྒྱང་ཐག་རིང་།
གནའ་དུས་ཀྱི་རླབས་སྒྲ་ལང་ལོང་དུ་འཕྱུར་ཞིང་། རྒྱ་མཚོའི་འུར་སྒྲ་འབུ་ཕྲ་འདབ་གསུམ་མའི་རྒས་འཁོགས་ཀྱི་ཡལ་འདབ་སྟེང་ཡོམ་ཡོམ་གྱིས་ཕེབས། ཁྲག་རྒྱུན་གྱི་སྐད་སྒྲ་ཕྱོགས་བཞིར་མཆེད་དེ། བྱ་བྱེའུ་འཕུར་ཞིང་ཉ་མོས་རྐྱལ་རྩལ་ངོམ། ལྗོན་པར་ལོ་འདབ་རྒྱས་ཤིང་མེ་ཏོག་གི་བསུང་ཞིམ་འཐུལ། མཚོ་རླབས་ཀྱིས་རང་ཉིད་བསྣུབས་པར་བྱས་ཏེ། གསན་ཐུབ་པའི་སྐད་སྒྲ་ཡོད་ཚད་ཁུ་སིམ་མེར་བཏེགས། རྒས་ཟིན་པའི་ལང་ཚོ་དང་བརྩེ་དུངས། ཡང་བསྐྱར་འཕོ་འགྱུར་གྱི་དུས་རིམ་དུ་བསྐྱོད།
སུ་ཡིས་གནམ་ལ་བསྙེས་ནས་གླིང་བུ་འབུད་ཅིང་། ཤོར་ཟིན་པའི་རྨི་ལམ་གྱི་གྲིབ་གཟུགས་ལ་སྨྲེང་བས་གཟིར། སྒྲ་སྙན་འཁོར་ཞིང་རྒྱུ་བས་ངུ་ཤུབ་ཏུ་གྱུར། ཟླ་འོད་མཚོ་ངོགས་སུ་ཆེམ་ཆེམ་འཕྲོ་ཞིང་། དེ་སྔོན་གྱི་བརྩེ་བ་ཟབ་མོ་རེ་རེ་དུས་ཚོད་དང་བར་ཐག་གིས་དུར་དུ་སྦས།
མདངས་ཟད་པའི་རྩྭ་སྐམ་གྱིས་རྒོད་དུ་ལུས་པའི་ཞིང་སའི་སྐྱོ་ངལ་བརྗོད་ཅིང་། མཚོ་ཁུག་གི་རྨི་ལྗོངས་སྟོན་དང་མཚུངས། མག་མོག་གི་ཟླ་བ་དྲན་བཞིན། འཁྱག་སིབ་སིབ་ཀྱི་བྲག་རྡོས་ལྷད་མེད་ཀྱི་བརྩེ་བར་མཆོད། རླུང་བུ་དངོས་སུ་ཕེབས་བྱུང་། ཆུ་བོ་སྐྱོ་བས་ངལ་ཞིང་། ག་སར་ཁྱབ་པའི་ངར་ཤུགས་མཚོ་རླབས་དང་འདྲ་བས། འགྲོ་འོང་ནི་ཞག་གཅིག་གི་དུས་ཡུན་ཙམ་མོ།།
མཐིང་མདོག་གི་མཚོ་ཁུག ཁྱེད་ཀྱིས་གནང་བའི་ཡོད་ཚད་ལོངས་སུ་སྤྱོད་བཞིན་བཀའ་དྲིན་ཞུ། སེམས་ལ་དོགས་ཟོན་མི་དགོས་པར། བརྩེ་སེམས་དང་རྒྱ་ཡན་གྱི་བསམ་གཞིག་གིས་སྤྲིན་རུམ་ནས་རྒྱང་ལ་བལྟས། རིང་ལ་ཉེ་བའི་གཟུགས་བརྙན་དེ། རྡོ་བརྐོས་ཤིག་དང་འདྲ། ཁྱོད་ལ་དྲན་ཤིང་ཁ་ཤས་བཞག་པས། གྱེས་བྲལ་གྱི་མིག་མདངས་ཧ་ཅང་ལྕི། རླུང་རླབས་ཀྱིས་རྡེག་པའི་བྲག་རྡོས་ལུས་པོ་འཁྱོག་ཅིང་མིག་ཟུང་བཙུམ་ཏེ། ཆུ་བོས་འཛད་ཅིང་རླུང་བུས་བརྐོ་བའི་སྐད་སྒྲར་གསན། སྐྱོ་ངལ་རྒྱང་དུ་བཞུད་པའི་རྦ་རླབས་ལ་འཐིམས། ཟོལ་མེད་ཀྱི་མི་ཚེ་ནི་དོན་དུ་འདི་འདྲའི་སྟབས་བདེ་ཞིག་རེད། སྔོན་ཆད་རེ་སྙེག་བྱས་པའི་ཡོད་ཚད། རྒྱ་མཚོར་ལྟ་བའི་སྐད་ཅིག་མ་དེར། འདི་ལྟར་སྣང་ལ་མ་ངེས་པར་གྱུར། ལྷིང་འཇགས་ཀྱི་རྗེས་སྙེག་ཅིང་། རྒྱ་མཚོར་བསྙེས་ནས་གཉིད་པས། རྙོག་འཛིང་གི་འཇིག་རྟེན་གྱིས་རང་ཉིད་གཞལ་མོད། འཇིག་རྟེན་ལས་ཐར་བའི་ཧམ་སེམས་མི་འཆང་། ལམ་ནོར་བ་ནི་ཁ་གཡོར་ས་ཡིན་པས། དམིགས་པ་ནི་འདྲ་མཚུངས་ཀྱི་གནས་ལུགས་ཤིག་ལ་བལྟས་ནས་ཁ་གཡོར་ཏེ་ཕྱིར་མི་འོང་བ་དེ་རེད།
ཁུ་སིམ་མེར་གནའ་ནས་བརྒྱུད་འོངས་པའི་ཅོང་སྒྲ་ཐོས་ཤིང་། རི་ཆུ་ཁྲི་སྟོང་ལ་བྲག་ཅ་འཁོར། རྒྱང་སྐྱོད་པའི་གོམ་སྟབས་ལ་ཚོད་འཛིན་བྱེད་ཐབས་མེད་ནའང་། འདི་ནི་ཁེར་ཧྲེང་དང་དཀའ་ཚེགས་ཆེ་བའི་ལོ་རྒྱུས་ཀྱི་ལམ་ཚད་ཅིག་ཏུ་ངེས། དངོས་ཡོད་ཀྱི་འཇིག་རྟེན་ནི་གཞི་ནས་དེ་འདྲའི་རྒྱང་ཐག་རིང་ཞིང་། ཟོལ་བཅོས་གཙང་མར་སེལ་དུས། སེམས་ཁམས་བདེ་ལ་བབས་ནས་དཔྱིད་རླུང་གིས་བྲན་པ་འདྲ། མི་རེ་རེ་ཧ་ཅང་ལྷད་མེད་ཡིན་པས། བྱིས་པ་དང་འདྲ། ཟོལ་མེད་ཀྱི་མིག་ཟུང་ཕྱེས་པར། མཛེས་སྡུག་གིས་བརྒྱན་ཅིང་སྤྲོ་སྐྱིད་ཀྱིས་ཁེངས།
རླབས་ཀྱི་འགྲོ་འོང་ནི་ཚེ་སྲོག་གི་ཁྲག་རྩ་དང་འདྲ་ལ། རླབས་ཀྱི་འཕྱོ་འཇགས་དེ་སྐྱོ་ལྷང་ལྷང་གི་རྒྱང་རིང་ནས་འཕྱུར་ཡོང་། རྒྱ་མཚོ་ནི་རྣམ་ཤེས་ཀྱི་ཕ་གཞིས་ཡིན་པས། ཚེ་སྲོག་གི་བྲེལ་འཚབ་དང་ཚེ་གང་བོའི་མཛེས་ལྗོངས་ཡོད། མིག་མདངས་རིམ་གྱིས་རྙོག་འཛིང་དུ་གྱུར་ནའང་། རྒྱ་མཚོ་སྔར་ལས་དྭངས་ཤིང་གསལ། གྲངས་མེད་པའི་གཏམ་རྒྱུད་ཀྱི་མེ་ཏོག་བཞད་ཅིང་འབྲས་བུར། སྨིག་རྒྱུར་ཆུར་མཐོང་གི་འཁྲུལ་ཤེས་རེ་རེ་གཅིག་འཇགས་གཅིག་ལངས་བྱེད། རྦ་རླབས་འཕྱོ་འཇགས་དང་ཟླ་བ་འཕེལ་འགྲིབ། རྨི་ལམ་རབ་རིབ་དང་རྨོངས་སད་དེ། རྒྱ་མཚོ་ནི་དུས་གཏན་གྱི་མཛའ་གྲོགས་ལགས། མདོར་ན་ལང་ཚོ་མངོན་པར་བཞད་པའི་མཛེས་པ་ཡོད་ལ། བརྩེ་བ་ཟབ་མོའི་གྱེར་གླུ་ཡོད་པ་མ་ཟད། བགྲང་བྱ་སྟོང་གི་རྦ་རླབས་དང་དྭངས་ཤིང་བསིལ་བའི་ཟླ་འོད་ཀྱང་ཡོད་ཨང་།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
