མངའ་རིས་བུ་མོའི་ཏམ་བུ་རའི་རྒྱུད་ལ་དྲངས་བའི་གླུ།
རིག་འཛིན་འཇིགས་མེད་གླིང་པས་གསུངས།
མངའ་རིས་བུ་མོའི་ཏམ་བུ་རའི་རྒྱུད་ལ་དྲངས་བའི་གླུ། རིག་འཛིན་འཇིགས་མེད་གླིང་པས་གསུངས།
ན་མོ་གུ་རུ།
ཡར་ལ་བལྟས་པས་ཀ་དག་འོད་གསལ་གྱི་མཁའ་ལ། །
ལྷུན་གྲུབ་ཉི་ཟླའི་ཚོམ་བུ་མེ་ཤེལ་ལས་དྭངས་བ། །
ལྟ་སྒོམ་སྤྱོད་པའི་རྒྱན་དུ་མེད་ཐབས་ནི་མི་འདུག །
ཨོ་ལོའི་སེམས་པ་དགུང་སྔོན་མཐོན་པོ་ལ་ཤོར་སོང་། །
མར་ལ་བལྟས་པས་ཁམས་གསུམ་འཁོར་བ་ཡི་གྲོང་ན། །
མ་རྒན་འགྲོ་དྲུག་སྣ་ཚོགས་སྡུག་བསྔལ་གྱིས་མནར་འདུག །
འདི་འདྲ་མཐོང་བས་སྙིང་རྩ་དབང་མེད་དུ་འདར་ནས། །
ཨོ་ལོའི་སེམས་པ་དམ་པའི་ལྷ་ཆོས་ལ་ཤོར་སོང་། །
འདི་རུ་བལྟས་པས་རྫ་རི་མཐོན་པོ་ཡི་རྩེ་མོར། །
ཁ་ཆར་ན་བུན་རླུང་གིས་རེག་བྱས་དང་གཡོགས་པའི། །
གཡམ་པའི་སྤྱིའི་ཆུང་ཆགས་མེད་ཞེན་བྲལ་གྱི་ཁང་མཛེས། །
ཨོ་ལོའི་སེམས་པ་གངས་ལའི་རྫ་ཁྲོད་ལ་ཤོར་སོང་། །
དགྲ་ལ་སྡང་ཞིང་གཉེན་ལ་རང་ཤུགས་ཀྱིས་ཆགས་པའི།།
སྡེ་དགོན་འདུ་འཛིའི་ཞེན་པ་ཡིད་ཡུལ་ལ་མི་འདུག །
བསླབ་བྱ་བྱིས་པའི་བསླུ་བྲིད་མ་མཛད་དང་ཨེ་གོ །
ཨོ་ལོའི་སེམས་པ་སྣང་ཟོས་གང་བདེ་ལ་ཤོར་སོང་། །
སྡིག་ཟས་ཤ་ལ་མཉེས་ཀྱང་གཞན་སྲོག་ནི་མི་གཅོད། །
རླུང་གཤོག་རྩེ་སྒྲོ་ངར་མའི་བརྟུལ་ཞུགས་དང་འགྲོགས་ནས། །
ལྟ་སྒོམ་ནམ་མཁའི་ཕུ་ཐག་བཙན་ཐབས་སུ་གཅོད་པའི། །
ཨོ་ལོའི་སེམས་པ་ཐང་དཀར་རྒོད་སྨུག་ལ་ཤོར་སོང་། །
བསམ་མེད་དུད་འགྲོར་སྐྱེས་ཀྱང་དགེ་སེམས་དང་ལྡན་པས། །
གཞན་ལ་གནོད་པའི་ཁ་ཟས་དང་ཁ་རུ་མི་འགྲོ། །
རྩྭ་དང་མྱུ་གུས་འཚོ་བའི་སྐད་སྙན་གྱི་འདབ་ཆགས། །
ཨོ་ལོའི་སེམས་པ་ལྷ་བྱ་གོང་མོ་ལ་ཤོར་སོང་། །
རི་དྭགས་སྤང་ལ་བརྩེ་བ་སྔོན་ལས་ཀྱི་སྨོན་པ། །
ཁྲེལ་མེད་ལིངས་པའི་དགྲ་ལ་བྱོལ་ཕྱིན་པས་ལོས་ཆོག །
གང་བྱུང་ཟས་ཀྱི་ཡང་རྩེ་རྩྭ་ཆུ་རུ་འདུག་པས། །
ཨོ་ལོའི་སེམས་པ་ཤ་བ་སྨུག་ཆུང་ལ་ཤོར་སོང་། །
ཁ་སང་བྱ་ལ་ཕུང་པོ་གཏོར་ཤུལ་དེ་མཐོང་བས། །
གཞོན་པའི་སྒྱུ་ལུས་ལ་ཁའི་ན་བུན་དུ་གོ་བྱུང་། །
ལུས་སེམས་བྲལ་ཀྱང་ཚོར་བའི་སྡུག་བསྔལ་ལས་གྲོལ་པའི། །
ཨོ་ལོའི་སེམས་པ་འོད་གསལ་ཆོས་སྐུ་ལ་ཤོར་སོང་། །
དོ་ནུབ་ཙམ་ཡང་མི་འཆིའི་གདེང་ཚད་ནི་མི་འདུག །
བྱ་བྱེད་མང་པོ་ངན་སོང་འཁོར་བ་ཡི་གཏིང་རྡོ། །
བྱར་མེད་ངང་ནས་ས་ལམ་ཆིག་ཆོད་དུ་འགྱུར་བའི། །
ཨོ་ལོའི་སེམས་པ་མ་བཅོས་ལྷུག་པོ་ལ་ཤོར་སོང་། །
གྲངས་མེད་གསུམ་གྱི་སྒུག་ཡུན་བཙོགས་ས་ན་མི་འདུག །
སྡོམ་པ་གསུམ་གྱི་རང་རིག་ངོ་བོ་ལ་རྫོགས་སོང་། །
ད་ལྟའི་ཤེས་པ་སངས་རྒྱས་རློན་པ་རུ་འདུག་པས། །
ཨོ་ལོའི་སེམས་པ་འོད་གསལ་རྫོགས་ཆེན་ལ་ཤོར་སོང་། །
དབེན་པའི་རི་ངོགས་གངས་ལ་རྗེའུ་ཡི་རྫ་ཁྲོད། །
སྐུ་མཚམས་དམ་པོར་ཁ་ཆར་ན་བུན་གྱིས་བསྡམས་ཚེ། །
དགའ་སྐྱོ་འདྲེས་མའི་ཉམས་སྣང་བན་བུན་གྱི་ངང་ནས། །
སྒྱུ་མའི་རྣལ་འབྱོར་མཁྱེན་བརྩེའི་འོད་ཟེར་གྱིས་སྨྲས་སོ། །
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
