རྣམ་པར་རྒྱལ་བའི་དུས་གཏམ་ལྷའི་རྔ་སྒྲ།
ངག་དབང་བློ་གྲོས་མཚུངས་མེད་ཀྱིས་གསུངས།
རྣམ་པར་རྒྱལ་བའི་དུས་གཏམ་ལྷའི་རྔ་སྒྲ་བཞུགས་སོ།།
ངག་དབང་བློ་གྲོས་མཚུངས་མེད་ཀྱིས་གསུངས།
སྙིང་འདབ་བརྒྱད་པདྨའི་ཟེའུ་འབྲུ་ལ།།
མགོན་རྒྱལ་ཀུན་ཡེ་ཤེས་གཅིག་འདུས་སྐུ།།
རྗེ་འཇམ་དཔལ་གཞོན་ནུ་རྟག་བཞུགས་ནས།།
གཏམ་སྨྲས་ཚད་འགྲོ་ལ་སྨན་པར་མཛོད།།
ལམ་ཡང་ཟབ་འོད་གསལ་སྙིང་པོ་ཡི།།
ཚིག་ཐོས་པས་སྲིད་རྩ་ཧྲུལ་བོར་བྱེད།།
གནད་བསྒོམས་ན་ཟླ་བ་དྲུག་གིས་གྲོལ།།
འདི་ཁོ་ན་སྙིང་གི་དཔལ་བེར་སྟིམས།།
དོན་འདི་དང་འཕྲད་པའི་སྐལ་བཟང་ཚོ།།
སྔོན་བསྐལ་མང་ཚོགས་བསགས་ལག་རྗེས་ཏེ།།
དཔལ་ཀུན་ཏུ་བཟང་དང་སྐལ་བ་མཉམ།།
ཐུགས་དགའ་བར་གྱིས་ཤིག་སྙིང་གྲོགས་རྣམས།
གནས་འཇིགས་རུང་འཁོར་བའི་སེམས་ཅན་རྣམས།།
གཏན་བདེ་ཡི་ས་ལ་དབུགས་དབྱུང་ཕྱིར།།
གཞན་ཕན་གྱི་བསམ་སྤྱོད་ཁུར་དུ་བཞེས།།
རང་གཅེས་འཛིན་ཧ་ལའི་ཟས་བཞིན་དོར།།
དམན་ངན་འགྲོའི་སྒོ་འཕར་འདི་ཡིས་འགོག །
གོང་མཐོ་རིས་བདེ་དཔལ་འདི་ཡིས་འདྲེན།།
མཐར་ཐར་བའི་སྐམ་སར་འདི་ཡིས་ཕྱིན།།
བློ་མ་མང་འདི་ལ་ཉམས་བཞེས་མཛོད།།
ཡུལ་འཁོར་བའི་ཕུན་ཚོགས་མཐའ་དག་ལ།།
ཡིད་སྨོན་པའི་བསམ་པ་ལྷོད་པོའི་ངང་།།
མཐོ་ལྷར་བཅས་འགྲོ་བའི་མཆོད་སྡོང་མཆོག །
ཆོས་འདུལ་ཁྲོམས་རྒྱན་གྱི་མཆོག་ཏུ་ཟུངས།།
སྤྱིར་མངོན་མཐོ་ངེས་ལེགས་མཐའ་དག་གི །
བདེ་དཔལ་ཀུན་འདི་ལ་བརྟེན་ནས་འབྱུང་།།
འདི་ཉམས་ན་ངན་འགྲོ་མཐའ་མེད་འཁྱམ།།
རང་མགོ་བོ་མ་འཁོར་བླང་དོར་མཛོད།།
དུས་ཀུན་ཏུ་བསམ་སྤྱོད་གྲོགས་དང་བསྟུན།།
རྒྱུད་དྲང་ཞིང་བསམ་པ་དཀར་ལ་བརྩོན།།
ཕུགས་རང་དོན་རྒྱ་ཆེར་བསྒྲུབ་འདོད་ཀྱང་།།
ཚུལ་གཞན་ཕན་བྱེད་པ་མན་ངག་ཡིན།།
དོན་འདི་ལ་མི་ཆོས་གཙང་མ་ཟེར།།
མགོན་དུས་གསུམ་རྒྱལ་བའི་ཐབས་མཁས་ལམ།།
ཆོས་བསྡུ་དངོས་བཞི་ཡི་སྙིང་ཁུ་ཡིན།།
འདི་མ་བརྗེད་མ་བརྗེད་སློབ་ཚོགས་རྣམས།།
གཏམ་འདི་སྨྲས་དགེ་བས་འགྲོ་བ་ཀུན།།
གནས་འཁོར་བའི་གཡང་ས་ལས་སྒྲོལ་ཞིང་།།
བུ་སྐལ་ལྡན་དགའ་བའི་གསོས་སུ་གྱུར།།
ནུབ་བདེ་ལྡན་ཞིང་དུ་སྐྱེ་བར་ཤོག །
ཅེས་པ་འདི་ནི་རབ་བྱུང་བཅུ་བདུན་པའི་མེ་བྱི་ཟླ་བརྒྱད་ཚེས་དགུ་ལ་བདག་ཅག་དཔོན་སློབ་ཕྱི་ནང་གསང་གསུམ་གྱི་མི་མཐུན་པའི་གཡུལ་ལས་རྒྱལ་བའི་དགའ་སྟོན་གྱི་དུས་སུ་དགེ་འདུན་པ་སྟོང་ཕྲག་ལྔ་ལ་ཉེ་བ་ཙམ་གྱི་དབུས་སུ་ངག་དབང་བློ་གྲོས་མཚུངས་མེད་ཀྱིས་གཅོས་གཏམ་གླུ་རུ་བལྔས་བ་དགེའོ།།
རྩོམ་སྒྲིག་པ། རྣོ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
