འགྲོ་ལ་བདེ་སྐྱིད་མ་བཞུགས་སོ།།
ངོར་ཆེན་རྡོ་རྗེ་འཆང་ཀུན་དགའ་བཟང་པོས་གསུང་།
འགྲོ་ལ་བདེ་སྐྱིད་མ་བཞུགས་སོ།།
ངོར་ཆེན་རྡོ་རྗེ་འཆང་ཀུན་དགའ་བཟང་པོས་གསུང་།
འགྲོ་ལ་བདེ་སྐྱིད་འབྱུང་བའི་སྒོ་གཅིག་པུ།།
ཀུན་མཁྱེན་རྒྱལ་བའི་བསྟན་པ་རིན་པོ་ཆེ།།
ཡུལ་དུས་གནས་སྐབས་ཀུན་ཏུ་མི་ཉམས་པར།།
ཕྱོགས་མཐར་དར་ཞིང་རྒྱས་པར་མཛད་དུ་གསོལ།།
ཚད་མེད་མཁྱེན་དང་བརྩེ་བའི་དཔལ་མངའ་ཞིང་།།
རྒྱལ་བའི་བསྟན་པ་སྲོག་ལྟར་གཅེས་འཛིན་པའི།།
མཚུངས་མེད་བླ་མ་དགེ་བའི་བཤེས་གཉེན་རྣམས།།
སྐུ་ཚེ་རིང་ཞིང་རྒྱས་པར་མཛད་དུ་གསོལ།།
འགྲོ་ལ་དགེ་བའི་ལམ་བཟང་སྣང་མཛད་ཅིང་།།
འཆད་དང་སྒྲུབ་པའི་བྱ་བ་ལྷུར་ལེན་པའི།།
ཆོས་བྱེད་དགེ་འདུན་སྡེ་རྣམས་ཞབས་བརྟན་ཅིང་།།
འཕྲིན་ལས་ཕྱོགས་བཅུར་རྒྱས་པར་མཛད་དུ་གསོལ།།
མི་རྣམས་ན་རྒ་འཆི་བའི་འཇིགས་མེད་ཅིང་།།
འཇིག་རྟེན་ཡང་དག་ལྟ་བ་དང་ལྡན་པས།།
ཕན་ཚུན་བྱམས་པའི་སེམས་དང་ལྡན་པ་ཡིས།།
ཚད་མེད་རབ་ཏུ་རྒྱས་པར་མཛད་དུ་གསོལ།།
འགྲོ་རྣམས་འཇམ་པོའི་རླུང་གིས་གཡོ་བ་ཡི།།
བ་དན་དཀར་པོ་ཕྲེང་བས་རབ་མཛེས་ཤིང་།།
གོས་བཟང་རིན་ཆེན་རྒྱན་དང་ལྡན་པ་ཡི།།
འབྱོར་ལྡན་སྐྱེ་བོས་གང་བར་མཛད་དུ་གསོལ།།
མཁའ་ལ་གློག་ཕྲེང་འགྱུ་བའི་སྤྲིན་མཛེས་ཤིང་།།
ས་ལ་རྨ་བྱ་དགའ་བའི་གར་མཛེས་པ།།
ཟིམ་བུ་དལ་གྱིས་འབབ་པའི་ཆར་རྒྱུན་གྱིས།།
འགྲོ་རྣམས་དགའ་བ་རྒྱས་པར་མཛད་དུ་གསོལ།།
རི་རྣམས་རྩ་དང་མེ་ཏོག་འབབ་ཆུས་བརྒྱན།།
ཀླུང་རྣམས་སྣ་ཚོགས་འབྲུ་དང་ཕྱུགས་ཀྱིས་གང་།
མི་རྣམས་རབ་ཏུ་དགའ་བའི་གླུ་ལེན་ཞིང་།།
དྲེགས་དང་འཐབ་རྩོད་ཞི་བར་མཛད་དུ་གསོལ།།
རྒྱལ་པོས་ཆབ་སྲིད་ཞི་བས་ལེགས་སྐྱོང་ཞིང་།།
འབངས་རྣམས་རྒྱལ་པོའི་བཀའ་ལུང་གུས་ལེན་པས།།
ཕྱི་དང་ནང་གི་འཁྲུགས་རྩོད་ཉེར་ཞི་ནས།།
རྫོགས་ལྡན་བཞིན་དུ་བདེ་བར་མཛད་དུ་གསོལ།།
གཙུག་ལག་ཁང་རྣམས་རྒྱལ་བའི་སྐུ་གཟུགས་དང་།།
དམ་ཆོས་གླེགས་བམ་དུ་མས་རབ་མཛེས་པ།།
ལྷ་རྫས་མཆོད་པའི་སྤྲིན་ཚོགས་དཔག་མེད་ཀྱིས།།
མཆོད་པའི་ཆར་ཆེན་རྒྱས་པར་མཛད་དུ་གསོལ།།
དགོན་གནས་ཐམས་ཅད་ཐུབ་བསྟན་སྐྱོང་བྱེད་པ།།
གཤེས་གཉེན་ངུར་སྨྲིག་འཛིན་པས་ཡོངས་གང་སྟེ།།
འཆད་རྩོད་རྩོམ་པའི་བྱ་བས་དུས་འདའ་ཞིང་།།
ཀློག་དང་ཁ་ཏོན་རྒྱས་པར་མཛད་དུ་གསོལ།།
དགེ་བསྙེན་དགེ་ཚུལ་དགེ་སློང་ཕ་མ་རྣམས།།
དྲི་མ་མེད་པའི་ཚུལ་ཁྲིམས་དང་ལྡན་ཞིང་།།
རྣམ་དག་ཐོས་བསམ་སྒོམ་གསུམ་བྱ་བ་ཡིས།།
བདེ་གཤེགས་བསྟན་པ་རྒྱས་པར་མཛད་དུ་གསོལ།།
སྒྲུབ་པ་པོ་རྣམས་གཡེང་བ་ཀུན་སྤངས་ནས།།
འཚེ་བ་ཀུན་བྲལ་འདུ་འཛིའི་རབ་དབེན་པའི།།
ཞི་བའི་གནས་སུ་སྤོང་པ་ལྷུར་ལེན་པའི།།
རྟོགས་པའི་ཡོན་ཏན་རྒྱས་པར་མཛད་དུ་གསོལ།།
ལྷག་པར་དད་པས་གསོལ་བ་འདེབས་བྱེད་པ།།
སྒྲུབ་པ་བདག་ཅག་འཁོར་དང་བཅས་རྣམས་ལ།།
ལོག་འཚོ་བྲལ་བའི་དཔལ་འབྱོར་ཕུན་ཚོགས་དང་།།
ཚེ་དང་དམ་ཆོས་རྒྱས་པར་མཛད་དུ་གསོལ།།
སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་།།
བསམ་གཏན་ཤེས་རབ་བླ་ན་མེད་སོགས་ཀྱིས།།
རང་ལ་སངས་རྒྱས་ཆོས་དང་ཀུན་ཡོངས་རྫོགས་ནས།།
ལུང་རྟོགས་ཡོན་ཏན་རྒྱས་པར་མཛད་དུ་གསོལ།།
སྦྱིན་དང་སྙན་པར་སྨྲ་བས་འཁོར་བསྡུས་ནས།།
དོན་སྤྱོད་དམ་ཆོས་ཚུལ་བཞིན་བཤད་པའི་མཐུས།།
རང་གཞན་དོན་མཐུན་ཆོས་ལ་ལེགས་སྦྱར་ནས།།
གཞན་དོན་ཆོས་བཞིན་རྒྱས་པར་མཛད་དུ་གསོལ།།
ཆོས་ཀྱི་འགལ་རྐྱེན་མཐའ་དག་ཉེར་ཞི་ཞིང་།།
མཐུན་རྐྱེན་མ་ལུས་ཕུན་སུམ་ཚོགས་གྱུར་ནས།།
གང་དང་གང་ལ་ཐུབ་པས་རབ་བསྔགས་པའི།།
དགེ་བ་དེ་དག་རྒྱས་པར་མཛད་དུ་གསོལ།།
ཅེས་འགྲོ་བའི་དོན་ལ་གསོལ་བ་འགྲོ་ལ་བདེ་སྐྱིད་མ་འདི་ངོར་ཆེན་རྡོ་རྗེ་འཆང་ཀུན་དགའ་བཟང་པོས་མཛད་པའོ།།།།
བང་སོས་ཡི་གེར་ཕབས།
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
