མཐོ་སྒང་།
འདྲུ་བཀྲིས་རྒྱལ། རྒྱུད་སྡེ་འོག་མ།
གངས་རླུང་འུར་འུར་དུ་ལྡང་། གཙང་པོ་འཁྱག་པས་འགྲིབས། གྲང་ཟུག་གི་གདོང་པ་དམར་མོ། མི་མངོན་པའི་དབྱིངས་ཀྱི་ལྷ་མོ། དལ་བ་དལ་བུས། གངས་ལ་རྐང་རྗེས་བཞག་པའི་མི་ཡང་དེ་ཁོ་ན་ཏེ། བླ་སྲོག་ལྟ་བུའི་མཐོ་སྒང་།
བཅོ་ལྔའི་དུང་ཟླ་དཀར་པོས། མཚན་ལམ་རིང་མོ་ཕར་ལ་བསྐྱལད། རྒྱུ་སྐར་གྱི་ཚོགས་ཀྱང་བཞད་ཀྱིན། དགུ་ཚིགས་རྒྱལ་མོའི་མཚམས་ལས་བརྒལད། ནམ་ཟླ་འདི་གྲང་ངད་ཀྱིས་མནརད་མོད། མི་རྣམས་བདེ་བའི་མལ་དུ་གཉིད་ཟིནད། འུར་སྒྲ་དང་ཚག་སྒྲ་ཅི་ཡང་མེད་པའི་མཚན་མོ། མཐོ་སྒང་ནི་དེ་ཙམ་ཡིན་ན་ཆོག །
ཡུམ་བུ་བླ་མཁར། ཡུལ་ཡར་ཀླུང་ན་གངས་ལ་འགྱིང་བའི་སེང་གེ་ཞིག །ཡང་ན། ཡངས་པའི་ཁམས་སུ་གཡོ་བའི་མཐོ་སྒང་གི་དབུ་དར་ཞིག །གཉའ་ཁྲི་བཙན་པོས་གཉའ་བས་བཏེགས་ནས་ཡོད་པའི་བླ་མཁར་ཞིག །མཐོ་སྒང་གི་བླ་སྲོག་ཐོག་མ་དེ་ནས་རྒྱས་མྱོང་། གཅིག་ཏུ་ན། མཐོ་སྒང་དང་ཡུམ་བུམ་བླ་མཁར་གཅིག་ཉིད།
སེམས་པའི་ཟབ་ཚད་ན། དམར་ལྷབ་ལྷབ་ཏུ་གཡོ་བ་མཐོ་སྒང་སྟེ། མེས་པོའི་རྣམ་དཔྱོད་དང་སྙིང་སྟོབས་ཀྱི་གཞིས་ཁྱིམ། འཛམ་བུ་གླིང་པས་དག་ཞིང་དུ་གླེང་བའི་གཅེས་སུ་འོས་པའི་གཞིས་ཁྱིམ། གངས་བུ་ཞིག་གི་ཡོད་ཚད་དང་ཡོད་ཚད། མེ་ཏོག་ཅིག་ལྷུག་པར་འཛུམ་པ་ལྟ་བུའི་གཞིས་ཁྱིམ།
དེའི་རྗེས་སུ།
བོད་ཁམས་པ། མངོན་པ་འོག་མ།
དེའི་རྗེས་སུ། ལྡོག་མེད་ཀྱི་ལས་དབང་བཙན་པོ་ཞིག་གི་འུ་ཅག་ལ་བར་ཐག་བཟོས་པ་རེད། དྲན་གདུང་དང་དམ་ཚིག་གི་འདུད་པ་ལྷོད་མ་མྱོང་བའི་ལོ་ཟླ་འདི་དག་གི་རིང་ལ། ངུ་ཁ་རབ་ཏུ་རྐྱེན་པའི་བདག་གིས་ཁྱེད་ཅག་དྲན་པའི་དྲན་གདུང་གི་མིག་ཆུས་རྒྱ་མཚོ་གསགས་ཡོད། ཁེར་རྐྱང་གི་གནས་མལ་ལ་མི་ལོབ་པས། འུ་ཅག་མཉམ་དུ་འཛོམ་སའི་དབྱར་གཞུང་གི་རྩྭ་ཐང་དེ་དྲན་བྱུང་ལ། མུ་མཐའ་མེད་པའི་རྩྭ་ཐང་ནས་སོ་སོའི་ཕུགས་བསམ་དང་རྨི་ལམ་མོལ་བ་ནམ་ཡང་གསུབ་མེད་དུ་སེམས་ན་ཉར་ཡོད་ཨང་།
དེའི་རྗེས་སུ། ང་ཡི་དྲན་འཛིན་གྱི་རབ་ཁ་ནས་ཝ་ལེར་མངོན་ཡོང་བ་ནི། མཛེས་སྡུག་གིས་སྤུད་པའི་དབྱར་ཟླ་དྲུག་པ་རེད། གཅེས་པར་འོས་པའི་དབྱར་ཟླ་དྲུག་པ་ཞེ་ལ་དྲན་ཐེངས་རེར། བརྟན་བརླིང་དང་རྔམ་བརྗིད་ཀྱིས་འགྱིང་བའི་གངས་རི། ཟམ་ཟིམ་གྱི་ཆར་བ་འབབ་ཤུལ་གྱི་མཐའ་ཡས་པའི་རྩྭ་ཐང་། ཆ་ཡོད་ཅིག་མིན་ན་ཡུལ་དེ་ན་གྲོང་བ་ཞིག་ཡོད་མེད་ཕལ་ཆེར་མི་ཤེས་པའི་ང་ཡི་ཕ་ས་ཕ་ཡུལ་སྟེ། ཡུལ་གྱི་འཚོ་བ་དང་འཚོ་གནས་དག་དྲན་འཛིན་གྱི་མེ་ལོང་ནས་འགོག་མེད་དུ་འཆར་ཡོང་། མ་ཟད་བྱིས་དུས་ཀྱི་དྲན་པ་དང་རྨི་ལམ་མང་སའི་ས་ཁུག་ལུང་སྐྱོག་དེ་འང་ཡང་ཡང་དྲན་དགོས་ཐུག་སོང་། མ་གཞི་དུས་ཚོད་ཀྱི་ཐག་སྒྲ་བར་མེད་དུ་སྒྲོག་བཞིན་པ་འདིས་ལོ་ཟླའི་གཙང་བོ་ཇི་ལྟར་དཀག་ཀྱང་འགོག་མི་ཐུབ་པའི་ཆོས་ཉིད་ཟེར་བའི་གནས་ལུགས་ཤིག་ར་སྤྲོད་བྱེད་ཀྱིན་ཡོད་འདུག་ཨང་།
དེའི་རྗེས་སུ། ནམ་ཟླ་ཇེ་འཁྱག་ནས་ཇེ་འཁྱག་དུ་ཕྱིན། རི་སྐྱེས་སྲོག་ཆག་ཆེ་མ་ཆུང་གསུམ་གང་མང་ཞིག་རང་རང་ས་ནས་འཁྱགས་ཤི་ཐེབས། ཕྱི་རོལ་གྱི་རི་ལུང་ཐང་གསུམ་ཡང་གྲང་འདར་རྒྱག་གིན་པའི་ཚོར་སྣང་འགོག་མེད་དུ་སྟེར། དེ་ནི་ཁྲིག་ཁྲིག་དགུན་ཟླ་འབྲིང་བོ་ལ་སླེབས་པས་ཡིན། དགུན་ཁ་སླེབས་ཐེངས་རེར། ནམ་རྒྱུན་ཡར་མར་ན་སྤུང་སོགས་བརྒྱག་བཞིན་པའི་མི་ཚོགས་རང་རང་གི་གནས་མལ་འཚོལ་དུ་ལོག ཐ་ན་ས་འབུ་རྐང་མེད་དག་ཀྱང་གར་སོང་ཆ་མེད་དུ་གྱུར། མ་ཟད་སྡེ་བའི་ནང་གི་སྒོ་ཟོག་གང་མང་ཞིག་མགོ་བོ་དུད་ནས་འཁྱག་ཤི་ཐེབ་པར་རེ་སྒུག་བྱས་ཡོད་པ་ཚོར། དེ་འདྲ་རེད་ཨང་། གྲང་རླུང་དང་བུ་ཡུག་དྲག་དུ་ལྡང་བཞིན་པའི་དགུན་གཞུང་འདིར། ང་ཡི་ཡིད་ཀྱི་གཏིང་རིམ་དུ་བརྗེད་མེད་དུ་དྲན་ཡོང་བ་ནི། མཚན་རིག་གི་དཔལ་ཡོན་ཤིན་ཏུ་འཐོ་བའི་གྲོང་ཆེར་དེ་དག་མིན་ལ། ད་ལྟའི་ང་ཡི་སྐྱ་སེར་སྔོ་སྡུག་གི་འཚོ་བའི་གནས་མལ་འདི་འང་དེ་ལས་ཀྱང་མ་ཡིན། དེ་ནི་ཆུ་ཆར་བ་ལ་མི་སྐྲག་ཅིང་། རླུང་སེར་བ་མི་འཇིགས་པའི་གནའ་དེང་མའི་འབྲོག་ཕྲུག་ཅིག་སྟེ། མགོ་ན་གནམ་དང་རྐང་འོག་ན་ས་གཞི་མེད་སྣང་ཤར་བའི་མཐོ་སྒང་གི་འབྲོག་ཕྲུག་དེ་ཞེ་ལ་འཁོར་བྱུང་།
འཚོ་བ་དང་འབྲེལ་བའི་སྣང་བརྙན་ཐན་ཐུན།
རི་སྤྱང་། ཤེར་ཕྱིན་བར་བ།
མི་ཚེ།
ང་ཚོ་མི་ཡུལ་འདིར་སླེབས་ནས་དུས་ཚོད་དང་ལོ་ངོ་ཅི་ཙམ་འཚོ་ཡོད་པ་སོ་སོའི་སེམས་སུ་གསལ་བོར་ཡོད་ཅིང་། འདིར་སྐྱེས་ནས་དོན་སྙིང་ལྡན་པའི་ལས་ག་རེ་བྱས་ཡོད་པ་སོ་སོའི་སེམས་སུ་གསལ་ལེར་ཡོད། འོ་ན། འཇིག་རྟེན་འདིར་ང་ཚོ་འཚོ་བའི་ཡང་སྙིང་ཅི་ཞིག་རེད། དངུལ་ལོ་དང་སྙན་གྲགས། ཆབ་སྲིད་དང་དབང་ཆ་ཞིག་ཐོབ་པའི་ཆེད་དུ་ཡིན་ནམ། ཡང་ན་གཞན་གྱི་ལག་ནང་གི་འགྱིག་རྡེའུ་བཞིན་གང་སར་འདེད་ཆོག་པའི་རྡེའུ་ལྟར་འཚོ་དགོས་པ་ཡིན། དོན་དམ་དུ་ང་ཚོ་འཚོ་བ་ནི་ཅི་ཞིག་གི་ཆེད་དུ་ཡིན།
འཆི་བ།
མི་ཚེ་ནི་ཐག་པ་རིང་བོ་ཞིག་གནམ་ལ་དཔྱངས་ཡོད་པའི་དབང་དུ་བཏང་ན། ཚེ་སྲོག་ནི་དེ་ཡི་སྟེང་དུ་འགྲེ་ལོག་རྒྱག་པའི་གྲུ་གུ་ལེབ་མོ་དེ་ཡིན། མི་ཚེའི་ཐག་པ་དུམ་བུར་ཆད་རྗེས་སུ། ཀུན་ཀྱང་འཇིགས་སྣང་སྐྱེ་བའི་འཆི་བ་ཐོག་ཏུ་སླེབས་ཚར་བ་ཡིན། འཆི་བ་ནི་ཆོས་གཞུང་ལ་ལར་བཤད་པའི་འཇིགས་སུ་རུང་བའི་གནས་དེ་ཡིན་ནམ། ཡང་ན་ད་ལྟའི་ཁྲག་རྣག་གི་ལུས་ཕུང་འདི་བརྗེས་ཏེ། འཇིག་རྟེན་འདི་དང་འཇིག་རྟེན་གཞན་པ་ཞིག་ཏུ་འགྲོ་དགོས་པ་ཡིན། འཆི་བ་ནི་སུས་ཀྱང་ངོ་མི་ཤེས་པའི་གསང་བ་ལྐོག་གྱུར་ཅིག་ཡིན་ན་ཡང་། འཆི་ཁ་མའི་མི་དང་མཉམ་དུ་འཕྲད་ནས་གྱེས་བརྡ་གཏོང་དུས། འཆི་བ་ནི་དངངས་སྐྲག་སྐྱེ་དགོས་པའི་འཇིགས་རུང་གི་དུར་ཁྲོད་ཆེན་པོ་ཞིག་ཡིན་པ་གཞི་ནས་རྟོགས་ཐུབ།
རྨི་ལམ།
རྨི་ལམ་ནི་ཅི་ཞིག་ཡིན། དེ་ནི་ཉལ་ནས་གཉིད་པའི་རྗེས་སུ། སེམས་འཁྲུགས་ནས་རྨི་ལམ་ཡག་བཙོག་ཅི་རིགས་པ་པ་རྨིས་ཆོག་པ་ཞིག་སྟེ། རྨི་ལམ་ལ་བརྟེན་ནས་ལྷ་ཡུལ་གྱི་དག་ཞིང་དུ་ཡང་བསྐྱོད་ཆོག་ལ། རྨི་ལམ་ལ་བརྟེན་ནས། སྡུག་བསྔལ་གྱི་གཅོང་རུང་དུ་ཡང་འཕེན་སྲིད། རྨི་ལམ་གྱི་ཐབས་ལམ་བེད་སྤྱོད་གཏོང་ནས་རང་ཉིད་འཁྲུལ་བ་ཡིན་པར་ངོས་འཛིན་ཐོབ་ཚེ། རྨི་ལམ་ནི་ཁྱོད་རང་རི་རྩེར་བསྒྲོད་པའི་སྐས་ཀྱི་བང་རིམ་ལྟ་བུ་ཡིན། ཁྱོད་ལ་རྨི་ལམ་གང་ཡང་མེད་ཚེ་ཁྱོད་ནི་སྔར་བཞིན་ནག་དོང་ནང་ན་བསམ་བློ་སྒྲོག་གིས་བཅིངས་ནས་ཡོད། བསམ་བྱ་སྒོམ་བྱ་ཅི་ཡང་མེད་པའི་གླེན་ནག་ཅིག་དང་འདྲ། ཡར་མར་གང་དུ་འགྲོ་དགོས་ཀྱང་རྨི་ལམ་ནི་མེད་དུ་མི་རུང་བའི་ལྷ་ཡི་དམུ་ཐག་རིང་མོ་དེ་ཡིན།
ཕུགས་བསམ།
བྱ་བ་གང་ཞིག་བསྒྲུབ་ཀྱང་གྲ་སྒྲིག་དང་འཆར་གཞི་ཡོད་པ་སྔར་ནས་བྱས་ཏེ། རེ་བ་ཆུང་ཆུང་བྱས། ཕུགས་རྒྱང་རིང་བོ་བྱས་ན། དེ་ནི་ཕུགས་བསམ་ཡིན། ཉིན་རེའི་བྱ་བ་དུས་ཚོད་ཀྱི་འགྲོས་དང་བརྟུན་ནས་བསྒྲུབ་དགོས། དུས་ཚོད་ནི་ཁྱོད་ཀྱི་ཚེ་སྲོག་གི་གྲུབ་ཆ་ཡིན་ཕྱིན། ཕྱིར་འགྱིངས་མེད་པར་ཏན་ཏན་ཏིག་ཏིག་གིས་འཐུས་ཤོར་མ་སོང་བྱེད་དགོས། མིག་གིས་ད་ལྟ་མཐོང་མི་ཐུབ་པའི་རྒྱང་རིང་ཡུལ་དེ། གོམ་པ་རེ་རེ་ཁེར་སྤོས་བྱས་ཏེ་ཡུན་མི་ཐོགས་པར་ཁྱོད་རང་སླེབས་སྲིད་པ་ནང་བཞིན། དེ་དང་འདྲ་བར་ཁྱོད་ཀྱི་ཕུགས་བསམ་ཡང་དེ་ལས་མ་འདས། གང་ཞིག་བསྒྲུབ་པར་འདོད་ན་ཐོག་མར་ད་ལྟ་ནས་འགོ་བརྩམས་ནས་མཇུག་ལེགས་པར་བསྡུས་ཤིག དེ་རིང་ནས་སང་ཉིན། སང་ཉིན་ནས་གནང་ཉིན་ལ་ཕྱིར་འགྱིངས་བྱས་ཚེ། ཁྱོད་རང་ལེ་ལོ་དང་སྒྱུད་ལུགས་ཀྱི་སྒྲོག་གིས་བཅིང་ཚར་བས། རེ་འབྲས་གང་ཡང་མེད་པའི་མི་ཤི་བོ་ཞིག་དང་ཁྱད་མ་མཆིས་སོ། ། བལྟས་ཚོད་ལ་རྐང་གཉིས་ཀྱི་མགོ་ནས་ཙོག་པུར་འགྲོ་བ་ཙམ་ལས་དོན་དུ་ཤི་བོ་ཡིན་ནོ། །
༨ ༡༡ ༢༠༢༡
སེམས་ལ་ཟུག་པའི་ཕ་ཡུལ།
ཕར་ཕྱིན་གོང་མ། རྙིང་ལྟ་བ།
བདག་གི་གོམ་སྟབས་འཁྱར་འཁྱོར་དུ་ཐོག་མར་སྤོ་ས། སྨྲ་ཤེས་ལ་མ་ཤེས་པའི་ཨ་མ་ཞེས་ཐོག་མར་འབོད་ས་གནས་འདི་སྟེ། རང་ས་རང་ཡུལ་ཡིན་ཐག་ཆོད་རེད། ང་རང་ཕ་ཡུལ་ནས་ཤ་རྒྱས་རུས་རྒྱས་སུ་གྱུར་ཞིང་། ཕ་ཡུལ་ནས་འཚར་ལོངས་བྱུང་སྟེ། ཕ་ཡུལ་གྱི་ཕྱི་ནང་གསང་གསུམ་དང་། སྐྱིད་སྡུག་གི་གཏམ་རྒྱུད་རེ་རེ་བདག་ཡིད་གཟུགས་མེད་ཀྱི་འཆར་སྒོ་ལས་དུས་ནམ་ཡང་གཟིམས་པ་མེད་པའི་དོན་ཞིག་ཡིན།
བདག་གི་ཕ་ཡུལ་ནི་ལྡོང་མི་ཉག་གི་ཁོངས་སུ་གཏོགས་ཅིང་། ཉག་ཆུ་ལྷུང་ལྷུང་འབབ་བའི་ས་ཕྱོགས། ཙན་དན་གྱི་དྲི་བསུང་འཐུལ་ས། ཕྱིའི་བཀོད་པ་ཕུན་སུམ་ཚོགས་ཤིང་། ནང་དུ་མཐུན་སྒྲིལ་གྱི་མདུད་པ་ལྷོད་མ་མྱོང་བའི་གནས་མཆོག མེས་པོ་གོང་མས་གནང་བའི་བྱམས་བརྩེ་དང་། སྙིང་རྗེ། དྲང་བདེན། དམ་ཚིག་ལ་སྙིང་ནས་བརྩི་ཞིང་། ལུས་ཀྱིས་སྲུང་བ་བྱེད་པའི་བོད་མི་རྣལ་མ་ཞིག་གི་ངོ་བོར་མ་འདོར་ཞིང་། རང་ཚུགས་བཟུང་སྟེ། དུས་ད་ལྟར་ལ་ཐུག་གི་བར་དུ་ཕ་ཡུལ་གྱི་མི་ལ་རིག་ཐུབ་པ་འདི་དག་གོ།
ལོ་གསར་ཚེ་བར་ཉེ་དུས་སུ་ཡུལ་མི་རྣམས་ཀྱིས་ལས་ཀ་རྣམས་རེ་ཞིག་མཚམས་བཞག་སྟེ། སོས་དལ་བག་ཕེབས་ངང་ནས་ལུས་སེམས་གཉིས་ལྷོད་ལ་ཕབ་ཅིང་། ཁྱིམ་གྱི་ཕྱི་ནང་བར་གསུམ་དུ་གཙང་སྦྲ་བྱེད་པ། ཡུལ་གྱི་རྒན་དར་གཞོན་གསུམ་དུང་འཁོར་སྒོ་རྩར་འདུས་སྟེ། མཆོད་རྟེན་དང་། དུང་འཁོར་བསྐོར་བ། མཉམ་དུ་ཇ་བསྐོལ་ནས་ཇ་འཐུང་བ། ཁ་བརྡ་ལབ་པའི་ངང་ཚུལ་ལྟ་ན་ཡིད་མགུ་ཐེབས་པའི་དོན་ཞིག་ཡིན་འདུག་སྟེ། འདི་ལྟར་བའི་འཚོ་གནས་ཀྱི་ཁོར་ཡུག་ཅིག་ནམ་ཞིག་ལ་མཇུག་རྫོགས་པ་ཡིན་སྙམ་པའི་སེམས་ཁྲལ་ཞིག་ཀྱང་ཡོང་གིན་འདུག
ཁོར་ཡུག་མི་འདྲ་བ་རེ་རེ་ནས་ཡུལ་སྲོལ་གོམས་གཤིས་མི་གཅིག་པ་ཇི་བཞིན། ས་ཕྱོགས་རེ་རེ་ན་ཡང་གཞན་དང་མི་མཚུངས་པའི་ཐུན་མིན་གྱི་ཁྱད་ཆོས་རེ་ཡོད་པ་སྨོས་མེད་རེད། ངའི་ཕ་ཡུལ་གྱི་མི་ཚོ་རྡོ་རྩིག་རིགས་གནས་ཀྱི་ཐད་ནས་ཆེད་ལས་མཁན་ཞིག་བརྩི་ན་བརྩི་ཆོག་ཆོག་ཡིན་ཏེ། གཟིགས་དང་། ད་ལོར་ངའི་ཕ་ཡུལ་གྱི་མི་ཚོས་པོ་ཏ་ལ་ཆུང་ཆུང་ཡག་ཐག་ཆོད་ཅིག་བཞེངས་འདུག དེ་ཡང་ལས་སླར་པོ་ཞིག་མིན་ཏེ། འདི་ནས་ཕ་ཡུལ་གྱི་མི་ཚོའི་ལག་རྩལ་དང་། དུངས་སེམས་ཀྱི་རིགས་ཞེན་མཐོང་ཐུབ་ལ། དགའ་བ་འབུམ་གྱིས་རྗེས་སུ་ཡིད་རང་ཞུ་བཞིན་ཡོད། ནམ་ཡང་ཕ་ཡུལ་གྱི་མི་ཚོ་བདེ་ཞིང་སྐྱིད་པར་ཤོག
ཕ་ཡུལ་དུ་ཅུང་ཙམ་བྲིས་ནས་མ་ཡུལ་སློབ་གླིང་གི་ངལ་གསོ་ཉིན་པར་རྫོགས་པར་བྲིས། 2022 / 4 / 1
ལོ་འདིའི་དཔྱིད་ཀ་བཞུད་ལ་ཉེ་འདུག
ཁྲག་གདོང་། ཕར་ཕྱིན་བར་མ།
ནམ་ཟླའི་ཚ་གྲང་མ་མཉམ་པའི་ཟླ་བ་འདིར། མི་རྟག་པའི་རང་བཞིན་ཟིན་པའི་སྡོང་པོ་དང་ཤིང་ལོ། ད་དུང་འབྱམས་ཀླས་པའི་རྩྭ་དང་རྩི་ཤིང་། ཡངས་ཤིང་རྒྱ་ཆེ་བའི་ས་གཞི་དེ་རུ་དཔྱིད་ཟླའི་རང་མདངས་མངོན་ཡོད་པ་སྐྱེས་བོ་ཀུན་གྱིས་ཕལ་ཆེར་ཚོར་མ་ཐུབ་ནས་སྒུར་ཡོད། ཡིན་ནའང་ལོ་ཟླ་ནི་རྟག་བརྟན་གྱི་རང་བཞིན་མ་ཡིན་པས་དལ་གྱིས་བུད་སོང་བའང་དུས་ཚོད་ཀྱི་ངོ་བོ་ཡིན་འདུག
དཀའ་སྡུག་གི་རྔུལ་ཆུ་ལས་གྲུབ་པའི་བྱིས་དུས་ཀྱི་ཚོར་འདུ་རེ་རེ་སེམས་སུ་དྲན་མ་ཐག་ཏུ་ཡིད་འོང་གི་རྨི་ལམ་སྣ་ཚོགས་རྨིས་དོན་ཡང་དུས་ཚོད་ཀྱི་འགྲོས་ཤིག་མ་ཡིན་ནམ། མ་གཞི་ནས་ལོ་གཅིག་ལ་ཟླ་བ་བཅུ་གཉིས་དང་དབྱར་དགུན་སྟོན་དཔྱིད་ལ་ཟླ་བ་གསུམ་གསུམ་ལས་ཡོད་མོད། དེ་ལས་དཔྱིད་ཀའི་ཟླ་བ་གསུམ་ནི་གངས་ཆར་འདྲེས་མའི་བཞུར་རྒྱུན་དང་སྔོ་སྐྱ་བསྲེས་པའི་ལྗོན་ཤིང་གིས་མཇུག་གྲུབ་སོང་བ་ནི་ཅི་ཡིན་མ་ཚོར།
ནམ་རྒྱུན་བདག་དང་བདག་འདྲ་བའི་གཤིས་ཀ་ལྡན་པ་ཡངས་ལ་དཔྱིད་ཀ་ནི་རེ་སྒུག་གི་ཀློང་དུ་ཚུད་ཅིང་ཡིད་སྨོན་གྱི་འོག་ནས་གསལ་འོང་བའི་དུས་ཚོད་ཁྱད་པ་ཅན་ཞིག་ཏུ་བརྩིས་ཡོད། ལྷག་ཏུ་དཔྱིད་ཟླ་གསུམ་པ་ནི་དབྱར་ཁ་དང་ཉེ་བའི་ཟླ་བ་བྱེ་བྲག་པ་ཞིག་ཡིན་པའི་གདེང་ཚོད་ཤིན་ཏུ་ཟབ། འོན་ཏེ་ད་ལོ་ནི་དེ་ལས་ལྡོག་སྟེ་ཉི་མའི་ཚ་གདུང་ཆེ་ཞིང་ཆར་བའི་བཞུར་རྒྱུན་དཀོན་པའི་ཟླ་བ་དམིགས་བསལ་བ་ཞིག་ཏུ་གྱུར། དེ་ནི་སེམས་ཅན་གྱི་ལས་ཀྱིས་གྲུབ་པའམ་འདྲིས་མེད་པའི་ཕྱི་རོལ་གྱི་ཆག་འཇིག་ལས་ཚེས་ཡོད་པ་བདག་ལ་ལྐོག་ཏུ་གྱུར།
ད་ནི་དབྱར་གྱི་ཟླ་བ་ལ་ཡིད་སེམས་འཆང་བ་ལས་དཔྱིད་ཟླ་ནི་རང་བཞིན་བཀྲ་མ་ཐུབ་པ་གློ་བུར་དུ་འགྲོ་ལ་ཉེ། མཛེས་སྡུག་གི་རྣམ་འགྱུར་ཡོད་ཚད་ཀྱང་བག་ལ་ཞར་ནས་འགྲོ་ལ་ཉེ། ཡིད་འཕྲོག་གི་མེ་ཏོག་དེ་དག་མགོ་ལྕོག་ལྡེམ་མ་ཐུབ་པར་ཐག་རིང་ཐག་རིང་ཞིག་ལ་བུད་འགྲོ་བའི་སྟ་གོན་བགྱིད་འདུག ཁུ་སིམ་མེའི་རང་བཞིན་ལ་རྒྱབ་ཀྱིས་ཕྱོགས་པའི་ད་ལོའི་དཔྱིད་ཀ་ནི་སྡིག་སྒྲིབ་ཆགས་པའི་ལོ་ཟླ་ཞིག་གི་རང་བཞིན་དུ་གྱུར་སོང་དོན་ཅི། དེ་ནི་ལོ་འདིའི་དཔྱིད་ཀ་ལ་ཕུལ་བའི་ཆེས་ཐོག་མའི་དྲི་བ་དེའོ།།
2021 4 26 ལ་བརྩམས།
དམྱལ་བ་ནས་མནོ་བསམ་རེ་རེས་དྲུད་འོང་བའི་ཡིག་འབྲུ་དེ་ཚོ།
བཞད་དཀར། ཕར་ཕྱིན་གོང་མ།
༡
དེ་རིང་གནམ་གཤིས་འཐིབ་པོ་བྱེད་འདུག འཁྱག་ཤུར་གྱིས་གཙེས་པའི་ཚོར་བ་དག་འདར་སིག་བྱས་ཤིང་། ཆར་ཆུ་འདྲེས་མས་ས་གཞི་འདི་རློན་དུས། རྒྱབ་རྟེན་ཅི་ཡང་གཡོག་འོག་ལྷུང་བ་ལྟ་བུའི་ཚོར་བ་མོག་པོ་ཞིག་འཐུལ་གྱིན། ས་སྲོད་ཙམ་ན་གོམ་ཁ་འཁྱོར་པོར་སྒྱུར་གྱིན་ཕྱིར་ལོག ཁང་ཆུང་སྐམ་པོ་ཞིག་ཏུ་ཅི་ཡང་ངེས་མེད་དུ་སྟེང་འོག་སྒྱུར་བ་བཞིན་ཕྱིར་ལོག རྐང་མགོ་ས་ལ་ཁེལ་བ་རང་གིས་མི་ཚོར་བཞིན་ཕྱིར་ལོག སེམས་པ་ཁེར་རྐྱང་ཞིག་གིས་ཅི་ཡང་ཆོད་དོན་ཆེན་པོ་ཞིག་གཏན་ཁེལ་བྱེད་པ་ལ་བསམ་གཞིགས་དང་བསམ་བློའི་འཐབ་རྩོད་ཅིག ས་ཁུལ་ཉི་ཚེ་བ་འགའ་ཞིག་ཏུ་ཞུམ་པ་ཅི་ཞིག་ཡོད། མི་ནི་རྒྱུན་ཚུལ་ལས་ལྡོག་སྟེ་ཁྲུས་པོ་ལྗིད་མོ་ཞིག་རྒྱབ་ནས་འཕེན་སོང་བ་ཇི་བཞིན་ཚོར་བ་ཡང་ལམ་ཕྱེད་ཙམ་དུ་བསླེབས་མྱོང་མེད། ཁ་ཁོག་གི་བར་དུ་དབུགས་རྒྱུ་བའང་གྲོས་འདོན་དང་ཆོད་དོན་མེད་པར་སོང་བས་དབུགས་ལེན་བཞིན་ཡོད། ཚོར་བའི་ཉེ་འགྲམ་པ་དག་ལ་དྲིས་པ་ན། འཇིག་རྟེན་སྣང་བའི་མངར་སྐྱུར་ཟེར་བ་ནི་བརྟན་པོ་དང་ཁ་བྲལ་སོང་བའི་རིང་ལུགས་ཤིག་ཏུ་སྨྲ། རང་སེམས་རང་གིས་དུལ་བས་ཁྲོ་བ་མངོན་གྱུར་ཞིག་གིས་སེམས་ཀྱི་བུ་ག་མང་པོ་ཞིག་ཁ་རུབ་ཅིང་། ཅིས་ཀྱང་ཐོལ་གྱིས་དྲན་པ་ཞིག་བྱུང་། སྒྲོ་བཏགས་ཁོ་ན་སྨྲ་བ་ནི་འཚོ་དངོས་ནས་འདུག་པས་མཚར་བས། འཇིག་རྟེན་འདི་འཁྲུངས་པ་ལ་ཐག་གིས་ཆོད་ཐབས་མེད་དེ། འཆར་ཡན་གྱིས་ཚོར་བྲིས་ཟབ་གཏིང་ལ་མྱོང་ནས་མྱོས་པའི་སྡིག་གཟུགས་ཤིག་རྐོས་ནས་རྨི་ལམ་ལྟ་བུ་འཚོ་བ་དངོས་ཤིག་ཀྱང་རོལ། སྐར་མ་ལོག་པའི་ཤུལ་ན་འཇིག་རྟེན་ན་ཉི་འོད་ཀྱི་ཁེལ་བས། སྲོག་ལྡན་གྱི་འགྲོ་བ་སུ་ཞིག་གིས་མཐོང་འགྲོ། སུས་ཀྱང་མ་མཐོང་པར་བཞུད་འགྲོ། ས་གཞི་འདི་གནམ་ཆེན་པོའི་འོག་ཏུ་ཉམས་ཆུང་བའི་གདན་ཞིག་ཡིན་ཚེ། མག་མོག་ཅིག་གི་ངོགས་ནས་སུ་ཞིག་གིས་མེ་ཏོག་དེ་བཏུས་ཏེ་ང་ལ་གནང་སོང་བ་ལ། སུ་ཞིག་ཡིན་སྙམ་ཞིག་ཡོད་ལ་མིན་སྙམ་ཞིག་ཀྱང་བྱུང་།
༢
ཁ་སང་གི་ལོ་ཟླ་དེ་སྨོན་ལམ་ཐེབས་པའི་ནུས་མཐུ་ཡིན་ན། ང་རང་གིས་སེམས་ཀྱིས་བསླེབས་པའི་འཁྲུལ་སྣང་གི་ཐ་གུ་རིང་པོ་ཞིག་ཏུ་འདུག མཚར་ཆེ་བ་ཞིག་ནི་འཆར་ཡན་ཏུ་ཚུད་པའི་སྔོན་སུས་ཀྱང་བདག་ལ་འཁྲུལ་བ་སྐྱེད་པ་བྱུང་ན། འཁྲུལ་དུ་འཇུག་དོན་ཅི་ལ་མྱོང་དགོས་པ་ལས་དབང་ལ་འགྲེལ། ཡུད་ཙམ་རྗེས་བལྟ་ལུགས་ཤིག་གིས་ས་གཞི་བྱེ་ཐང་དུ་སྒྱུར་ཏེ། རྟབ་རྟབ་པོར་ལམ་ལ་ཆས་ཚུལ་གྱི་ཐོ་ཡིག་ཅིག་དཔར་དུ་བསྐྲུན་མོས་བྱས། མི་ལོ་འགའ་ཞིག་ལ་འཁྱོར་འཁྱོར་པོར་འོང་དོན་ཡང་མི་ཚེ་ཧྲིལ་པོ་དེ་མག་མོག་ནས་ཐོན་ཏེ་ཉེ་འཁོར་ཐམས་ཅད་རབ་ཏུ་དྭངས་སང་སང་དུ་འདུག ང་ཡི་སྒོ་དང་སྒོ་ཐེམ་བར་ནས་ཚོར་བྲིས་ཀྱི་སྣང་བརྙན་དཔར་བའི་དུས་ཚོད་ཐར་ཐོར་ནང་། གསར་ཡག་ལེགས་ཚོར་ཞིབ་པའི་ནམ་ཟླ་སློག་དུས། ཅི་ཞིག་དྲན་གི་ཡོད་ནི་ཅི་ཡིས་ཤེས། ལས་མི་གཅིག་པའི་བསྐོས་ཐང་འདི་ཡིས། སྲིད་པའི་སྣང་བརྙན་གྱི་སྒོ་ན། བལྟ་བ་འདོད་པའི་ཟ་ཕྲུག་ལ་ལག་ཟུང་གི་སེན་མོས་འཇིག་རྟེན་གྱི་ས་ཁྲ་ཚིམས་ཤིང་ངོམས་པའི་མི་ཡུལ་ཞིག་བསྐྲུན་ཡོད།
༣
འཚོ་བའི་གཡས་གཡོན་དང་ཉེ་འཁོར་ན་ཁུར་པོ་ལྗིད་པོ་ཞིག་གིས་ནོན་བཞིན། རྒྱང་ཐག་ཤིན་ཏུ་རིང་བའི་ས་ཆ་ཞིག་ལ་དམིགས་པ་གཏད་ནས་ཆས་བཞིན་པའི་རྣམ་ཤེས་སྐོར་ཞིག བས་མཐའི་ས་ཆ་ཆུང་ངུ་ནས་ཉིན་བཞིན་སེམས་སུ་ཕྱོགས་ཏེ་སུན་སུན་བར་སྡོད་པའི་སྡིག་གཟུགས་ཤིག་ལྷུང་དུས། རང་ཉིད་ཀྱི་བསམ་གཞིགས་དང་ཡིད་འགྱུར་གྲུང་པོ་དེ་རང་མོས་ངང་བདམས་པའི་འདུན་མ་དེའི་ཕྱིར་དུ། ཐད་ཀར་མི་གཏོགས་པའི་སེམས་བྱུང་གི་ལྐོག་མྱུར་ཅན་ཞིག ཆུ་བོ་བཞུར་བ་བཞིན་ཟིན་དཀའ་ནའང་ནམ་ཞིག་འདོར་དུའང་མེད་པར་གྱུར། དེའི་དབང་གིས་གདམས་ང་ཡང་ཡང་བྱས་མཐར་ལས་དབང་ཞིག་གིས་བསྒྱུར་བའི་གོམ་ཁ་དེ་སློག ཉམས་གུད་ཆེན་པོའི་སྣེ་ནི་འཆར་ཡན་དང་འགལ་བའི་སྐད་ཆ་ཞིག ཇི་ལྟར་ལངས་མ་གོག་གི་གནོད་ཚིག་ཅིག་འཕྱུང་ཡོང་། མི་མཚུངས་པའི་ཁ་ཕྱོགས་ལ་ཚེ་སྲོག་གི་དཔར་བསྐྲུན་གཞི་བཟོ་ཞིག་སྤྲོས་པ་སོམས་མོད། ཉམས་འུར་ཐེངས་གཅིག་གིས་འགལ་བ་བྱུང་རྗེས། མི་སེམས་ནི་དམྱལ་བ་ལ་དགའ་བའི་གཏམ་རྒྱུད་ཅིག་མཆིས། དམྱལ་བ་ནས་མནོ་བསམ་རེ་རེས་དྲུད་འོང་བའི་ཡིག་འབྲུ་དེ་ཚོ་ཅི་འདྲའི་གཅེས་སྤྲས་ཆེ་ཡོད་ཨང་། འཆར་ཡན་གྱིས་བསྡུས་པའི་ཆོ་འཕྲུལ་ནང་མི་སེམས་ཀྱི་འཇིག་རྟེན་བརྩམས་ན། མཐོང་མཁན་ནི་སྤྱན་མིག་གི་བློ་རྒྱ་རྒྱང་ཐུབ་པ་ཞིག་ཡིན། ལམ་གྱི་ལྷ་མཆོག་ལས་སུ་བབས་པ་ནི་སྔར་མེད་པའི་འཆར་ཡན་གྱི་མེ་ཏོག་ལ་ཚོད་འཇུག་བྱེད་ཅིང་། སུ་ཡི་སྣང་སེམས་འདྲེན་སྟོབས་དང་བསམ་པ་འགུགས་ནུས་ཀྱི་འཆར་ཡན་དྲག་ཤུར་ངོ་ལོག་ཅིག་ཡིན།
མིང་མེད།
ཨ་ཉོག་རྒྱལ་པོ། རྒྱུད་སྡེ་འོག་མ།
ཐག་རིང་གི་བདག ཁྱོད་ལ་བཞག་པའི་སྙིང་གཏམ་ནི་ཧ་ཅང་མང་མོད། ཁྱོད་ནི་སྐབས་རེ་ཆང་གིས་མྱོས་ལ། སྐབས་རེར་མདུན་ཕྱོགས་ཀྱི་མཛེས་པ་ལས་གཡོལ་བར་བྱེད། ཁྱོད་ཀྱིས་མཐོང་མྱོང་བའི་ཁ་སང་གི་བདག་ཀྱང་། སྤུ་རིས་ཟིན་ཐབས་བྲལ་བའི་བྱིས་བློ་འདིས་སུབ་པར་བྱེད། ལག་པས་བསྙབ་མི་ཐུབ་པའི་ཁྱེད་རང་། ཁོ་བོས་འབད་བརྩོན་བརྒྱ་ཕྲག་གིས་ངལ་བ་བརྟེན་མོད། ཆར་སིམ་ཁྲོད་ཀྱི་ཀྱི་འཇའ་མཚིན་བཞིན། གང་ནས་ཤར་བ་མི་ཤེས་ཤིང་གང་དུ་ཡལ་བའང་མ་རྟོགས། སྡོམ་ཐག་གིས་དཀྱིག་པའི་ཐག་རིང་གི་ང་། དོན་དམ་པར་འབར་སྦྲད་ཅི་ལྟར་བྱས་ཀྱང་ཞོགས་པའི་མལ་ཁྲིའི་སྟེང་དུ་གན་རྐྱལ་དུ་ལྷུང་ཞིང་། རྣར་གཟན་པའི་ཆུ་ཚོད་ཀྱི་ལྟིར་སྒྲ་ཡང་འགོག་པར་དཀའ།
གྲོགས་ཚོམས།
རབ་རྡོར། ཕར་ཕྱིན་གོང་མ།
ཧེ། གྲོགས་ཚོམས། མཐེ་བོང་ཡར་ལ་ཀེར་བའི་གྲོགས་ཚོམས། ང་ལ་དགའ་རུ་མ་བཅུག་རོགས། ཧེ། གྲོགས་ཚོམས། མཐེ་ཆུང་མར་ལ་བསྣོལ་བའི་གྲོགས་ཚོམས། ང་ལ་སྡུག་བསྔལ་མ་གནང་རོགས། ང་ནི་རྩྭ་སྐྱ་འཇག་མ་བཞིན། ང་ནི་རླུང་ནང་མར་མེ་བཞིན། ང་ནི་ལ་ཁའི་དར་ལྕོག་བཞིན། མཐེ་བོང་ཀེར་ལུགས་ཙམ་གྱིས་གཡོ་འགྲོ། དེ་བས། དེ་བས། ང་ལ་ཉམས་ལེན་མེད་པས། ང་ལ་རེ་དོགས་ཡོད་པས། སྙིང་རྗེ་ལྷོད་ཙམ་གནང་ཞོར། ང་ལ་བསྟོད་སྨད་མ་གནང་རོགས།
ཧེ། གྲོགས་ཚོམས། དེ་རིང་ཁྱོད་བདེ་ཞིང་སྐྱིད་དམ། འཚོ་བ་ནི་མ་གཞི་ནས་བདེ་སྐྱིད་ཅིག་རེད། ཧེ། གྲོགས་ཚོམས། དེ་རིང་ཁྱོད་སྡུག་གིས་མནར་རམ། མ་རྩ་འཁོར་བ་ནི་སྡུག་བསྔལ་ཞིག་རེད། དེ་བས། དེ་བས། ཁྱོད་ལ་དགོས་པ་ནི་བདེ་སྐྱིད་ཡིན། རང་སེམས་རང་གིས་གསོ་ནས། གྲོགས་ཚོམས་ཀྱིས་བཟང་ངན་ཅི་བཤད་ཀྱང་། ཁུ་སིམ་མེར། དབྱངས་ལ་རོལ་བཞིན། སྤྲོ་ཙམ་གནང་དང་། ང་ཚོ་ཚང་མས་མཉམ་རོལ་བྱེད།
ཧེ། གྲོགས་ཚོམས། དེ་རིང་འཛམ་གླིང་གཡོ་འདུག་ཟེར། གུ་ཡངས་མཛོད་དང་། དེ་ནི་མི་སྲིད་པ་ཞིག་ག་ལ་ཡིན། ཧེ། གྲོགས་ཚོམས། དེ་རིང་གོ་ལ་འཐོར་འདུག་ཟེར། སེམས་རྒྱ་བསྐྱེད་དང་། དེ་ཡང་ཡ་ང་ལ་ཞིག་ག་ལ་ཡིན། འཛམ་གླིང་གཡོ་རུང་། གོ་ལ་འཐོར་རུང་། རང་ལག་གི་བདེ་སྐྱིད་འཇིགས་དངངས་དང་མ་བརྗེས་པར་རོལ་མྱོང་མཛོད་དང་། དེ་ནི་འཚོ་བའི་སྙིང་པོ་རེད། དེ་ནི་འཚོ་བའི་གྲུབ་ཆ་རེད། ཧེ་ཧེ། བདེ་མོ།
༢༠༢༠ལོའི་ཟླ༢པའི་ཚེས་༡༣ཉིན་ལ།
རྒྱང་རིང་།
མྱི་གསར་བ། མངོན་པ་འོག་མ།
ང་དུས་ཚིགས་འདིའི་ལས་དབང་ལ་ཤིན་ཏུ་དགའ་སྟེ"དུས་ཚིགས་འདི་ཁོ་ནས་ང་ལ་ཁྲེལ་མེད་ཀྱི་བརྩེ་སེམས་གནང་བ་རེད། ང་དུས་ཚིགས་འདིའི་འདུ་འབྲལ་ལ་ཤིན་ཏུ་དགའ་སྟེ"དུས་ཚིགས་འདི་ཁོ་ནས་ངའི་སྐྱེ་བ་གཅིག་གི་སེམས་ལ་རྨ་ཁ་བཟོས་པ་རེད།
དུས་ཚིགས་ཀྱི་རྒྱང་རིང་། སེམས་ཀྱི་རྒྱང་རིང་། ང་ད་ལྟ"བོའུ་ལྦེ"གྲོང་ཁྱེར་ནས་ཕྱིར་ལན་ཀྲུག་ཏུ་ལོག་བཞིན་ཡོད་ལ། ཕྱིར་ལན་ཀྲུག་དུ་ལོག་པ་ནི་ང་ལ་མཚོན་ན་མ་ངེས་པའི་འཚོ་བའི་ཁྲོད་དུ་ཕྱིར་ལོག་པ་ཡིན། ད་ལྟ་ངས་ཤིན་ཏུ་ཁེར་རྐྱང་ངང་མེ་འཁོར་གྱི་སྒེའུ་ཁུང་བརྒྱུད་ནས་ཕྱི་རོལ་ཞིང་གྲོང་གི་ཉི་ནུབ་ལ་བལྟས་ཡོད་ཅིང་། མཐོང་སྣང་སྨུག་ལོང་ཁྲོད་ཀྱི་ཉི་ནུབ་དེ་ཡང་མི་འགྱང་བར་ང་ཡི་སེམས་ཀྱི་ཟབ་ས་རུ་འཁྱིལ་དགོས་བྱུང་བ་འདྲ། ངས་སྔོན་ཆད་འདི་ལྟ་བུའི་ཉི་ནུབ་མང་པོ་མཛེས་སྡུག་ངང་མིག་ལམ་ནས་ཡལ་དུ་བཅུག་པ་ཡིན་ལ། ཉི་ནུབ་ནི་ང་ལ་མཚོན་ན་བརྩེ་སེམས་ཀྱིས་གཏན་དུ་བསྲུང་བའི་དུས་ཚིགས་ཁྱད་པར་བ་ཞིག་ཡིན་པ་འདྲ། ད་ལྟ་ངའི་སེམས་སུ་ང་རང་མེ་འཁོར་སྟོང་བ་ཞིག་ཏུ་བསྡད་དེ་ཕྱིར་ལན་ཀྲུག་ཏུ་ལོག་གིན་ཡོད་ལ། ཕྱིར་ལོག་པའི་གནས་མལ་དེ་ནི་ལན་ཀྲུག་མ་ཡིན་པར་མིང་ཚིག་གིས་མཚོན་པར་དཀའ་བའི་རྒྱང་རིང་ཞིག་ཏུ་ཕྱིར་ལོག་གིན་ཡོད་པ་འདྲ། ཕྱི་རོལ་ལམ་འགྲམ་གྱི་ཤིང་སྡོང་གི་ལོ་འདབ་ཕྱོགས་སུ་འཐོར་བར་སེར་སྣ་སྙིང་ནས་སྐྱེ་ཡང་དུས་ཚོད་ཀྱི་ཆོས་ཉིད་ལ་སུ་ཞིག་གིས་འགྱུར་བ་གཏོང་ཐུབ། དེ་བཞིན་འུ་ཅག་གི་ལས་དབང་གཏམ་རྒྱུད་ལ་སུ་ཞིག་གིས་བཟོ་བཅོས་བྱ་ཐུབ། དེ་བས་ད་ལྟ་ངའི་སེམས་ལ་རྒྱང་རིང་མང་པོ་སྐུང་ཡོད་ཅིང་། ངའི་སེམས་ཀྱི་རྒྱང་རིང་རེ་རེ་ནི་ན་ཚ་དང་སྨྲེང་བའི་རྒྱུ་རུ་འགྱུར་སྲིད་པའི་རྒྱང་རིང་རེ་རེ་ཡིན་སྲིད། བདེན་སྟེ་་་་རྒྱང་རིང་ནི་འཇིགས་ཤིང་ཡ་ང་བའི་མེ་འཁོར་བགྲོད་བཞིན་པའི་དོང་ལམ་འདི་དང་ཧ་ཅང་མཚུངས་བས་སོ།། དུས་ཚོད་མ་ངེས་པ། ཚེ་སྲོག་མ་ངེས་པ། རེ་སྙེགས་མ་ངེས་པའི་ནམ་ཟླ་འདི་ལ་ང་རང་རྒྱང་རིང་ཞིག་ཏུ་ཕྱིར་ལོག་དགོས་བྱུང་བ་ག་རེ་ཡིན། ང་རྒྱང་རིང་ལ་སྔར་བཞིན་སྐྲག་དགོས་བྱུང་བ་ག་རེ་ཡིན། རྒྱང་རིང་ནི་རྒྱང་རིང་གིས་ཀྱང་མཚོན་ཐབས་བྲལ་བའི་རྒྱང་རིང་དམིགས་བསལ་བ་ཞིག་ཡིན་པ་འདྲ། དེ་ལྟ་ནའང་ངས་རྒྱང་རིང་འདི་ཉིད་འཆར་ཡན་དང་རེ་ཆད་ཀྱི་སྒོ་ནས་ཡུན་དུ་གསོ་དགོས་བྱུང་། གློ་བུར་ཏུ་མེ་འཁོར་གྱི་ས་ཚིགས་རེ་རེ་བརྒལ་རྗེས་མཐོང་སྣང་གི་ལོ་རྒྱུས་རེ་རེ་བརྒལ་བ་དང་ཅི་འདྲའི་མཚུངས་ཨང་།
དུས་ཚོད་ཀྱི་མདའ་རྩེ་ཡང་ཡང་འཁོར་བའི་མཇུག་མཐར་ལན་ཀྲུག་ཏུ་ཐོན་སོང་། འོན་ཀྱང་དེ་ནི་བརྗེད་པར་དཀའ་བའི་དུས་ཚོད་དམིགས་བསལ་བ་ཞིག་ཡིན་ལ། རང་དབང་གི་མགོ་འཕངས་ཤིན་ཏུ་དམའ་བའི་མཚན་མོ་ཞིག་རེད། དུས་ཚུགས་འདི་ནི་ཕྱི་དྲོ་ཞིག་མ་ཡིན་ལ་ཞོགས་པ་ཞིག་ཀྱང་མ་ཡིན། དེ་བཞིན་དགུན་ཁ་ཞིག་མ་ཡིན་ལ་སྟོན་མཇུག་ཅིག་ཀྱང་ཡིན་མི་སྲིད། ཏག་ཏག་བརྗེད་པར་དཀའ་བའི་དུས་ཚིགས་འདི་ནི་སེམས་ཀྱི་རྒྱང་རིང་དུ་ལུས་པའི་མུན་པ་མཐུག་པའི་མཚན་མོ་ཞིག་རེད་ལ། རྣམ་ཤེས་སྐྱོ་བས་ཟིན་པའི་རྨི་ལམ་ནང་གི་མངོན་སུམ་ལྟ་བུ་ཞིག་རེད། ཤེས་སམ། ཞིང་གྲོང་གི་འཚོ་བ་མཛེས་ཤིང་སྡུག རྒྱང་རིང་གི་གནས་མཇལ་ཡིད་དུ་འོང་། གྲོང་ཁྱེར་གྱི་མི་རྣམས་བྲེལ་ཟིང་གིས་འཚོ་བའི་གདུང་། སྲང་ལམ་གྱི་མི་རྣམས་ང་དང་ཤིན་དུ་རྒྱང་ཐག་གིས་ཆོད་པའི་ཐོ་ཡོར་རེ་རེ་དང་ཤིན་ཏུ་མཚུངས། མེ་འཁོར་ས་ཚུགས་ནས་ཡང་ཡང་འཕྲད་སྲིད་པའི་མི་རྣམས། དོན་དུ་ཤིན་ཏུ་རྒྱང་ཐག་གིས་ཆོད་པའི་བེམ་པོ་ཁུར་བའི་རྣམ་ཤེས་སྟོང་བ་རེ་རེ་རེད་ཨང་། ད་ནི་རྒྱང་རིང་གིས་ང་ལ་ཤིན་ཏུ་བརྩེ་དུང་མེད་པའི་རྣམ་འགྱུར་སྣ་ཚོགས་བསྟན། ཤིན་ཏུ་ཞེན་པ་ལོག་པའི་བར་ཐག་གིས་ལས་དབང་སྣ་ཚོགས་བསྐྲུན། སྲང་ལམ་གྱི་གསོལ་སྟོན་འདི་ཡང་ཁ་བ་དང་སྐྱུར་བའི་རོ་བཅུད་ཕུན་སུམ་ཚོགས། སྲང་ལམ་གྱི་གཏམ་རྒྱུད་འདི་ཡང་སྐད་ཅིག་སྐད་ཅིག་ལ་འགག་སྲིད་པའི་སེམས་ཀྱི་ལོངས་སྤྱོད་ཕུན་སུམ་ཚོགས། མཐོང་བ་མེད་པའི་ཁྱོད་ཀྱི་རལ་གྲིའི་རྩེ་མོ་ཧ་ཅང་རྣོ་ཨང་། མཐོང་བ་མེད་པའི་ང་ཡི་སེམས་པ་རྨ་ཁས་ཤིན་ཏུ་གདུང་ཨང་། དེ་བས་ང་རང་ཕུགས་བསམ་གྱི་གནས་ཡུལ་དུ་བསྒྲོད་མ་ཐུབ་ལ་མཛེས་སྡུག་གི་ཉི་ཤར་དང་ཉི་ནུབ་ལ་རྒྱང་མཇལ་ཡང་བྱ་མ་ཐུབ། ད་ལྟ་ང་ཕྱིར་ཁང་སྟོང་ཞིག་ཏུ་ལོག་ནས་སྐྱེ་བ་འདི་ལ་རྒྱང་ཐག་རིང་བའི་བརྩེ་བ་མཐའ་དག་བརྗེད་པར་བྱ་བའི་སྨོན་ལམ་བཏབས་ཤིང་། རང་གི་གཉོམ་ཞིང་གཅེས་པའི་བརྩེ་བ་མ་ལུས་བེམ་པོ་ལྟ་བུའི་རྒྱང་རིང་ཞིག་ལ་མི་ཕུལ་བའི་དམ་བཅའ་བྱས། ད་ལྟ་ང་ཤིན་ཏུ་ཆུང་བའི་ཁང་མིག་ཅིག་དུ་བསྡད་དེ་ངས་ཅི་ལའང་འཁང་ར་བྱ་མི་སྲིད་ཅེས་ཡང་ཡང་བསྐྱར་ཟློས་བྱས། ཅི་ལའང་འགྱོད་གདུང་མི་བྱ་བའི་ཨམ་གཙིགས་སྙིང་ཐག་པ་ནས་བསྡམས། ད་ནས་བཟུང་རྒྱང་རིང་ནི་ངའི་མི་ཚེའི་ལས་དབང་ཙམ་ལས་སྨྲེང་བ་དང་གདུང་བ་ཉིད་ཡིན་མི་སྲིད་ལ། དེ་བཞིན་མཚན་མོ་འདིའང་གཏམ་རྒྱུད་ཙམ་ལས་དངོས་བྱུང་དང་འཚོ་བ་ཡིན་མི་སྲིད། དབུགས་རིང་ཞིག་ལྷོད་ཀྱིས་བྱས་རྗེས་ནང་སེམས་ཡང་ཡང་སྐྱོམ་པའི་གཞས་དབྱངས་ལ་ཉན་པ་ནི་ངའི་རྩོམ་པའི་འཚོ་བ་དང་ཤིན་ཏུ་འདྲའོ།། བཀྲིས་བདེ་ལེགས།
2021 8 21
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
Signature is customized by Netease