དཔེ་འཕྲིན། ལྷ་ཁང་ནང་གི་རྨི་ལམ།

ལྷ་ཁང་ནང་གི་རྨི་ལམ་རྩོམ་སྒྲིག་ཁང་།

དེབ་གསར《ལྷ་ཁང་ནང་གི་རྨི་ལམ》གྱི་འགྲེམ་བརྡ།

སྙན་དེབ་གསར་པ《ལྷ་ཁང་ནང་གི་རྨི་ལམ》པར་དུ་བསྐྲུན་ཏེ་མི་རིང་བར་བོད་ཀྱི་ས་གནས་སོ་སོའི་དཔེ་ཁང་བརྒྱུད་ནས་ཀློག་པ་པོ་དག་གི་སྤྱན་ལམ་དུ་འབུལ་རྒྱུ་ཡིན། འདི་ནི་སྒྱུ་རྩལ་རྩོམ་རིག་ལ་བློ་དཀར་བའི་དགོན་སྡེའི་ཁྲོད་ཀྱི་གྲྭ་བཙུན་ཁ་ཤས་ཤིག་གི་ཚོར་འདུ་དང་བརྩེ་བ་མངོན་སྟངས་ཤིག་ཡིན་ལ། ལོ་རབས་གསར་པ་འདིའི་དགའ་སྐྱོ་ཁུར་བའི་བོད་ཀྱི་སེར་མོ་བའི་སྒྱུ་རྩལ་སེམས་ཁམས་མཚོན་པའི་མེ་ཏོག་རྐང་ཅིག་ཀྱང་ཡིན།

《ལྷ་ཁང་ནང་གི་རྨི་ལམ》ནི་དུས་རྒྱུན་མཆོད་མེ་བོད་ཀྱི་རྩོམ་རིག་དྲ་བར་རྩོམ་བཀོད་མྱོང་མཁན་གྱི་གྲྭ་གཞོན་འགའི་སྙན་དེབ་གཅེས་བསྡུས་བྱས་པ་ཡིན་པས་ང་རང་ཁོ་ཚོའི་རྩོམ་རྩལ་ལ་ཡིད་ཆེས་ཡོད།

—སྐྱབས་ཆེན་བདེ་གྲོལ་གྱིས།

དགོན་སྡེའི་སྙན་ངག་པ་བདུན་གྱི་སྙན་དེབ་པར་སྐྲུན་བྱས་པ་འདིས་བོད་ཀྱི་དེང་རབས་སྙན་ངག་ལ་ཚོན་མདངས་གསར་བ་ཞིག་སྤྲོ་ངེས་པར་ཡིད་ཆེས་ཡོད།

—སྟག་འབུམ་རྒྱལ་གྱིས།

སྨོན་ཚིག

རླུང་གིས་ཁུར་ཟིན་པའི་ཉི་འོད་དེ་ནི།

རླུང་གིས་འཁུར་བར་གྱིས།

སྙིང་ལ་འཚང་འོང་བའི་ས་རྡུལ་དེ་ནི།

སྙིང་ལ་འཚང་བར་གྱིས།

ང་ནི་སང་ཉིན་གྱི་ལས་བཟོ་བ་ཡིན།

མུ་མཐུད་དུ་ལམ་ལ་ཆས།

—རོང་བོ་དགེ་འདུན་ལྷུན་གྲུབ་ཀྱིས།

ལྷ་ཁང་ནང་གི་རྨི་ལམ།།