སྙན་ངག་གི་ལུས་ཀྱི་དབྱེ་བ་འཇོག་སྟངས་སྐོར་གྱི་བསམ་གཞིགས་ཕྲན་བུ།
རྩོམ་པ་པོ། དཔལ་ལྡན་རྒྱ་མཚོ།
སྙན་ངག་གི་ལུས་ཀྱི་དབྱེ་བ་འཇོག་སྟངས་སྐོར་གྱི་བསམ་གཞིགས་ཕྲན་བུ།དཔལ་ལྡན་རྒྱ་མཚོ། ལི་ཐང་།
ནང་དོན་གནད་བསྡུས།
སྙན་ངག་གི་ལུས་ཀྱི་དབྱེ་བ་འཇོག་སྟངས་སྐོར་ལ་ཅུང་ཙམ་མི་མཐུན་པ་ཡོད་པས་དེའི་སྐོར་ནས་མཁས་པ་རྣམས་ཀྱིས་ཀྱང་དགག་བཞག་ཀྱང་གང་ལ་གང་འཚམས་ཤིག་མཛད་ཡོད་པ་དེར་བརྟེན་རང་གིས་ཀྱང་དེའི་སྐོར་དོགས་གཅོད་མདོར་བསྡུས་ཙམ་ཞིག་ཞུས་པ་ཡིན་ནོ། །
བརྡ་ཆད་གཙོ་བོ།
སྙན་ངག་གི་ལུས། ཚིགས་བཅད། ལྷུག་པ། རྒྱུན་ཆགས།
མཆོད་བརྗོད།
སྟོབས་བཅུའི་ཡོན་ཏན་ཁུར་གྱིས་རབ་དུད་ཅིང་། །
རྨོངས་མུན་དྲི་མ་མཐའ་དག་འབྱིན་མཛད་པ། །
མོས་ལྡན་འགྲོ་བའི་ཡིད་ཀྱི་བཅོམ་ལྡན་འདས། །
བདག་གི་མི་ཕྱེད་དད་པའི་སྤྱི་བོར་མཆོད། །
དྲི་བྲལ་མཚམས་སྤྲིན་མདངས་ཀྱིས་ཉེར་འཁྱུད་ཅིང་། །
ཐུགས་བརྩེའི་འོ་མའི་མཚོ་མོ་ཀུན་ལ་སྙོམས། །
རྨོངས་མུན་སྒྲིབ་ཚོགས་ཞི་བའི་གཉེན་པོ་སྟེ། །
མཆོག་སྤྱིན་ཤེས་རབ་འཁོར་ལོས་སྲུང་གྱུར་ཅིག །
རབ་དཀར་ཡིད་འོང་ཟླ་བའི་བཞིན་རས་ངོས། །
ཚེམས་ཕྲེང་མུ་ཏིག་གསར་བའི་སྟར་ག་མཛེས། །
སྣ་ཚོགས་སྒྱུ་མའི་རྣམ་རོལ་ཤེར་ལྷ་མོ། །
རྟག་ཏུ་ཕན་བདེ་གནང་མཛད་ཁྱོད་ལ་འདུད། །
གླེང་གཞི།
དེ་ཡང་(མདོ་དྲན་པ་ཉེར་བཞག་)ལས། "དཀོན་མཆོག་གསུམ་ལ་བསྟོད་པར་བྱའོ། ། དམ་པའི་ཆོས་ཤིན་ཏུ་གསལ་བར་བྱེད་པའི་སྙན་དངགས་བྱའོ། ། དེ་ལས་མྱ་ངན་ལས་འདས་པའི་མཐར་ཐུག་པར་འགྱུར་རོ། །„ ཞེས་སྙན་ངག་ལ་སྦྱངས་བའི་ཉིང་དགོས་སམ་འབྲས་བུ་བསྟན་པ་དང་། གཞན་ཡང་(མདོ་སྡེ་སྐལ་བཟང་)ལས། "དེ་བཞིན་གཤེགས་པ་དུས་མཁྱེན་རྒྱལ་པོ་ནི། ། སྙན་ངག་མཁན་ཚེ་བདེ་གཤེགས་རྩྭ་མཆོག་ལ། ། ཚིགས་སུ་བཅད་པའི་དབྱངས་ཀྱིས་བསྟོད་ནས་ཀྱང་། ། དང་པོར་བྱང་ཆུབ་ཏུ་ནི་སེམས་བསྐྱེད་དོ། །„ ཅེས་གསུངས་པ་ལྟར། དང་བ་དང་འདོད་པའི་དད་པས་ཀུན་ནས་བསླངས་ཏེ། ཡུལ་དམ་པ་དཀོན་མཆོག་རིན་པོ་ཆེ་རྣམ་པ་གསུམ་ལྟ་བུ་ལ་སྙན་ངག་གིས་བསྔགས་པའམ་བསྟོད་པ་བྱས་པས་བསྐལ་བ་མང་པོར་ཚོགས་བསགས་པ་དང་། བྱང་ཆུབ་ཀྱི་སེམས་རིན་པོ་ཆེའི་ས་འོན་ལེགས་པར་བསྐྲུན་པ་སོགས་ཀྱི་ཆེ་བ་བསྟན་པ་ཡིན། (སྙན་ངག་མེ་ལོང་མ་)ལས་ཀྱང་། རང་བཞིན་གྱིས་གྲུབ་སྤོབས་པ་དང་། ། མང་དུ་ཐོས་པ་དྲི་མེད་དང་། ། མངོན་པར་སྦྱོར་བ་མི་དམན་པ། ། སྙན་ངག་ཕུན་སུམ་ཚོགས་པའི་རྒྱུ། ། ཞེས་པ་ནས། སྙན་ངག་ཆུང་ངུ་ལ་ཡང་ངལ་བྱས་མི། ། མཁས་པའི་མདུན་ས་དག་ཏུ་འདུག་ལ་དབང་། ། ཞེས་པའི་བར་དུ་སྐྱེས་སྟོབས་ཀྱི་ཤེས་རབ་དང་། རིག་པའི་གནས་སྤྱི་དང་བྱེ་བྲག་སྙན་ངག་གི་གླེགས་བམ་མང་དུ་ཐོས་པ་དང་། མཁས་པ་དག་གིས་སྙན་ངག་ཕུན་སུམ་ཚོགས་པ་བདེ་བླག་ཏུ་འགྲུབ་པ་དང་། སྙན་ངག་ཤེས་ན་མཁས་པའི་མདུན་ས་ནས་གླེང་མོལ་ཆོག་པའི་ཐོབ་ཐང་སོགས་བསྟན་པ་ཡིན། དེས་ན་སྙན་ངག་ནི་མཁས་པ་སྤྱི་དང་བྱེ་བྲག་སུ་ལ་ཡང་ཡོད་ན་དེས་ཆོག་དང་། མེད་ན་ཐབས་ཆག་ལྟ་བུ་ཞིག་ཡིན་པ་འདི་དག་གིས་གཙོ་བོ་དཔོག་ཐུབ་པ་ཡིན། ད་ནི་སྙན་ངག་གི་ལུས་ཀྱི་དབྱེ་བ་འཇོག་སྟངས་སྐོར་ལ་བསམ་གཞིགས་ཕྲན་ཙམ་བགྱི་ན། སྙན་ངག་གི་ལུས་ཀྱི་རྣམ་བཞག་མདོར་བསྟན་པ་དང་། དེའི་དབྱེ་བ་རྒྱས་པར་སྤྲོ་བ། མཐའ་དཔྱད་ཀྱིས་མཇུག་བསྡུ་བ་གསུམ་ལས།
དང་པོ་ནི།
སྙན་ངག་མེ་ལོང་མ་ལས། “ལུས་ནི་རེ་ཞིག་འདོད་པ་ཡི། ། དོན་གྱི་རྣམ་བཅད་ཚིག་གི་ཕྲེང་། །„ ཞེས་པས་སྙན་ངག་གི་ལུས་ཀྱི་ངོ་བོ་བསྟན་པ་ཡིན་ཏེ། ལུས་ནི་ཞེས་པའི་ནི་སྒྲ་ནི་ལུས་ངེས་གཟུང་གི་དོན་དུ་འཇུག་ཅིང་། རེ་ཞིག་ཅེས་པས་རྩོམ་པའི་སྐབས་སམ་དུས་བསྟན་པ་ཡིན། དོན་གྱི་རྣམ་བཅད་ཅེས་པས་དོན་དང་དོན་མ་ཡིན་པ་ལ་བླང་དོར་ཚུལ་བཞིན་དུ་བྱེད་དགོས་པའི་དོན་བསྟན་པ་དང་། ཚིག་གི་ཕྲེང་ཞེས་པ་ནི་སྙན་ངག་གི་བསྟན་བཅོས་རྣམས་དང་མི་འགལ་བའམ་མིང་ཚིག་ཡི་གེ་ཚོགས་པའི་རྗོད་བྱེད་ཀྱི་ཚིག་གི་ཕྲེང་བ་བསྡེབས་པ་ལ་གོ་དགོས་པ་ཡིན། སྙན་ངག་གི་བསྟན་བཅོས་རྣམས་དང་མི་འགལ་བ་ཞེས་པས་ནི། ངག་ཚིག་སྔ་ཕྱི་ལ་འབྲེལ་བ་མེད་པ་དང་། ཚིག་དོན་སྔ་ཕྱི་འགལ་བ་དང་། ཚིག་ལ་བསྐྱར་ཟློས་མང་བ་དང་། ལུང་རིགས་དང་འགལ་བ་སོགས་ཀྱི་སྐྱོན་དང་བྲལ་དགོས་པའི་དོན་བསྟན་པ་ཡིན་ནོ། ། (ཀུན་མཁྱེན་མི་ཕམ་རྒྱ་མཚོས་)མཛད་པའི་(སྙན་འགྲེལ་དབྱངས་ཅན་དགྱེས་པའི་རོལ་མཚོ་)ལས། “ སྙན་ངག་གི་ལུས་ནི་རེ་ཞིག་ཅེས་རྩོམ་པའི་སྐབས་དེར། རང་གིས་གང་བརྗོད་བྱར་འདོད་པ་ཡི་དོན་གྱི་རྣམ་པར་བཅད་པའམ་ཁྱད་པར་དུ་བྱས་པའི་ཚིག་གི་ཕྲེང་བའམ་ངག་གི་རྒྱུན་དེ་ཉིད་ལ་འདོད་དོ། ། „ ཅེས་དང་། (ཟུར་མཁར་བློ་གྲོས་རྒྱལ་པོས་)མཛད་པའི་(སྙན་ངག་མེ་ལོང་འཆད་པ་ལ་ཉེར་འཁོའི་ལེགས་བཤད་མཁས་པའི་མགྲིན་རྒྱན་)ལས། "སྨྲ་བ་པོའི་བརྗོད་འདོད་ཀྱི་ཀུན་ནས་བླངས་བའི་དོན་སྙན་ངག་གི་བསྟན་བཅོས་ནས་འབྱུང་བའི་ལུགས་ལྟར་བརྗོད་བྱ་མ་ཡིན་པ་རྣམ་པར་བཅད་པའི་ཚིག་གི་ཕྲེང་བར་སྤེལ་བ་ཞེས་རྒྱ་གར་གྱི་སློབ་དཔོན་ཚད་མར་གྱུར་པ་རྣམས་ཀྱིས་བཤད་ཅིང་།„ ཞེས་སོགས་གསུངས་པ་ཡིན་ནོ། །
གཉིས་པ་ནི།
(སྙན་ངག་མེ་ལོང་མ་)ལས། "དེ་ཡང་ཚིགས་བཅད་ལྷུག་པ་དང་། ། སྤེལ་མ་རྣམ་གསུམ་ཉིད་དུ་གནས། །„ ཞེས་གསུངས་པ་ལྟར། སྙན་ངག་གི་ལུས་ལ་དབྱེ་ན། ཚིགས་བཅད་དང་། ལྷུག་པ་དང་། སྤེལ་མ་སྟེ་རྣམ་པ་གསུམ་ལས། དང་པོ་ཚིགས་བཅད་ནི། ཚིག་གི་རྐང་བ་བཞིར་བཅད་ཅིང་། ཚིག་གི་རྐང་བ་བཞི་ཚོགས་པའི་ངག་གི་རྒྱུན་ནམ་ཚིག་གི་ཕྲེང་བ་ལ་གོ་དགོས་པ་ཡིན་ཏེ། དེ་ཡང་(མེ་ལོང་མ་)ལས། "ཚིགས་བཅད་རྐང་བཞི་་་་། །„ ཞེས་པ་འདི་བྱུང་བ་ཡིན། དེ་བཞིན་དུ་ཕྱིས་སུ་འགྲེལ་བ་ཁག་ལས་ཀྱང་ཚིགས་བཅད་ལ་རྐང་པ་བཞིར་འཆད་པའི་ཚིག་མང་དུ་བྱུང་སྟེ། (པཎ་ཆེན་ངག་དབང་ཆོས་གྲགས་)ཀྱིས་མཛད་པའི་(མེ་ལོང་གི་བསྟན་བཅོས་རྣམ་པར་བཤད་པའི་གསུང་སྒྲོས་ལེགས་པར་བཤད་པ་རིན་པོ་ཆེའི་མཛོད་ལས་ལུས་རྣམ་པར་བཤད་པའི་སྐབས་)ལས། "སྡེབ་སྦྱོར་སྙན་ངག་གི་ལུགས་ལ་ཚིགས་སུ་བཅད་པ་ནི་གཙོ་བོར་རྐང་པ་བཞི་པ་ཅན་ཡིན་ཏེ།„ ཞེས་དང་། དེ་བཞིན་དུ་(འབྲུག་ཀུན་མཁྱེན་པདྨ་དཀར་པོ་)ཡིས་མཛད་པའི་(སྙན་དངགས་མེ་ལོང་ལས་ལམ་རྣམ་པར་དབྱེ་བའི་རྣམ་པར་བཅད་པ་དང་པོའི་འགྲེལ་བ་)ལས་ཀྱང་། "ཚིགས་བཅད་ལུང་ལས་རྐང་པ་གཅིག་པ་ལ་སོགས་པ་གསུངས་ཀྱང་། སྙན་དངགས་མཁན་རང་ལུགས་དེ་ལྟར་མི་འདོད་པར་རྐང་པ་བཞིར་ལོངས་པའོ། །„ ཞེས་སོགས་གསུངས་པའོ། ། འདི་ཡང་སྙན་ངག་གི་གཞུང་ཁག་དང་སྙན་ངག་མཁན་རང་ལུགས་ལ་དམིགས་བསལ་འཆད་དགོས་པ་ཞིག་ཡིན་པ་ལས་སྤྱིར་ནི་ངེས་པ་མེད་དེ། ཀྱེ་བྲམ་ཟེ་ཆུ་ལ་ཇི་ཙམ་ཞིག ། ཅེས་དྲིས་པ་ལ། མི་བདག་ཆུ་ལ་བུས་ནུབ་ཙམ། ། ཞེས་ཚིགས་བཅད་གཅིག་གིས་ལན་བཏབ་པར་བཤད་པ་དང་། མངོན་པ་ཀུན་ལས་བཏུས་པ་ལས་ཀྱང་། ཚིགས་བཅད་ལ་རྐང་པ་གཅིག་པ་ནས་དྲུག་པའི་བར་དུ་བཤད་པ་ཡིན་ཏེ། (ཀུན་མཁྱེན་མི་ཕམ་རྒྱ་མཚོས་)མཛད་པའི་(སྙན་དངགས་མེ་ལོང་གི་འགྲེལ་པ་དབྱངས་ཅན་དགྱེས་པའི་རོལ་མཚོ་)ལས། "གཞན་ལས་ཚིགས་བཅད་ལ་རྐང་པ་གཅིག་ནས་དྲུག་གི་བར་བཤད་པ་ཡང་ཡོད་དོ། །„ ཅེས་གསུངས་སོ། ། ཚིགས་བཅད་དེ་ལ་དབྱེ་ན་སྡེབ་སྦྱོར་གྱི་སྒོ་ནས་གཉིས་སུ་དབྱེ་བ་དང་། སྦྱོར་ཚུལ་གྱི་སྒོ་ནས་བཞིར་དབྱེ་བ་ཡོད་དོ། ། འོན་ཏེ་སྔ་མ་ནི་བོད་ལ་སྤྱོད་སྒོ་དེ་ཙམ་མེད་པར་སྣང་ངོ་། ། དབྱེ་བ་དེ་ཉིད་འཆད་པར་འདོད་ནས། (མེ་ལོང་མ་)ལས། "་་་་དེ་ཡང་ནི། པྲྀཏྟ་ཛཱ་ཏི་ཞེས་རྣམ་གཉིས། །„ ཞེས་པ་ནས། "གྲོལ་བ་དང་ནི་རིགས་དང་མཛོད། ། འདུས་པ་ཞེས་བྱ་དེ་འདྲ་ཡི། །„ ཞེས་པའི་བར་གྱི་རྩ་བ་དེ་བྱུང་བ་ཡིན་ནོ། ། དེས་ན་རེ་ཞིག་སྨྲ་བ་པོའི་བརྗོད་འདོད་ཀྱི་ཀུན་ནས་བསླངས་པའི་དོན་ཅན་གྱི་བརྗོད་བྱ་གང་ཞིག ། རྐང་བ་བཞིར་བཅད་ཅིང་། རྐང་བ་བཞི་ཚོགས་པའི་ངག་གི་རྒྱུན་ནམ་ཚིག་གི་ཕྲེང་བ་ལ་ཚིགས་བཅད་ཅེས་ཟེར་རོ། །
གཉིས་པ་ཚིག་ལྷུག་ནི། རྐང་བ་མེད་པའི་ཚིག་གི་རྒྱུན་ཞིག་ལ་གོ་དགོས་པ་ཡིན་ཏེ། (མེ་ལོང་མ་)ལས། "རྐང་པ་མེད་པའི་ཚིག་རྒྱུན་ནི། ། ལྷུག་པ་་་་་་་། །„ཞེས་པའི་ཚིག་རྐང་གཅིག་དང་ཕྱེད་དེ་བྱུང་བ་ཡིན་ནོ། ། དེས་ན་རྐང་པ་མེད་པ་ཞེས་པས་ནི། རྐང་པ་བཞིར་ངེས་མི་དགོས་པ་དང་། ཚེག་བར་མང་ཉུང་གྲངས་མཉམ་མི་དགོས་པ་དང་། ཚིག་རྐང་རིང་ཐུང་དོ་མཉམ་མི་དགོས་པར་བསྟན་པ་ཡིན་ཞིང་། ཚིག་རྒྱུན་ཞེས་པ་ནི་ངག་གི་རྒྱུན་ཞེས་པ་དང་གཅིག་པར་སྣང་སྟེ། མིང་ཚིག་ཡི་གེ་ཚོགས་པའི་ཚིག་གི་ཕྲེང་བ་བར་མ་ཆད་པ་ཞིག་ལ་གོ་དགོས་པ་ཡིན་ནོ། ། དེས་ན་སྙན་འགྲེལ་ཁག་ལས་ཀྱང་ལྷུག་པ་ལ་རྐང་པ་མེད་པ་ཞེས་བཞེད་པ་ཡིན་ཏེ། (ཟུར་མཁར་བློ་གྲོས་རྒྱལ་པོས་)མཛད་པའི་(སྙན་ངག་མེ་ལོང་འཆད་པ་ལ་ཉེར་འཁོའི་ལེགས་བཤད་མཁས་པའི་མགྲིན་རྒྱན་)ལས། "རྐང་པ་མེད་པའི་ཚིག་རྒྱུན་ནི་ལྷུག་པ་ཞེས་འབྱུང་བས་རྐང་པར་མ་བཅད་པའི་ཚིག་གི་རྒྱུན་སྙན་ངག་གི་བརྡ་བཞག་པ་གང་ཡིན་པ་དེ་ལ་ལྷུག་པ་ཞེས་བརྟགས་ནས་དེ་ལ་འགའ་ཞིག་གིས་བཞེད་པ་ལ།„ ཞེས་དང་། (རྣམ་གླིང་པཎ་ཆེན་དཀོན་མཆོག་ཆོས་གྲགས་)ཀྱིས་མཛད་པའི་(སྙན་ངག་མེ་ལོང་གི་བསྡུས་དོན་འཆད་ཐབས་དང་བཅས་པ་རིན་ཆེན་དོ་ཤལ་མཁས་རྣམས་དགའ་བསྐྱེད་སྣང་བྱེད་ཟླ་གསར་)ལས། "གཉིས་པ་ལྷུག་པ་ལ་གསུམ་པ། རྐང་བ་མེད་པའི་ཚིག་རྒྱུན་ནི། །„ ཞེས་སོགས་གསུངས་པའོ། ། ལྷུག་པ་ལ་དབྱེ་ན་རྣམ་པ་གཉིས་ཡོད་དེ། བརྗོད་པ་དང་གཏམ་གཉིས་སོ། ། དེ་ཉིད་འཆད་པ་ལ། (མེ་ལོང་མ་)ལས། "ལྷུག་པ་བརྗོད་པ་ངག་དང་གཏམ། ། ཞེས་པ་དེ་ཡི་རབ་དབྱེ་གཉིས། །„ ཞེས་པའི་ཚིག་དེ་བྱུང་བ་ཡིན་ནོ། ། དེས་ན་རེ་ཞིག་སྨྲ་བ་པོའི་བརྗོད་འདོད་ཀྱི་ཀུན་ནས་བསླངས་པའི་དོན་ཅན་གྱི་བརྗོད་བྱ་གང་ཞིག ། རྐང་པ་མེད་པའི་ཚིག་གི་རྒྱུན་དུ་བསྡེབས་པ་ལ་ལྷུག་པ་ཟེར་ན་ལེགས་སམ་སྙམ་མོ། །
གསུམ་པ་སྤེལ་མ་ནི། ཟློས་གར་དང་། རྩ་འགྲེལ་སྦྲགས་མ་བྱས་པའི་བསྟན་བཅོས་རྣམས་དང་། སྐྱེས་རབས་སོགས་ལ་བྱེད་པ་ཡིན་ཏེ། དེ་ཉིད་འཆད་པ་ལ། (མེ་ལོང་མ་)ལས། "སྤེལ་མ་ཟློས་གར་ལ་སོགས་ཏེ། ། དེ་དག་རྣམས་ནི་གཞན་ན་རྒྱས། ། ལྷུག་པ་ཚིགས་བཅད་རང་བཞིན་གང་། ། ཙམ་བུ་ཞེས་པ་མངོན་པར་བརྗོད། །„ ཞེས་པའི་ཚིགས་བཅད་དེ་བྱུང་བ་ཡིན་ནོ། །
གསུམ་པ་ནི།
(སྙན་ངག་མེ་ལོང་མ་)ལས། "དེ་ཡང་ཚིགས་བཅད་ལྷུག་པ་དང་། ། སྤེལ་མ་རྣམ་གསུམ་ཉིད་དུ་གནས། །„ ཞེས་པས་གོང་དུ་བཤད་པ་ལྟར་སྙན་ངག་གི་ལུས་ཀྱི་དབྱེ་བ་འཆད་པ་ཡིན་མོད། འདིར་དེ་དང་ཆ་འདྲ་བར་ཆོས་ཀྱི་རྒྱལ་པོ་(འཇམ་མགོན་ས་སྐྱ་པཎྜི་ཏ་)ཆེན་པོས་མཛད་པའི་(སྡེབ་སྦྱོར་མེ་ཏོག་ཆུན་པོ་)ལས། "ཚིགས་སུ་བཅད་དང་རྐྱང་པ་དང་། ། རྒྱུན་ཆགས་ཞེས་བྱ་རྣམ་པ་གསུམ། ། ཚིག་གི་སྦྱོར་བ་བྱེད་འདོད་པའི། ། མཁས་པ་རྣམས་ཀྱི་འཇུག་ངོགས་ཡིན། །„ ཞེས་དང་། (འགྲེལ་བའི་ནང་དུ་ཡང་།) "རྒྱུན་ཆགས་པ་དེའང་གཉིས་ཏེ། རྒྱུན་ཆགས་བཅད་པ་དང་མ་བཅད་པའོ། ། དེ་ལ་རྒྱུན་ཆགས་བཅད་པ་ནི་འདིར་ཚིགས་སུ་བཅད་པའི་བྱེ་བྲག་ཡིན་པས་ཚིགས་སུ་བཅད་པ་ཉིད་ཀྱི་ནང་དུ་བཤད་པར་བྱའོ། ། རྒྱུན་ཆགས་མ་བཅད་པ་ནི། སྡེབ་སྦྱོར་གྱི་མཚན་ཉིད་ལྕི་ཡང་ལ་སོགས་པས་ཕྱེ་ལ། བྱ་བ་སྟོན་པའི་སྒྲ་ཡོད་པ། རྐང་པ་བཞིར་མ་བཅད་པ་སྟེ། དེ་སྐད་དུ་ཡང་། སྡེབ་སྦྱོར་གྱི་ཚོམས་ལས། རྐང་བ་དག་གིས་མ་བཅད་པ། ། གང་ལ་ཡི་གེ་སྦྲེལ་ལེགས་ཡོད། ། བྱ་བའི་ཚིག་གིས་གསལ་བྱས་པ། ། དེ་ནི་རྒྱུན་ཆགས་ལས་གཞན་མིན། ། ཞེས་འདོན་པའི་ཕྱིར་རོ། །„ ཞེས་དང་། (ས་པཎ་མཁས་འཇུག་ལས།) རྒྱུན་ཆགས་མ་བཅད་པ་ནི་སྡེབ་སྦྱོར་རྒྱུན་ཆགས་དང་འདྲ་ལ།„ ཞེས་གསུངས་པ་རྣམས་ལ་མཁས་པ་ཁ་ཅིག་གིས། སྙན་ངག་གི་ལུས་ཀྱི་དབྱེ་བ་བཞེད་སྟངས་འདི་ནི་ཆེས་མི་རིགས་ཏེ། ཚིགས་བཅད་ལས་གཞན་རྒྱུན་ཆགས་མེད་པའི་ཕྱིར། ། རྒྱུན་ཆགས་ཟུར་དུ་འབྱེད་པ་ཤིན་ཏུ་འཁྲུལ། ། ཞེས་རྒྱུན་ཆགས་ཟེར་བ་ནི་ཚིགས་བཅད་ལས་གཞན་མེད་པས་སྙན་ངག་གི་ལུས་གསུམ་པར་མི་རུང་པར་བསྟན་པ་དང་། དེ་ལྟར་ཡིན་ན་སྡེབ་སྦྱོར་རིན་ཆེན་འབྱུང་གནས་དང་མེ་ལོང་མ་སོགས་དང་འགལ་བ་དང་། ལྷག་ཏུ་སྡེབ་སྦྱོར་མེ་ཏོག་ཆུན་པོ་དང་མཁས་འཇུག་གཉིས་ཀྱང་ནང་འགལ་ཡོད་པར་གསུངས་སྟེ་སྐྱོན་བརྗོད་པ་ཡིན། དེ་དག་ནི་དཔྱད་པར་བྱ་བའི་གཞི་ཆེས་ཆེར་སྣང་མོད། ཚང་མ་མཁས་པའི་གསུང་ཡིན་པས་ཁྱད་ཆོས་དང་གོ་བ་དམིགས་བསལ་བ་རེ་ཡོད་པས་མཐའ་གཅིག་ཏུ་དགག་པ་ནི་ཁོ་བོས་མི་ཕོད་དོ། ། ཡིན་ན་ཡང་རང་གི་རྨོངས་བློར་ཤར་ཚོད་ཀྱིས་དེ་ལ་དོགས་གཅོད་མདོ་ཙམ་ཞུས་ན། ས་པཎ་གྱིས་སྡེབ་སྦྱོར་མེ་ཏོག་ཆུན་པོར། རྒྱུན་ཆགས་ལ་ཚིག་རྐང་བཅད་མ་བཅད་གཉིས་ཀྱི་ཆ་ཡོད་པ་དང་། ཚིག་ལྷུག་པའི་རང་བཞིན་ཅན་ལ་ཡང་ཡི་གེ་ལྕི་ཡང་གི་རྟགས་འགོད་པར་གསུངས་པ་དང་། ཡང་མཁས་འཇུག་ཏུ། རྒྱུན་ཆགས་མ་བཅད་པ་དེ་ཡང་སྡེབ་སྦྱོར་རྒྱུན་ཆགས་དང་འདྲ་བ་བཤད་པ་གཉིས་པོ་དེ་སྡེབ་སྦྱོར་རིན་ཆེན་འབྱུང་གནས་དང་། སྙན་ངག་མེ་ལོང་མ་སོགས་ཀྱི་དགོངས་དོན་གཞིར་བཞག་སྟེ་བཤད་པ་དང་། ཡོངས་གྲགས་ཀྱི་སྡེབ་སྦྱོར་ལ་གོ་བ་ཡིན་ན་ནི། སྡེབ་སྦྱོར་གྱི་གཞུང་གཞན་དང་ས་པཎ་རང་གི་གཞུང་གཉིས་པོ་ལ་ཡང་འགལ་བ་ཡོད་དེ། དེ་ལ་སྐྱོན་བརྗོད་པ་གནད་དུ་འགྲོ་བ་ཡིན་ནོ། ། ཡིན་ན་ཡང་ས་པཎ་གྱིས་སྡེབ་སྦྱོར་མེ་ཏོག་ཆུན་པོར་རྒྱུན་ཆགས་ལ་བཅད་མ་བཅད་གཉིས་ཀྱི་ཆ་ཡོད་ཅེས་གསུངས་པ་ནི། སྤྱིར་རྒྱ་གར་ན་རྒྱུན་ཆགས་མ་བཅད་པ་ཞིག་འབྲི་སྲོལ་ཡོད་པ་དེའི་དབང་དུ་བྱས་པ་ཡིན་ཏེ། (སྡེབ་སྦྱོར་མེ་ཏོག་ཆུན་པོ་རང་གི་གཞུང་དུའང་།) "འདི་ལྟ་བུའི་སྡེབ་སྦྱོར་ནི་དེང་སང་རྒྱ་གར་ན་སྡེབ་སྦྱོར་བ་ཆེས་ཆེ་བ་མང་དུ་ཐོས་པ་འགའ་ཞིག་ལ་གྲགས་པ་ཙམ་དུ་ཟད་ཀྱི། ཐམས་ཅད་ལ་གྲགས་པ་མ་ཡིན་ལ། སྦྱོར་བའང་ཆེས་ཤིན་ཏུ་ཉུང་བར་སྣང་ངོ་། །„ ཞེས་དང་། "འདིར་སྐབས་མ་ཡིན་པས་རྣམ་པར་དབྱེ་བར་མ་བྱས་སོ། །„ ཞེས་དང་། (ཁམས་འགྲེལ་དུ་སི་ཏུའི་ལུང་དྲངས་པར།) "ཤིན་ཏུ་གྲགས་ཆུང་ཞིང་སྦྱོར་བ་ཉུང་བ་མ་གཏོགས། དཎ་ཊ་ཀར་གྲགས་པའི་སྡེབ་སྦྱོར་རྒྱུན་ཆགས་མ་བཅད་པ་ཞིག་རྒྱ་གར་ནའང་ཡོད་པ་ཡིན་འདུག་ཀྱང་། གཞུང་འདི་དང་སྡེབ་སྦྱོར་རིན་འབྱུང་སོགས་ལ་ནི་བསྒྲིག་ཏུ་མེད།„ཅེས་སོགས་གསུངས་སོ། ། དེས་ན་སྡེབ་སྦྱོར་མེ་ཏོག་ཆུན་པོར་རྒྱུན་ཆགས་ལ་བཅད་མ་བཅད་གཉིས་ཀྱི་ཆ་ཡོད་པ་དེ་རྒྱ་གར་གྱི་སྡེབ་སྦྱོར་བ་ཁ་ཅིག་གི་ལུགས་དང་། ཡང་གཞུང་དེ་དང་མཁས་འཇུག་ཏུ་རྒྱུན་ཆགས་ལ་རྐང་བས་གཅོད་དགོས་པར་གསུངས་པ་ནི་ཡོངས་སུ་གྲགས་པའི་སྡེབ་སྦྱོར་གྱི་ལུགས་ལྟར་བྱས་པ་ཡིན་ནམ་སྙམ་མོ། ། ཡོངས་སུ་གྲགས་པའི་རྒྱུན་ཆགས་ནི་ཚིགས་བཅད་ཁོ་ནར་གོ་དགོས་པ་ཡིན་ཏེ། དེ་ལྟར་ཡང་(འཇམ་དཔལ་རྩ་རྒྱུད་)ལས། "ཚིགས་བཅད་རྒྱུན་ཆགས་ཆ་དག་ནི། ། ཚིགས་བཅད་ཚིགས་སུ་བཅད་པ་ཡིན། །„ ཞེས་དང་། (སྡེབ་སྦྱོར་རིན་ཆེན་འབྱུང་གནས་ཀྱི་འགྲེལ་བ་)ལས། "རྒྱུན་ཆགས་དང་རབ་བསགས་སོགས་ཀྱང་ཚིགས་བཅད་རྐང་པ་རིང་པོ་ཉིད་ཡིན་ནོ། །„ ཞེས་དང་། (དཔང་ལོ་ཙཱ་བ་བློ་གྲོས་བརྟན་པས་)མཛད་པའི་(སྙན་ངག་མེ་ལོང་གི་རྒྱ་ཆེར་འགྲེལ་པ་གཞུང་དོན་གསལ་བ་)ལས་ཀྱང་། "དེས་ན་རྒྱུན་ཆགས་དང་རབ་བསགས་དག་ཀྱང་ཚིགས་བཅད་རྐང་པ་རིང་པོ་ཉིད་ཡིན་ནོ། །„ ཞེས་སོགས་གསུངས་པའི་ལུང་གིས་གྲུབ་བོ། ། གཞན་ཡང་མཁས་པ་ཁ་ཅིག་གིས། ས་པཎ་གྱིས་ཚིགས་བཅད་ལ་རྐང་པ་བཞིར་ངེས་མི་དགོས་པའི་སྒྲུབ་བྱེད་དུ། (མངོན་པ་ཀུན་ལས་བཏུས་པ་)ལས། "ཚིགས་སུ་བཅད་པ་ནི་རྐྱང་བ་དང་། གཉིས་པ་དང་། གསུམ་པ་དང་། བཞི་བ་དང་། ལྔ་བ་དང་། དྲུག་པ་རྣམས་སུ་ཡོད་དོ། །„ ཅེས་པའི་ལུང་དྲངས་པར། དེ་ནི་ཞྭ་དཔེ་ལྷམ་འགེབ་ཀྱི་དཔེ་ཁོ་ནར་ཟད་དེ། གང་ཡང་རྐང་བས་མ་བཅད་ལྷུག་པ་ལ། ། སྡེབ་སྦྱོར་པྲཱསྟ་མི་འབྱུང་ཚིགས་བཅད་ལ། ། རྐང་བཞི་མི་དགོས་མངོན་པས་རྒྱས་འགེབ་པ། ། ཞྭ་དཔེ་ལྷམ་ལ་འགེབ་པ་ཁོ་ནར་ཟད། ། ཅེས་མི་འཐད་པའི་ཚུལ་བསྒྲུབས་ཀྱང་། དེ་ཉིད་སྙན་ངག་རང་གཞུང་ནས་བཤད་པའི་ཚིགས་བཅད་ལ་རྐང་བ་བཞིར་ངེས་མི་དགོས་པའི་སྒྲུབ་བྱེད་དུ་བཀོད་པ་ཡིན་ན་སྐྱོན་དེ་འཇུག་པ་ཡིན་ཡང་། སྤྱིར་བཏང་ཚིགས་བཅད་ལ་རྐང་པ་བཞིར་ངེས་མི་དགོས་པའི་སྒྲུབ་བྱེད་དུ་བཀོད་པ་ཡིན་པས་སྐྱོན་མེད་དམ་སྙམ་མོ། ། སྙན་ངག་པའི་ལུགས་ལ་ཚིགས་བཅད་ལ་རྐང་བ་བཞིར་ངེས་དགོས་པ་ནི་ (སྡེབ་སྦྱོར་རིན་ཆེན་འབྱུང་གནས་ཀྱི་འགྲེལ་བ་)ལས། "དེས་ན་སྙན་ངག་པའི་ལུགས་ལ་ཚིགས་བཅད་ལ་རྐང་བཞིས་ཁྱབ་པའི་ཕྱིར།„ ཞེས་དང་། (ཀུན་མཁྱེན་མི་ཕམ་རྒྱ་མཚོས་)མཛད་པའི་(སྙན་འགྲེལ་དབྱངས་ཅན་དགྱེས་པའི་རོལ་མཚོ་)ལས། "དང་པོ་ཚིགས་བཅད་ནི་རྐང་པ་དྲུག་ནས་ཉེར་བདུན་ལྟ་བུའི་བར་གྱི་ཡི་གེ་རྣམས། རྐང་པ་བཞི་ཀ་ལ་འདྲ་བར་གྱུར་པ་ཅན་ཡིན་བར་སྙན་ངག་གི་ལུགས་འདིར་འདོད་དོ། ། ཅེས་སོགས་གསུངས་པའོ། །
སླར་སྨྲས་པ།
འདི་ལྟར་དཔྱད་པའི་བློ་མིག་ཕྲ་མོ་ཡིས། །
ཅུང་ཟད་བརྟགས་པ་འདིས་ཀྱང་བླ་མ་མཆོག །
མི་འཇིགས་གདོང་ལྔས་སྟེགས་པའི་རིན་ཆེན་ཁྲིར། །
འགྱུར་མེད་རྡོ་རྗེའི་ཁམས་སུ་ཞབས་བརྟན་ཤོག །
འདིས་མཚོན་དགེ་ཚོགས་བདུད་རྩིའི་ཟེགས་མ་ཡིས། །
རིས་མེད་འགྲོ་བའི་སེམས་རྒྱུད་བརླན་ནས་སུ། །
གནས་སྐབས་བདེ་སྐྱིད་དཔལ་གྱིས་ལེགས་འཚོ་ཞིང་། །
མཐར་ཐུག་བདེ་ཆེན་ཞིང་དུ་སྐྱེ་གྱུར་ཅིག །
ཅེས་༢༠༢༥ལོའི་བོད་ཟླ་བ་༧པའི་ཚེས་༡༢ཉིན་རང་གནས་ཡ་ཆེན་ཨོ་རྒྱན་བསམ་གཏན་གླིང་གི་དགེ་འདུན་འདུས་པའི་སྡེ་ཡི་གྲལ་མཐར་འཁོད་པ་དཔལ་ལྡན་རྒྱ་མཚོ་རུ་འབོད་པ་དེས་ཆོས་ཉིད་འོད་གསལ་གླིང་ནས་མཇུག་གྲུབ་པར་བྱས་པ་འདིས་ཀྱང་དཔལ་ལྡན་བླ་མ་དང་ཚེ་རབས་ཀུན་ཏུ་འབྲལ་བ་མེད་པར་ཤོག་ཅིག་གུ། དགེའོ། །
འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། སྡེ་དགེ་བཀའ་འགྱུར། ༼ཀ༽ མདོ་སྡེ། དེབ་གྲངས། ༢༩༤
འཕགས་པ་དམ་པའི་ཆོས་དྲན་པ་ཉེ་བར་གཞག་པ། སྡེ་དགེ་བཀའ་འགྱུར། ༼ལ།༽ མདོ་སྡེ། དེབ་གྲངས། ༡༧༠
སྙན་ངག་མེ་ལོང་། སྡེ་དགེ་བསྟན་འགྱུར། ༼སེ།༽ སྒྲ་མདོ། དེབ་གྲངས། ༣༢༢
སྙན་ངག་མེ་ལོང་། སྡེ་དགེ་བསྟན་འགྱུར། ༼སེ།༽ སྒྲ་མདོ། དེབ་གྲངས། དེབ་གྲངས། ༣༡༨
སྙན་དངགས་མེ་ལོང་གི་འགྲེལ་པ་དབྱངས་ཅན་དགྱེས་པའི་རོལ་མཚོ་ཞེས་བྱ་བ། འཇུ་མི་ཕམ་གྱི་གསུང་འབུམ། ༼ཤྲཱིཿ༽ དེབ་གྲངས། ༡༠
སྙན་ངག་མེ་ལོང་འཆད་པ་ལ་ཉེར་འཁོའི་ལེགས་བཤད་མཁས་པའི་མགྲིན་རྒྱན། སྙན་འགྲེལ་དཔེ་དཀོན་གཅེས་བཏུས། ༼པོད་བཅུ་པ།༽ ཤོག་ངོས། ༦
མེ་ལོང་གི་བསྟན་བཅོས་རྣམ་པར་བཤད་པའི་གསུང་སྒྲོས་ལེགས་པར་བཤད་པ་རིན་པོ་ཆེའི་མཛོད་ལས་ལུས་རྣམ་པར་བཤད་པའི་སྐབས། སྙན་འགྲེལ་དཔེ་དཀོན་གཅེས་བཏུས། ༼པོད་ལྔ་པ།༽ ཤོག་ངོས། ༧༧
སྙན་དངགས་མེ་ལོང་ལས་ལམ་རྣམ་པར་དབྱེ་བའི་རྣམ་པར་བཅད་པ་དང་པོའི་འགྲེལ་བ། སྙན་འགྲེལ་དཔེ་དཀོན་གཅེས་བཏུས། ༼པོད་བཞི་པ།༽ ཤོག་ངོས། ༣
སྙན་དངགས་མེ་ལོང་གི་འགྲེལ་པ་དབྱངས་ཅན་དགྱེས་པའི་རོལ་མཚོ་ཞེས་བྱ་བ། འཇུ་མི་ཕམ་གྱི་གསུང་འབུམ། ༼ཤྲཱིཿ༽ དེབ་གྲངས། ༡༠
སྙན་ངག་མེ་ལོང་། སྡེ་དགེ་བསྟན་འགྱུར། ༼སེ།༽ སྒྲ་མདོ། དེབ་གྲངས། དེབ་གྲངས། ༣༡༩
སྙན་ངག་མེ་ལོང་འཆད་པ་ལ་ཉེར་འཁོའི་ལེགས་བཤད་མཁས་པའི་མགྲིན་རྒྱན། སྙན་འགྲེལ་དཔེ་དཀོན་གཅེས་བཏུས། ༼པོད་བཅུ་པ།༽ ཤོག་ངོས། ༡༠
སྙན་ངག་མེ་ལོང་གི་བསྡུས་དོན་འཆད་ཐབས་དང་བཅས་པ་རིན་ཆེན་དོ་ཤལ་མཁས་རྣམས་དགའ་བསྐྱེད་སྣང་བྱེད་ཟླ་གསར། སྙན་འགྲེལ་དཔེ་དཀོན་གཅེས་བཏུས། ༼པོད་བརྒྱད་པ།༽ ཤོག་ངོས། ༡༥༣
སྙན་ངག་མེ་ལོང་། སྡེ་དགེ་བསྟན་འགྱུར། ༼སེ།༽ སྒྲ་མདོ། དེབ་གྲངས། དེབ་གྲངས། ༣༡༩
སྙན་ངག་མེ་ལོང་གི་རྒྱ་ཆེར་འགྲེལ་པ་གཞུང་དོན་གསལ་བ། སྙན་འགྲེལ་དཔེ་དཀོན་གཅེས་བཏུས། ༼པོད་དང་པོ།༽ ཤོག་ངོས། ༡༡
སྙན་དངགས་མེ་ལོང་གི་འགྲེལ་པ་དབྱངས་ཅན་དགྱེས་པའི་རོལ་མཚོ་ཞེས་བྱ་བ། འཇུ་མི་ཕམ་གྱི་གསུང་འབུམ། ༼ཤྲཱིཿ༽ དེབ་གྲངས། ༡༠
གསལ་བཤད་སྙན་ངག་མེ་ལོང་མའི་ལུང་དག་ཤོག་ངོས་གཅིག་ཏུ་ཡོད་པ་མང་བས་མཐའ་དག་གི་དེབ་གྲངས་སོགས་འདིར་བཀོད་མེད། དཔྱད་གཞིའི་ཡིག་ཆའི་མ་དཔེ་མ་རྙེད་པ་ཡང་གཉིས་གསུམ་ཞིག་ཡོད་པས་འདིར་བཀོད་ཐབས་བྲལ་སོང་།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
