ཕྱིར་མི་ཡོང་བ་དག་བཀླགས་རྗེས།
རྩོམ་པ་པོ། སྒྲེ་བོ།
རྩོམ་པ་པོ། སྒྲེ་བོ།
ཙོང་ཁ་ཚེ་བརྟན་རྒྱལ་གྱི་ཉེ་བྲིས་སྙན་ཐུང་((ཕྱིར་མི་ཡོང་བ་དག))ཅེས་པ་ཀློག་ཞོར་རྒུན་ཆང་འཐུང་།
__ སྒྲེ་བོ།
ཕྱིར་མི་ཡོང་བ་དག
2019/11/15-17སེ་ནེ།
ཕྱིར་མི་ཡོང་དག་ཅེས་པའི་སྙན་ཐུང་འདི་ནི། གཞུང་རིང་བའི་བསམ་གཞིགས་ཤིག་དང་གཏོས་ཆེ་བའི་བློས་བསླངས་ཤིག རྩོམ་འགྲོས་ཐུང་ངུ་ཞིག་དང་སྐད་ཆ་རྩེག་རིམ་ཞིག་གིས་གཤམ་སྟོན་བྱས་རེད་ཡོད་པ་རེད་དོ།། དེ་ལྟར་ན། ཐོག་མར་ཕྲན་གྱིས་གོང་དུ་བརྗོད་པའི་སྐད་ཆ་རྩེག་རིམ་ཞེས་པ་དང་འབྲེལ་ནས་ཨེན་ཙམ་གླེང་དགོས་སོ།།
རྩོམ་སྐད་ནི་མ་གཞི་ནས་སྐད་ཆའི་རྩལ་ཞིག་རེད་ལ་རྩལ་གྱི་ནང་ནས་མཛེས་རྩལ་ཞིག་རེད། མཛེས་པ་དང་རྩལ། ཡང་ན་རྩལ་དང་མཛེས་པ་མཉམ་སྡེབ་བྱས་ཡོང་ན་དེའི་ངོ་བོ་སྒྱུ་རྩལ་རིགས་ཤིག་ལ་འགྱུར་འགྲོ་བས། སྐད་ཆ་རྩེག་རིམ་བྱ་བ་འདི་འདྲ་ཞིག་ལ་ཟེར་རོ།། གཞན་ནི་སྙན་ཐུང་འདི་སྐད་ཆ་རྩེག་རིམ་གྱིས་གྲུབ་ཡོད་པ་རེད། ཡང་སྐད་ཆ་རྩེག་རིམ་དང་དབྱངས་འགྲོས་གཉིས་ནི་བརྩམས་ཆོས་ཤིག་གཞིར་བཞག་སྟེ་གླེང་ན་ཕལ་ཆེར་གཅིག་ཏུ་འཇུག་ཀྱང་གྲང་མོད། སྐབས་བབ་ལ་མཚོན་ན་སྔ་མ་དེ་སྤྱད་པར་ཕྲན་ལ་འཚམ་པོ་འདུག འོན་ཏེ། འདི་ནི་རྩོམ་གཞུང་སྤྱིའི་གཏན་འབེབ་བམ་རིག་ལམ་རགས་པ་ཞིག་ཀྱང་རེད་མོད། ཡང་མཚམས་རེར་སྤྱིའི་འགྲོ་སྟངས་བྱེ་བྲག་ཏུ་སྦྱར་ན་བླངས་ན་ཡང་ཆོག་པས་ན། ཁོང་གི་སྙན་ངག་གི་གྲུབ་ལམ་གཙོ་བོ་སྐད་ཆའི་འགྲོས་རིམ་ནི་ཐོག་མར་དབྱེ་ཞིབ་འདི་འདྲ་བྱས་ཀྱང་འཐུས་སོ།།
དེ་ནས་སྙན་ངག་ནི་སྐད་བརྡའི་སྒྲིག་གཞི་དང་གཞི་ནས་འགལ་དུ་མེད་པ་ཞིག་རེད་སྙམ། དེ་ནི་སྙན་ངག་ལ་ཅིས་ཀྱང་ཚང་དགོས་པའི་མ་མཐའི་ཆ་རྐྱེན་རེད་འདུག་ཀྱང་། སྙན་ངག་གིས་སྐད་བརྡའི་གྲིམ་ལྷོད་དང་རྐྱོང་སྐུམ་ལ་གསོན་ཤུགས་ནི་གསར་གཏོད་ཀྱི་ཚུལ་དུ་སྐུལ་འདེད་དགོས་པ་ནི་སྙོན་དུ་མེད་པ་ཞིག་རེད། དེ་བས་ནུབ་ཀྱི་སྙན་ངག་གླེང་སློང་རེ་རེ་ན། སྙན་ངག་པ་སུ་ཞིག་ཐོག་མ་ནས་ཕ་སྐད་དང་དེ་ལས་ཀྱང་ཡུལ་སྐད་ལ་གཉུག་འདྲིས་དང་དེ་དང་དེ་འབྲེལ་གྱི་བག་ཆགས་ལ་ཡང་གཉུག་འཐིམ་དུ་དགོས་པ་ཉག་ཅིག་གླེང་ངོ་།། དེ་ལ་ཡང་ཤིན་ཏུ་འཐད་དོ།།  ཡིན་ཙ་ན། ཁོང་གི་སྙན་ཐུང་འདི་ལ་དེའི་དགེ་མཚན་ཟེར་ན་རེད། ཁྱད་ཆོས་ཟེར་ན་རེད། གང་ལྟར་དེ་དག་ཚང་ཡོད་པ་རེད་དོ།
དེ་འབྲེལ་གྱི་དྲན་འཆར་འདི་ཡང་བྲི་བར་བྱ་བ་ལ་ཐོག་མར་སྙན་ངག་གི་ཁམས་འདྲ་བོ་སྙན་ངག་གི་ཁ་བྱང་རང་སྟེང་ནས་དཔོག་ཐུབ་པ་ཞིག་རེད། སྔར་ཡང་གླེང་མྱོང་བ་བཞིན་གྱེས་བྲལ་ནི་འུ་ཅག་ཀུན་ལ་ཆེས་རྒྱུས་མངའ་ཡོད་པ་ཞིག་རེད་དོ།། གྱེས་བྲལ་ནི་འུ་ཅག་གི་བརྩེ་བའི་ཟབ་ཚད་དང་། འཚོ་བའི་རིན་ཐང་རེད་ཨང་། དེ་ལ་བརྟན་ནས་བློས་མི་ཐོངས་པ་སྐོར་ཞིར་འདུ་ཤེས་གཞན་ཞིག་བརྒྱུད་ནས་བློས་སུ་གཏོང་དགོས་པ་རེད། འདུ་ཤེས་གཞན་དེ་ནི་ཆོས་ཀྱི་བསླབ་བྱ་དང་དེའི་རྒྱུན་ཤེས་ཉི་ཚེ་བ་རེད་པས་ཆོས་ཀྱི་བསླབ་འགའ་ཞིག་ནི་སྒྱུ་རྩལ་ལས་བྱུང་བ་རེད་འདུག དེའི་སྐོར་ལ་གནའ་བོའི་ངྒི་རི་སིའི་བྱུང་རབས་སོགས་སུ་མང་པོ་ལྟ་རྒྱུ་རེད་པ་དེ་ག་རེད།
སྐབས་ཀྱི་སྙན་ཐུང་འདིའི་རྒྱབ་ལྗོངས་ཀྱི་རྒྱབ་ལྗོངས་དངོས་གནས་ནི་གྱེས་བྲལ་བྱ་བ་རེད། ཤིན་ཏུ་ལྷག་མ་དང་རབ་ཏུ་ཆག་རོར་གྱུར་བའི་ཞེན་ཆགས་ཀྱི་རྟིང་མ་ཞིག་གིས། གྱེས་བྲལ་གྱི་སྟོང་ཁམས་ལ་ཚོར་ཤུགས་ཤོར་སྟངས་ཤིག་རེད། གནས་བབ་འདིའི་དོན་དངོས་གང་ཡིན་ནི་ཕྲན་ལ་ཆ་རྒྱུས་མེད་མོད། ཀློག་པ་པོ་ཞིག་གི་ངོས་ཐད་ནས་སྙམ་ན་གྱེས་བྲལ་ནི་སུས་ཀྱང་བཟོད་དཀའ་བ་ཞིག་ཡིན་པ་རེད། དེ་ལས་ཀྱང་ཚོར་བ་སྐྱེན་པའི་སྙན་ངག་པ་ཞིག་ལ་མཚོན་ན་ལྷག་ཏུ་དཀའ་བ་ཨ་ཅང་ཅང་རེད། ཡིན་ཡང་། སྙན་ངག་པ་ལ་ལས་དེའི་ཚུལ་ནི་བྱུང་རིམ་ཧྲིལ་བོ་ཞིག་བྲི་སྲིད། ཡང་འགའ་ཡིས་དེའི་བབ་ནི་དྲན་གདུང་དང་འགྱོད་གདུང་འབའ་ཞིག་བྲི་ངེས། དེ་ཡང་རུང་ངོ་།། ཚུལ་དེ་བཞིན་སྙན་ངག་པ་ཁོང་གིས་ཀྱང་དེའི་སྐོར་ཟུར་ཙམ་གྱིས་བྲིས་པ་དེ་རེད།
དེ་ནས་འཕྲོས་དོན་ཞིག་སྟེ། སྙན་ངག་ཅེས་པ་ནི་ཀ་དག་ནས་སྐད་ཆས་སྐད་ཆ་ཤོད་སྟངས་ཤིག་རེད་པས་དེ་ལ་ཐ་སྙད་དང་བརྡ་ཆད་འདྲ་ཆགས་པོའི་མཆོད་རྟེན་དགོས་པ་མ་རེད། ཤིན་ཏུ་གཙང་དག་དང་ཆོས་ཉིད་ཀྱི་སྒྱུ་རིས་ལ་ཉེ་བར་བཅར་བ་དེ་ཙམ་གྱིས་འཐུས་པ་རེད། འདི་ནི་སྐབས་དོན་གྱི་ཕྲན་གྱིས་སྙན་ངག་ལ་འཆང་བའི་ལྟ་ཚུལ་ཙམ་པོ་བ་ཡིན་པ་བྱས་སོ།། དེའི་ཐད་ནས་དེ་ལྟར་མྱོང་རོལ་བྱས་ཏེ་ཡོང་ན་སྙན་ཐུང་འདི་ལ་དམིགས་བསལ་གྱི་ཚོར་བ་ཞིག་མཆིས། མིག་ཟུམ་རེ་སྟངས་རེ་ཡིས་ཡིད་ལ་མི་ཞིག་གི་ངོ་གདོང་ན་མཆི་མ་འཐོར་བཞིན་ཡོད་པ་གཟུགས་སུ་མངོན་འཆར་ཡོང་ངོ་།། གསལ་ལ་མི་གསལ་བའི་འབོད་སྒྲ་ཞིག་ཀྱང་གྲག་གིན་འདུག ཏག་ཏག་དེ་ནི་སྙན་ཐུང་འདིའི་སྙིང་འཛེར་དུ་བརྡབས་པའི་”ཤབ་ཤུབ”ཅེས་པའི་བརྡ་ཆད་དང་གཅིག་མཚུངས་རེད་འདུག
ཞིབ་ཀྱིས་བརྗོད་ན་སྙན་ཐུང་འདི་ཐོག་མར་བཀླགས་དུས་དེ་ཙམ་ཚོར་བར་སིམ་འཛུལ་མི་བྱེད་པའམ། ཚོར་ཤུགས་བསྐྱེད་སྟོབས་དེ་ཙམ་མ་མཆིས་མོད། ཐེངས་འགར་བཀླགས་རྗེས་ཡིད་སེམས་ལ་སྨེང་བ་རིགས་ཤིག་བསྐྱལ་ཡོང་། ནུས་པ་དེ་འདྲ་དེ་སྙན་ཐུང་འདིའི་གཏིང་གཏིང་ཞིག་ན་ཡོད་དོ།། ཤིན་ཏུ་ལྷོད་པ། བར་སྟོང་ཅན། ཟུར་ངོས་གཅིག་ཅན་གྱི་སྐད་ཆའི་བབ་རིམ་ལས། རྩལ་ཤུགས་དེ་འདྲ་ཡང་རྦབ་ཆུའི་ཟོལ་གྱིས་སྣེ་གཅིག་ནས་ཡིད་ལ་བྱོས་བྱུང་ངོ་།། དེ་བས་ཁོང་གི་སྙན་ངག་དག་གི་ནང་ན་དུངས་བརྗོད་ཀྱི་ཞད་ཐིམ་པ། སྐྱོ་ཡུས་ཀྱི་སླད་ཤོར་བ། ཡིད་ཆད་ཀྱི་རྨས་ཕོག་པ། དྲན་གདུང་ཡང་མག་མོག་འཐིབ་པའི་སྤྱི་གཤིས་ཤིག་རྨང་ནས་ཁྱབ་ཅིང་བརྡལ་ཡོད་པས། ཕྲན་ལ་རྒྱུན་དུ་སྡུག་བསྔལ་གྱི་བདེ་སྐྱིད་འབའ་ཞིག་འདྲེན་པར་བྱེད་དོ།།
16/01/20
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
Signature is customized by Netease