ཡིད་ལ་བརྣགས་པ་དེ་ཚོ།
རྩོམ་པ་པོ། ཚོར་རྐང་།
རྩོམ་པ་པོ། ཚོར་རྐང་།
ཡིད་ལ་བརྣགས་པ་དེ་ཚོ།
ཚོར་རྐང་།
སེམས་སྐྱོ་ཤས་རུམ་པའི་ཁ་བ་དེ་ཚོ།།
མར་སྣང་བའི་གཞུང་ལ་ཆགས་པ་དེ་ཚོ།།
ཕྱོགས་གར་འགྲོ་མེད་པའི་བྱེའུ་དམག་དེ་ཚོ།།
སྒྲ་དིར་དིར་འཕུར་ཞིང་འགྲོ་བ་དེ་ཚོ།།
གནའ་དབྱུག་དུམ་ཞོན་པའི་ཆུང་གྲོགས་དེ་ཚོ།།
གསལ་ལྷིང་ངེར་ཡིད་ལ་བརྣགས་པ་དེ་ཚོ།།
ལོ་ཟླ་བའི་གསེང་གི་གཏམ་རྒྱུད་དེ་ཚོ།།
ཕྱིར་དྲན་ན་དགའ་ལ་སྐྱོ་བ་དེ་ཚོ།།
ང་སྐྱོ་བཞིན་སྐྱོ་བཞིན་བྲིས་པ་དེ་ཚོ།
ང་ངུ་བཞིན་ངུ་བཞིན་གླེང་བ་དེ་ཚོ།།
འཕྲད་མ་ཐུབ་རིང་ནས་གདུང་བ་དེ་ཚོ།།
བྲལ་མ་ཐུབ་ཡང་ནས་ངུ་བ་དེ་ཚོ།།
ཁོག་ཡི་ག་འཆུས་པའི་ཉིན་མཚན་དེ་ཚོ།།
མདང་རྨི་ལམ་ནང་གི་ངོ་ཤེས་དེ་ཚོ།།
ཆང་ཨ་རག་འདྲ་བའི་བུ་མོ་དེ་ཚོ།།
གློ་འདྲ་བ་མཆིན་པ་འདྲ་བ་དེ་ཚོ།།
དུས་ད་ལྟ་ཡོད་ན་སྙམ་པ་དེ་ཚོ།།
༢༠༢༠/༡༡/༢༡
ཐུགས་སྐྱོ་བ་གཏིང་ནས་སྐྱེས་སམ་ཅི།
—ཆུང་འདྲིས་YZལ་ཕུལ།
གཏམ་སྙིང་གི་གསེབ་ཏུ་སྦས་པ་དང་།།
སྙིང་ལག་པའི་ནང་དུ་བཞག་པ་འདྲའི།།
ཁྱོད་ང་གཉིས་འགྲོག་པའི་ལོ་ཟླ་དག །
མདང་ནམ་སྟོད་དུས་ཀྱི་རྨི་ལམ་བཞིན།།
དུས་ད་ཚོད་སད་རན་ཡིན་ནམ་ཅི།།
ལས་ཆུ་མོ་གཤིབ་པའི་ཆུ་ཀླུང་གཉིས།།
མཐར་རྒྱ་མཚོར་འབབ་པ་འདྲ་ན་ཡང་།།
ལས་འཕྲོ་མའི་བཞུར་རྒྱུན་གྱ་མ་གྱུ།།
ཕྱོགས་རྒྱལ་ཁམས་བསྐོར་བའི་མཐའ་མ་ལ།།
སླར་མཇལ་བའི་ལས་སྐལ་ཡོད་དམ་ཅི།།
ལོ་ཉི་ཤུའི་འདུ་སྣང་སྐྱོ་ཤས་མ།།
དོན་ངོ་མར་བློ་ཡིས་མི་ཐོངས་པས།།
རྒྱབ་ནག་ཉེས་ཁུར་བའི་ན་ཚོད་འདིར།།
ཞེ་སྐྱོ་སྐྱོ་ཡིན་པའི་གཏམ་རྒྱུད་དག །
དུས་ད་དུང་སྙིང་དུ་སྡུག་ལགས་སམ།།
དོན་རྗོད་པར་འདའ་བའི་འདས་སོང་དག །
ཚིག་ཐ་སྙད་གཉིས་ཀས་མཚོན་མིན་ཏེ།།
ལས་འཕྲལ་དུ་འབྲལ་བའི་ང་རང་གཉིས།།
འདང་གསེར་ནག་མདུད་པ་ཆད་དུས་འདིར།།
ཁོག་སྙིང་ནད་དེངས་མཐའ་ཡོད་དམ་ཅི།།
ཁྱོད་དེ་ལྟར་འགྱུར་རྗེས་འདི་ལྟར་དུ།།
ངས་ལེ་ལེན་འཁེང་ར་མི་ཕོད་དེ།།
ཚེ་ད་ཐེངས་འདུས་པ་ལན་ཅིག་འདིར།།
ལས་ལན་ཆགས་ལན་པ་མ་ཡིན་པས།།
ཞེ་འགྱོད་པའི་གདུང་བ་ལྕི་འམ་ཅི།།
ཡུལ་འཇིག་རྟེན་སྒྱུ་མའི་ཕོ་བྲང་གི།།
ཚུལ་ཧ་ཅང་འཆོས་པའི་ང་རང་ཅག །
ཁ་མངོན་ལྐོག་ལག་པའི་ཕྱི་ནང་ནས།།
དོན་ནང་ཉམས་ཁྲེལ་ལ་མི་རིང་བས།།
ཐུགས་སྐྱོ་བ་གཏིང་ནས་སྐྱེས་སམ་ཅི།།
རི་ཐ་དད་སྟེང་གི་སྤྲིན་པ་གཉིས།།
ལས་ལམ་ཐུག་འབྱུང་རྒྱུ་ཁག་པོ་རེད།།
ལས་ལམ་ཐུག་གལ་ཏེ་བྱུང་གྱུར་ཀྱང་།།
སེམས་སེམས་ངོར་འཕྲོད་མིན་ཁག་པོ་རེད།།
ཁག་ཡོད་མེད་དེ་ལྟ་ཡིན་ནམ་ཅི།།
༢༠༢༠/༣/༡
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
Signature is customized by Netease