ཕྱི་དྲོའི་དྲན་པ།
རྩོམ་པ་པོ། རྒྱ་སེ།
ཕྱི་དྲོའི་དྲན་པ།
རྒྱ་སེ།
གློ་བུར་ཡུལ་འདི་སྣང་བའི་ཆོམ་ངེས་བཅས།།
ཁེར་རྐྱང་སྐྱོ་བའི་སྙིང་པོ་སྟོང་བ་བཞིན།།
ངག་མི་ཁྲོལ་བའི་སྡུག་སྔལ་གཙང་ཉིལ་བཞིན།།
སྐྱེ་འཆིའི་རླབས་གཟར་སོམ་སྒྲ་དགོད་པ་བཞིན།།
ཚེ་རབས་འཁྱག་སོབ་གྲིབ་ཟེག་སྦུབ་པ་བཞིན།།
བགྲེང་མོའི་སྟོང་ལག་ནང་གི་གཉོམ་སྐད་བཞིན།།
རླུང་རྩེར་གདུ་བའི་དུས་ཚོད་ཡལ་བ་བཞིན།།
མཚེར་ས་འཁྱག་པ།
འཁྲུལ་སྣང་སྤར་མོ་གང་གི་ཡན་པ་ཡིས།།
མཚེར་སའི་སྨག་ནག་བྲང་གི་གཤོག་པ་འདར།།
བདག་གི་གཟེབ་སྒྲོམ་བྲག་དཀྱིལ་རྡེབ་པ་ཡིས།།
མུན་པའི་ཁྲག་གི་ལག་ཆུང་གཡུག་གཡུག་བྱེད།།
དམིགས་རྩེར་ཆགས་པའི་འོད་ཀྱི་སྐར་མ་དེ།།
མུན་པའི་འཆི་སོ་ལྡད་པ་གཤིན་པའི་སྒྲུང་།།
གྲིབ་མའི་རང་སྣང་རླུང་བུས་ཅོ་འདྲི་ཡིས།།
མཚེར་ཀའི་ཚེ་སྒྲོམ་མཆོག་ནི་དམར་ཐག་ཆད།།
ནམ་གུང་གི་སྙན་ངག
རེ་ལྡེ་ངོས་ཀྱི་མུན་པ་དེ།།
ཐལ་བ་ཞུལ་ཞུལ་སེམས་སུ་འཐམ།།
སུ་ཞིག་བོར་བའི་མྱ་ངན་གྱིས།།
སྐར་མས་སྐར་མ་འདེད་དེ་འགྲོག།
མཚན་གུང་འདི་ཡི་བྲང་ཁོག་ཏུ།།
འཇིག་རྟེན་བྱེ་བ་ཁྲ་ཁྲ་ལྡེམ།།
མཚེར་ས་འདི་ཡི་མལ་ཤུལ་ནས།།
རྨི་ལམ་སླེབ་གང་རྐུས་ཏེ་སོང་།།
རྩོམ་སྒྲིག་པ། མྱི་གསར་བ།
