འཁོར་བའི་ནགས་ཀློང་ལ་འཁྲི་བའི་བྱེའུ།
རྩོམ་པ་པོ། ཨ་ཀྲད།
འཁོར་བའི་ནགས་ཀློང་ལ་འཁྲི་བའི་བྱེའུ།
ཨ་ཀྲད། ཡུལ་ཤུལ།
༡)
ང་ལ་དེ་ལྟར་བསྙེན་ཞིང་བཀུར་བ་ཡི།།
ཡུན་རིང་བྲེལ་བའི་ལས་ཀ་རྫོགས་པ་ན།།
བསིལ་ཞིང་འཇམ་པའི་རླུང་བུ་གང་ལ་སོང་།།
གྲིབ་མར་བྲོས་པའི་ཉི་འོད་གང་དུ་ཡོད།།
ཟམ་པའི་རྒྱུད་ཀྱི་སྙན་ངག་རྒན་མོ་དེས།།
སྔོ་ཚོད་བཀྲུ་བཞིན་བྱིས་པར་འབོད་ཀྱིན་འདུག།
བྱང་ཐང་དེ་ཡི་སྲོད་ཀྱི་ཁྱོད་རང་ནི།།
དཔག་ཚད་ག་ཚོད་ཅིག་ནས་ཡོང་གིན་ཡོད།།
རི་སྒང་སྨུག་པ་རིམ་གྱིས་འཁྱུད་པ་དང་།།
དེ་དག་ཁ་དོག་དཀར་པོར་གྱུར་པའི་ཚེ།།
རང་སེམས་ཁྱོད་ཕྱོགས་བཞུད་པའི་ངང་ཚུལ་འདིས།།
ཁྱོད་ཀྱི་ལམ་དང་ཟམ་པ་མ་འགུལ་ལམ།།
༢)
རྒྱང་རིང་ཅིག་ནས་རྩྭ་ཐང་སེར་སྐྱར་གྱུར།།
གུར་དང་ལུག་ཁྱུ་མེ་རི་བཞིན་དུ་འབར།།
མེ་ལྕེ་རེ་རེའི་རྩེ་ནས་མཆེད་པ་ཡི།།
དམར་པོའི་མེ་ཁྱོད་ད་ལྟ་གང་དུ་ཡོད།།
ལྷ་བཟོ་ཀུན་དགའ་ཤིང་བཟོ་ཀུན་དགའ་ལྟར།།
སྔ་མ་ལྟར་དུ་དུ་བའི་རྟ་ཕོ་ལ།།
བཅིབས་ཏེ་འཛམ་གླིང་གཡས་སྐོར་མ་བརྒྱག་རོགས།།
རྟ་ཕོ་འདི་ཡི་མིག་གཉིས་མཆི་མས་གང་།།
ཉི་འོད་ཅུང་ཙམ་མཐོང་པའི་གློ་རྡེག་ཏུ།།
ང་ཡི་རྣམ་ཤེས་ཚ་བ་མི་བཟོད་འཆི།།
དེ་ཚེ་ཁྱོད་རང་ད་དུང་མ་ཡོང་ཚེ།།
ང་ཡི་མི་ཚེར་སྙན་ངག་མ་འབྲི་རོགས།།
༣)
དགུན་ཁ་ཡོལ་ནས་སྟོན་འགོ་ཚུགས་མ་ཐག།
གཟན་ཤམས་ཁ་དོག་དྲོད་ཀྱི་རྔུལ་ཆུས་བརླན།།
སོས་ཀའི་མི་ཞེས་རྟག་པར་གཉིད་དུ་ཡུར།།
སྒེག་ལྡན་ཁྱོད་ཀྱི་ཚེ་ཡི་འཕེན་པའང་།།
གཞན་དག་ལྟར་དུ་མྱུར་མོར་མ་རྫོགས་ཚེ།།
ཁྱོད་ཀྱིས་ང་ལ་བག་མེད་མ་བྱེད་ལགས།།
ང་ཚོའི་མི་ཚེ་ཕལ་བའི་མི་ཚེ་རེད།།
རིང་པོ་རེད་ཅེས་བཤད་སར་མི་འགྲོ་ལ།།
ཐུང་ངུ་ཡིན་ཞེས་མཉན་མཁན་མི་ཡོང་ངོ་།།
༤)
ཁྱོད་ཀྱིས་མི་ཚེ་གཅིག་ལ་ཞི་བ་སྒོམ།།
སྡང་བའི་དགྲ་རྣམས་མེ་སྟག་བཞིན་དུ་བཏུལ།།
མཉམ་པར་བཞག་ཚེ་སྙན་ངག་ཅུང་རེ་འབྲི།།
ཏིང་ངེ་འཛིན་ལ་ཡུན་རིང་ངང་དུ་བསྡད།།
སྒྲོལ་མ་འཇལ་འདོད་འདུན་པའི་གདུང་བ་གང་།།
སྐར་ཆེན་དག་ལས་ཡིད་གར་ཡོང་བ་ཡི།།
འཁྲབ་སྟོན་པ་རྣམས་སྙིང་དུ་སྡུག་པ་ལྟར།།
སྐྱ་ཐག་ཆོད་པའི་བྱེ་ཐང་རྒལ་བཞིན་སོང་།
༥)
ཁྱོད་ཀྱིས་ལོ་ངོ་ལྔ་བརྒྱའི་བར་སྐབས་ནས།།
ལྷ་མོར་བཏུད་ཅིང་ལྷ་མོའི་ཞལ་ཡང་མཇལ།།
ལྷ་མོའི་སྤྱན་གྱིས་གཟིགས་པ་མི་འདོར་བ།།
རྗེས་ཆགས་ཐུགས་རྗེས་མི་ལོ་ལྔ་བརྒྱར་བསྐྱང་།།
བཀའ་དྲིན་ཞུའམ་རྒྱང་རིང་རྒྱང་རིང་གི།
དྲན་པའི་ཕོ་བྲང་རྟག་ཏུ་སྲུང་པ་ཡི།།
ནམ་མཁར་རྒྱུ་བའི་བྱང་ཆུབ་ཆེན་པོ་ལགས།།
ཚེ་གང་ཕུད་ཅིང་ལོ་གང་མཆོད་པ་ཡི།།
ཆང་དང་བརྩེ་བས་རིལ་བོར་བརྒྱན་པ་ཁྱོད།།
ད་ནི་ཇི་ལྟར་ང་ཡི་སེམས་ལ་འབབ།།
༦)
གྲོང་ཁྱེར་འདི་རུ་སྙན་པའི་གླུ་མ་ལེན།།
གྲོང་ཁྱེར་འདི་ཡི་སྲང་དང་སྲང་ལམ་བར།།
ཕུགས་འདུན་མེད་པའི་བྱ་ནི་མང་གྱུར་པས།།
ལུས་དང་ལང་ཚོ་འཇའ་འོད་ལྟར་དུ་འཆར།།
ད་ལྟ་ཡོད་ལ་ད་ལྟ་མེད་པ་ཡི།།
མི་སྡུག་པ་ཡི་འཚོ་བར་ཆགས་ཆགས་ནས།།
ཞེ་ཡི་མགུར་འདིས་མགྲིན་པ་རྣངས་ན་ཡང་།།
བརྗེད་པ་མི་འདུག་ཀྱེ་ཧོ་བྱེ་ཐང་གི།།
འདི་ཕྱོགས་ཡོང་བའི་ཆ་མེད་རྒྱུས་མེད་ཀྱི།།
རྨི་ལམ་ནང་གི་མཆོད་མེ་ལྟ་བུའི་ཁྱོད།།
ང་རང་ད་ནི་ཁྱོད་ཀྱི་ཉེ་ས་རུ།།
མྱུར་བར་ལོག་འདོད་སེམས་འདི་གཡོ་བ་ལ།།
ལོ་ངོ་མང་པོས་རུམ་དུ་ཉལ་བ་ཡི།།
བརྩེ་བ་ཀོ་ཤུན་མ་འདི་ཆུང་ནའང་།།
དེ་ལ་དེ་ལྟར་མཛའ་བརྩེ་མང་ལགས་པས།།
གཅེས་པར་འོས་རོགས་རྗེ་བཙུན་ཁྱོད་ལགས་སོ།།
2019/7/1ཉིན་ཕ་ཡུལ་དུ་བྲིས།
རྩོམ་སྒྲིག་པ། མྱི་གསར་བ།
རྩོམ་སྒྲིག་པ། མྱི་གསར་བ།
