རས་པའི་འཁར་བ།
ཐོ་ཡིས་སྦྱར།
རས་པའི་འཁར་བ།
ཐོ་ཡིས་སྦྱར།
༡
ཕུ་རི་བོའི་རྩེ་མོར་ཡར་ལ་བལྟས།།
ཁངས་འདབ་དྲུག་ཟམ་ཟིམ་འབབ་ཙ་ན།།
བྱ་བྱིའུ་འཕུར་ལམ་ཅི་འདྲ་འདུག།
ཤྭ་ཡུ་མོའི་ལས་དབང་ག་འདྲ་རེད།།
གོས་རས་རྐྱང་མནབས་པའི་དྲང་སྲོང་ལགས།།
སྙིང་རྗེའི་མཆི་མ་མི་འཐོར་རམ།།
བྱམས་དུངས་ཀྱི་མཆོད་མེ་བསྒྲོན་དང་ཀྱེ།།
སེམས་འོད་གསལ་སྒོམ་པའི་རྣལ་འབྱོར་པ།།
ཆོས་ཉིད་ཀྱི་གཤིས་ལ་འཁྱུད་འཁྱུད་ནས།།
མགུར་འཐེན་ན་གཙང་ཆེན་འབབ་པ་འདྲ།།
ཁོ་ཐག་ནང་ནས་ཆོད་དམ་ཅི།།
བློ་ངེས་འབྱུང་གིས་བསྐུལ་བའི་རས་པ་ཆེ།།
གཞིས་བྲག་ཕུག་ནང་དུ་སྐྱིད་ཉལ་བྱེད།།
ཕ་བླ་མ་དྲན་པའི་ཆོ་ངེ་འདོན།།
རོགས་ཆུང་འདྲིས་བསམ་ན་ཡི་མུག་སྐྱེ།།
ཞེ་སྨྲེང་བའི་དབྱངས་ཆུང་བླངས་བླངས་ནས།།
ཕུ་གཙང་ཆབ་བཞུར་བའི་གདངས་ལ་འདྲེས།།
དྲིན་ཕ་མ་བརྗེད་ནས་གང་ཙམ་སོང་།།
ཉིན་ཟས་ཐུན་བཅད་ནས་ཅི་ཙམ་འགོར།།
བློ་ཕུགས་ཆོས་ཀྱིས་དྲོས་ཙམ་ན།།
རྨི་ལམ་ལ་འགྲེལ་བཤད་མེད་དོ་ཟེར།།
ས་གར་འགྲོ་གཏད་སོ་མེད་དོ་ཟེར།།
ལྕག་བེར་ཀ་བཟུང་བའི་རྒན་པོ་དེ།།
གོས་རས་རྐྱང་གྱོན་ཅིང་གླུ་ཆུང་ལེན།།
དགའ་དུས་ཉམས་དང་རྟོགས་པའི་གླུ།།
སེམས་ཅན་ཡི་ག་བྱེད་ལེ་ལེན།།
སྡུག་དུས་བླ་མ་དྲན་པའི་གླུ།།
ལུས་བ་སྤུ་ལྡང་ལེ་མི་ལེན་རེ།།
ཁྱོད་གངས་སྟོད་འགྲིམས་དུས་སེང་གེ་འདྲ།།
གངས་སེང་གེས་དོ་ཡ་ཡོང་རབས་མེད།།
ལ་ཕྱི་གངས་ཀྱི་རི་བོ་རུ།།
རྩལ་གྲུབ་རྟགས་ཀྱི་ཉི་ཟླ་རང་བྱུང་རེད།།
ཁྱེད་རྫ་ལམ་འགྲིམ་དུས་བྲེ་སེར་འབྲོང་།།
འབྲོང་དར་མས་རྩེད་ཡ་ལོས་ཡིན་ཏེ།།
རི་ཏི་སེའི་ལ་མོ་བརྒལ་དུས་ན།།
རྡོ་ཕ་བོང་ངོས་སུ་རྐང་རྗེས་ཕབས།།
རོགས་ན་ཟླ་ཞེ་སེམས་དམའ་ལེ་བྱས།།
མདའ་གཙང་ཆེན་བརྒལ་ན་བྱ་དང་འདྲ།།
བྱ་རྒོད་པོས་དོ་ཡ་ཡོང་རབས་མེད།།
ནང་རླུང་སེམས་ཀྱི་རང་དབང་ཐོབ་ཙ་ན།།
ཆོས་སྟོང་ཉིད་ཀྱི་དབྱིངས་སུ་འཕུར་འཕུར་ནས།།
ཕྱི་འཇིག་རྟེན་གྱི་ལྟད་མོ་ཅི་ཡང་མཐོང་།།
ནང་ཡིད་སེམས་ཀྱི་ལྗོངས་རྒྱུ་མཐོ་ཙམ་གདའ།།
དད་འདུན་གྱི་མེ་ཏོག་ཁྱེད་ལ་བཏེགས།།
༢
ཤིང་ཤུ་གུའི་རྩེ་མོ་ཡར་ལ་ཟུག།
བྲག་དཀར་ཆུང་གི་ཡོལ་བ་མཐའ་ནས་བརྒྱན།།
བྱ་འཇོལ་མོའི་གྲེ་བ་དབྱངས་ཀྱིས་ཁེངས།།
ཉིན་རི་ཉི་ཁུག་དྲོ་ས་ན།།
དྲང་སྲོང་དགུང་ལོ་བགྲེས་པོ་ཞིག།
སྐུ་ལ་དར་རས་སིལ་འཇམ་མནབས།།
ཞལ་འཛུམ་པའི་མེ་ཏོག་བཞད་པ་ལ།།
སྙིང་རྗེའི་སྦྲང་མ་འཕུར་ཞིང་ལྡིང་།།
ཉི་མར་གཟིགས་ཏེ་མགུར་ཞིག་འཐེན།།
འདུ་བྲལ་སྒྱུ་མའི་དཔེ་ཞིག་བཞག།།
འདུག་ལོང་མེད་ཅིང་འགྲོ་དགོས་ཟེར།།
སེམས་ཀྱི་རྒྱལ་ཁམས་བསྐོར་དགོས་ཟེར།།
ཚེ་ལ་ངེས་པ་མེད་དོ་ཟེར།།
དགུང་ལ་མོ་བརྒྱབ་ནས་བྱོན་སོང་ངོ་།།
༣
རི་མཐོ་པོ་དེ་ཡི་ཉག་ག་ན།།
སྤང་གོར་མོ་མེ་ལོང་ལེབ་གཅིག་གདའ།།
སུར་དཀར་གྱི་དྲི་བསུང་འཐུལ་བ་དང་།།
ཆར་ཟམ་ཟིམ་འབབ་ཅིང་ཉི་འོད་འཕྲོ།།
བྱ་བྱིའུས་དབྱངས་ཀྱི་གྲེ་བ་ལྷོད།།
ཤིང་སྤེན་ཆུང་དེ་ཡི་འོག་རོལ་དུ།།
རི་ལ་བྲོས་པའི་རྣལ་འབྱོར་པ།།
ཞེ་སྨྲེང་བའི་མིག་ཟུངས་རྒྱང་ལ་གཏད།།
ལྷོ་གྲོ་བོ་ལུང་གི་ཕྱོགས་སུ་གཟིགས།།
ཕ་བླ་མ་དྲན་པའི་མགུར་ཞིག་འཐེན།།
སྤྱན་ཆབ་ཀྱི་ཕྲེང་ཐག་ས་རུ་གཏོར།།
སྤྲིན་དཀར་ལུ་བྱང་དུ་བཞུད་པ་དང་།།
ནང་ཡིད་སེམས་སྐྱོ་བའི་ན་བུན་ལྡང་།།
དགུང་ཉི་མས་ནུབ་རིའི་རྩེ་མོ་ནས།།
སེམས་གསོ་བའི་གཞས་ཆུང་ཡང་ཡང་བླངས།།
ཕོ་རྒོད་པོ་མི་ལ་རས་པ་ཉིད།།
ལ་ལུང་པ་བརྒལ་ནས་བྱོན་སོང་ངོ་།།
༢༠༡༩/༤/༥
དཔའ་བོ་མཐུ་ཆེན།
ཕྱག་ཆེན་གདམས་པའི་རང་སེམས་གསོས་པས།།
སྣང་བའི་མེ་ཏོག་འདབ་མ་གྲོལ་བྱུང་།།
མགུར་ཆུང་སྙན་མོ་དབྱངས་ལ་བརྒྱུས་ཡོད།།
བྲག་དཀར་རྟ་སོའི་ཉི་འོད་ཀློང་དུ།།
འོད་གསལ་གཉིད་ཀྱི་རྨི་ལམ་རིང་མོ།།
ཏིང་འཛིན་བདེ་བའི་གར་ལ་རོལ་ཞིང་།།
འབྱོར་མེད་སྤྲང་འཁྱམས་སྐྱིད་པོ་ཡིན་ཟེར།།
གུང་ཐང་ལ་ཁའི་སྦྲང་ཆར་སིལ་མ།།
གྲོད་བོ་ལུང་གི་སྤྲིན་དཀར་ཚོམ་བུ།།
ངེས་འབྱུང་ཤེལ་དཀར་འོད་དུ་འཚེར་ཞིང་།།
རྟོགས་པའི་མགུར་མས་རང་སེམས་གསོ་བའི།།
འཇིག་རྟེན་སྒྱུ་མའི་ཐང་ཆེན་དཀྱིལ་དུ།།
བྱམས་བརྩེའི་ཆུ་ཐིག་འགྲོ་ལ་བསྩོལ་བའི།།
རྒྱལ་ཁམས་བསྐོར་བའི་རས་པ་སྐྱིད་དོ།
རྩ་རྔ་སྐྱ་ཡི་སྒྱུ་མའི་སློ་དཔོན།།
གྲོ་བོ་ལུང་གི་མར་པ་ལོ་ཙྭ།།
བྱམས་བརྩེའི་ཐུགས་མཚོ་ཀློང་ན་བཞུགས་པའི།།
ཡུམ་ཆེན་བདག་མེད་སྐྱོ་བའི་སྐྱོ་རོགས།།
ཆུང་འདྲིས་བྱམས་པ་སྙིང་གི་ཐིག་ལེ།།
མཛེས་སེའི་པད་ཞལ་ཡིད་ཀྱི་འཁོར་ཕྱོགས།།
བརྩེ་དུང་བསྙལ་བའི་དཔའ་བོ་མཐུ་ཆེན།།
རང་ཡུལ་ཕྱོགས་སུ་སྤྱན་གྱིས་གཟིགས་དང་།།
༢༠༡༨/༣/༡༠ ཉིན། མུ་འགོད།
ཡིད་བྲིས་དགའ་ལྡན་ཆུ་འཛིན་ཞིང་།།
མགུར་ཆུང་ནང་གི་གྲོ་བོ་ལོད།།
དགའ་སྐྱོའི་ཆུ་མིག་འཁྱིལ་བའི་གནས།།
ཚོར་བའི་མེ་ཏོག་བཞད་ས་ཡིན།།
མར་པ་ཆོས་ཀྱི་རྒྱལ་པོ་ལགས།།
ཏིང་འཛིན་ཀློང་དུ་ཕེབས་པ་ཨིན།།
དབུ་མ་རྫོང་གི་རྫོང་རྩེ་ན།།
ཞི་བའི་ཟླ་འོད་བསིལ་ལམ་ཅི།
རས་རྐྱང་རླུང་བུས་སྡེབ་པ་ལས།།
སྐྱོ་བའི་གཉེར་མ་བཞད་དམ་ཅི།།
བདག་འཛིན་གསེར་གྱི་ཁང་བཟང་དུ།།
ཞག་རེ་ཞག་གཉིས་མི་བཞུགས་སམ།།
ལྷོ་མཐའི་ཆུ་འཛིན་འཁྱིལ་བའི་འོག།།
སྙིང་སྡུག་ཡོད་པས་ཨེ་ཡིན་ནམ།།
ཞེན་ཆགས་དངུལ་གྱི་ཐིག་ལེ་དག།
སྦྲང་ཆར་ཟོལ་གྱིས་འབབ་དོན་ཅི།།
༢༠༡༨/༤/༡༩ ཉིན།
ཡུལ་ལ་ཕྱི་གངས་ཀྱི་རི་བོ་རུ།།
ཏིང་འཛིན་གྱི་མྱུ་གུ་སྨིན་པ་ན།།
ངེས་འབྱུང་གི་ཉི་འོད་བསིལ་བ་ན།།
འབྲོང་བྲེ་སེ་རྫ་ལམ་འགྲིམས་པ་བཞིན།།
བུ་མི་ལ་གྲོང་ནས་སོང་བ་ཡི།།
དོན་དེ་ཕྱིར་མཛེས་སེ་གཤིས་བཟང་མ།།
ཞེ་སྐྱོ་བ་གཏིང་ནས་ཨེ་སྐྱེ་ལགས།།
ཆུ་གཙང་པོ་ལྡམ་མེ་ལྡེམ་མེ་བཞུར།།
མགུར་སྙན་མོ་ལུང་པའི་ཕུ་ནས་གྲག།
གནས་བྲག་དཀར་རྟ་སོའི་དབེན་ཁྲོད་དུ།།
དགའ་སྐྱིད་ཀྱི་གླུ་ཆུང་འཛད་པ་མེད།།
རེ་དོགས་ཀྱི་ཡོལ་བ་ཕྱེས་པ་ན།།
དགུན་ཁ་བ་བུ་ཡུག་འཚུབ་ཀྱང་རུང་།།
ཉམས་རྟོགས་ཀྱི་མེ་ཕུང་ཨ་རེ་ཆེ།།
བུ་མཐུ་ཆེན་ཞེ་རྩ་དྲོད་ཀྱིས་གཏམ།།
༢༠༡༨/༤/༢༧ ཉིན། མུ་འགོད།
སྐུད་པ་ཆད་པའི་ཤོག་བྱ།
ཤོག་བྱ་གནམ་མཐར་འཕུར་བ་བཞིན།།
ཟླ་བ་མཁའ་ལ་འཕགས་པ་བཞིན།།
སྤྲིན་དཀར་དཀར་རླུང་བུས་གཏོར་བ་བཞིན།།
རྨི་ལམ་ནང་གི་ཡུ་མོ་ཨེ།།
འཁོར་བའི་གྲོང་ནས་མ་བྲོས་དང་།།
ང་ནི་སྦྲང་མའི་ལུས་བླངས་ཏེ།།
ཞིམ་པའི་སྦྲང་བརྩི་ཁྱོད་ལ་སྟེར།།
རྣ་བར་སིམ་པའི་འཕྲད་གླིང་དེ།།
དུང་སེམས་ཀློང་ནས་ཁྱེད་ལ་འབུད།།
ཉི་མ་ཕར་ཕར་བྱོན་ཤུལ་དུ།།
ཆུ་མོ་མར་མར་བཞུད་ཤུལ་དུ།།
རླུང་བུ་ཡང་ཡང་ལྡང་ཤུལ་དུ།།
དགུང་གི་གླང་བྱིའུ་འཕུར་ཤུལ་དུ།།
རྫི་བོས་ནོག་ནག་དེད་ཤུལ་ན།།
ཁ་བ་ངེས་མེད་འཚུབ་པ་དང་།།
མུན་པ་ཡང་ནས་བསྐྱར་དུ་འཁྲིགས།
ང་ཡི་ལས་ཀྱི་སྣེ་མོ་ན།།
ཁྱེད་རང་མེ་ཏོག་ཚུལ་དུ་བཞད།།
དྲན་པ་འདི་ཡི་གཏིངས་རུམ་ན།།
ཁྱོད་རང་ཞོགས་པའི་སྨུག་རླངས་བཞིན།།
བྲང་ཁོག་དཀྱིལ་དུ་ཡང་ཡང་འཕྱོ།།
2019/3/26. མགྱོགས་བྲིས།
རྩོམ་སྒྲིག་པ། མྱི་གསར་བ།
