རྣལ་འབྱོར་རྟ་རྒྱུག་གི་མགུར་གླུ།
རྗེ་བཙུན་མི་ལ་རས་པས་གསུང་།
རྗེ་བཙུན་མི་ལ་རས་པ།
མར་པའི་སློབ་མ་ཀ་ཆེན་བཞིའི་ཡ་གྱལ་བྱང་གི་ཀ་ཆེན། རྗེ་འདི་ཉིད་རབ་བྱུང་དང་པོའི་ལྕགས་འབྲུག ༡༠༤༠ པལོར་ཡབ་མི་ལ་ཤེས་རབ་རྒྱལ་མཚན་དང་ཡུམ་མྱང་ཚ་དཀར་རྒྱན་གཉིས་ཀྱི་སྲས་སུ་མང་ཡུལ་གུང་ཐང་གི་སྐྱ་རྔ་རྩ་རུ་སྐུ་འཁྲུངས། སྐུ་ཆུང་ངུའི་མཚན་ལ་ཐོས་བ་དགའ་ཞེས་ཞུ།ཁོང་སྐུ་བལྟམས་ནས་ཡུན་རིང་མ་སོང་བར་ཡབ་སྐུ་གཤེགས་པས་ཨ་ཁུ་དང་ཨ་ནེས་སྡུག་པོ་ཚད་མེད་བཏང་། དེ་རྗེས་ཡུམ་གྱི་བཀའ་བཞིན་མཐུ་བསླབས་ནས་འཁོན་གླན་པར་མི་མང་པོ་བསད། སླད་ནས་སྡིག་པ་ལ་འགྱོད་དེ་ཆོས་བྱེད་པར་ས་རྟ ༡༠༧༨ ལོར་ལྷོ་བྲག་ཏུ་ཕེབས་ཏེ་མར་པ་ལོ་ཙཱ་ཆོས་ཀྱི་བློ་གྲོས་དང་མཇལ།དགུང་ལོ་ཞེ་ལྔ་པ་ཤིང་བྱི ༡༠༨༤ ལོར་སྟོད་ཕྱོགས་སྐྱིད་གྲོང་དང་གཉའ་ནང་ཁུལ་དུ་ཕེབས་ཤིང་སྒྲུབ་པའི་དམ་བཅའ་མཛད་དེ་ལོ་དགུའི་རིང་ན་བཟའ་རས་རྐྱང་དང་ཟས་ཟྭ་ཚོད་ཙམ་ལ་བརྟེན་པ་སོགས་དཀའ་སྤྱད་དྲག་པོས་བསྒོམས་པས་སྐུ་ཚེ་འདི་ཉིད་ལ་མཆོག་གི་དངོས་གྲུབ་ཐོབ།སློབ་མའི་མཆོག་ནི་རྗེ་སྒམ་པོ་བ་དང་། རས་ཆུང་པ། དེ་བཞིན་འབྲི་སྒོམ་རས་པ། སེ་བན་རས་པ། རས་པ་ཞི་བ་འོད། ཁྱི་ར་རས་པ། ངན་རྫོང་རས་པ། བདེ་བ་སྐྱོང་། ར་རྫི་རས་པ་སྟེ་རས་པ་མཆེད་བརྒྱད། སྟོན་པ་དྲུག་ས་པ་བཅུ་གཉིས། བ་ཐོབ་མ་དྲུག་སོགས་བགྲངས་ཀྱིས་མི་ལང་བའོ། མཐར་དགུང་ལོ་གྱ་བཞི་བ་རབ་བྱུང་གཉིས་པའི་ཆུ་ཡོས ༡༡༢༣ལོར སྐུ་གཤེགས།
རྣལ་འབྱོར་རྟ་རྒྱུག་གི་མགུར་གླུ། ཞར་བཀོད་གཅིག་ཡོད།
ཕ་དྲིན་ཅན་མར་པའི་ཞབས་ལ་འདུད༎
ང་རང་ལུས་རི་བོའི་དགོན་པ་ན༎
བྱང་ཁོག་སྟོད་ཀྱི་ལྷ་ཁང་ན༎
ཟུར་གསུམ་སྙིང་གི་དབུ་རྩེ་ན༎
སེམས་ཀྱི་རྟ་ཕོ་རླུང་ལྟར་འཕྱོ༎
རྟ་འཛིན་ན་ཞགས་པ་གང་གིས་འཛིན༎
བརྟོད་ན་ཕུར་བ་གང་གིས་བརྟོད༎
ལྟོགས་ན་ཟས་སུ་ཅི་ཞིག་སྟེར༎
སྐོམ་ན་ཆུ་རུ་ཅི་ཞིག་ལྡུད༎
འཁྱགས་ན་རྭ་བ་གང་དུ་འཛུད༎
རྟ་འཛིན་ན་གཉིས་མེད་ཞགས་པས་འཛིན༎
བརྟོད་ན་ཏིང་འཛིན་གྱི་ཕུར་བས་བརྟོད༎
ལྟོགས་ན་བླ་མའི་གདམས་ངག་སྟེར༎
སྐོམ་ན་དྲན་པའི་ཆུ་རྒྱུན་ལྡུད༎
འཁྱགས་ན་སྟོང་ཉིད་རྭ་བར་འཇུག།
ཐབས་ཤེས་གཉིས་ཀྱི་སྒ་སྲབ་སྤྲད༎
འགྱུར་མེད་བརྟན་པའི་གོང་རྨེད་བཅུག།
སྲོག་རྩོལ་རླུང་གི་མཐུར་མདའ་བརྒྱུས༎
དེ་ལ་རིག་པའི་ཁྱེའུ་ཆུང་ཞོན༎
ཐེག་ཆེན་སེམས་བསྐྱེད་རྒྱ་རྨོག་གྱོན༎
ཐོས་བསམ་སྒོམ་པའི་འཇོལ་ཁྲབ་གྱོན༎
བཟོད་པའི་ཕུབ་ཆུང་རྒྱབ་ཏུ་ཁུར༎
ལྟ་བའི་མདུང་རིང་ལག་ཏུ་ཐོགས༎
ཤེས་རབ་ཀྱི་རལ་གྲི་བློ་ལ་བཏགས༎
ཀུན་གཞི་འཇམ་པའི་སྨྱུག་མ་ལ༎
ཁོང་ཁྲོ་མེད་པའི་འཁྱོག་ཅིག་བསྲང་༎
ཚད་མེད་བཞི་ཡི་སྒྲོ་ཞིག་བསྐྱོན༎
ཤེས་རབ་སྣོན་པོའི་མདེའུ་བཙུགས༎
སྟོང་པ་ཉིད་ཀྱི་གཞུ་མོ་ལ༎
ཐབས་ལམ་ཟབ་མོའི་ལྟོང་སྦྱར་ནས༎
ཟུང་འཇུག་ཡངས་པའི་འདོམ་ལ་འཇལ༎
མདའ་འཕེན་པ་རྒྱལ་ཁམས་ཡོངས་ལ་འཕེན༎
ཕོག་པ་དད་པ་ཅན་ལ་ཕོག།
ཤི་བ་ངར་འཛིན་གྱི་འགོང་པོ་ཤི།
དེ་ཕྱིར་དགྲ་ནི་ཉོན་མོངས་འདུལ༎
གཉེན་ནི་འགྲོ་དྲུག་སེམས་ཅན་སྐྱོང་༎
རྟ་རྒྱུག་ན་བདེ་ཆེན་ཐང་ལ་རྒྱུག།
སྙོག་ནི་རྒྱལ་བའི་གོ་འཕང་སྙོག།
དཀྱུས་སྨད་འཁོར་བའི་གཞི་རྩ་བཅད༎
དཀྱུས་སྟོད་བྱང་ཆུབ་སྐམ་སར་སླེབས༎
རྟ་དེ་ལྟར་བརྒྱུགས་པས་སངས་རྒྱས་ཐོབ༎
ཁྱེད་ཀྱི་སྐྱིད་དང་འདྲའམ་ལྟོས༎
འཇིག་རྟེན་གྱི་སྐྱིད་ལ་སྨོན་རྒྱུ་མེད།།
རས་པ་ཞི་བ་འོད་ལ་གནང་བའི་མགུར།
ཨ་མཚར་པོ་ཅི་འདྲ་ཚོར་བར་འདུག།
ཚིག་གིས་སྦོས་པའི་སྟོན་པ་དེ།།
རྩོད་དུས་ཁྲོམ་པ་བསྙོན་བསྙོན་བྱེད།།
ལབ་དུས་དྲེད་མོས་ལབ་ལབ་བྱེད།།
ཉལ་དུས་མི་ཆེན་ཉལ་ཉལ་བྱེད།།
འགྲོ་དུས་ཧོར་དམག་འགྲིམ་འགྲིམ་བྱེད།།
དེས་གེགས་དང་གོལ་ས་ཅི་ཆོད་ཨང་།།
སྤྱིར་ཁམས་གསུམ་སེམས་ཅན་སོ་སོར་གོལ།།
སོ་སོ་སྐྱེ་བོ་ལས་ལ་གོལ།།
ཉན་རང་ཞི་བའི་གནས་ལ་གོལ།།
དགེ་བཤེས་ཟ་བའི་ཐབས་ལ་གོལ།།
སྟོན་པ་ཚིག་གི་རྫོང་ལ་གོལ།།
དགེ་སློང་ཟ་རྒྱུའི་ནང་དུ་གོལ།།
རྣལ་འབྱོར་སྨྱོན་པའི་གསེབས་ཏུ་གོལ།།
སྒོམ་ཆེན་སྟོང་ལྟ་ཧད་པོས་གོལ།།
དེ་བཞིན་ཐམས་ཅད་གོལ་ཚབས་ཆེ།།
བུ་སྙན་བརྒྱུད་མཁའ་འགྲོའི་ཁ་རླངས་ལ།།
གོལ་ས་ཡོད་སྙམ་བདུད་ཡིན་ཏེ།།
རས་ཆེན་དྲུང་དུ་ཞི་བ་འོད།།
གེགས་ལ་ཤོར་ན་བསླུས་པ་ཡིན།།
དམར་ཁྲིད་ལག་ལེན་མངོན་སུམ་ལ།།
གོལ་ས་བྱུང་ན་བདེན་པ་མེད།།
བུ་གོལ་སའི་སློབ་གཉེར་མ་སེམས་པར།།
རྩེ་གཅིག་ཏུ་སྒོམ་དང་མྱུར་དུ་གསལ།།
རྩོམ་སྒྲིག་པ། འཕགས་མི།
