རང་ཉིད་གདམས་པའི་མགུར།
ཤར་སྐལ་ལྡན་རྒྱ་མཚོས་གསུངས།
རང་ཉིད་གདམས་པའི་མགུར།
ཤར་སྐལ་ལྡན་རྒྱ་མཚོས་གསུངས།
གྲོང་དུ་འདུག་ཡུན་རིང་ན་རང་མཚང་སྟོན།།
འདུག་ས་དབེན་པར་གྱིས་དང་རི་ཁྲོད་པ།།
ཟས་ནོར་བསོད་ནམས་ཆོས་ཀྱི་བར་ཆད་ཡིན།།
འདོད་ཆུང་ཆོག་ཤེས་གྱིས་དང་རི་ཁྲོད་པ།།
གྲོགས་ངན་བསྟེན་ན་རང་ཡང་ཇེ་ངན་འགྲོ།།
རྟག་ཏུ་གཅིག་པུར་སྡོད་དང་རི་ཁྲོད་པ།།
བྱང་ཆུབ་སེམས་དཔའ་གང་ན་བཞུགས་མི་ཤེས།།
མཐོང་མཐོང་ཀུན་ལ་མ་སྨོད་རི་ཁྲོད་པ།།
ལྐོག་ཏུ་གཞན་གྱི་མཚང་ནས་མ་འབྲུ་དང་།།
ལན་པོ་རང་ལ་འཁོར་རོ་རི་ཁྲོད་པ།།
གཞན་སྐྱོན་མ་རྟོག་རང་གི་སྐྱོན་ལ་རྟོག།
སྐྱོན་མཚང་རང་ལ་ཡོད་དོ་རི་ཁྲོད་པ།།
དམ་པའི་ཆོས་ལ་མི་ཟབ་གང་ཡང་མེད།།
དགོས་མེད་ཁ་སྡིག་མ་སོག་རི་ཁྲོད་པ།།
ཕྱག་དང་མཆོད་པས་ལུས་ཀྱི་སྒྲིབ་པ་འདག།
ཉིན་བཞིན་འབད་པར་ཞུས་དང་རི་ཁྲོད་པ།།
ཁ་ཏོན་བཟླས་པས་ངག་གི་སྒྲིབ་པ་འདག།
དོན་མེད་ལོང་གཏམ་སྤོངས་དང་རི་ཁྲོད་པ།།
བསམ་པ་བཟང་ན་ཅི་བྱས་ཆོས་སུ་འགྲོ།།
འདི་ལ་ནན་ཏན་གྱིས་དང་རི་ཁྲོད་པ།།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
