རྡོ་གྲུབ་ཆེན་བསྟན་པའི་ཉི་མའི་གསུང་མགུར།
རྡོ་གྲུབ་ཆེན་བསྟན་པས་ཉི་མའི་གསུངས།
རྡོ་གྲུབ་ཆེན་བསྟན་པའི་ཉི་མའི་གསུང་མགུར།
རྡོ་གྲུབ་ཆེན་བསྟན་པས་ཉི་མའི་གསུངས།
ཐང་ཆེན་པོ་སྔོ་ཕྱུག་དར་མ་རེད།།
མེ་ཏོག་གིས་གཡོགས་ན་དེ་བས་ལྷག།
སྟོན་དགུན་གྱི་ཐུགས་བབ་མ་བྱུང་ན།།
བ་མོས་བཀའ་བཀྱོན་ཞིག་ཕོག་ངོ་ཡོད།།
སྨན་ལོ་གཞོན་མཛེས་སྡུག་དར་བབ་རེད།།
གཞོན་ལྷ་ཕྲུག་གིས་འཁྱུད་ན་དེ་བས་མཛེས།།
སྔོན་ལས་ལ་ཐུགས་བབ་མི་འདུག་ན།།
འདུ་འབྲལ་གྱི་ཡོ་ལང་ཞིག་འབྱུང་ཏ་རེ།།
གཞོན་ཆུང་གི་གདོང་པ་ལྷ་བས་ཡག།
སྨན་སྐེད་མེད་ཀྱི་མིག་ཟུར་མདའ་བས་རྣོ།།
ལྷ་ཕྲུག་ཚོ་མདའ་རྩེས་རྨས་ཏ་རེ།།
མདའ་སྐེ་རྒྱན་དུ་བཞེད་ན་ཅི་དགྱེས་མཛོད།།
ཆུང་ལྷ་སྨན་གྱི་མཁུར་ཚོས་མཛེས་མོད་དེ།།
རྒན་ཁ་སྔོན་ཤ་ཚུགས་སྐྱི་རེ་བུང་།།
འདང་སྔ་མཐའ་ཕྱི་ཕུགས་ལ་མ་བཏང་ན།།
སེམས་འགྱོད་པའི་དུས་ཤིག་ཡོད་ལས་ཆེ།།
བན་དར་མའི་འཕྱོར་ཉམས་འཇའ་བས་ལེགས།།
སྨན་གཞོན་ནུའི་སྒེག་ཉམས་ལྷ་མོ་འདྲ།།
འཕྱོར་ཉེ་བའི་གྲ་སྡེབ་བཟང་མོད་ཀྱི།།
བྱི་ཕྲུག་གི་གྲགས་པ་སྙིང་ལ་གཟན།།
མཚན་སྨད་ཀྱི་དུས་སྟོན་སྐྱིད་མོ་དང་།།
ཉིན་ཕྱེད་ཀྱི་བཟའ་འཛིང་ཐལ་སྤུལ་མ།།
རེས་འཇོག་གི་བྱ་བ་མཐའ་རིང་པོ།།
བྱེ་(ཕྱེ)བྲལ་ལ་གཏོད་པའི་དུས་ཤིག་མཆི།།
ནུབ་གཅིག་གི་དགའ་བདེའི་གཡང་སློང་དང་།།
བསྐལ་ཆེན་གྱི་རང་སྡུག་ངུ་འབོད་མ།།
དེ་མཉམ་ཚོང་བྱེད་པའི་ཕོ་རྒོད་ཚོ།།
ཚོང་ཕམ་པོ་རེད་དམ་རྒྱལ་པོ་རེད།།
དེ་ཚོང་ཁེ་ལོན་ཞེས་དགོངས་ན་ནི།།
སོས་དལ་དུ་བཞུགས་ལོང་མི་གདའ་བས།།
ཚེ་གྲོགས་ལ་གཡབ་མོ་མྱུར་དུ་མཛོད།།
ཉིན་མཚན་དུ་ལྷ་སྨན་འཁྱུད་ལ་བཞུགས།།
ལྷ་ཞི་ཁྲོ་རབ་འབྱམས་སྒོམ་ནའང་།།
སྟོང་འདང་ཞིག་རེད་མོད་མཐོང་རྒྱུ་དཀའ།།
ད་བསྒོམ་ན་ལྷ་སྨན་བོ་ལི་སྒོམས།།
བྱིན་རླབས་ཤིག་དེ་ཡི་གསང་ན་ཡོད།།
བདག་སྲས་དང་གཞན་སྲས་བསྒོམ་ཅི་དགོས།།
སྲས་ལྷ་ཕྲུག་འདྲ་བ་ཞིག་བསྐྱེད་ན་ཆོག།
ད་བསྐྱེད་ན་རིགས་ཀྱི་ས་བོན་བསྐྱེད།།
དངོས་གྲུབ་ཞིག་དེ་ཡི་གསང་ན་ཡོད།།
ཧ་རཱ་ཨི་ཨཾ་ཨཱཿ
ཤར་ཉི་མ་སེར་པོའི་མངའ་ཞབས་ན།།
ལུས་ལང་ཚོ་དར་བབ་པདྨོ་མཆོག།
དགུང་ཟླ་བ་གཞོན་ནུའི་ཐོད་ཆིངས་ཤིག།
འདོགས་འདོད་ན་སྨྱོ་གླུ་ཚིག་གསུམ་ཉོན།།
ཧ་རཱ་ཨི་ཨཾ་ཨཱཿ
སྐད་མཐོན་པོ་འཁར་བའི་རྔ་ཀོར་ཡིན།།
དབྱངས་གདངས་དང་ང་ཞེས་ཟེར་མོད་དེ།།
སེམས་འཕྲེང་བའི་གླུ་གསུམ་མི་འཐེན་ན།།
ཡིད་སྐྱོ་བའི་ཉམས་ལ་སངས་དུས་མེད།།
ཧ་རི་ཨཱི་ཨཾ་ཨཱཿ
འབུ་བུང་བའི་གཤོག་རླུང་ཟི་ཟི་བོ།།
སྐྱིད་མེ་ཏོག་ཚལ་ན་སྙན་སྐད་དེ།།
སྡུག་བ་མོའི་གཉའ་ཤིང་འཁོར་བ་ན།།
ཚེ་ཕྱི་མའི་དུང་ཁར་རྐང་པ་འཇོག།
ཧ་ར་ཨཱ་ཨཾ་ཨཱཿ
བྱ་འཇོལ་མོའི་གྲེ་ལྕེ་བདེ་ལགས་ན།།
མ་ལྷོ་མོན་ནགས་མའི་ཁུ་བྱུག་དེ།།
སྙིང་བྱམས་པའི་ཤུགས་ཀྱིས་དྲན་དྲན་ཡང་།།
ཞལ་མཐོང་བ་མེད་པས་སྣང་ཤེས་སྐྱོ།།
ཧ་ར་ཨཱི་ཨཾ་ཨཿ
ཡུམ་སྙིང་ལ་སྡུག་པའི་མིའམ་ཅི།།
གླུ་པི་ཝཾ་ལེན་པས་ཅི་སྐྱོ་སྟེ།།
མ་སྐུ་དྲིན་ཆེ་ཞེས་མི་བརྗོད་ན།།
བུ་བདུད་དུ་འབབས་པའི་ནམ་ཟླ་ཡོད།།
ཧ་ར་ཨཱིཿ་ཨཾ་ཨ།།
བྲག་ཤེལ་དཀར་མཆོད་རྟེན་བཟང་ལེགས་ཏེ།།
གླུ་བྲག་ཆ་བླང་པ་རྫུན་དུ་ཆེ།།
མི་རྣམ་དཔྱོད་ཅན་གྱིས་བལྟས་ཙ་ན།།
རྩ་སོག་མ་བུས་པའི་ཐལ་བ་ཙམ།།
དྷཾ་ངི་ངི་ངི་ངི་ངི་ངི་ངི་། དྷཾ་ངི་ངི་ངི་ངི་ངི་།
དྷཾ་ངི་ངི་ངི་། དྷཾ་དྷཾ་དྷཾཾ། དྷཾ་དྷཾ་དྷཾ། ཨི་ཨི་ཨཱི།
ཞེས་ཟད་མི་ཤེས་པའི་སྙན་འགྱུར་ཀ་མ་ལའི་གདངས་ལས་དྲངས་སོ།།
དབྱངས་ཅན་སྐྱབས་ཀྱིས་ཡི་གེར་ཕབ།
རྩོམ་སྒྲིག་པ། མྱི་གསར་བ།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
