ཨ་མའི་ལྷན་པ།
རྩོམ་པ་པོ། གཟུངས་བྷ།
ཨ་མའི་ལྷན་པ།
གཟུངས་བྷ།
ངའི་ཨ་མ་ནི་ཆེས་སྤྱིར་བཏང་སྤྱིར་བཏང་གི་འབྲོག་མོ་ཕལ་བ་ཞིག་ཡིན།ཁོ་མོ་ནི་རྒྱལ་ཁབ་ཀྱི་ལས་བྱེད་པ་མིན་ལ་ལས་རིགས་གསར་གཏོད་བྱས་ནས་ཁེ་ལས་གཉེར་མཁན་དེའི་རིགས་ཀྱི་གྲས་ཀྱང་མིན།ཁོ་མོ་ནི་རྟ་ནོར་ལུག་གསུམ་གྱི་ལུས་དང་གྲིབ་མར་གཤིབ་ནས་མི་ཚེའི་བདེ་སྡུག་འབྲོག་ཐང་ནས་བསྐྱལ་མྱོང་མཁན་ཞིག་ཡིན།མི་སུ་ཞིག་ཡིན་ན་ཡང་ཨ་མ་དྲིན་མོ་ཆེ་ཞེས་ཕལ་ཆེ་བ་ཞིག་གིས་ཨ་མ་ལ་བསྟོད་པ་རྐྱང་རྐྱང་བྱེེད་གོམས་སུ་སོང་འདུག་པ་འདྲ།དོན་ལ་ཡང་གནམ་འོག་གི་ཨ་མ་སུ་ཞིག་ཡིན་ན་ཡང་བསྟོད་པ་བྱེད་འོས་པ་ཞིག་རེད་སྙམ།ཡིན་ན་ཡང་ང་ལ་མཚོན་ན།ཆུང་ངུའི་དུས་སུ་ཨ་མ་ལ་ཁོ་ཆད་སྐྱེས་མྱོང་བ་མ་ཟད་ཨ་མའི་ནུས་མེད་ཀྱིི་ཐོབ་ཐང་དེེེེ་ལ་ལེ་བདའ་དང་འཁང་ར་བྱས་མྱོང་།
སྔོན་ཆད་སློབ་ཆུང་གི་དགེ་སློབ་མང་བོ་ཞིག་གིས་ང་ལ་མཐོང་ཆུང་དང་འཕྱ་སྨོད་བྱས་མྱོང་།རྒྱུ་མཚན་ང་རང་སྒྲིག་ལམ་དང་འགལ་བས་མ་ཡིན་ལ་ཡིག་ཚད་མཐོན་པོ་མ་ལོན་པས་ཀྱང་མ་རེད།ཡིན་པ་ནི་ཨ་མའི་ནུས་མེད་ཀྱི་ལས་དབང་དེ་ལན་པ་རེད།ནམ་རྒྱུན་གྱི་འཚོ་བའི་ཁྲོད་དུ་སློབ་གྲོགས་ཚོས་གཅིག་གིས་གཅིག་ལ་འགྲན་པ་ལྟར་གོས་གང་ཡག་གྱོན་ནས་ཕན་ཚུན་ལ་ངོམ་སོ་ལྟ་བུ་བྱེད་དུས་སུ།ངས་ནི་སྟེང་དུ་ལྷན་པ་བརྒྱབ་པའི་གྱོན་པ་ངན་ངོན་ཇི་སྙེད་ཅིག་རེས་མོས་སུ་གྱོན་རྒྱུ་བྱུང་བས་རེད།སློབ་ཆུང་སློབ་གྲོགས་ཨུ་རྒྱན་གཙོ་བྱས་པའི་སློབ་ཆུང་སློབ་གྲོགས་དག་གིས་ངའི་གྱོན་པའི་སྟེང་དུ་ཆ་མི་མཚུངས་པའི་ལྷན་པ་བརྒྱབ་འདུག་ཅེས་བརྙས་མྱོང་བ་མ་ཟད།དགེ་རྒན་རྣམས་ཀྱི་ཁ་ཟུར་ཚིག་ཟུར་དུ་ཡང་མཐོང་ཆུང་གི་ཆ་རེ་ཞ་དང་ཞོར་དུ་མངོན་མྱོང་བས།ང་རང་དགེ་སློབ་ཚོའི་སྟེང་ལ་ཞེན་པ་ལོག་པ་དང་ཆབས་ཅིག་ཏུ་ཨ་མའི་སྟེང་དུ་འཚིག་པ་ཟོས་མྱོང་།བརྒྱ་ལ་ཕ་དྲིན་ཅན་ད་དུང་ཡང་མ་ཤི་གསོན་པོར་གནས་པ་ཡིན་ན།ངས་དེ་ལྟར་གཞན་གྱི་མཐོང་ཆུང་དང་འཕྱ་སྨོད་མྱངས་མི་དགོས་ཀྱང་སྲིད།གང་ལྟར་དེ་དུས་ཀྱི་གྱོན་པའི་སྟེང་དུ་ལྷན་པ་བརྒྱབ་མྱོང་བའི་འཚོ་བ་སྡུག་ལ་ཐུག་པ་དེས་ངའི་བྱིས་པའི་དུས་ཀྱི་ཕྱིར་དྲན་ལ་ཟུག་གཟེར་མི་དམན་པ་ཞིག་བསླངས་མྱོང་།
ལོ་རྒན་རིང་མོ་དྲུག་འགོར་མཐར་ང་རང་གཞི་ནས་སྔ་མོ་ཞིག་ནས་གཞའ་ན་སྙམ་པའི་སློབ་ཆུང་གི་འཚོ་བ་དང་ཁ་བྲལ་ནས།དུས་ཡུན་རིང་མོ་ཞིག་ལ་རེ་སྒུག་བྱེད་སའི་སློབ་འབྲིང་གི་སློབ་མ་ཞིག་ཏུ་གྱུར་སོང་།ཡིན་ན་ཡང་ཅང་མ་འགོར་བར་སློབ་འབྲིང་གི་ལོ་གསུམ་པོ་ཡང་མྱུར་དུ་མཇུག་རྫོགས་ན་སྙམ་པའི་སྣང་བ་ཞིག་སྐྱེས་སོང་།ཅིའི་ཕྱིར་དུ་ཞེ་ན།ཕོ་ལོ་བཅོ་ལྔ་བཅུ་དྲུག་སྐབས་ཀྱི་ན་ཚོད་ད་སོ་མ་སྨིན་བཞིན་པའི་ན་ཆུང་བའི་གསར་བུ་ཞིག་ལ་མཚོན་ན།རང་དང་ན་ཚོད་མཉམ་པའི་སློབ་གྲོགས་ཚོའི་ཁྲོད་དུ་ལྷན་པ་བརྒྱབ་པའི་གོན་པ་ཞིག་གྱོན་ནས་སོང་ན་ནི།རང་བརྩིའི་བསམ་པ་ལ་ཤུགས་རྐྱེན་ག་འདྲ་ཞིག་ཐེབས་སྲིད་དམ།ངོ་མ་ང་རས་ངོས་ནས་སློབ་འབྲིང་གི་འཚོ་བ་ནི་སློབ་ཆུང་གི་འཚོ་བ་ལས་ཀྱང་སྡུག་ལ་ཐུག་པ་ཞིག་རེད་མོད་ཀྱང་།སྐབས་དེའི་ངེད་མ་བུ་གཉིས་ཀྱི་འཚོ་བའི་ཆ་རྐྱེན་ཤིན་ཏུ་ཞན་སྟབས།ངས་དེ་ལྟར་མི་འདོད་པའི་འཚོ་བ་ཞིག་མི་རོལ་རང་རོལ་བྱུང་སོང་།
སློབ་འབྲིང་གི་དགེ་རྒན་རྣམས་ཀྱིས་ཀྱང་སྔོན་ཆད་ཀྱི་སློབ་ཆུང་སྐབས་ཀྱི་དགེ་རྒན་ཚོ་བཞིན་ཁ་ཟུར་ཚིག་ཟུར་དུ་མཐོང་ཆུང་གི་ཆ་རེ་ཞ་དང་ཞོར་དུ་མངོན་མྱོང་ལ།སློབ་འབྲིང་གི་སློབ་གྲོགས་ཚོས་ནི་སློབ་ཆུང་གི་སློབ་གྲོོགས་རྣམས་ཇི་བཞིན་ང་ལ་ཐད་ཀར་དུ་བརྙས་མ་མྱོང་ཡང་།ཐད་ཀར་མ་ཡིན་པའི་རྣམ་འགྱུར་དང་སྦྱོར་བ་ཁྲོད་ནས་ང་ལ་མཐོང་ཆུང་དང་སྣང་མེད་བྱས་མྱོང་།ད་ཆ་ཕྱིར་འདང་ཞིག་བརྒྱབ་ན།སློབ་འབྲིང་གི་སློབ་གྲོགས་རྣམས་ཀྱིས་ང་ལ་ཐད་ཀར་དུ་མི་བརྙས་དོན་ཤེས་ཐུབ་པ་འདྲ་སྟེ།དེ་ནི་ཁོ་ཚོ་ནི་སྐབས་དེར་ན་ཚོད་གཞོན་པའི་དུས་ལ་ཐོད་བརྒལ་བྱེད་སྒང་ཡིན་སྟབས་སློབ་ཆུང་གི་བྱིས་པ་བསམ་མེད་དེ་ཚོ་དང་བསྡུར་ཐབས་ཆེ་ཡོད།དྲང་མོར་བཤད་ན།སློབ་ཆུང་སྐབས་ཀྱི་སློབ་གྲོགས་ཚོས་ཐད་ཀར་བརྙས་པའི་བྱ་བྱེད་དང་བསྡུར་ན།སློབ་འབྲིང་གི་སློབ་གྲོགས་ཚོའི་ཐད་ཀར་མ་ཡིན་པའི་རྣམ་འགྱུར་འཁྱག་པ་དེའི་རིགས་ཀྱིས་ང་ལ་ལྷག་ཏུ་ནས་ཀྱང་རྨ་ཁ་མེད་པའི་ན་ཟུག་ཅིག་བསླངས་ཡོད་པ་ད་ལྟའི་ལོ་ཚོད་འདི་ལ་རྟོགས་ཡོང་།
ང་རང་མཐོ་འབྲིང་གི་སློབ་མ་ཞིག་ཏུ་གྱུར་བ་ནས་བཟུང་།ལྷན་པ་བརྒྱབ་པའི་གྱོན་པ་ཞིག་གོན་མ་མྱོང་ཟེར་ཆོག་ལ།དེ་ཡང་ངས་ལས་དབང་སྡུག་ཐུག་དེ་དང་ལེན་བྱེད་མ་འདོད་པ་དང་།ཡང་ན་ཨ་མ་དང་ཁ་རྩོད་ཆ་རེ་བརྒྱབ་པ་ལས་ཐོན་པའི་འཚོ་བའིི་འགྱུར་ལྡོག་ཡིན་ཟེར་ཆོག་པ་འདྲ་སྟེ།ཐེངས་ཤིག་ངས་ཨ་མ་ལ་འདི་ལྟར་ཕྱིར་ཁ་ལོག་ཚིག་ལོག་བརྒྱབ་མྱོང་།ཨ་མ།ཁྱོད་ནི་ཅི་འདྲའི་ཕ་མ་སྡུག་ཐུག་ཅིག་རེད།ང་རང་ནར་སོན་ནས་ལོ་ཚོད་འདི་ལྟ་བུ་ཞིག་ལ་ཐོན་ཡོད་ཀྱང་།ཁྱོད་ཀྱིས་ད་དུང་ཡང་ང་ལ་འདི་ལྟར་ལྷན་པ་བརྒྱབ་ཡོད་པའི་གྱོན་པ་གོན་དུ་འཇུག་སྲོལ་ཞིག་ཡོད་དམ།ངའི་ན་མཉམ་ལོ་མཉམ་གྱི་ན་གཞོན་ཚོའི་མིག་ནང་དུ་ང་རང་ཚད་ཐིག་ག་ཚོད་ཅིག་ཏུ་ཡོད་རྒྱུ་རེད།ངོ་མ་སྡུག་ཐུག་ཟེར་བ་རེད་ཅེས་ཐེ་ཚོམ་མེད་པར་བཤད་མ་ཐག་ཏུ།ཨ་མས་ཡུད་ཙམ་ལ་ཅི་ཡང་མི་ཟེར་བར་ངའི་གདོང་ལ་ཧད་དེ་བསྡད་ཅིང་མཐར་ཧ་ཅང་དམའ་བའི་སྐད་གདངས་ཤིག་ཕྱུང་ནས་དགོངས་དག་ཞུ་ཞེས་བཤད་རྗེས་མགོ་བོ་ནང་དུ་སྨད་ཙམ་བྱས།
དྲང་མོར་བཤད་ན།ཨ་མའི་སྙིང་རྗེའི་ཡུལ་དུ་གྱུར་བའི་དགོངས་ཡངས་ཞུ་སྟངས་དང་མགོ་བོ་སྨད་སྟངས་དེས་ངས་རང་གི་སྦྱོར་བ་ཚད་ལས་བརྒལ་ཡོད་པ་ལོས་ཤེས།རེད་ཀྱང་།དུས་དེ་ནས་བཟུང་ང་དང་ལྷན་པ་གཉིས་ཀྱི་བར་ལ་གྱང་ར་ཞིག་བརྩིགས་པ་ལྟར་ལྷན་པ་བརྒྱབ་པའི་གྱོན་པ་དག་ང་དང་རིང་དུ་གྱེས་པ་ནས་བཟུང་།ངའི་ནང་སེམས་ལ་སྤྲོ་སྣང་རྟ་ཡིས་མི་ཐེག་པ་ཞིག་སྐྱེས་པ་མ་ཟད།ད་ནི་ང་ཡང་སློབ་གྲོགས་ཚོ་དང་འདྲ་བར་གོས་གང་ཡག་གྱོན་པའི་སློབ་བུ་ཞིག་མིན་ན་གང་ཡིན་སྙམ་བྱུང་ལ།བལྟས་བལྟས་རིག་རིག་ལ་ང་ཡི་འཚོ་བའི་སྤུས་ཚད་མཐོར་འདེགས་བྱུང་སོང་བསམ་པའི་ཚོར་བ་ཞིག་གིས་ལུས་སེམས་གཉིས་ལ་ངར་ཤུགས་མི་དམན་པ་ཞིག་སྐྱེས་སོང་།
ཡིད་ལ་ཡང་མ་དྲན་པ་ཞིག་ལ་ང་རང་འཆུགས་ཡག་རེད།ང་རང་དམའ་འབྲིང་སྐབས་སུ་བློ་ལ་ཤིན་ཏུ་བབས་པའི་བུ་མོ་ཞིག་ཡོད་པ་དེའེི་མིང་ལ་མཁའ་འགྲོ་མཚོ་ཟེར།སྟེས་དབང་ངམ་སྟབས་ལེགས་པ་ཞིག་ལ་ངེད་གཉིས་མཐོ་འབྲིང་འགྲིམ་སྐབས་སུ་འཛིན་གྲྭ་མི་གཅིག་ཀྱང་སློབ་གྲྭ་གཅིག་ཡིན་ཙང་།ངས་སྔར་བཞིན་ཁོ་མོ་ཉི་མའི་ནང་ནས་རིག་ཐུབ་པ་མ་ཟད་མུན་ནག་ནང་ནས་ཀྱང་རིག་ཐུབ་ལ།སྐབས་སྐབས་སུ་ཡུན་རིང་སེམས་ལ་ཉར་བའི་བརྩེ་གཏམ་རེ་ཁོ་མོའི་རྣ་རྩར་བཞག་ཀྱང་།ཁོ་མོས་ང་ལ་དང་ལེན་མི་བྱེད་པས་མི་ཚད་ང་ཡི་རྣམ་རྟོག་མིན་ན་ནི་ཁོ་མོས་ང་ལ་མཐོང་ཆུང་གི་ཆ་རེ་ཡང་དང་ཡང་དུ་བསྟན་བྱུང་།ཅིའི་ཕྱིར་དུ་ཁོ་མོས་ང་ལ་དང་ལེན་མི་བྱེད་པས་མི་ཚད་ད་དུང་དེའི་སྟེང་ལ་མཐོང་ཆུང་གི་ཆ་རེ་མངོན་དགོས་པ་རེད་དམ།འོ་རེད་ཡ།ཁོ་མོས་ཧ་ལམ་ངའི་དམའ་འབྲིང་སྐབས་ཀྱི་གྱོན་པའི་ངོས་ཀྱི་ལྷན་པ་དེ་དག་དྲན་རྐྱེན་ང་ལ་དེ་འདྲའི་རྣམ་འགྱུར་འཁྱག་སིབ་སིབ་ཅིག་བསྟན་པ་མིན་ནམ།ཨ་མ་བཟས་ཡ།ཁྱོད་ཀྱི་ནུས་མེད་ཀྱི་ཐོབ་ཐང་དེས་ཐ་ན་ངའི་བརྩེ་དུང་གི་འཚོ་བ་ལ་ཡང་བར་ཆད་བྱས་སོང་ཨང་།
མཁའ་འགྲོ་མཚོ་དེེ་ལྟར་ང་ལ་མ་འཐོབ་རྐྱེན།ངའི་མཐོ་འབྲིང་གི་འཚོ་བ་ནི་མིག་སྐྲངས་བའི་སྟེང་ལ་ཁུ་ཚུར་དང་སེམས་སྐྱོ་བའི་སྟེང་ལ་ཁུ་ཡུག་ཏུ་གྱུར་སོང་།ཤུ་རེ་ཁོ།མི་ཞིག་གི་ཁྱིམ་ཚང་གི་རྒྱབ་ལྗོངས་ནི་མི་དེའི་མདུན་ལམ་ལ་མཚོན་ན་ཅི་འདྲའི་གལ་ཆེ་བ་ལ།ང་ཡང་སློབ་གྲོགས་ཚེ་རིང་ཚང་དང་འདྲ་བར་ཁྱིམ་ཚང་ཕྱུག་པོ་ཞིག་གི་བུ་རྒྱུད་ཡིན་ན་ནི་ལྷན་པ་བརྒྱབ་པའི་གྱོན་པ་དེ་དག་གོན་མི་དགོས་ལ།ལྷན་པ་མེད་པའི་འཚོ་བ་ཞིག་རོལ་ཡོད་ན་གཞན་གྱི་མཐོང་ཆུང་དང་བརྙས་བཅོས་ཀྱང་མྱངས་དགོས་ས་མ་རེད།ད་དུང་ངས་ཀྱང་སློབ་གྲོགས་གཞན་པ་ཚོ་དང་འདྲ་བར་སེམས་པ་ལྷོད་ལྷོད་དུ་སློབ་སྦྱོང་བྱས་ཆོག་ལ།དགའ་དགའ་བསོར་བསོར་ཏུ་བརྩེ་དུང་གི་སྣང་བ་ལ་ཡང་ཡན་ཆོག་པ་རེད།ཡིན་ན་ཡང་ཁྱིམ་ཚང་གི་རྒྱབ་ལྗོངས་དང་གོན་རྒྱུའི་སྟེང་གི་ལྷན་པ།གསལ་བོར་བཤད་ན་མེད་མུག་གི་འཚོ་བ་ཞིག་གིས་ངའི་ཡོད་ཚད་འཕྲོགས་སོང་།ངའི་ན་ཚོད་ཕྲ་བའི་དགའ་འབོད་འཕྲོགས་ཤིང་སློབ་སྦྱོང་གི་སེམས་ཤུགས་འཕྲོགས་སོང་།ངའི་སྣང་བའི་དར་སྐུད་སྣེ་ཡི་བརྩེ་དུང་འཕྲོགས་ཤིང་མི་སོ་སོ་ལ་མངའ་བའིི་རང་བརྩིའི་བསམ་པ་འཕྲོགས་སོང་།དེ་དང་དེ་ལྟ་བུའི་སེམས་འགྱུ་ཕྲ་མོ་དག་གིས་མཐོ་འབྲིང་གི་ལོ་གསུམ་རིང་གི་འཚོ་བ་ནི་དེ་ལྟར་སྡུག་སྣང་དང་བཅས་ཏེ་ཕར་བསྐྱལ་ཞིང་།མཐར་སེམས་ཤུགས་གཉོམ་པའི་བུ་ཆུང་ངས་མཐོ་འབྲིང་ལ་ཡང་རྒྱུགས་མ་འཕྲོད།
མཐོ་འབྲིང་ལ་རྒྱུགས་མ་འཕྲོད་རྐྱེན།ང་རང་སེམས་སུ་ཡུན་རིང་ཉར་བའི་སློབ་ཆེན་སློབ་མའི་དངོས་གཞིའི་འཚོ་བ་དེ་དང་རིང་དུ་བྲལ་ནས།མི་འདོད་བཞིན་དུ་ནང་ལོགས་ཀྱི་ལས་རིགས་ལག་རྩལ་སློབ་གྲྭ་ཞིག་ཏུ་སློབ་གཉེར་ལ་འགྲོ་ཁུལ་བྱས།དྲང་མོར་བཤད་ན།ནང་ལོགས་ཀྱི་ལས་རིགས་ལག་རྩལ་སློོབ་གྲྭ་ཞིག་ཏུ་ཉི་མ་གཏོང་དུ་སོང་བ་ཡིན།ལས་རིགས་ལག་རྩལ་སློབ་གྲྭ་དེ་རུ་དངོས་གཞི་ལ་རྒྱུགས་འཕྲོད་པའི་སློབ་གྲོགས་ཚོ་བཞིན་སློབ་ཆེན་ཚད་ལྡན་ཞིག་གི་སློབ་གསོ་མྱངས་ཐུབ་མེད་ཀྱང་སྲིད་མོད་ཀྱང་།དངོས་གཞི་རུ་རྒྱུགས་འཕྲོད་པའི་སློབ་གྲོགས་འཇམ་དབྱངས་ཚེ་བརྟན་གྱིས་བཤད་པ་ལྟར་ན།དངོས་གཞི་སློབ་མ་ཞེས་ཡ་མཚར་རྒྱུ་ཅི་ཡང་མི་འདུག་པ་མ་ཟད།སྔ་ས་ཞིག་ནས་དངོས་གཞི་སློབ་མའི་འཚོ་བ་འདི་འདྲ་ཞིག་ཡིན་པ་ཤེས་ན་ནི་ང་ཚོས་མཐོ་རྒྱུགས་ཀྱི་སྐར་མ་ལ་དེ་འདྲའི་སྣང་འཇོག་ཅིག་བྱས་ནས་ཅི་བྱེད།སྐར་མ་མཐོ་ཡང་དམའ་ཡང་ལས་རིགས་ལག་རྩལ་སློབ་གྲྭ་ཞིག་ཏུ་སོང་ན་དགའ་ས་རེད་ཟེར།
གཅིག་བྱས་ན་སློབ་གྲོགས་འཇམ་དབྱངས་ཚེ་བརྟན་གྱིས་བཤད་པའི་སྐད་ཆ་དེ་ལ་གནས་ལུགས་ཆེས་ཆེར་ལྡན་པ་འདྲ།གང་ལྟར་ང་ལ་མཚོན་ན་དངོས་གཞི་ལ་རྒྱུགས་མ་འཕྲོད་པ་ནི་སེམས་ཀྱི་ཁུར་བོ་ཆེན་པོ་ཞིག་ཏུ་གྱུར་ཡོད་ལ།དོན་དག་གང་ཞིག་ཡིན་ན་ཡང་དེའི་མཇུག་འབྲས་ནི་ཐད་ཀ་དང་ཐད་ཀ་མ་ཡིན་པའི་རྒྱུ་རྐྱེན་དག་ལ་འབྲེལ་བ་ཡོད་ཅིང་།དེ་ལྟ་ན་ང་རས་དངོས་གཞི་ལ་རྒྱུགས་མ་འཕྲོད་པ་ནི་ལྷན་པ་བརྒྱབ་པའི་གོན་པ་དེ་དག་དང་ཐད་ཀར་མ་ཡིན་པར་འབྲེལ་བ་ངེས་ཅན་ཡོད་སྙམ་ན།ང་རང་ཨ་མའི་སྟེང་ལ་ཁ་རོག་གེར་འཚིག་པ་ཟོས་མྱོང་བ་མ་ཟད།ཨ་མའི་ལྷན་པ་དེ་དག་ལ་ལྷག་ཏུ་ནས་ཀྱང་སྡང་བ་ལྟ་བུའི་སེམས་འགྱུ་ཞིག་མཚམས་མཚམས་སུ་ལས་རིགས་ལག་རྩལ་སློབ་གྲྭ་དེའི་ག་ས་གང་ནས་སྐྱེས་མྱོང་ཡང་།ད་ནི་འདི་དག་ཡོད་ཚད་རང་ལ་ཐེམ་པའི་ལམ་བུ་ཞིག་ཡིན་རྒྱུ་རེད་ཅེས་རང་གིས་རང་ལ་སེམས་གསོ་ཟེར་ན་འདྲ་ཡང་ན་རང་གིས་རང་ལ་གུ་ཡངས་མི་གཏོང་རང་གཏོང་རེད།
ལས་རིགས་ལག་རྩལ་སློབ་གྲྭ་འདིའི་ག་ས་གང་དུ་གཞོན་ནུ་ཕོ་མོ་ཟུང་གིས་ཆ་དང་ཆ་བྱས་ཏེ་བརྩེ་དུང་གི་བདེ་སྣང་ལ་རོལ་དུས།རང་བརྩིའི་བསམ་པ་ཞན་པའི་བུ་ཆུང་ང་ལ་དགའ་མཁན་གྱི་བུ་མོ་སུ་ཞིག་ཡོད་དམ།གལ་ཏེ་ང་ལ་ཚུར་དགའ་བའི་བུ་མོ་ཞིག་ཡོད་པའི་དབང་དུ་བཏང་ཡང་ང་རང་ཕར་ལ་འགྲོགས་པའི་ཡིད་ཆེས་ཤིག་མེད་པ་འདྲ།འདི་ཡང་མཐར་དེད་ན་ཨ་མའི་ལྷན་པས་བཞག་པའི་མཇུག་འབྲས་རེད།རྒྱུ་མཚན་བརྩེ་དུང་རོལ་མཁན་ཞིག་ལ་མཚོན་ན་རང་བརྩིའི་བསམ་པ་དང་ཡིད་ཆེས་མེད་མི་རུང་སྙམ་པས།སེམས་པ་སྙི་དྲགས་པའི་བདག་གི་བརྩེ་དུང་ལ་བུ་མོ་སུ་ཞིག་གིས་མིག་བརྡ་འཕེན་ནམ།ཡིན་ཕྱིན།མཐའ་མཇུག་ང་ཡི་སློབ་ཆེན་འཚོ་བ་ནི་དགའ་རོགས་གཅིག་ཀྱང་བསྒྲིགས་མ་ཐུབ་པར་ཁེར་རྐྱང་དུ་མཐར་ཕྱིན་དགོས་བྱུང་སོང་།
ད་ལྟ་ང་རང་སྤྱི་ཚོགས་ཞེས་པའི་སློབ་གྲྭ་ཆེན་མོ་དེ་འགྲིམ་བཞིན་ཡོད།སྤྱི་ཚོགས་སློབ་གྲྭ་ནི་ངོ་མ་གདུག་རྩུབ་དང་ལྡན་པ་ཞིག་རེད།སློབ་གྲྭ་འདིའི་ཁོར་ཡུག་ཏུ་ཁྱོད་ལ་ནུས་པ་དང་སྙིང་སྟོབས་མེད་ན་མི་ཆོག་པ་འདྲ།གལ་སྲིད་ཁྱོད་ལ་ནུས་པ་དང་སྙིང་སྟོབས་མེད་ན་སྤྱི་ཚོགས་སློབ་གྲྭ་ནས་ཁྱོད་རང་སྡུག་ལ་ཐུག་ནས་རང་སྲོག་ཀྱང་གཅོད་དགོས་པའི་དུས་ལ་ཁེལ་སྲིད།འདི་ནི་སྤྱི་ཚོགས་སློབ་གྲྭ་ཉིད་དངོས་ནས་གདུག་རྩུབ་ཆེ་བའི་སློབ་གྲྭ་ཞིག་ཡིན་པའི་ངོ་གདོང་རེད་ཟེར་ཐུབ་པ་འདྲ།
'ཁྱོད་ནིི་ཅི་ཡང་མི་ནུས་པའི་མི་ཞིག་རེད།ནམ་རྒྱུན་དུ་སེམས་སུ་ཅི་འདྲའི་ཁུར་བོ་ཆེན་པོ་ཞིག་ཁུར་ཡོད་པ་ལྟར་རྣམ་རིག་ཟེར་བ་ཞིག་མི་འདུག འདི་ལྟར་སོང་ན་སྤྱི་ཚོགས་འདིའི་སྒང་ནས་མུ་ནས་གྱོང་རེག་པ་ལས་ཁེ་ཞིག་ཇི་ལྟར་རེག'ཅེས་བཤད་སོང་།དེ་ལྟར་བཤད་མཁན་ནི་ང་ཡི་མ་སྤུན་ནུ་བོ་རྟ་མགྲིན་སྐྱབས་ཟེར་བ་ཞིག་རེད།ཁོས་དེ་ལྟར་བཤད་པ་ལ་ཡང་རྒྱུ་མཚན་མེད་པ་མིན་ཏེ་དངོས་ནས་དེ་འདྲ་ཞིག་རེད།སེམས་ཀྱི་ཁུར་བོ་ནི་ཨ་མའི་ལྷན་པས་བཞག་པའི་འདས་དོན་སྐྱ་བོ་དེ་དག་ཡིན་སྲིད།འོན་ཀྱང་མ་སྤུན་ནུ་བོ་རྟ་མགྲིན་སྐྱབས་ཀྱིས་ནི་ང་ལ་སེམས་བཟང་བཅངས་ནས་ཁ་ཏ་བྱས་པ་མ་ཡིན་པར།དེ་ནི་ཁོོས་ང་ལ་ཁ་ཏའི་ཚུལ་དུ་སྙིང་འཕྱས་གཏོང་སྟངས་ཤིག་རེད།འདི་དང་འདི་ལྟ་བུའི་སྙིང་འཕྱས་གཏོང་སྟངས་ནི་གདུག་རྩུབ་ཆེ་བའི་སྤྱི་ཚོགས་འདི་རུ་མང་མེད་ན་ཉུང་མེད།
སྤྱི་ཚོགས་ཀྱི་གནོན་ཤུགས་དང་གདུག་རྩུབ་ཇི་སྙེད་ཅིག་གི་མངར་སྐྱུར་ཁ་གསུམ་གྱི་བྲོ་བ་མྱངས་མྱངས་མཐར།ངས་ཅི་ཡིན་འདི་ཡིན་མེད་པར་དབུགས་རིང་རིང་མོ་རེ་མི་འཐེན་རང་འཐེན་བྱུང་སོང་ལ།ལྷག་པར་དུ་རང་ལ་མེད་ན་གླིང་ན་མེད་ཅེས་པའི་དཔེ་ལྟར་སྤྱི་ཚོགས་འདིའི་སྒང་ནས་ཁྱོད་ལ་རོགས་ར་བདའ་བྱེད་མཁན་གྱི་མི་ཤིན་ཏུ་ཉུང་བས་ན།ངས་ད་གཟོད་ཚོད་ཚོད་ལ་ཆུང་ངུའི་དུས་ཀྱི་ཨ་མའི་ལྷན་པ་དེ་དག་མིག་ལམ་དུ་ཤར་ནས་སེམས་ནང་དུ་སིམ་འགྲོ་བ་ལྟ་བུའི་སྣང་བ་ཞིག་བྱུང་།མ་གཞི་ཨ་མའི་ལྷན་པ་རེ་རེ་ནི་ཅི་འདྲའི་དྲོད་ཁོལ་དང་ལྡན་པ་ཏག་ཏག་རེད།ཨ་མས་བཟོས་པའི་ལྷན་པ་རེ་རེ་ལ་ཨ་མས་སེམས་ཤུགས་དང་ལུས་ཤུགས་ག་འདྲ་ཞིག་བཀོལ་ཡོད་དམ།ཨ་མས་ལྷན་པ་རེ་རེ་བཟོ་ཆེད་དུས་ཚོད་ག་ཚོད་ཅིག་བཏང་ཡོད་དམ།འདི་ལྟར་བསམ་ཞིང་བསམ་ན་ང་རང་རང་གི་སྔར་བྱས་ལ་འགྱོད་པ་སྐྱེས་ཤིང་ཨ་མ་ལ་ཉེས་མེད་ཁག་འགེལ་བྱས་འདུག་སྙམ་པའི་སྣང་བ་ཞིག་ཀྱང་འགོག་མེད་དུ་སྐྱེས་སོང་།
དེ་རིང་ང་རང་མཛེས་སྡུག་འགྲན་ཟླ་བྲལ་བའི་རྩྭ་ཐང་ཞིག་གི་ཆུ་འགྲམ་ན་ཡོད།ཆུ་འགྲམ་དུ་ད་དུང་ཆེད་དུ་མཐོ་ཚད་ན་མི་དར་མ་ཞིག་གི་གཟུགས་ཚད་དང་མཉམ་པའི་མེེ་ལོང་དྭངས་མོ་ཞིག་གྱེན་དུ་བརྩེངས་ཡོད་ལ།ང་རང་མེ་ལོང་དྭངས་མོ་དེའི་མདུན་ཐད་དུ་ལངས་ནས་རང་གི་གཟུགས་བྱད་ལ་ཞིབ་བལྟ་ཐེངས་ཤིག་བྱས་པའི་མོད་ལ་སྣ་ཁུང་དུ་སྐྱུར་ལངས་པ་ལྟ་བུའི་ཚོར་བ་ཞིག་ལུས་ཡོངས་སུ་ཁྱབ་ཅིང་།དེ་དང་མཉམ་དུ་དུས་ཡུན་རིང་མོ་ཞིག་ལ་བཏོན་མ་མྱོང་བའི་མིག་ཆུའི་ཐིགས་པ་འགའ་ཡང་མཁུར་ཚོས་སུ་འགྲིལ་དགོས་བྱུང་སོང་།རེད་ཡ།ད་ལྟ་བཞུར་བཞིན་པའི་མིག་ཆུའི་རྡོག་པ་འདི་དག་ནི་ང་རང་སྤྱི་ཚོགས་ལ་སྐྲག་ནས་ཤོར་བའི་མིག་ཆུ་མ་ཡིན་པར།ཨ་མའི་ལྷན་པ་ལ་བཅངས་པའི་བརྩེ་དུང་གི་མིག་ཆུ་ཡིན་ཟེར་ཆོག
མེ་ལོང་དྭངས་མོ་དེའི་ངོས་སུ་གོས་ལ་ལྷན་པ་བརྒྱབ་པའི་མི་ཞིག་ཤར་འདུག་པ་ནི་ངའི་ལྡོག་གཟུགས་རེད།ཤུ་རེ་ཁོ།ཨ་མ་དག་ཞིང་མ་ད་དུང་ཡང་མི་ཡུལ་འདི་རུ་ཡོད་རྒྱུ་ན།ངས་ཁོ་མོར་སྐུལ་མ་བྱས་ཏེ་ད་ལྟའི་དུས་ཀྱི་ང་ཡི་གཟུགས་གཞི་དང་ཚད་རན་པའི་ལྷན་པ་ཅན་གྱི་གོས་ཤིག་ཆེད་དུ་བཟོ་རུ་འཇུག་ཆོག་མོད་ཀྱང་།ད་ནི་ཨ་མས་སྔོན་ཆད་བཟོས་ཟིན་པའི་ལྷན་པ་ཅན་གྱི་གྱོན་གོས་ཤིག་ལུས་སུ་གྱོན་ནས་འདས་ཟིན་པ་ལ་འགྱོད་བཤགས་མི་བྱེད་རང་བྱེད་རེད།ད་ལྟ་ང་རང་ནར་སོན་ནས་ལྷན་པ་བརྒྱབ་ཡོད་པའི་གྱོན་པ་འདི་རྒྱབ་ནས་ཅུང་ཙམ་ཆུང་བའི་ཚོད་དུ་འདུག་ན་ཡང་།གྱོན་པ་འདི་རྒྱབ་ཏུ་གོན་ན་ངས་ཨ་མ་དག་ཞིང་མའི་དྲོད་ཁོལ་མྱངས་ཐུབ་པ་འདྲ།ངས་ཨ་མ་དྲིན་ཆེན་མའི་ཁབ་སྐུད་རེ་རེར་བརྒྱུས་པའི་ལུས་ཚེགས་སེམས་ཚེགས་གཉིས་ཀ་ཚོར་ཐུབ་པ་འདྲ།ད་ལྟ་ལུས་སུ་གྱོན་པའི་གོན་པ་འདི་མ་གཏོགས་གཞན་ལྷན་པ་བརྒྱབ་པའི་ཆུང་དུས་ཀྱི་གྱོན་གོས་དེ་དག་ཨ་མ་དག་ཞིང་མ་དང་ལྷན་དུ་ང་དང་རིང་དུ་གྱེས་འདུག་ཀྱང་།ལས་ཡག་པ་ཞིག་ལ་ལྷན་པ་བརྒྱབ་ཡོད་པའི་གྱོན་གོས་འདི་ངས་ངེད་ཚང་གི་'སྒམ་སྔོ་ལྡང་'ནང་ནས་རྙེད་ཐུབ་སོང་།
སློབ་ཆུང་དང་སློབ་འབྲིང་།མཐོ་འབྲིང་དང་སློབ་ཆེན་སྐབས་སུ་ངས་ཨ་མའི་ལྷན་པ་ལ་དེ་ལྟར་རྒྱང་བཀྱེད་བྱས་ཀྱང་།སྤྱི་ཚོགས་ཞེས་པའི་སློབ་གྲྭ་འདི་འགྲིམས་ནས་དུས་མཚམས་འདིར་ཐོན་པ་ན།ང་རང་ཨ་མའི་ལྷན་པ་ལ་སྔར་ཡོད་མ་མྱོང་བའི་དུངས་ཞེན་ཞིག་སྐྱེས་སོང་ལ།གཞེས་ནིང་ལོར་ཨ་མ་ཁོང་མི་ཡུལ་དང་ཁ་གྱེས་མེད་ན་ནི།དེ་རིང་མེ་ལོང་འདིའི་མདུན་དུ་ལངས་ཡོད་པ་ནི་ང་རང་གཅིག་པུ་མ་ཡིན་པར་ཨ་མ་དག་ཞིང་མ་ཡང་ང་དང་མཉམ་གཤིབ་བྱས་ནས་ལངས་ཡོད་པ་ཁོ་ཐག་ཡིན།གདུག་རྩུབ་ཆེ་བའི་སྤྱི་ཚོགས་འདིའི་ཁྲོད་དུ་རང་དང་མཉམ་གཤིབ་བྱེད་པའི་མི་བུ་ཤིན་ཏུ་ཉུང་བ་ལ་ཨང་།ཨ་མ་ལགས་ཁྱེད་རང་དེ་ལྟར་ད་ལྟ་དངོས་སུ་ང་ཡི་གམ་དུ་མེད་ཀྱང་།ཁྱེད་ཀྱིས་བཟོས་པའི་ལྷན་པ་ཅན་གྱི་གོན་པ་འདིས་ང་ལ་འདུག་རོགས་བྱེད་ཐུབ་པ་འདྲ།ཨ་མ་ལགས་དགོངས་དག་ཞུ།སྔོན་ཆད་ངས་ཁྱེད་ལ་རྒྱུ་མཚན་མེད་པའི་ལེ་བདའ་དང་འཁང་ར་བྱས་པ་ཚད་ལས་བརྒལ་ཡོད།ངས་ད་དུང་ཁྱེད་ནི་ངའི་མི་ཚེ་འདིའི་འཕེལ་རྒྱས་ཀྱི་བཀག་རྡོ་རེད་བསམས་མྱོང་།བལྟས་ནས་ཡོང་ན་ང་རང་དངོས་ནས་འཆུགས་འདུག
མི་རང་རང་བུ་ཞིག་མ་འཁྱོངས་ན་མདའ་ལི་མ་ཤིང་རྐྱ་སྒྲོ་མེད་ཡིན་ཅེས་པ་ལྟར།གཙོ་བོ་ང་རང་གིས་མ་འཁྱོངས་པ་མ་གཏོགས་ཨ་མའི་ལྷན་པ་ལན་པ་ག་ལ་ཡིན།དེ་དང་ལྡོག་སྟེ་ཨ་མའི་ལྷན་པ་ནི་ང་ལ་དཔུང་བ་མཉམ་གཤིབ་བྱེད་པའི་མཚོན་རྟགས་ཤིག་ཏུ་གྲུབ་འདུག་ལ།ཨ་མའི་ལྷན་པ་ནི་ང་ལ་བརྩེ་བ་ལྷད་མེད་བཅངས་པའི་དཔང་རྟགས་ཤིག་ཏུ་གྱུར་འདུག་པས།ངས་ཨ་མས་བཟོས་པའི་ལྷན་པ་ཅན་གྱི་གྱོན་པ་འདི་ལ་གཅེས་སྤྲས་བླ་ལྷག་ཅིག་བྱེད་ན་འདོད།མདོར་དེད་ན་ཨ་མའི་ལྷན་པ་ནི་སྤྱི་ཚོགས་ཀྱི་ནམ་ཟླ་འཁྱག་པ་དེའི་ཁྲོད་དུ་ང་ལ་དྲོད་ཁོལ་སྟེར་ན་བསམ་པའི་གྱོན་གོས་འབའ་ཞིག་ཡིན་ཡང་སྲིད།ཨ་མའི་ལྷན་པ་ཕུད་པའི་གཞན་སུ་ཞིིག་གིས་ང་ལ་རྒྱུ་མེད་རྐྱེན་མེད་དུ་བརྩེ་བ་ཡང་དག་ཅིག་སྟོན་སྲིད་དམ།།
ཨ་མའི་ལྷན་པ་ནི་ཁབ་དང་སྐུད་པར་བརྒྱུས་པའི་འདང་བརྩེ་རེད།།
ཨ་མའི་ལྷན་པ་ནི་ལུས་དང་སེམས་པ་གཤིབ་པའི་རྒྱབ་རྩ་རེད།།
ཨ་མའི་ལྷན་པ་ནི་དུས་དང་བར་སྣང་བརྒལ་བའི་ལྷག་བསམ་རེད།།
ཨ་མའི་ལྷན་པ་ནི་མ་དང་བུ་ཆུང་སྦྲེལ་བའི་རས་ཆ་རེད།།
ཞེས་སྤྱི་ལོ་2024ལོའི་སྤྱི་ཟླ་8པའི་28ཉིན་དང་།སྤྱི་ལོ་2024ལོའི་ཧོར་ཟླ་7པའི་25ཉིན་བྲིས་ཚར་ཞིང་གཟའ་ལྷག་པ་ཞིག་གི་ཕྱི་དྲོའི་དུས་ཚོད་གསུམ་དང་ཕྱེད་ཀ་ཡས་མས་རེད།འཇིག་རྟེན་གྱི་དོན་དག་ལ་ལ་ཞིག་དངོས་ནས་སྟེས་དབང་དུ་གྲུབ་པ་ཞིག་རེད།གུས་པས་བརྩམས་སྒྲུང་འདི་བྲིས་རྔ་རྫོགས་པའི་ཉི་མ་དེ་རིང་ཨ་མ་དང་ངེད་གཉིས་བར་ལ་དངོས་ནས་བརྩམས་སྒྲུང་འདི་དང་ཆ་འདྲ་བའི་ལས་དབང་ཞིག་གི་དབུ་ཁྱུད་འབྲི་འགོ་བརྩམས།ངོ་མ་བརྩམས་སྒྲུང་འདི་ཉིད་དེ་རིང་གི་ཨ་མ་དང་ངེད་གཉིས་བར་གྱི་དོན་དག་འདི་ལ་གཟས་ནས་བྲིས་པ་དང་ཨ་ན་མ་ན་རེད།དེ་ཡང་སྟབས་ལེགས་པ་ཞིག་ཡིན་པར་བྱོས།གང་ལྟར་ནམ་ཞིག་གནས་ཚུལ་འདི་གཞན་ལ་ཞིབ་ཏུ་བཤད་དགོས་པའི་དུས་ཤིག་ཡོད་ཀྱང་སྲིད།
རྩོམ་སྒྲིག་པ། འཕགས་མི།
མཐོང་གྲོལ་དྲ་རྩོམ་དག་རྩོམ་བདག་དང་དྲ་བདག་གིས་ཆོག་མཆན་མེད་པར་རང་དགར་མི་འཁྱེར་བར་མཁྱེན།
 |
|
Signature is customized by Netease
